Jenesis 40
40
Nuarin tas alupas 40.
1 Naheca aminjinaig nide vaine u Fero im naheca aminjinaig nareto o un anliin neom ipjin. 4 Et aminjinai rau a Josef. 5 Et asuptenaig nesgantas an numjeg ahnag urau. 20 Eh ehneijid et idivaig intas asuptecnaig o un. 23 Et eti imiehva nedo upene u Josef a naheca aminjinaig nide vaine.
1IS wat ti pan itac nitai iji igki, is auahas inliinmopoi natimarid an pece Ijipt a naheca aminjinaig nide vaine o un, im lep naheca ago nareto o natimarid, an pece Ijipt.
2Is edemda a Fero vai ohwat aheca o un erahki, naheca esjilid irai ilpu aheca aminjinaig nide vaine o un, im naheca esjilid irai ilpu aheca ago nareto o un.
3Is ati rau aien anliin neom ipjin, anliin neom u natimi alupas u ilpu eucsupo, an nuarin iyehki is amen iran a Josef.
4Is ati rau ehele Josef a natimi alupas u ilpu eucsupo, is aminjinaig rau aien: erus amen anliin neom ipjin arau an mesese is ethi.
5Erus umjeg ahnag arau ero an nepig is ethi, naheca aminjinaig nide vaine, im naheca ago nareto o natimarid an pece Ijipt, erus amen arau anliin neom ipjin; is eche numjeg ahnag o un is ethi, jam lep eche numjeg ahnag o un is ethi, is lep eteuc nesgantas iran is ero.
6Is wat lahlah an nuhialeg, is apan ehele rau a Josef, um alum rau, is has nesganimtarau arau.
7Is ahodaig ohwat aheca u Fero erahki aien, erus amen arau anliin neom ipjin u natimi alupas o un, um ika, Erau a uri aijaurau, et par has nesganimtamirau an nadiat inig inpig?
8Erus ika arau ehelen, Ecrus umjeg ahnag aijumrau, ja et eti eteuc tah par asuptecnaig nesgantas iran. Is ika ehele rau a Josef, Et ato a Atua ache par asuptecnaig nesgantas an numjeg ahnag u atimi: asuptecnaig ehelek aijaurau.
9Is asuptecnaig numjeg ahnag o un ehele Josef a naheca esjilid irai ilpu aheca aminjinaig nide vaine, um ika, Ek mun umjeg ahnag ainyak um ecetai vaine is ethi an nuhup unyak;
10is eseij inrai vaine iyehki: is lep algei nerin, um eteuc intisian; is lep amen iran nohwan meto:
11is amen nipjinitai u Fero an nikmak: kis leh nohwai vaine ainyak, um avise nidin anliin nipjinitai u Fero, kis lep alupai Fero nipjinitai ainyak.
12Is tas ehelen a Josef, um ika, Nesgantas iran nigki: Et, idivaig nadiat et eseij inran et eseij:
13etu wit ti pan itac nadiat, inyi eseij, etpu imiatidai nidjinum a Fero, um lep ati euc u nauritai unyum: napu alupai Fero nipjinitai o un aiek, et idivaig an nopan iyehki as wat upyi aminjinaig nide vaine o un aiek.
14Nau wit lep amen upene aiek, aktaktai nyak, um aiheuc vai nyak, um tas ehele Fero vai nyak, um atipagki nyak an neom inigki:
15eris idim ahneg nyak an pece u nup u Hibru: kis lep eti ago tah nitai ainyak, eris par imiati nyak anliin neom ipjin inigki vaig.
16Is wat atahaijeg a naheca esjilid irai ilpu aheca ago nareto, mika is upene nesgantas iran, is ika ehele Josef aien, Kis lep umjeg ahnag ainyak, is amen ijinies an nidjinik incat ahi is eseij:
17is amen an cat ijinjinies niji obotpot itai caig asega er ahen, incai Fero; ja eris caig inman an cat an nidjinik.
18Is tas a Josef um ika, Nesgantas iran nigki: Et idivaig nadiat et eseij incat et eseij:
19etu wit ti pan itac nadiat inyi eseij etpu imiatidai nidjinum a Fero, um aijcei euc an nauincai; erupu caig nohum inman.
20Is wat ti pan itac nadiat is ero wat lahlah iran is ethi, nadiat eris apos Fero iran, is auanetha alupas aien, incai ilpu aheca asega o un: is imiatidai nidjini naheca esjilid irai ilpu aheca aminjinaig nide vaine o un aien, im naheca esjilid irai ilpu aheca ago nareto, an nuhup u ilpu aheca o un.
21Is lep aminjinaig nide vaine a naheca esjilid irai ilpu aheca aminjinaig nide vaine; is alupai Fero nipjinitai aien:
22ja is aijcei naheca esjilid irai ilpu aheca ago nareto aien: is idivaig is asuptecnaig ehele rau a Josef.
23Ja is eti imiehva Josef a naheca esjilid irai ilpu aheca aminjinaig nide vaine, is ahnag iran aien.
Currently Selected:
Jenesis 40: VAO63
Highlight
Share
Copy
Want to have your highlights saved across all your devices? Sign up or sign in
Vanuatu Bible (Intas Etipup) © United Bible Societies, 1863, 2019.
