Jenesis 30

Nuarin tas alupas 30.

1 Et taig a Rejel va neti asvalav o un, um alupai Jekob Bilha naheca atahig o un ehgan. 5 Et apos Tan im Naftalai aien. 9 Et lep alupai yin Silpa naheca atahig o un eghan a Lia, et apos Cat im Eser aien. 14 Et almoi ohwai yihec a Ruben, et auanimtan natamnyu un vaig irai Rejel a Lia. 17 Et apos Isakar, im Sebulun, im Taina a Lia. 22 Et apos Josef a Rejel. 25 Et merit a Jekob mika yi apan an pece o un. 27 Et atapnes yin a Leban an tas etipup et eche. 37 Nedo arapakau u Jekob, et ikni itai vaig aien.

1IS wat ato a Rejel mika is eti apos tah inhalav imi Jekob aien, is auatitai vai etwan a Rejel, um tas ehele Jekob, um ika; El et eti alupai nyak inhalav aiek, ekpu mas ainyak.

2Is ehniv a Jekob vai Rejel, um ika; Ek eti idivaig Atua ainyak, et eti alupai euc ilpu halav aien.

3Is ika a Rejel, Almoi Bilha naheca atahig unyak, namu apan ehelen aiek; etpu apos ilpu halav imi nyak aien, ekpu asvalav iran ainyak.

4Is alupai yin Bilha naheca atahig o un aien ehgan: is apan ehelen a Jekob.

5Is opoc a Bilha, um apos inhalav atamaig imi Jekob.

6Is ika a Rejel, Is aktaktai nyak a Atua, um atahaijeg intas unyak, um alupai nyak inhalav atamaig: va nitai inigki is anvi nidan aien par ika Tan, (Neruvaig atoh).

7Is lep opoc a Bilha naheca atahig u Rejel, umlep apos inhalav atamaig imi Jekob.

8Is ika a Rejel, Kis imiisjis emda ehele etwak ainyak, ja ek esjilid ainyak: is anvi nidan aien par ika Naftalai, (Nimiisjis emda).

9Is wat ato a Lia mika is eti fi asvalav aien, is leh Silpa naheca atahig o un aien, um alupai Jekob yin ehgan.

10Is apos inhalav atamaig imi Jekob a Silpa naheca atahig u Lia.

11Is ika a Lia, Et ham namen upene: is anvi nidan aien par ika Cat, (Namen upene).

12Is lep apos inhalav atamaig imi Jekob a Silpa naheca atahig u Lia.

13Is ika a Lia, Ek mun ahesmoij ainyak, erupu lep ika a ilpu takata ek mun ahesmoij ainyak: is anvi nidan aien par ika Eser, (Nahesmoij).

14Is apan a Ruben an nopan meto u hwiit, um almoi ohwai yihec an lelitai, um imiapan ehele Lia risin. Is ika a Rejel ehele Lia, Aiheuc vai nyak aiek, um alupai nyak ohwai yihec u inhal unyum.

15Is ika ehelen aien, Et eti upene nedo unyum, as atipagki natamnyu unyak aiek; nai lep merit aiek inleh vaig ohwai yihec u inhal unyak. Is ika a Rejel, Oʼo, etpu amen ehelum aien an nepig inigki vai ohwai yihec inhal unyum.

16Is wat ahes an lelitai a Jekob an jupura, is apan a Lia par aubilid yin, um ika, Namu apam ehelek aiek; ek mun idim auanimtam ainyak irai ohwai yihec u inhal unyak. Is amen ehelen aien an nepig iyehki.

17Is atahaijeg intas o Lia a Ihova, is opoc aien, um apos inhalav atamaig fiftd imi Jekob.

18Is ika a Lia, Et alupai nyak nimtan unyak a Atua, va nedo unyak, nikavaig, kis ati naheca atahig unyak ainyak ehele natamnyu unyak is anvi nidan aien par ika Isakar, (Et imtan aien).

19Is lep opoc a Lia, um apos inhalav atamaig siktd imi Jekob.

20Is tas a Lia, um ika, Et mun ago nedo upene vai nyak a Atua; etpu imiacitak nyak a natamnyu unyak, kis apos inhalav atamaig is siks imi yin ainyak: is anvi nidan aien par ika Sebulun, (Nimiacitak).

21Is apitac aien um apos inhalav atahig, um anvi nidan par ika Taina.

22Is imiehva Rejel a Atua, is lep atahaijeg intas o un a Atua, um ika yi asvalav aien.

