Eksotus 17
17
Nuarin tas alupas 17.
1 Era asan tas ehti natimi vai intivaig wai Refitim. 2 Et ika a Atua ehele Moses yi apan an nij Horeb aien vai inwai. 8 Era esjilid irai nup Amalek ara va nalcacseijai u nikmai Moses. 15 Et actaig natau a Moses, nidan Ihova-nissai.
1ERIS ahes an namasacen Sin a nup Isreel asega um atga ura, eris atga ara is idivaig intas alep u Ihova, um atumop Refitim: is ti inwai luma atimi.
2Va nitai inigki eris atuh Moses natimi, um ika, Alumama inwai. Is ika ehele ra a Moses, Eka a uri aijaua par atuh nyak? eka a uri aijaua par auahas inliinmopoi Ihova?
3Eris ahvig wai eahki natimi; eris lep edemda vai Moses natimi, um ika, As a uri aiek par iknipagki cama an pece Ijipt, par auahas cama va nahvig wai, im lep ilpu hal unyima, im niji itai eklim edo irai pece unyima.
4Is ahlaig vai Ihova a Moses, um ika, Ekpu ago inhe ainyak ira atimi iji igki? era ika ara eri asji nyak irai hat.
5Is ika a Ihova ehele Moses, Namu apan aiek um uhup ira atimi, um lucsei nahaiji ilpu atimi alupas u nup Isreel; namu apos an nikmam aiek niseuc unyum as auud nofowai iran aiek, um atga unyum.
6Ekpu idim aiji ijinies an nij Horeb ainyak an nuhup unyum; namu auud nij aiek, etpu ahes inwai iran luma atimi. Is ago a Moses is uce an nuhup u ilpu atimi alupas u nup Isreel.
7Is anvi nidan nuarin iyehki aien par ika Masa, (Nauahas inliinmopon), im Meriba, (Nimiisjisitai), va nimiisjisitai u nup Isreel, im nedo auahas inliinmopoi Ihova, eris ika ara, Et amen eheleija a Ihova, ka oʼo?
8Eris apan Refitim a nup Amalek, um ago nedoa vai nup Isreel.
9Is ika a Moses ehele Josua, Namu ehtai atimi aiek iraija, um apan, um ago nedoa vai nup Amalek: ekpu aiji ijinies an lolan nedoon ainyak imraig, um apos an nikmak niseuc u Atua.
10Is ago a Josua is idivaig is asaig ehelen a Moses, um ago nedoa vai nup Amalek: ehtijis aridjai an lolan nedoon ahtaij, nan, Moses, im Eron, im Hur.
11Is wat adaigjai nikman a Moses, eris esjilid a nup Isreel: ja is wat atise nikman aien, eris esjilid a nup Amalek.
12Ja is opoc nikmai Moses; erus leh inhat arau, um ati ithan, is ateuc iran aien; erus asjiraig jai nikman a Eron im Hur, is amen is ethi an nahaijin, im lep is ethi an nahaijin; is emda nikman um yetpan an nete u nagesega.
13Is ahlo nup Amalek a Josua an nedoa.
14Is ika a Ihova ehele Moses, Namu aged intas va nitai inigki aiek an nitaasviitai, va uhpu imiehva, um asuptecnaig ehele Josua: nikavaig, ekpu idim auahas ehni nup Amalek an nobohtan ainyak.
15Is actaig natau eahki a Moses, um anvi nidan par ika Ihova-nissai:
16is ika aien, Eris adaigjai nikmara a nup Amalek ehele Ihova, va nitai inigki etpu ago nedoa vai ra a Ihova im lep vai ilpu mapora irai iji mesese.
Currently Selected:
Eksotus 17: VAO63
Highlight
Share
Copy
Want to have your highlights saved across all your devices? Sign up or sign in
Vanuatu Bible (Intas Etipup) © United Bible Societies, 1863, 2019.
