ሮሜ 6
6
ናጋራ ኦ̈ሳ ኣሻ̇ሪ ክርስቶ̈ሳባር ዶኢ
1ዪዚ ኑ ኣብዝ ጋ̈ኔ? ጾ̈ሳ̇̈ ካን ኑ̈ብ ዎይላምፔ̈ን ናጋራ ኦ̈ሙታ̇ ዶኣኔ? 2ጊዳካ̇ዬ! ኣሲ ኣሳ ጋልዳፖ ዓይቃባር ፋጊንታ̇ዚንዲፌ̈ኒ ናጋራ ጋልዳፖ̇ ፋጊንቲኖን ኑ̈ኒ ዎዛርፌ̈ን ናጋራ ኦ̈ሙታ̇ ዶኢ̈ራ? 3ዬሱ̈ስ ክርስቶ̈ሳባር ዎልኣ ፔታ̇ን ማ̈ቃ̇ንዳቦ ጻማ̇ቂንቲኖን ዎይ ኢ ዓይቂንባራር ኢባር ዎል ፔታ̇ን ማ̈ቃ̇ንዳብ ጻማ̇ቂንቲ̇ኖን ዪንቲ̇ ኤሪባ̈ሳ? 4ኑ̈ኒ ጻማ̇ቂንታ̇ምባ̇ራ ኑ̈ናር ኢባር ዎልኣ ዓይቂ̇ኔ፤ ኢባር ዎልኣ ዱ̈ኪንቲ̇ኔ፤ ዪ̈ኮታ̇ቦ ክርስቶ̈ሲ ጾ̈ሳ̇ ባ̈ባ ዎልቃ ቦንቺ̇ንቲኖምባራ ዓይቃ ጋርታ̇ፖ ዲንዲ̇ኖንዲፌ̈ኒ ኑ̈ናር ኦራ ሼምፓባር ዶኢ̈ሬ።
5ኑ̈ኒ ኢ ዓይቂምባራ ዪኒ̇ፌ̈ን ኢባር ዎልኣ ፔታ̇ን ማ̈ቄ̇ጌዪን ኢ ዓይቃ ጋርታፖ̇ ዲንዲ̇ኖንዲፌ̈ኒ ኑ̈ናር ዓይቃ ጋርታ̇ፖ ዲንዲ̇̈ሬ። 6ሚኖ ናጋራንቻ ማ̈ቂ̇ኖ ኑ ኣሲቲንዳ ፋካምፔ̈ንኬ ኑ̈ኒ ናጋራብ ኣይላ ማ̈ቃ̇ዚን ጋርታፖ̇ ኣታ̇ንዳቦ ናጋራንቻ̇ ማ̈ቂ̇ኖ ኑ ኣሲቲንዳ ክርስቶ̈ሳባር ሶ̈ቲንቲ̇ኖን ኑ ኤሪ̈ሬ። 7ኣባ ጌይን ዓይቂ̇ኖ ኣሲ ናጋራ ኦ̈ንዳብ ዳንዳኢባ̈ሴ። 8ዪዚ ኑ̈ኒ ክርስቶ̈ሳባር ዎልኣ ዓይቄ̇ጌይን፤ ኢባራ ሼምፓባር ዶኣዚን ኑ̈ኒ ኣማ̇ኒ̈ሬ። 9ክርስቶ̈ሲ ዓይቃ ጋርታ̇ፖ̇ ዲንዲኖኮታ̇ቦ ናምኢ ማ̈ቃ̇ር ዓይቂ̇ባ̈ሶንዲኬ ማ ዓይቃር ኢያ ጋማንዳ̇ብ ዳንዳኢባ̈ሶን ኑ ኤሪ̈ሬ። 10ኢ ኣሳ ናኣ ጋልዳ ካውቲኖ ናጋራ ዎልቃ ይሳ̇ንዳቦ፥ ናምኢ ማ̈ቂ̇ ዓይቃ̇ንዳቤይ ፔቲ̇ ቶህ ዓይቂ̇ኔ፤ ማ ኢ ሼምፓባር ዶኣዚንዳ ጾ̈ሳ̇̇̈ ቦንቻ̈̇ብ ዶኢ̈ሬ። 11ዪዚ ዪንቲ̇ ኣሲ ኣሳ ጋልዳፖ ዓይቃባር ፋጊንታ̇ዚንዲፌ̈ኒ ናጋራ ጋልዳፖ̇ ፋጊንቲኖ̈ዲፌ̈ንኬ ዬሱ̈ስ ክርስቶ̈ሳ ጎይባር ጾ̈ሳ̇ቦ ሼምፓባር ዶኢዛ̈ዲፌ̈ን ዪንታ̇ ፋይዲብቴ̇።
12ዪ̈ኮታ̇ቦ ናጋሮ ዓይቃ̇ዝ ዪንታ̇ ኣሲቲን ጋልዳ ካውታሪ ዪንቲ̇ ዪንታ̇ ኢ̈ታ ኢኒ̇ምቦ ኪቲ̇ንታምፔ̈ን ዎታካ̇ይፌ̈ኒ ና̈ጊንቲ̇ብቴ̇። 13ዪና̇ ኢዝፌ̈ኒ ዪንታ̇ ኣሲቲን ኢ̈ት ኦ̈ሳ ኦ̈ምፔ̈ን ማሃሪ ናጋራብ ኣ ኢማ̇ፒቴ። ዎቲናካሬ ዓይቃ ጋርታፖ̇ ዲንዳ̇ሪ ሼምፓባሮ ማ̈ቃ̇ሪ ጾ̈ሳ̇̈ቦ ዪንታ̇ ኢሚ̇ብቴ። ዪንታ̇ ኣሲቲን ዎይን ኮሽ̇ ኦ̈ሳ ኦ̈ምፔ̈ን ማሃሪ ጾ̈ሳ̇ቦ ኢሚ̇ብቴ። 14ዓት ዪንታ̇ ኣቂሲዛ̈ዲ ጾ̈ሳ̇̇ ካንዲዶኬ ሙ̈ሳ ሂጋ̈̇ ጊዳካ̇ዮኮታ̇ቦ ዪንቲ̇ ናጋራብ ኣይላ ማ̈ቃ̇ንዳብ ኮሺ̇ባ̈ሴ።
