Niji auritai o ilpu Apostolo 10
10
Nuarin-tas alupas 10.
1IS amen natimi is ethi Sisaria, nidan Kornilyus, is atimi alupas o ilpu eucsupo iji eig aien eris ika vai ra Ilpu eucsupo Itale;
2is atimi upene aien, um eccen vai Atua, im lep ra asega an nimnim o un, is ahinag nedo aiheuc o un aien vai ilpu ihki atimi, um ugni Atua irai iji adiat.
3Is wat jupki an nadiat is ethi, is idim ecet nagelo o Atua aien nehcohos pan vaig ehelen, um ika ehelen, Ak Kornilyus.
4Is wat easji pan ehelen aien, um imtitai yin, um ika, Inhe, ak Natimi alupas? Is um ika ehelen aien, Et mun aridjai nalaigaheni unyum, im nedo aiheuc unyum vai ilpu ihki atimi, an nuhup u Atua, nitai imyiehva euc:
5namu abra atimi aiek mika eri apan Joppa ara, um imyiacaij natimi et ethi eahki, nidan Saimona, tak idan Pitrus:
6et amen aien ehelen et ethi Saimona, natimi ago arasi kurimatau, et eteuc neom o un ubutpotet u injop: etpu asuptecnaig ehelum aien nitai ineig eris idim ika napu ago aiek.
7Is wat atga o un a nagelo iyehki is tas aien ehele Kornilyus, is ahlaig aien vai naheca is ero o un, im lep neucsupo upene is ethi ira ra eris aheca o un ara irai iji adiat;
8is asuptecnaig ehele ehtaij aien nitai iji eigki asega, um abrai ehtaij mika ehtiji apan Joppa ahtaij.
9¶ Is wat lahlah an tak apnyin, ehtijis wat apan ahtaij alaig Joppa, um yetpan ubutpotet u nuarin-pece iyehki, is aridjai an neom ijinies a Pitrus, um alaigaheni an nadiatadiat:
10is um ehtele yin aien, um ahvig nitai caig: ja eris wat ago nitai caig ara, is ahuumtidec aien,
11um ecetai nohatag is asalgei, is asuolse ehelen tah nitai is idivaig nap alupas, eris leh pam nesvipas iran is for um arore, um atise an nobohtan:
12is amen iran niji obotpot itai asega an nobohtan et for neduon, im niji itai aleg, im niji itai ata has, im inman.
13Is atahaijeg nohran tah aien, is ika, Atidai, ak Pitrus, um atgei, um hegaig.
14Ja is um ika a Pitrus, Oʼo, ak Natimarid; kis idim eti caig tah nitai ineig ainyak et has ka itaup irai iji adiat.
15Is ehcero tas nohran iyehki ehelen, um ika, Jim ika aiek et has nitai ineig et mun ago adicinadicin a Atua.
16Eris ehceseij ago nedo ineigki: ja par lep aiyihijai nitai iyehki an nohatag.
17Is wat aktaktai a Pitrus nesgan nitai ineig is ahuumtidec iran aien, ehtijis ahilek neom o Saimona ahtaij atimi erahki is abrai ehtaij a Kornilyus, um aiji an neucse nathatahau,
18um ahodaig, um ika, Et amen igcaki a Saimona, tak idan Pitrus, ka oʼo?
19¶ Is wat aktaktai a Pitrus nitai ineig is ahuumtidec iran aien, is um ika ehelen a Nesgan Upene, Ehtaij ahilek euc natimi et eseij:
20va nitai ineig namu atidai aiek, um asuol, um ahced ehtaij, um jim imyiisjis: ek mun abrai ehtaij ainyak.
21Is asuol a Pitrus, um apan ehele natimi erahki is abrai ehtaij a Kornilyus, um ika, Ainyak ap aigki, ehtaij ahilek nyak aijautaij: ehtaij ham aijautaij vanhe?
22Ehtijis um ika ahtaij, Is tas a Atua ehele Kornilyus natimi alupas o ilpu eucsupo, irai nagelo upene o un, um ika yi imyiacaij euc, mika an apan aiek an neom o un, mika yi atahaijeg intas unyum aien; et atimi upene aien, um eccen vai Atua, era asan tas upene vai yin a nupu Jutaia asega.
23Is ika ehele ehtaij aien, Apam aijautaij an nimnim, um amen. Is wat lahlah an tak apnyin, is apan a Pitrus im lep ehtaij, eris lep ahced yin nahaiji ilpu etoan Joppa.
24Is wat lep lahlah an tak apnyin, eris yetpan Sisaria ara. Is asjapicnaig ilpu atimi ehpan iran a Kornilyus im ilpu apa o un, um aitgai ra.
25Is wat yetpan an nimnim, a Pitrus, is aubillid pan yin a Kornilyus, um atpuse u neduon, um alaigaheni vai yin.
