Eksotus 6
6
Nuarin tas alupas 6.
1 Et aketo a Atua um asan tas upyi asaig o un an nidai Ihova. 14 Niji idai ilpu mapoi Ruben, 15 im Simeon, 16 im Livai etpoi Moses im Eron.
1IS ika a Ihova ehele Moses, Napu almoi nitai inig aiek, ekpu ago ainyak irai Fero: etpu lep atcijai ra aien an nikman emda, um ahlo pan ra an pece o un an nikman emda.
2Is tas a Atua ehele Moses, um ika ehelen, Ek Ihova ainyak:
3kis ehcohos pan ainyak ehele Ebraham, im Aisak, im Jekob, an nidak Atua emda acen, ja eris eti ato nidak et eche Ihova ara.
4Kis lep ati intas etipup unyak ainyak ehele ra, mika ki alupai ra inpece Kenan ainyak, inpece inig eris amen terimterim iran ara, um tak atimi iran.
5Kis lep atahaijeg ainyak nehtigtaig u nup Isreel iji igki era ehcerucai ra a nup Ijipt; ek lep imiehva intas etipup unyak ainyak.
6Va nitai inigki namu asaig ehele nup Isreel aiek, mika ek Ihova ainyak, ekpu iknipagki caua ainyak va nauritai ehka u nup Ijipt, ekpu lep imicoho caua ainyak va nauaraheca ura, ekpu imiatamaig caua ainyak an nikmak emda, im lep an nedo emda esjilid unyak:
7ekpu ikni caua ainyak, mika aki ilpu atimi unyak aijaua, ekpu lep Atua unyimia ainyak: akupu lep ato aijaua, nikavaig, ek Atua unyimia ainyak Ihova, ekpu imiatamaig caua ainyak va nauritai ehka u nup Ijipt.
8Ekpu imiapan caua ainyak an pece inig, kis tas aktit vaig ainyak, um ika, Ekpu alupai Ebraham ainyak, im Aisak, im Jekob; ekpu alupai caua ainyak mika aki ohuun aijaua: ek Ihova ainyak.
9Is asan tas inigki ehele nup Isreel a Moses: ja eris eti atahaijeg intas o Moses ara va nohocred u inliinmopora, im lep nauritai opoc ura.
10Is tas a Ihova ehele Moses, um ika,
11Namu apan aiek, um asaig ehele Fero natimarid Ijipt mika yi atcijaig nup Isreel aien, mika eri udei inpece o un ara.
12Is tas a Moses an nuhup u Ihova, um ika, Eris idim eti ata-haijeg intas unyak a nup Isreel; inyi eti lep atahaijeg intas unyak a Fero, et eti upene nipjineucsek ainyak.
13Is tas a Ihova ehele Moses im Eron, um asuptecnaig ehele rau intas o un ehele nup Isreel, im lep ehele Fero natimarid Ijipt, mika eru iknipagki nup Isreel an pece Ijipt arau.
14Eris ilpu retpora ara sji igki: nikavaig, Ilpu hal u Ruben inhal u Isreel inmeto; nan, Henok, im Palu, im Hesron, im Karmai: eris ilpu mapoi Ruben ara sji igki.
15Im lep ilpu hal u Simeon; nan, Jemuel, im Jemin, im Ohat, im Jekin, im Sohar, im Seal inhal u intakata Kenan: eris ilpu mapoi Simeon ara sji igki.
16Nidai ehtaij hal u Livai, is idivaig eris aged ehtaij; nan, Cerson, im Kohad, im Mererai: is eteuc inmesese is wun huntret im dirte seven irai Livai, ja pah mas.
17Ohwat hal u Cerson; nan, Libnai, im Saimai.
18Ilpu hal u Kohad; nan, Amram, im Ishar, im Hibron, im Usiel: is eteuc inmesese is wun huntret im dirte dri irai Kohad, ja pah mas.
19Ohwat hal u Mererai; nan, Mahelai, im Musai: eris ilpu mapoi Livai ara sji igki.
20Is leh Jokebet natahig irai etman a Amram ehgan; is apos Eron im Moses imi yin aien: is eteuc inmesese is wun huntret im dirte seven irai Amram, ja pah mas.
21Im lep ehtaij hal u Ishar; nan, Kora, im Nifec, im Sidrai.
22Im lep ehtaij hal u Usiel; nan, Miseel, im Elsafan, im Sidrai.
23Is leh Eliseba, inhalav atahig u Aminatab, im natahig irai Neson, a Eron ehgan; is apos Netab aien, im Abaihu, im Eliesar, im Idamar.
24Im lep ehtaij hal u Kora; nan, Asir, im Elkana, im Abaiasaf: ehtijis ahes ehele Kora ahtaij raigki.
25Is leh inhalav atahig is ethi u Putiel a Eliesar inhal u Eron ehgan; is apos Finehas imi yin aien: eris ahes ehele ra sji igki a nup u Livai.
26Eron im Moses raigki, is tas ehele rau a Ihova, um ika, Arumu iknipagki nup Isreel an pece Ijipt aijaurau, um asjaaicnaig sjipe ira ra.
27Moses im Eron raigki, erus lep tas ehele Fero natimarid Ijipt arau, um ika yi atcijaig nup Isreel aien an pece Ijipt.
28An nopan iyehki is wat tas a Ihova ehele Moses an pece Ijipt,
29is ika a Ihova ehele Moses, Ek Ihova ainyak: namu asaig aiek ehele Fero natimarid Ijipt intas asega unyak ehelum.
30Is tas a Moses an nuhup u Ihova, um ika, Et eti upene nipjineucsek ainyak, inyi eti atahaijeg intas unyak a Fero.
Currently Selected:
Eksotus 6: VAO63
Highlight
Share
Copy
Want to have your highlights saved across all your devices? Sign up or sign in
Vanuatu Bible (Intas Etipup) © United Bible Societies, 1863, 2019.
