ሉቃ̈ሳ 5
5
ዬሱ̈ሲ ፌ ዎሂን ዬ̇ዝ ኣስ ማራ̇ጺዴ
1ፔቲ̇ ጋላስ ዬሱ̈ሲ ጌ̈ንሳ̈ሬጥ ጋዝ ባሃ̈ሪን ላፍ ኤቃ̇ር ዎዶ̈ን ዎይሊን ዎርዦ ኢ ቡጊድባር ሺ̈ቃሪ ጾ̈ሳ̇̇ ቃ̈ላ ሲስካ̇ንዳ̇ብ ዎልዎልኣ ሱጊንቲ̇ ኤ̈̇ዴ። 2ዪና̇ ኢዝባራ ናምኢ ጎጛን ባሃ̈ሪን ቡጊዲን ጋልዳ̇ ኤቂ̇ንዶ̈ን ቤቂ̇ዴ። ሞላ ኤ̈̇ዛን ጎጚን ጋልዳ̇ፖ̇ ሶ̈ባሪ ፌ ማግላባን ሜ̈ጪ̇̈ርዶ̈ን፥ 3ዬሱ̈ሲ ጎጛን ጊዳ̇ፖ̇ ሲሞ̈ና ጎጚን ጋርታ̇ ጌላሪ ኢ̈ኮ “ጎጚን ኔ ታ̈ብ ባሃ̈ሪን ጊዳ̇ ሙቃ̇ ሺ̈ሺ̇ሼ” ጌይዴ። ኢናፖ̇ ኢ ጎጚን ጋልዳ ዶኣሪ ዎርዣ ታማ̈ርሲ ኤ̈ዴ።
4ዬሱ̈ሲ ዎርዣ ታማ̈ርሳ̇ዚን ዉርሲኖፖ̇ ዓኒ ሲሞ̈ናኮ “ጎጚን ባሃ̈ሪን ጊዳ̇ ጌ̈ኒ̇ንኮ ኤ̈ጛራ ኔ̈ናክ ኔ ላጋ̇ንኬ ሞላ ኤ̈̇ንዳቦ ዪንታ̇ ማግላቢን ኢና ሚሺብቴ” ጌይዴ።
5ሲሞ̈ናሬ “ኣስታማ̈ራ̈ዶ! ኑ̈ኒ ቃሚ̇ን ጋርታ̇ ዎይ ዋ̈ዪሙታ̇ ኣቃሪ ኣባካር ኤ̈ካ̇ዬ፤ ዓት ኔ ኑ̈ና ዪስቶ ጋ̈ዶኮ፥ ማግላባን ሚሻንዳ” ጌይዴ።
6ኢንታ̇ር ኢ ጌይኖንዲፌ̈ኒ ዎቲን ኢንታ̇ ማግላቢን ዱጳ̇ንድ ዬሊ̇ዝ ዲራ̈ስ ዎይሊን ሞላ ኤ̈̇ዴ። 7ሜላ ጎጛ ጋርታ̇ ዎ ላጋ̇ን ዬ̈ር ፌ̈ና ማ̈ዳ̇ምፔ̈ን ካች̇ ጋ̈ር ዉቲ̇ዴ፤ ኢንታ̇ር ዬ̈ሪ ናምኢ ጎጛንባር ሞላ ኩምን ጎጛን ቶኪንቲ̇ ኤ̈̇ዴ።
8ሲሞ̈ን ጴ̈ጥሮ̈ሳር ዪኖ̇ ቤቃ̇ሪ ዬሱ̈ሳ ቶሂን ጋልዳ ኬዳ̇ሪ “ላ̈! ታ̈ኒ ናጋራንቻ̇ ማ̈ቂ̇ኖኮታ̇ቦ ታ̈ክ ኡካፔ̇” ጌይዴ። 9ኢያኬ ኢባር ዎን ዎይ ዎይሊን ሞላ ኤ̈̇ኖኮታ̇ቦ ጋራ̇ሚንታሪ ኢ ዪኖ̇ ጌይኔ። 10ማ ሲሞ̈ና ላጋ̇ን ዛብዶ̈ሳ ናኣን ዓይቆ̈ባኬ ዋ̈ኒ̇ሲ ጋራ̇ሚንቲ̇ዴ። ዬሱ̈ሳር ሲሞ̈ናኮ “ኢ̈ጫፔ̇፤ ቴ ኔ̈ና ታ̈ብ ኣስ ሺ̈ሺ̇ዝ ኣስ ማሃንዳ” ጌይዴ። 11ኢንታ̇ር ፌ ጎጛን ዓኒ ቡጊድ ኬሲ̇ኖፖ̇ ዓኒ ዎይ ባዝ ኣሻ̇ሪ ኢ ዎሂን ዬዴ።
