Niji auritai o ilpu Apostolo 13
13
Nuarin-tas alupas 13.
1ERIS amen an nakalasia Anteok hal ilpu profeta, im ilpu atimi esege; Barnabas, im Simeon, tak idan Naijer, im Luseus nupu Sairini, im Maneen, is eredo aien im Herot natimi alupas an pece, im lep Saulo.
2Eris wat alaigaheni vai Natimarid ara um atwakam, is um ika a Nesgan Upene, Akumu idim ati imi nyak Barnabas im Saulo aijaua, va nauritai ineig kis ati rau vaig ainyak.
3Eris atwakam ara um alaigaheni, ja par atijai nikmara ira rau, um abraig pan rau.
4¶ Is wat abraig pan rau a Nesgan Upene, erus apan Selusea arau: erus lep ahes eahki arau um atau an nelcau, um apan alaig Saiprus.
5Erus wat amen Salamis arau, erus asuptecnaig intas o Atua arau irai eom alaigaheni o nupu Jutaia: is aheca urau a Joanes.
6Erus ahced inpece arau um yetpan Pefos, um ecet natimi ahraces is ethi, is aprofeta efaifa aien, is upu Jutaia aien, nidan Barjosua:
7is amen aien ehele Serjeus Paulus, natimi alupas an pece, im natimi arapakau; is imyiacaij Barnabas im Saulo aien, is merit aien natahaijegvaig intas o Atua.
8Ja is imyiisjis itai ira rau a Elimas, (nesgan tas an nidan ineigki, natimi ahraces,) is merit aien mika yi imyiadumoij natimi alupas iyehki u nalaigaheni.
9Ja is amen alupas a Nesgan Upene ehele Saulo, tak idan Paulo, is anani nesganimtan aien iran,
10um ika, Ak at eigki, et esjilid nahcil unyum, im nefaifa unyum, nai hal o Tiapolo aiek, na esjum aiek va nedo atoh asega, na auri aiek par eti atumop um edwedwai nedo atoh o Natimarid?
11et mun idim amen iram nikmai Natimarid, etpu aupat nesganimtam aiek, napu eti ecetai nagesega aiek an tak aopan. Is um auroauro um arupoig nesganimtan um aupat; is atga ahilek atimi aien mika eri atau an nikman.
12Is wat almoi nitai ineigki a natimi alupas, is imyiisjis ninivaijec aien, um imyiali nesege o Natimarid.
13Is wat atceija nelcau Pefos a Paulo im ilpu atimi ahced yin, um apan Perca an pece Pamfilya, is epujai ra eahki a Joanes, um lep adumoij pan Jerusalem.
14¶ Eris wat ahes Perca ara, um apan Anteok an pece Pisitya, um apan anliin neom alaigaheni an nadiat atumop, um ateucse.
15Eris wat esvi intas alep ara im intas o ilpu profeta, eris um ika ehele ra a ilpu atimi alupas an neom alaigaheni, Ak ilpu etoama, el et amen ehelemia tah intas ated atimi, akumu asaig aijaua.
16Is um atidai a Paulo, um ahpoijaiji ra, um ika, Ak nupu Isreel, im ilpu atimi eccen vai Atua, akumu atahaijeg aijaua.
17Is ehtai ilpu retpoija a Atua o nupu Isreel iji eigki, um imyiatidai ra an namen ura an pece Ijipt um tak atimi, is lep iknipagki ra aien eahki an nikman emda.
18Is eti aru nedo has ura aien an namasacen is idivaig inmesese is forte.
19Is wat auahas nup urai uari pece is seven aien an pece. Kenan, ja par atiakoai umara imi ra irai itai asjaaicnaig.
20Is wat ti pan itac nitai iji eigki, is ikni ilpu atimi tas alep aien imi ra is idivaig inmesese is for huntret im fifte, um yetpan irai Samuel naprofeta.
21Eris apitac ara um ugni natimarid imi ra: is ati Saulo inhal o Kis imi ra a Atua, irai mesese is forte, is mapoi Benjamin aien.
22Is lep atipagki yin aien, um ati Tevit mika yi atimarid imi ra aien; is tas vai yin aien, um ika, “Ek mun ecet Tevit ainyak inhal o Jese, et idivaig inliinmopok inliinmopon aien, etpu imyiaiji intas asega unyak aien.”
23Is imyiatidai Iesu imi nupu Isreel a Atua mika yi Atimi imyiatamaig ra, mapoi natimi ineigki, is idivaig intas upyi asaig o un;
24is upyi uhup a Joanes, um asuptecnaig nabaptiso va nadumoijvaig o atimi anliinmopura imi nupu Isreel asega, ja is par ham aien.
25Is wat ago nauritai o un a Joanes, is ika aien, “Eka ika aijaua, ainyak di aigki? ek eti atimi iyehki ainyak, ja etpu idim ham tah inyi epitpitac irak aien, ek eti upene ainyak par ahiyi incedpun eduon.”
26Ak ilpu etoak, ilpu mapoi Ebraham, im lep aijaua eka eccen vai Atua aijaua, er alupai caua intas va nitai umoh iran ineigki.
