Jenesis 25

Nuarin tas alupas 25.

1 Ilpu hal u Ebraham irai Ketura. 5 Ar ahaig naga o un. 7 Numoh vaig o un, im inmas vaig. 12 Ilpu hal u Ismeel. 17 Numoh vaig o un, im inmas vaig. 19 Et eti asvalav a Ribeka, ja et alaigaheni vai yin a Aisak. 22 Erau ehtauo jipe an nipjinetgan ahwat hal o un. 24 Napos vaig u Isa im Jekob. 27 Erau eche arau. 29 Et ahtai natimi alupas o un a Isa.

1IS lep aketo a Ebraham um leh ehgan, nidan Ketura.

2Is apos imi yin Simran aien, im Joksan, im Mitan, im Mitian, im Isbak, im Sua.

3Is apos Siba im Titan a Joksan. Eris ahes ehele Titan a nup Esur, im nup u Litusi, im nup u Liumi.

4Eris ilpu hal u Mitian ara sji igki: nan, Ifa, im Ifer, im Henok, im Abaita, im Eltea. Eris ilpu mapoi Ketura ara sji igki asega.

5Is alupai Aisak niji itai asega o un a Ebraham.

6Ja is ahtai niji itai tup ahtai a Ebraham imi ilpu hal u ohwat ehnaa o un, ja is abrai ra aien mika eri udei Aisak inhal o un ara, um aijujai an pece an ridjai o un an nopan umoh o un.

7Is eteuc inmesese is wun huntret im sevente faiv (175) irai Ebraham, is umoh aien irai mesese iji igki.

8Ja is mas a Ebraham, an nefatimi o un, is ahinag inmesese iran; eris ati yin ehele ilpu retpon.

9Erus atelmoi yin ahwat hal o un Aisak im Ismeel an mun nij Makpila, an nuarin uobohtan u Ifron inhal u Sohar nup u Hed, ubutpotet pan Mamri;

10is auanimtan nuarin nobohtan iyehki a Ebraham imi nup u Hed: eris atelmoi Ebraham eahki im lep Sera ehgan.

11Is wat mas a Ebraham, is acis yi alwai Aisak inhal o un a Atua; is amen a Aisak ubutpotet u nehpanwai Laheroi.

12Ilpu hal u Ismeel inhal u Ebraham ji igki, is apos imi Ebraham a Hecar nup Ijipt, naheca atahig u Sera:

13nidai ilpu hal u Ismeel ji igki, is idivaig eris aged ra: nan, Nibejod inmeto; im Kitar, im Atbiil, im Mibsam,

14im Misma, im Tuma, im Masa,

15im Hetar, im Tima, im Jitur, im Nefis, im Ketema:

16ilpu hal u Ismeel ji igki, nikavaig, nidara ji igki irai iji maliyum ura, im lep irai iji imnim ura; eris ilpu atimarid is twelv ara, is idivaig niji elcau ura.

17Is eteuc inmesese is wun huntret im dirte seven (137) irai Ismeel: ja is auatialidi aien, um mas; eris lep ati yin ehele ilpu retpon.

18Eris amen ara Havila um yetpan Sur, ubutpotet pan Ijipt, an nefalaig yetpan Asiria: is mas aien an nuhup u ilpu etwan asega.

19Intas va Aisak inhal u Ebraham nigki: is apos Aisak a Ebraham:

20is wat eteuc inmesese is forte irai Aisak, is leh Ribeka aien ehgan, inhalav atahig u Beduel nup u Siria is amen Petaneram aien, is lep atahig irai Leban nup u Siria aien.

21Is eti asvalav aien, ja is ugyi Ihova a Aisak vai ehgan: is adai intas o un a Ihova, is um opoc a Ribeka ehgan.

22Erus aliaujai jipe an nipjinetgan ahwat hal o un; is ika aien, Et echamecha, ek a uri ainyak par hiski? Is par apan aien um ahodaig Ihova.

23Is ika ehelen a Ihova, Erupu ahes ehelum a nup uran nelcau inyi ero, napu etpoi niji ira atimi inyi ero aiek; inyi esjilid niji iran yi ethi; inyi aheca u inharei a inmeto.

24Is wat yetpam nopan apos inhal o un, is apos inmul aien.

25Is wat apos inmeto aien, is eteuc nalau an nohun, is idivaig napelumai cap; eris anvi nidan par ika Isa.

26Is lep apos etwan aien, is asjiraig nijinalak an neduei Isa etwan aien an nikman; eris anvi nidan par ika Jekob: is eteuc inmesese is sikste wai Aisak an nopan iyehki is apos rau aien.

27Erus elvalupas ahwat dualep erahki: is atimi arapakau par ahilek itai eklim edo irai pece a Isa, um amen irai lelitai; ja is atimi igpa a Jekob, um amen irai eom atga.

28Is aiyu inliinmopoi Aisak vai Isa, is caig nitai caig o un aien: ja is aiyu inliinmopoi Ribeka vai Jekob.

29Is ago nitai caig a Jekob: ja is ahes an lelitai a Isa um adumoij, is auatialidi aien:

30is ika a Isa ehele Jekob, Alaak suup cap naico aiek; ek auatialidi ainyak: va nitai inigki eris anvi nidan par ika Itom, (Cap).

31Is ika a Jekob, Ahtai imi nyak natimi alupas van meto unyum aiek an nadiat inigki.

32Is ika a Isa, Et idim ubutpotet u inmas unyak ainyak: et eti upene irak natimi alupas van meto unyak?

33Is ika a Jekob, Namu asig yi aktit intas ehelek aiek an nadiat inigki; is asig yi aktit intas ehelen aien: is ahtai imi Jekob natimi alupas van meto o un aien.

34Is alayi Isa nareto im suup ariko a Jekob; is caig aien um umnyi, um atidai, um atga o un: is eti aktaktai natimi alupas van meto o un a Isa an nedo inigki.

Currently Selected:

Jenesis 25: VAO63

Highlight

Copy