ዬሱ̈ሲ ና̈ሳ ሹያባሮ ፋዴ
ማ̈ቶ̈ሳ 8፡1-4፤ ማ̈ርቆ̈ሳ 1፡40-45
12ፔቲ̇ ጋላስ ዬሱ̈ሲ ፔቲ̇ ካታማ ጋርታ̇ ዎዶ̈ን ኢ ጋሊ̇ን ዎይ ሹያ ሙይኖ ፔቲ̇ ኣሲ ኢ̈ክ ዬይዴ፤ ዪ ና̈ሳ ዬሱ̈ሳ ቤቃ̇ር ኢ ቲ̈ን ጉጲጛሪ “ላ̈! ኔ ታ̈ና ማ̈ዳ̇ንዳ̇ብ ኮያዶኮ ታ̈ና ፋንዳ̇ብ ዳንዳኣ̈ርሽዋ” ጋ̈ር ጌሺዴ። 13ዬሱ̈ሳሬ ፌ ኩሺን ኢ ጋል ጋዳ̇ሪ “ቴ ኔ̈ና ፋንዳብ ዶሳ̈ሬ፥ ፋጻቤ!” ጌይዴ። ኢናፖ̇ ሹዪንዳ̇ ኤሊ̇ባር ኢ ጋልዳ̇ፖ ያዴ።
14ዬሱ̈ሳር ኢ̈ኮ “ኔ ዓኖ̇ ኦ̈ባካር ሶ̈ላፔ̇፤ ሉካ̇ራ ቄ̈ሳብ ኔ ኔ̈ና ቤይሳቤ። ዎርዣ̈ብ ማርካ ማ̈ቃ̇ምፔ̈ኒ ኔ ዓርጊን ዓና̇ ጋልዳፖ̇ ፋጺኖምቦ̇ ሙ̈ሶ ኪ̈ቲ̇ኖ ዣ̈ርሺ̇ን ሺ̈ሻ̇ቤ” ጋ̈ሪ ኢያ ኪ̈ቲ̇ዴ።
15ዬሱ̈ሳ ኦ̈ሳ̈ዲ ቲ̈ኖፖ̇ ኣ̈̇ሪ ሲስኪ̇ንቲ̇ሙታ̇ ዎይ ቤስ̇ ዬሊ̇ዴ፤ ዎይሊን ኣሲ ኢ ሶ̈ሊን ሲስካ̇ንዳብኬ ፌ ዓርጊ̇ን ጋልዳ̇ፖ ፋጻንዳ̇ቦ ኢ̈ክ ሺ̈ቂሬ። 16ዎቲናካር ኢ ዎይሊን ኬል̇ ኣሲ ባዮ̇ ቤስ̇ ሉካ̇ር ዎ̈ሳ ዎ̈ሲ̇̈ሬ።
ዬሱ̈ሲ ፔቲ̇ ዎብ̇ ኣስ ፋዴ
ማ̈ቶ̈ሳ 9፡1-8፤ ማ̈ርቆ̈ሳ 2፡1-12
17ፔቲ̇ ጋላስ ዬሱ̈ሲ ታማ̈ርሳ̇ዚምባራ ጋሊላፕኬ ዪሁዳ ጋርታ̇ ዎ ቤሳ̇ን ጋርታ̇ፖ̇ ዎይ ማ ዬሩሳ̈ላማፖ̇ ዬይኖ ፋራሳ̈ዋንኬ ሙ̈ሳ ሂጋ̇ ታማ̈ርሲዛን ኢ ላፍ ዶኢንዶ̈ን፥ ኢ ማኖ ኣሳን ፋምፔ̈ኒ ጾ̈ሳ̇̇ ዎልቃ̇ ኢባር ማ̈ቂ̇ዴ። 18ዪና̇ ኢዝባራ ኣሳን ፔቲ̇ ዎብ̇ ኣስ ኣርሳባር ቶ̈ካ̇ር ኤኪ̇ ዬ̈ሪ ዬሱ̈ሲ ዎ ኬ̈ን ጋርታ̇ ጌልሳር ኢ ቲ̈ን ጋዳ̇ንዳብ ኮዪንዶ̈ን፥ 19ዎርዣ ዎይሊኖኮታ̇ቦ ኬ̈ ጌልሳ̇ንዳብ ኢንታ ጋሚን ኬ̈ን ጋል ኣፋ ኬስካ̇ሪ ኬ̈ን ኣፎን ሾክ ዎታሪ ና̈ሳ ማዛ ኢ ኣርሲንባር ኣሳ ጊዳ̇ባር ዬሱ̈ሳ ቲ̈ን ሶ̈ቢሲዴ።
