Jenesis 18

Nuarin tas alupas 18.

1 Et alayi nagelo et eseij a Ebraham. 9 Er acaiji Sera vai inlaav o un vai intas upyi asaig imiali iyehki. 17 Er ehvaig ehele Ebraham nauahas vaig u inmaliyum Sotom. 23 Et ugyi Ihova a Ebraham vai nup u Sotom.

1IS ehcohos pan ehele Ebraham a Ihova irai uarin marara Mamri: is ateuc aien an neucse neom au nadiatadiat;

2is easji pan aien um ecet natimi is eseij naiji vaig ehelen: is wat ecet ehtaij aien is ahes an neucse neom aien, um athut, um aubilid ehtaij, um atpuse an nobohtan,

3um ika, Ak ehtaij atimarid unyak, aiheuc vai nyak aijautaij, um jim ahtaredgei naheca umyimitaij:

4uhmu imiapam tah inwai par yiri neduomitaij, ahtijmu lep atumop aijautaij ithan cai:

5ekpu lep imiapam nuarin nitai caig ainyak, ahtijmu asjirai cautaij iran aijautaij; ja par lep atga unyimitaij: ehtaij mun ham ehele naheca unyimitaij aijautaij va nitai inigki. Ehtijis ika ahtaij, Et upene intas unyum, ago aiek.

6Is auroauro a Ebraham um apan anliin neom ehele Sera, um ika, Auroauro aiek, um leh flaur upene inyi ohua nipjinitai inyi eseij, um aplamod, um ago nareto, um ahen.

7Is athut pan a Ebraham u kurimatau o un, um leh nakli kurimatau esjilid, um alupai intakuras is ethi; is auroauro aien am atgei um atho.

8Is lep leh buter aien, im nidenided, im nakli kurimatau iyehki eris atho, um ikni an nuhup u ehtaij; is aiji aien ehele ehtaij ithan cai; ehtijis hag ahtaij.

9Ehtijis ika ehelen ahtaij, Sera ehgam yek eda? Is ika aien, Anliin neom marom.

10Is ika aien, Ekpu idim lep ham ainyak ehelum an nopan o un; etpu apos inhalav atamaig a Sera ehgam. Is amen a Sera an neucse neom an nidjin, um atahaijeg.

11Erus efatimi a Ebraham im Sera; is lep ti pan itac nedo o ilpu takata irai Sera.

12Va nitai inigki is laav a Sera, um ika inliinmopon, Ek efatimi ainyak, et lep efatimi a natimi alupas unyak, ekpuimiacitak inhalav atamaig unyak ainyak, um uauo?

13Is ika ehele Ebraham a Ihova, Et a uri a Sera par laav, um ika, Inki eti apos inhalav ainyak, ek mun efatimi ainyak?

14Et eti ehka tah nitai vai Ihova. Ekpu lep ham ehelum ainyak an nopan eris ati, etpu apos inhalav atamaig a Sera.

15Ja is ateri a Sera, um ika, Ek mun eti laav ainyak; is idim imtitaig aien, Ja is ika aien; Na mun idim laav aiek.

16Ehtijis atidai natimi erahki, um easpan Sotom: is ahced ehtaij a Ebraham, um, imiasjaaicnaig ehtaij an nefalaig.

17Is ika a Ihova, Inki eti adenaig vai Ebraham ainyak nitai inig ekpu ago ainyak;

18erupu idim ahinag acen a ilpu mapoi Ebraham, erupu imiacitak a nup urai iji pece vai yin.

19Ek ato yin ainyak mika, etpu esege imi ilpu hal o un aien, im ilpu aheca o un, mika eri ahced nefalaig u Ihova ara, um ago nedo upene im nedo atoh; va etpu ago irai Ebraham a Ihova is idivaig intas o un ehelen.

20Is ika a Ihova, Et esjilid nohran tas o nup u Sotom im nup u Comora, et lep esjilid nedo has ura;

21ekpu asuol ainyak, um almoi nedo ura, el et idivaig nohran tas iyehki is yetpam irak, ka oʼo; ja el et eti idivaig, ekpu ato ainyak.

22Erus ahes eahki natimi erahki um apan alaig Sotom: ja is aiji a Ebraham an nuhup u Ihova.

23Is apan ubutpotet a Ebraham, um ika, Napu ehrauahas ilpu atimi upene aiek im ilpu atimi auatatimi, ka oʼo?

24El era amen an maliyum inigki a ilpu atimi upene er fifte: napu auahas inmaliyum aiek, um eti imialep vai ilpu atimi upene et fifte iran, ka oʼo?

25Etmu itac acen vai euc nedo inigki, par ehrauahas ilpu atimi upene im ilpu atimi auatatimi: etmu lep itac acen vai euc nedo inigki par ago nedo et ethi vai ilpu atimi upene im ilpu atimi auatatimi: Etpu idim ago nedo atoh a Natimi alupas an nobohtan asega.

26Is ika a Ihova, El ek ecet ilpu atimi upene inyi fifte ainyak an maliyum Sotom, ekpu imialep nuarin pece asega ainyak vai ra.

27Is tas a Ebraham, um ika, Ek mun idim tas ehele Ihova ainyak, ja ek idim obohtan ainyak um ohpa:

28el eh iknipagki natimi et faiv irai ilpu atimi upene et fifte: napu auahas inmaliyum asega aiek va neti ecet natimi et faiv, ka oʼo? Is ika aien, El ek ecet ilpu atimi upene et forte faiv ainyak, inki eti auahas ainyak.

29Is lep tas ehelen aien, um ika, El et ecet natimi et forte iran aiek. Is ika aien, Inki eti auahas ainyak va natimi et forte.

30Is ika aien, Namu jim edemda aiek, ak Ihova, ekpu lep tas ainyak: El et ecet natimi et dirte iran aiek. Is ika aien, El ek ecet natimi et dirte iran ainyak, inki eti auahas ainyak.

31Is ika aien, Ek mun emda ainyak um tas ehele Ihova: El et ecet natimi et twente iran aiek. Is ika aien, Inki eti auahas ainyak va natimi et twente.

32Is ika aien, Namu jim edemda aiek, ak Ihova, ekpu lep ecethi tas ainyak: El et ecet natimi et ten iran aiek. Is ika aien, Inki eti auahas ainyak va natimi et ten.

33Is tas ehni ehele Ebraham a Ihova, ja par atga o un: is lep adumoij pan a Ebraham an nimnim o un.

Currently Selected:

Jenesis 18: VAO63

Highlight

Copy