Jenesis 28

Nuarin tas alupas 28.

1 Et asan tas acis yi alwai Jekob a Aisak, um abrai yin mika yi apan Petaneram. 6 Et leh Mahelad inhalav atahig u Ismeel a Isa mika yi ehgan. 10 Et ahuumtidec a Jekob um ecetai nefalaig. 18 Inhat u Bedel. 20 Intas upyi asaig u Jekob.

1IS ahlaig vai Jekob a Aisak, um acis yi alwai yin, um ated yin, um ika ehelen, Namu jim leh ehgam aiek irai ilpu atahig an pece Kenan.

2Atidai aiek, um apan Petaneram, an nimnim u Beduel etmai risum; um leh ehgam eahki irai ilpu halav atahig u Leban natamaig irai risum.

3Etmu acis yi alwai euc a Atua emda acen, um ika an asvalav aiek, mika eri ahinag acen a ilpu mapoin;

4um atijai iram intas acis yi alwai Ebraham im lep irai ilpu mapom; mika an ohuun inpece inig aiek na amen iran aiek, is alupai Ebraham a Atua.

5Is abraig pan Jekob a Aisak: is apan Petaneram aien ehele Leban, inhal u Beduel nup u Siria, natamaig irai Ribeka, risi Jekob im Isa.

6Is ato a Isa, nikavaig, is acis yi alwai Jekob a Aisak, um abrai yin mika yi apan Petaneram aien, um leh ehgan eahki; um lep ated yin, an nacis yi alwai yin vaig, um ika, Namu jim leh ehgam aiek irai ilpu atahig an pece Kenan;

7um lep ato mika is atahaijeg intas o etman im risin a Jekob, um apan alaig Petaneram;

8is wat ecetai a Isa, nikavaig, is esjum vai ilpu takata an pece Kenan a Aisak etman;

9is apan a Isa ehele Ismeel inhal u Ebraham, um leh Mahelad ehgan is halav atahig u Ismeel aien, im natahig irai Nibejod; ja is upyi leh ehgan is ero aien.

10Is ahes Biersiba a Jekob, um apan alaig Heran.

11Is yetpan an nuarin is ethi aien, an nete u nagesega, um amen eahki an nepig; is leh inhat aien an nuarin iyehki, um ati uri nilaig, um asjeuc, um umjeg.

12Is umjeg ahnag aien, um ecetai nafurafeta eris aduwi an nobohtan, is lep taujai nilpun an nohatag: eris aridjai iran a ilpu agelo o Atua, um lep asuol se.

13Is lep aiji ubutpotet ehelen a Ihova, um ika, Ek Ihova ainyak, Atua u Ebraham etpom, im Atua u Aisak: ekpu alupai euc ainyak, im ilpu mapom, inpece inig na asjeuc iran aiek.

14Erupu idivaig inmah an nobohtan a ilpu mapom, erupu terimterim ara um apan suko, im jeko, im poko, im pahaiko erupu lep ahesmoij a nup urai iji pece asega vai euc, im lep vai Mapom.

15Ek idim amen ehelum ainyak par aminjinai euc irai iji uarin asega an apan iran aiek, ekpu lep imiapam euc an pece inigki ainyak; inki idim eti udei euc ainyak, um imihum pan an nopan iyehki ekpu ehneijid ainyak intas inig ek mun asaig ehelum ainyak.

16Is aiji a Jekob va numjeg o un, um ika, Et idim amen a Ihova an nuarin inigki; ja ek mun eti ato ainyak.

17Is imtitaig aien, um ika, Et itap esjilid nuarin inigki! et idim neom u Atua nigki, im lep neucse neom an nohatag.

18Is auroauro a Jekob um atidai an nuhihialeg, um leh inhat iyehki is ati aien um ilaig iran, um aduwi um atladwi jai narakei iran.

19Is anvi nidan nuarin iyehki aien par ika Bedel: nidan inmaliyum iyehki itu acen Lus.

20Is asan tas aktit o un a Jekob, um ika, Vaig inig nikavaig, etpu amen ehelek a Atua, um aminjinaig nyak an nefalaig inig ek atga iran ainyak, um alupai nyak nitai caig incak, im nepelumai aso nyak.

21Um imiadumoij pan nyak an nimnim n etmak an nigpa; etpu idim Atua unyak a Ihova:

22inyi eom u Atua inhat inigki, ek mun aduwi ainyak va nitai asjaaicnaig: ekpu lep ahtai nuarin tend imi euc ainyak irai iji itai asega napu alupai nyak aiek.

Currently Selected:

Jenesis 28: VAO63

Highlight

Copy