20ኢያሬ ኢንታ̇ብ ኣማ̇ና ዎን ቤቃ̇ሪ “ኣ̈ን ና̈ሳ̈ዶ! ኔ ናጋራ ኔ̈ብ ኣቶ̇ ጌዪንቲኔ” ጌይዴ። 21ሙ̈ሳ ሂጋ̇ ታማ̈ርሲዛንኬ ፋራሳ̈ዋን “ዓፌ̈ኖ ጾ̈ሳ̇̇ ቆ̈ዛ ኢ ኣ ኣሳ? ፔቲ̇ ጾ̈ሳ̇̇̈ፖ̇ ኣቲ̇ን ሜላ ኣሳ ናጋራ ኣቶ̇ ጋ̈ንዳ̇ቦ ዳንዳኢዝ ኣሲ ዎ?” ጋ̈ሪ ቆፒ̇ዴ። 22ዬሱ̈ሳር ኢንታ̇ ቆፊን ኤሪኖኮታ̇ቦ ኢንታኮ “ዪንቲ̇ ኣባብ ዪ̈ዲፌ̈ን ዪንታ̇ ቡ̈ዳ ጋርታ̇ ቆፒ̇̈ራ? 23‘ኔ ናጋ̈ሪን ኔ̈ብ ኣቶ̇ ጌይንቲ̇ኔ’ ጋ̈ዚምፔኬ ‘ዲንዳ̇ር ሉካ̇ቤ’ ጋ̈ዚምፖ̇ ዎና̇ ዴ̈ጻ̇̈ራ? 24ዪና̇ ቴ ጌይኖንዳ̇ ታ̈ኒ ኣሳ ናኣ̈ዲ ሳ̈ዝ ጋልዳ̇ ኣሳ ናኣን ናጋራ ኣቶ̇ ጋ̈ንዳ̇ቦ ሲልጣ̈ና ታ̈ብ ዎን ዪንቲ̇ ኤራምፔ̈ኒ ጋ̈ሪ ና̈ሳ ዎባ̇̈ኮ “ዲንዳ̇ር ኔ ኣርሲን ቶ̈ካ̇ር ኔ ኣ̈ል ሉካ̇ቤ” ጌይዴ። 25ኢያሬ ኤሊ̇ባር ዲንዳ̇ር ኢንታ̇ ቲ̈ን ኤቂ̇ዴ። ኢናፖ̇ ፌ ሱርቂ̇ኖ ኣርሲን ቶ̈ካ̇ር ጾ̈ሳ̇̇ ጋላቲ ሙታ̇ ፌ ኣ̈ል ሉኪ̇ዴ። 26ዪና̇ ኢዝባራ ዎይን ጋራ̇ሚንታ̇ሪ ጾ̈ሳ̇̇ ጋላቲ ሙታ̇ “ዓታ̇̈ቦ ኑ̈ኒ ጉዳ ባዝ ቤቃ̇ሽ” ጌዪ ኢ̈ቺ̇ ኢንታ̇ ኤ̈̇ዴ።
ዬሱ̈ሲ ሌ̈ዊ ጌይዝ ና̈ሳ ጼይጊዴ
ማ̈ቶ̈ሳ 9፡9-13፤ ማ̈ርቆ̈ሳ 2፡13-17
27ዪኒ̇ፖ ዓኒ ዬሱ̈ሲ ኢናፖ̇ ኬስኪ̇ ሉካ̇ሪ ቃራጻ ቃጺሲዛ ሌ̈ዊ ጌይዝ ና̈ሳ̈ዲ ቃራጻ ቃጺሲዝ ቤስ̇ ጋልዳ ዶኣር ዎዶ̈ን ቤቃ̇ሪ “ታ ዎሂን ዬ̈ቤ” ጌይዴ። 28ኢያር ዎይ ባዝ ኣሻ̇ሪ ዲንዳር ኢ ዎሂን ሉኪ̇ዴ። 29ሌ̈ዊ ዬሱ̈ሳቦ ፌ ኣ̈ል ጴች ጊብዣ ጊ̈ጊሲዴ፤ ቃራጻ ቃጺሲዝ ዎይሊን ኣሳንኬ ሜላ ኣሳንሬ ኢንታ̇ባራ ጊብዣ ሞ̈ንዳ̇ብ ዶኢዴ። 30ፋራሳ̈ዋንኬ ሙ̈ሳ ሂጋ̇ ታማ̈ርሲዛን ኢንታ̇ኮ “ዪንቲ̇ ቃራጻ ቃጺሲዛንባርኬ ናጋራንቻ̇ንባራ ዎልኣ ኣባቦ ሙዪ ኡሽኪ̇ ዎቲራ?” ጌዪ ኢ ታማ̈ራን ጋልዳ̇ ጉንዲሚዴ።
