Eksotus 3

Nuarin tas alupas 3.

1 Et asgi siip u Jedro a Moses. 2 Et ehcohos ehelen a Atua an cai alaume. 9 Et abraig pan Moses aien mika yi imiatamaig nup Isreel. Nidai Atua. 15 Intas o Atua imi nup Isreel.

1IS asgi siip u Jedro a Moses etmai ehgan, natimi alupas Mitian: is imiapan siip aien an nahaijin namasacen itac, um yetgan an nedoon u Atua, nidan foreb.

2Is ehcohos pan ehelen a nagelo u Ihova an nalaume u incap an nahtancai: is eas pan aien, um almoi incap an nahtancai, ja is eti eas nahtancai.

3Is ika a Moses, Ekpu apan ainyak, um almoi nitai imiali inigki, nikavaig, et eti cas nahtancai.

4Is wat ato a Ihova mika is apan aien um almoi, is ahlaig vai yin a Atua an nahtancai, um ika, Ak Moses, ak Moses. Is um ika aien, Ainyak ap aigki.

5Is ika aien, Jim apam aiek igcaki: namu atipagki incetpon neduom aiek, et itap muarin nobohtan inig na aiji iran aiek.

6Is lep ika aien, Ek Atua u etmam ainyak, im Atua u Ebraham, im Atua u Aisak, im Atua u Jekob, is ahpopones nesganimtan a Moses; is um imtitaig aien par aes pan Atua.

7Is ika a Ihova, Ek mun idim almoi nohocred u ilpu atimi unyak ainyak an pece Ijipt, um atahaijeg nehtigtaig ura vai ilpu atimi aminjinaig nauritai ura; ek ato nohocred ura ainyak;

8ek mun asuol pam ainyak par imiatamai ra va nikmai nup Ijipt, um iknipagki ra an pece inaico, um ikni ra an pece upene um alupas, inpece et amen alupas nidenided im hune iran; an pece u nup u Kenan, im nup u Hed, im nup Emor, im nup u Piris, im nup u Haivai, im nup u Jibus.

9Et mun idim aridjai intaig u nup Isreel an nuhup unyak: ek lep almoi nohocred ura ainyak vai nup Ijipt.

10Va nitai inigki apan aiek, ekpu abraig pan euc ainyak ehele Fero, mika napu iknipagki nup Isreel aiek an pece Ijipt.

11Is ika a Moses ehele Atua, Ethi ainyak di aigki, ekpu apan ainyak ehele Fero, um iknipagki nup Isreel an pece Ijipt

12Is ika aien, Ekpu idim amen ehelum ainyak; nitai asjaaicnaig imi euc nigki mika, ek mun abraig pan euc ainyak: Nau wit iknipagki ilpu atimi unyak an pece Ijipt aiek, akupu ahlap vai Atua aijaua an nedoon inigki.

13Is ika a Moses ehele Atua, wit apan ainyak ehele nup Isreel, um asaig ehele ra mika, is abraig pam nyak ehelemia a Atua u ilpu retpomia; erupu ika ehelek ara, Nidai di? ekpu ika inhe ehele ra ainyak?

14Is ika a Atua ehele Moses, AINYAK AIGKI EK ISPUK ETEUC AINYAK: Is um ika aien, Namu asaig aiek ehele nup Isreel mika, is abraig pam nyak ehelemia AIEN ET ISPUN ETEUC AIEN.

15Is ika a Atua ehele Moses, Namu asaig aiek ehele nup Isreel mika, is abraig pam nyak ehelemia a Ihova Atua u ilpu retpomia, Atua u Ebraham, im Atua u Aisak, im Atua u Jekob: nidak nigki irai iji mesese, im nitai imiehva nyak nigki irai iji opan asega.

16Apan aiek, um asjapicnaig ilpu atimi alupas u nup Isreel, um tas ehele ra, um ika, Is ehcohos pam ehelek a Ihova, Atua u ilpu retpomia, Atua u Ebraham marom, im Aisak, im Jekob, um ika, Ek mun idim ateghe caua ainyak, um almoi nedo inig er ago vai caua an pece Ijipt:

17kis ika ainyak, Ekpu iknipagki caua ainyak an pece Ijipt va nohocred unyimia, um imiapan caua an pece u nup u Kenan, im nup u Hed, im nup Emor, im nup u Piris, im nup u Haivai, im nup u Jibus, inpece et amen alupas nidenided im hune iran.

18Erupu atahaijeg nohram ara: namu apan aiek, im lep ilpu atimi alupas u nup Isreel ehele natimarid Ijipt, um ika ehelen, Is ehcohos ehelema a Ihova Atua u nup u Hibru: ecra ugyi euc aijama mika ecri apan aijama, um atga an nadiat inyi eseij an namasacen, um ahlap irai iji itai ahlap vai Ihova Atua unyima.

19Ja ek idim ato ainyak mika, inyi eti atcijaig caua a natimarid Ijipt, jai va nikmak emda ache.

20Ja ekpu atgeig yi apidi nikmak ainyak, um auud inpece Ijipt an nedo emda asega unyak ekpu ago ainyak an nuhup ura: ja erupu atcijaig caua ara.

21Ekpu lep ago updak inliinmopoi nup Ijipt ainyak vai ilpu atimi unyak: aku wit atga unyimia aijaua, akupu eti tup atga aijaua:

22erupu ugyi ilpu atimi eblaamnem ura, im lep ra era amen irai imnim ura ara a ilpu takata asega, va niji itai silver, im niji itai colt, im napelumai: akupu yecrei ilpu halav atamaig unyimia iran aijaua, im ilpu halav atahig unyimia; akupu lucsei itai u nup Ijipt aijaua.

Currently Selected:

Eksotus 3: VAO63

Highlight

Copy