23Is opoc aien, um apos inhalav atamaig; um ika, Et mun atipagki nohocred unyak a Atua:

24is anvi nidan aien par ika Josef, (Lep alupai); um ika, Etpu lep alupai nyak inhalav atamaig inyi ethi a Ihova.

25Is wat apos Josef a Rejel, is ika ehele Leban a Jekob, Namu adcijaig nyak aiek, mika ki apan ainyak umak, an pece unyak.

26Namu alupai nyak ilpu ehnaa unyak aiek, im ilpu hal unyak, kis aheca unyum ainyak vai ra, umadcijaig nyak; na ato aiek nauanaheca unyum kis ago ainyak.

27Is tas ehelen a Leban, um ika, Namu aiheuc vai nyak aiek, um amen ehelek: ek ato ainyak mika is acis yi alwai nyak a Ihova vai euc.

28Is ika aien, Namu asaig nimtan ehelek aiek, ekpu alupai euc ainyak.

29Is ika ehelen a Jekob, Na ato aiek, nikavaig, kis aheca upene unyum ainyak, um aminjinaigupene niji itai eklim edo irai pece unyum.

30Kis wat ham ainyak is eti elpat niji itai unyum, ja et mun ahinag acen an nopan inig; et mun acis yi alwai euc a Ihova va nauritai unyak: ekpu lep ikni itai ainyak vai ilpu hal unyak an nahopan?

31Is ika a Leban, Ekpu alupai euc inhe ainyak? Is ika a Jekob, Namu jim alupai nyak tah nitai aiek: el et ago nedo inigki vai nyak aiek, ekpu lep aminjinaig niji itai eklim edo irai pece unyum ainyak, um asgi ra.

32Namu atga aiek inpig irai iblai iji itai eklim edo irai pece asega unyum, um iknipagki ehele ra arakei asega, im picadpicad, im nilmaicap irai siip, im picadpicad, im arakei irai anin: nimtan imi nyak nigki.

33Etu wit yetpam nimtan imi nyak an nuhup unyum an taka opan, uhpu ato nedo atoh unyak: el et amen ehelek tah nanin et eti arakei, um eti picadpicad, ka tah siip et eti ilmaicap, inyi idivaig nitai eris ahneg.

34Is tas a Leban, um ika, Et idim upene intas unyum, inyi idim uco.

35Is iknipagki nanin atamaig ugnyitugnyit a Leban an nadiat iyehki, im picadpicad, im nanin atahig arakei asega, im picadpicad, (nanin asega is ahi niji ualin iran,) im nilmaicap asega irai siip, um ikni ra ehele ilpu halav atamaig o un.

36Is ati nuarin nefalaig a Leban er atga iran ira adiat et dri, an niblan im Jekob: is lep asgi niji itai eklim edo irai pece u Leban is eled a Jekob.

37Is lucsei auiya mat im nauiugnyabod, im nauihau a Jekob; um ahosjugnit, mika yi ateucrad nahi ira auicai.

38Is aduwi nauicai iji igki is ahosjugnit iran aien an nuhup u itai eklim edo irai pece irai iji elcau is amen inwai nan eris wat apan ara par umwig, mika eri lep ahei ra an napan ura par umwig.

39Eris ahei niji itai eklim edo irai pece an nuhup u nauicai; va nitai inigki eris ugnyitugnyit, um arakei, um picadpicad a ilpu hal ura.

40Is ahaig nakli siip im nakli nanin a Jekob, um iknipagki ira ra niji itai eklim edo irai pece eris ugnyitugnyit ara, im naklai asega irai iji itai eklim edo irai pece u Leban; ja is echim ikni is eche niji itai eklim edo irai pece iji ehki imi yin aien, jam eti ikni ra ehele iji itai eklim edo irai pece u Leban.

41Eris wat ahei niji itai eklim edo irai pece emda, is ikni nauicai an nuhup ura a Jekob u inwai, mika eri ahei ra an nuhup u auicai.

42Ja eris wat auatialidi niji itai eklim edo irai pece is eti ikni aien: va nitai inigki is auatialidi niji itai eklim edo irai pece u Leban, jam emda u Jekob.

43Is atimi ikni itai esjilid aien, is ohuun niji itai eklim edo irai pece is ahinag aien, im ilpu aheca atamaig, im ilpu aheca atahig, im kamela, im togke.

Currently Selected:

Jenesis 30: VAO63

Highlight

Copy