Jenesis 29

Nuarin tas alupas 29.

1 Et yetpan nehpanwai Heran a Jekob. 9 Et ecet Rejel aien. 13 Et alaan a Leban. 18 Et asan tas etipup a Jekob vai Rejel. 23 Er ahiyek yin vai Lia. 28 Et lep leh Rejel aien mika yi ehgan, um auanaheca vai yin irai mesese et seven et eche. 32 Et apos Ruben a Lia, 33 im Simeon, 34 im Livai, 35 im Juta.

1IS atga o un a Jekob, um apan an pece u nup an ridjai o un.

2Is eas aien, um ecetai nehpan-wai an lelitai, eris asjeuc o un inpak irai siip is eseij im natimi asgi siip; eris alumai siip inwai an nehpanwai iyehki. Is lep amen inhat alupas an nehpanwai.

3Eris wat asjapicnaig eahki siip ura a ilpu atimi asgi siip asega, eris atipagki inhat an neucsen nehpanwai ara, um alumai siip, um lep atapnes nehpanwai an hat.

4Is tas ehele ra Jekob, um ika. Ak ilpu etwak, akis ahes eda aijaua? Eris ika ara, Ecra up u Heran ai-jama.

5Is aliodai ra aien, um ika, Eka ato Leban aijaua mapoi Nehor, ka oʼo? Eris ika ara, Maiya, ecra ato yin aijama.

6Is ika ehele ra aien, Et ceh-cehe aien, ka oʼo? Eris ika ara, Maiya, et cehcehe aien: et lep imiaparn siip a Rejel inhalav atahig o un.

7Is ika aien, Et idim adiat an nopan inig, um eti opan asjapic-naig itai eklim edo irai pece: aku-mu alumai siip aijaua, um apan, um asgi ra,

8Eris ika ara, Etelika vai cama an nopan inig, ja uhu wit asjapicnaig siip asega, uhpu atipagki inhat an neucsen nehpanwai; ecrupu alumai siip aijama.

9Is wat tas ehele ra aien, is imi-apam siip u etman a Rejel: is asgi siip o un aien.

10Is wat ecet Rejel inhalav atahig u Leban natamaig irai risin a Jekob, im lep siip u Leban natamaig irai risin, is apan ubutpotet a Jekob, um atipagki inhat an neucsen nehpanwai, um alumai siip u Leban natamaig irai risin.

11Is aijumnyi Rejel a Jekob, um taig ijinies.

12Is asuptecnaig ehele Rejel a Jekob mika, is ohwanig u etman aien, im inhal u Ribeka: is athut pan a Rejel um asuptecnaig ehele etman.

13Is wat atahaijeg intas vai Jekob a Leban, inhal u natahig iran, is athut pan aien, um aubilid Jekob, um ablaijiraig pam yin, um aijumnyi yin, um imiapan yin anliin neom o un. Is asuptecnaig niji itai asega va napam o un ehele Leban aien.

14Is tas ehelen a Leban, um ika, Na idim esgak aiek. Is amen ehelen aien an mohoc is ethi.

15Is tas ehele Jekob a Leban, um ika, Na ohwanig unyak aiek, ja napu eti tup aheca unyak aiek; namu asaig ehelek aiek nimtan imi euc.

16Is eteuc inhalav atahig is ero o Leban: nidai inmeto Lia, im nidai inharei Rejel.

17Is auatialidi nesganimtai Lia; ja is upene nohui Rejel, um eklim upene nesganimtan.

18Is aiyu inliinmopoi Jekob vai Rejel; is ika aien, Ekpu aheca unyum ainyak nai mesese inyi seven vai Rejel inhalav atahig unyum inharei.

19Is ika a Leban, Et upene irak mika ki alupai euc yin ainyak ehgam, um eti alupai intak atimi: namu amen ehelek aiek.

20Is aheca vai Rejel a Jekob irai mesese is seven; ja is idivaig nadiat is eti elpat iran, va naiyu u inliinmopon vai yin.

21Is tas a Jekob ehele Leban, um ika, Et mun ahni nopan nauanaheca unyak, namu alupai nyak ehgak aiek mika yi amen ehelek aien.

22Is asjapicnaig atimi asega au nuarin pece iyehki a Leban, um auanetha incara.

23Is wat epig, is leh Lia inhal o un aien, um imiapan yin ehelen; is amen ehelen aien.

24Is alupai Lia inhalav atahig o un a Leban Silpa naheca atahig o un, mika yi aheca o un aien.

25Is wat lahlah an nuhialeg, is ecet Lia a Jekob; is ika ehele Leban aien, Nev edo inigki na mun ago aiek vai nyak? kis aheca unyum ainyak vai Rejel; na a uri aiek par ago nedo efaifa vai nyak?

26Is ika a Leban, Er eti ago nedo inigki an pece unyima, um uhup um alupai inharei, ja par apitac inmeto.

27Namu aminjinaig wiik va natmehgan u nat igki aiek; ja napu lep leh nat naico aiek, va nauanaheca unyum napu lep aheca unyak aiek wai mesese inyi seven.

28Is ago nedo inigki a Jekob, um aminjinaig wiik va natmehgan u Lia: is lep alupai yin Rejel aien inhalav atahig o un ehgan.

29Is alupai Rejel inhalav atahig o un a Leban Bilha naheca atahig o un, mika yi aheca o un aien.

30Is lep amen ehelen a Rejel, is aiyu alupas inliinmopon aien vai Rejel, ja is aiyu tintin vai Lia; is lep aheca o un aien irai mesese is seven.

31Is wat almoi a Ihova mika is esjum a Jekob vai Lia, is ika aien yi asvalav aien: ja is eti asvalav a Rejel.

32Is opoc a Lia, um apos inhalav atamaig, um anvi nidan par ika Ruben, (Almoi inhalav atamaig): is ika aien, Is idim almoi nohocred unyak a Ihova; etpu lep aiyu inliinmopoi natamnyu unyak vai nyak.

33Is lep opoc aien, um apos inhalav atamaig; um ika, Is ato a Ihova mika eris esjum vai nyak, va nitai inigki et mun lep alupai nyak inhalav atamaig inigki aien: is anvi nidan aien par ika Simeon, (Nato nohocred).

34Is lep opoc aien, um apos inhalav atamaig; um ika, Etpu idim upene inliinmopoi natamnyu unyak vai nyak an nopan inig, kis apos inhalav atamaig is eseij imi yin ainyak: va nitai inigki eris anvi nidan par ika Livai, (Napol vaig).

35Is lep opoc aien um apos inhalav atamaig: is ika aien, Ekpu idim imiahpas Ihova ainyak: va nitai inigki is anvi nidan aien par ika Juta, (Nimiahpas); is eti fi lep asvalav aien.

Currently Selected:

Jenesis 29: VAO63

Highlight

Copy