31ዬሱ̈ሳሬ ኢንታ̇ኮ “ማዛንቦዶኬ ማባ̈ሶንቦ ኣኪማ ኮሺ̇ባ̈ሴ። 32ታ̈ናር ናጋራቻ̇ን ማ̈ሪቲ ጌላምፔ̈ንዶኬ ጺላ̇ን ጼይጋንዳ̇ብ ዬ̈ካ̇ዬ” ጋ̈ር ማሂዴ።
ጾ̈ማ ጎይ ኦይጪ̇ኖ ኦይች
ማ̈ቶ̈ሳ 9፡14-17፤ ማ̈ርቆ̈ሳ 2፡18-22
33ኢንታ̇ሬ ዬሱ̈ሳኮ “ዋ̈ኒ̇ሳ ታማ̈ራን ዎይሊን ጋላስ ጾ̈ሚ ዎቲ̈ሪ፤ ፋራሳ̈ዋን ታማ̈ራንሬ ዪና̇ ኢዝፌ̈ን ዎቲ̈ሬ። ኔ̈ኮን ሙዪ ኡሽኪ̇ ዎታዚን ኣባ?” ጌይዴ። 34ዬሱ̈ሲ ኢንታ̇ኮ “ኢሳ̇ ኢንታ̇ባር ዶኣምባ̇ራ ቱሪን ኣሳን ጾ̈ማምፔ̈ን ዎታ̈ንዳ̇ቦ ዪንቲ̇ ዳንዳኢ̈ራ? 35ዎቲናካሬ ኢሳ̇̈ዲ ኢንታ̇ ጋልዳ̇ፖ ሉኪ̇ዝ ቃሚ̇ ዬይሬ፥ ዪና̇ ኢዝባራ ኢንቲ̇ ጾ̈ሚ̈ሬ” ጌይዴ።
36ማ ኢንታ̇ኮ ሚሳ̇̈ሊባራ “ኦራ ኣፊላ ጋልዳፖ̇ ቃጺ̇ ኤካ̇ሪ ሲላ ኣፊላ ጋልዳ̇ ኪቢዝ ኣሲ ኦ̈ናካር ባዬ̇፤ ዪኒ̇ፌ̈ን ዎቴጌይንዶ ኦራ ጫርቂን ኢ ሜላ̇ ዳርሲ̇ ኢ̈ሲ̇ኔ። ኦራ ጫርቂ̇ንዳ̇ ሲላ ኣፊሊምቦ̇ ማ̈ቃ̇ባሴ። 37ቢርት ኤ̈ሲ̇ኖ ኤ̈ስ ኤካ̇ሪ ሲላ ኦካራ ጋርታ̇ ጋዲ̇ዝ ኣሲ ኦ̈ናካር ባዬ። ዪኒፌ̈ን ዎቴጌይንዶ̇ ኤ̈ሲ̇ንዳ̇ ኦካሪን ዳርሳ̇̈ሬ። ኤ̈ሲ̇ንዳ̇ር ዉልኢንታ̇ሬ፤ ኦካሪንዳ̇ር ቶጚንታ̇ ኣታ̇̈ሬ። 38ዪ̈ኮታ̇ቦ ቢርት ኤ̈ሲ̇ኖ ኤ̈ስ ኦራ ኦካራ ጋርታ̇ ሚሻንዳ̇ብ ኮሺ̇̈ሬ። 39ዪዚ ‘ሜሊኖ ኤ̈ሲ̇ ኮሼ̇’ ጌይዛኮታ̇ቦ ሜሊኖ ኤ̈ስ ኡሽኪ̇ ማ̈ቃ̇ሪ፥ ቢርት ማ̈ኖ ኤ̈ስ ኡሽካ̇ንዳብ ኮዪዝ ኣሲ ባዬ̇” ጋ̈ር ሶ̈ሊዴ።
Currently Selected:
ሉቃ̈ሳ 5: ኦጫ̈ቃማ
Highlight
Share
Copy
Want to have your highlights saved across all your devices? Sign up or sign in
