Jenesis 16
16
Nuarin tas alupas 16.
1 Et eti asvalav a Sere, ja et alupai Ebram Hecar aien mika yi ehgan. 4 Et amcel vai intakata atimi alupas o un a Hecar, et wat ehtipidai yin a Sere vaig, et aha aien. 7 Et acaiji yin a nagelo, um ika yi atahaijeg intas o Sere, 11 et lep tas ehele Hecar aien vai inhal o un, 15 Er apos Ismeel.
1IS eti asvalav a Sere ehgai Ebram: ja is eteuc naheca atahig o un, nidan Hecar, nup Ijipt.
2Is ika a Sere ehele Ebram, Is idim ika a Ihova ki jim asvalav ainyak: ek ugyi euc ainyak mika an apan aiek ehele naheca atahig unyak; kit ekpu lucsei ilpu halav ainyak ehelen. Is atahaijeg intas o Sere a Ebram.
3Is amen a Ebram an pece Kenan irai mesese is ten, ja is par leh Hecar nup Ijipt, im naheca o un, a Sere ehgai Ebram, um alupai Ebram natamnyu un mika yi ehgan.
4Is apan ehele Hecar a Ebram, ja is par opoc aien: is wat ato a Hecar mika is opoc aien, is ago nedo ijinies vai Sere aien intakata atimi alupas o un.
5Is ika ehele Ebram a Sere, Ek ohocred ainyak vai euc: kis alupai euc naheca atahig unyak ainyak; ja is wat ato aien mika is opoc aien, is ago nedo ijinies vai nyak aien: etmu aru iram a Ihova va nedo unyum vai nyak.
6Ja is tas a Ebram ehele Sere, um ika, Nai esjilid aiek irai naheca atahig unyum; ago nedo inigki iran aiek et upene iram. Is wat ago nedo ipjin vai yin a Sere, is udei yin aien um aha.
7Is ecet yin a nagelo o Ihova u nehpanwai is ethi an namasacen, nehpanwai iyehki an nefalaig yetpan Sur.
8Is ika aien, Ak Hecar naheca atahig u Sere, na mun ahes eda aiek? nalaig eda nigki unyum? Is ika aien, Ek mun aha vai Sere ainyak intakata atimi alupas unyak.
9Is um ika ehelen a nagelo o Ihova, Adumoij pan aiek ehele intakata atimi alupas unyum, um imiaiji intas o un.
10Is ika ehelen a nagelo o Ihova, Ekpu ika ainyak eri ahinag acen a ilpu mapom, inyi ehka vaig tah nesvi ra vaig va nahinag ira ra.
11Is um ika ehelen a nagelo o Ihova, Nai idim opoc aiek, napu apos inhalav atamaig aiek, napu anvi nidan aiek par ika Ismeel; et idim ato nohocred unyum a Ihova.
12Etpu amen an namasacen aien, um idivaig natimi aleg; etpu ada nikman va atimi asega aien, erupu lep ada nikmara vai yin natimi asega; etpu amen aien an nuhup u ilpu etwan asega.
13Is anvi nidai Ihova aien is tas ehelen par ika Elroi, (Na Atua alum nyak aiek): is ika aien, Ek mun aes yin ainyak igcaki et alum nyak aien.
14Va nitai inigki eris anvi nidan nehpanwai iyehki, par ika Bier-lahe-roi, (Nehpanwai o un et umoh aien, um alum nyak); et eteuc juju an niblan pece Ketes im Bired.
15Is apos inhalav atamaig imi Ebram a Hecar: is anvi nidai inhal o un a Ebram, is apos imi yin a Hecar, par ika Ismeel.
16Is eete siks inmesese irai Ebram, an nopan iyehki is apos Ismeel imi yin a Hecar,
Currently Selected:
Jenesis 16: VAO63
Highlight
Share
Copy
Want to have your highlights saved across all your devices? Sign up or sign in
Vanuatu Bible (Intas Etipup) © United Bible Societies, 1863, 2019.