27Ara era amen Jerusalem ara, im lep ilpu atimi alupas ura, eris eti ato yin ara, im intas o ilpu profeta er esvi irai iji adiat atumop asega; va nitai ineigki eris ehneijid intas vai yin ara an tas alep ura vai inmas o un.
28Eris eti ecetai tah nitai ineig ehelen ara eri atgei yin vaig, ja eris ugni Pailet ara mika yi atgei yin aien.
29Eris wat ago ehni nitai iji eigki asega ara eris aged vai yin, eris atise yin ara an nauincai, um ati yin an mun nij.
30Ja is imyinusjai yin a Atua vai inmas o un:
31eris ecet yin an nadiat is ahinag a ilpu atimi iji ehki eris ahes Calili ara, um ahced yin um yetpan Jerusalem; era asuptecnai yin ara ehele nupu Isreel.
32Ecra lep asuptecnaig ehelemia aijama intas-upene ineig eris upyi asaig ehele ilpu retpoija,
33is mun ehneijid a Atua eheleija ilpu mapora, is wat lep imyinusjai Iesu aien; is idivaig eris aged an Nohranitai tu, um ika, “Nai Hal unyak aiek, ek mun apos euc ainyak an nadiat ineigki.”
34Is lep imyinusjai yin aien vai inmas o un, um ika, inyi idim eti muttit aien, is idim ucce intas o un, nikavaig, “Ekpu alupai caua ainyak niji itai upene inivaijec o Tevit.”
35Is lep ika aien an Nohranitai is eche, “Anyi ti atceijaig Natimi Upene unyum aiek mika yi muttit.”
36Is wat imyiaiji intas o Atua a Tevit, um ago ehni nauritai o un ira atimi an naopan iyehki, is umjegse aien; eris ati yin ehele ilpu retpon, is um muttit aien:
37ja aien, is imyinusjai yin a Atua, is eti muttit aien.
38Ak ilpu etoak, akumu ato aijaua mika er asuptecnaig ehelemia, nikavaig, natimi ineigki uhmu eti aru nedo has vai yin:
39ara asega era imyiisjis ninivaijec ara, eris ika et atoh nedo ura vai yin, va nitai iji eigki asega is ehka vai intas alep o Moses nikavaig et atoh nedo unyimia.
40Va nitai ineigki, akumu aminjinai caua aijaua va yi jim yetpam iramia nitai ineigki eris asaig a ilpu profeta, um ika;
41“Ak ilpu atimi imyipalea, akumu almoi aijaua, um imyiali, um atpuh: ek ago nauritai ainyak an naopan unyimia, ja et wit asuptecnaig nauritai unyak ehelemia tah natimi, akupu eti imyiisjis ninivaijec vaig aijaua.”
42Eris wat ahes anliin neom alaigaheni a nupu Jutaia um alau ijo, eris ugni ra u a nup uran pece iyehki mika eru lep asuptecnaig ehele ra intas iji eigki an nadiat atumop yiek.
43Eris wat terimterim natimi, eris apitac Paulo im Barnabas a nupu Jutaia is ahinag, im ilpu atimi upene leh nalaigaheni o nupu Jutaia: erus tas ehele ra arau, um ated ra mika eri apol an naiheuc o Atua ara.
44¶ Is wat yetpan an nadiat atumop iyehki, eris asjapicnaig is idivaig natimi asega an nuarin-pece, mika eri atahaijeg intas o Atua.
45Eris wat almoi natimi is ahinag a nupu Jutaia, eris atavaitap alupas ara, um tas has va nitai iji eigki is asaig a Paulo, um imyiisjis itai, um asan tas has esjilid.
46Ja erus emda a Paulo im Barnabas, um ika, Eris idim ika eri upyi hup um asuptecnaig intas o Atua ehelemia: ja akis esjum vaig aijaua, um ika is eti upene vai caua nitai umoh iran ineig inyi ti lep ti, va nitai ineigki ecrau ahidaig pan cumrau aijumrau ehele nup urai taka pece:
47is tas alep ehelema a Natimarid, um ika, “Kis ati euc ainyak mika an nitai lah imi nup urai iji pece, um lep itai imyiatamaig atimi um yetpan u intid an nobohtan.”
48Eris wat atahaijeg intas ineigki a nup uran pece iyehki, eris imyiacitak ara, um imyiahpas intas o Natimarid: eris imyiisjis ninivaijec ara asega, eris anacanac ira ra mika eri leh nitai umoh iran ineig inyi ti lep ti.
49Eris asuptecnaig intas o Natimarid an pece iyehki asega.
50Ja eris auahas inliinmopoi ilpu atimi alupas an nuarin-pece a nupu Jutaia, im lep inliinmopoi ilpu takata esga atimi eris leh nalaigaheni o nupu Jutaia ara, um ika eri edemda vai Paulo im Barnabas, eris ahlo rau ara an pece ura.
51Erus ucjucjaig nobohtan irai eduorau arau vai ra, um apan Aikoneum.
52Ja is amen alupas ehele ilpu atimi alaigaheni a Nesgan Upene; eris imyiacitak ara.
Currently Selected:
Niji auritai o ilpu Apostolo 13: VAO63
Highlight
Share
Copy
Want to have your highlights saved across all your devices? Sign up or sign in
Vanuatu Bible (Intas Etipup) © United Bible Societies, 1863, 2019.