ጺሊቲ ኦ̈ሳብ ኣይላ ማቂ
15ዪዚ ኑ ኣብዝ ጋኔ? “ሙ̈ሳ ሂጋ̇ ኑ̈ና ኣቂሲባ̈ሴ፤ ጾ̈ሳ̇ ካን ኑ̈ና ኣቂሲ̈ሬ” ጋ̈ሪ ናጋራ ኦ̈ኔ? ዋኣኬ! ዪ ዉርሲ ማ̈ቂ̇ባሴ! 16ዪንቲ̈ ፔቲ̇ ኣሳብ ኣይላ ማ̈ቃ̇ሪ ኪቲንቲ̇ ኤጌይንዶ ና̈ሳ ዪ̈ቦ ዪንቲ̇ ኣይላ ማ̈ቂ̇ኖን ኤሪ̈ሬ፤ ዪና̇ ኢዝፌ̈ን ዪንቲ̇ ናጋራቦ ኪቲ̇ንቴጌዪን ዪንታ̇ ጋልዳ ዓይቃ ኤሄ̈ዝ ናጋሪምቦ ኣይላ ማ̈ቂ̇̈ሬ፤ ጾ̈ሳ̇ቦ ኪቲ̇ንቴጌዪን ጺሊ̇ቲ ዲጚ̈ሬ። 17ዪንቲ̇ ዓኒፖ̇ ቲ̈ን ናጋራብ ኣይላ፤ ዓት ዎቲናካሬ ዪንቲ̇ ዪንታ̇ብ ኢሚ̇ንቲ̇ኖ ቲሚርቲ̇ምቦ ቡ̈ዳ ጋርታፖ̇ ኪ̈ቲንቲ̇ኖኮታ̇ቦ ጾ̈ሳ̇̈̇ቦ ጋላታ ማ̈ቆ̇። 18ናጋራ ኣይሊቲ ጋርታ̇ፖ ኬስካ̇ሪ ጺሊ̇ቲብ ኣይላ ማ̈ቂ̇ኔ። 19ታ̈ኒ ዓኒፌ̈ን ኣሳብ ጌሊዝ ጎይባር ሶ̈ላዚንዳ ዴ̈ጺዝ ሶ̈ላ ሶ̈ሌጌይንዶ ዪንታ̇̇ቦ ጌላባሶንኮታ̇ቦ። ዪንቲ̇ ሚን ጎዳ ኣማ̇ናናፖ ቲ̈ን ዪንታ̇ ኣሲቲን ቄ̈ ባዛብኬ ዉጫ ኦ̈ሳብ ኣይላ ማሂኖንዲፌ̈ኒ ዓት ዪንቲ̇ ጺላ̇ ኦ̈ሳ ኦ̈ንዳቦ ጺሊ̇ቲብ ኣይላ ማ̈ቂ̇ብቴ።
20ዪንቲ̇ ናጋራብ ኣይላ ማቃ̇ር ዎ ኬ̈ሊምባራ ጺላ̇ ባዝ ኦ ጌዪ ዪንታ̇ ዋ̈ዪዝ ባዚ ኣባክ ባዬ̇። 21ዪዚ ዪንቲ̇ ሚን ዪንታ̇ ዬ̈ሊ̇ዝ ባዝ ኦ̈ዝ ኬሊ̇ንባራ ኢዝ ጋርታ̇ፖ̇ ኣብዝ ኮሽ ባዝ ዲጚቴ? ባዝ ዪና̇ ኢዛ ዉርሲ ጋልዳ ዪንታ̇̇ብ ዓይቃ ኤሄ̈ሬ። 22ዓት ዪንቲ̇ ናጋራብ ኣይላ ማ̈ቃ̇ር ዎን ጋርታፖ ኬስካ̇ሪ ጾ̈ሳ̇ ኣይላ ማ̈ቂ̇ኖኮታ̇ቦ ጌ̈ሺ̇ቲ ዪንቲ̇ ዲጚ̈ሬ። ባዝ ዪና̇ ኢዝ ዉርሲንዳ ሜናብ ሼምፓባር ዶኢ። 23ናጋራ ኦ̈ሳ ጋርታፖ ቤንታ̇ዚንዳ ዓይቃ፤ ጾ̈ሳ̇ ጋልዳፖ̇ ኢሚ̇ንታ̇ዝ ኪልሲ̇ንዳ ኑ ጎዳ ዬሱ̈ስ ክርስቶ̈ሳ ጎይባራ ቤንቲ̇ዝ ሜናብ ሼምፓባር ዶኢ።
Currently Selected:
ሮሜ 6: ኦጫ̈ቃማ
Highlight
Share
Copy

Want to have your highlights saved across all your devices? Sign up or sign in