26Ja is um imyiatidai yin a Pitrus, um ika, Atidaijai aiek; ek idim atimi ainyak.
27Is atga tas ehelen aien, um apan anliin neom, um alum atimi is ahinag eris asjapicnaig ara.
28Is um ika ehele ra aien, Eka ato aijaua, nikavaig, et itaup vai nupu Jutaia napanvaig ehele nup urai taka pece, um amen ehele ra; ja et mun asuptecnaig ehelek a Atua, um ika, Jim ika vaig tah natimi, et takitai aien um has:
29va nitai ineigki ek mun ham ehelemia ainyak an nimyiacaij nyak vaig, um eti imyiisjis itai: ek ahodai caua ainyak mika, eka ahilek nyak aijaua vanhe?
30Is um ika a Kornilyus, Kis ti pan itac nadiat is for ainyak um atwakam um imyihum pam an nuarin-nadiat ineig; kis lep alaigaheni ainyak anliin neom unyak an jupki, ja is aiji an nuhup unyak natimi is ethi is ememina napelumai iran,
31um ika, Ak Kornilyus, eh mun atahaijeg nalaigaheni unyum, et lep imyiehva a Atua nedo aiheuc unyum vai ilpu ihki atimi:
32namu abra atimi aiek mika eri apan Joppa ara, um imyiacaij Saimona, tak idan Pitrus; et amen aien anliin neom o Saimona natimi ago arasi kurimatau ubutpotet u injop: et wit ham aien, etpu tas ehelum aien.
33Kis auroauro ainyak um abra atimi mika eri apan ehelum; et upene nedo ineigki na ago aiek par ham. Ecra mun asjapicnaig pam igcaki aijama asega an nuhup u Atua, mika ecri atahaijeg niji itai asega is asaig ehelum a Atua.
34¶ Is tas a Pitrus, um ika, Ek idim ato ainyak, nikavaig, et tup ethi ache inliinmopoi Atua vai nup urai iji pece:
35ja et upene inliinmopon aien vai natimi ineig et eccen vai yin aien, um ago nedo upene, irai iji pece asega.
36Intas ineig is imyiapan ehele nupu Isreel a Atua, nasuptecnaigvaig neigpa vai Iesu Kristo: (et Atimarid aien ira atimi asega:)
37eka ato intas ineigki aijaua, an ti pan itac vaig nabaptiso ineig is asuptecnaig a Joanes, eris atupun um asuptecnaig Calili, um yetpan an pece Jutaia asega;
38nikavaig, is ati Iesu nup an Nasared a Atua irai Nesgan Upene im nemda o un: is atga jipe aien um ago nedo upene, um ago cehcehe ra asega eris ohocred ara vai Tiapolo; is amen ehelen a Atua.
39Ecra ilpu atimi asuptecnaig nitai iji eigki asega aijama is ago aien an pece Jutaia, im lep Jerusalem; aien aigki eris aijcaijai yin an nauincai ara, um atgei yin:
40ja is wat ti pan itac nadiat is eseij, is imyinusjai yin a Atua, um ehvaig upene yin;
41jam eti ehvai yin ehele atimi asega, ehelema ache, is upyi ehtai cama a Atua mika ecri asuptecnai yin aijama, is wat nusjai aien vai inmas o un, ecris ehrihag ehelen aijama um umwig.
42Is abrai cama aien mika ecri efehtas ehele atimi aijama, um asuptecnai yin, um ika, Aien aigki is ati yin a Atua mika yi asuptecnaig nimtan imi ilpu atimi umumoh aien, im lep ra eris emesmas ara.
43Eris tas vai yin a ilpu profeta asega, um ika, Ara asega era asgeig iran ara, eri eti aru nedo has ura va nidan.
44¶ Is wat asan tas iji eigki a Pitrus, is asuolse a Nesgan Upene ira ra asega eris atahaijeg intas iyehki ara.
45Eris imyiali natimi iji ehki irai ilpu atimi aperitome eris imyiisjis; ninivaijec ara, ara asega eris ahced Pitrus ara, va nitai ineigki, nikavaig, eris lep atladwi Nesgan Upene irai nup urai taka pece, nitai tup ahtai ineigki.
46Eris atahaijeg ra ara intasvaig irai tas is eche, um imyiahpas Atua. Is um ika a Pitrus,
47Et ehka vaig tah natimi natapanes inwai vaig, um ika, jim baptiso irai ra sji eigki era mun leh Nesgan Upene ara, um idivai, caija.
48Is um ika aien eri baptiso ira ra an nidai Natimarid. Eris ugni yin ara mika yi amen ehele ra aien ira adiat inyi eti elpat.
Currently Selected:
Niji auritai o ilpu Apostolo 10: VAO63
Highlight
Share
Copy
Want to have your highlights saved across all your devices? Sign up or sign in
Vanuatu Bible (Intas Etipup) © United Bible Societies, 1863, 2019.
