ዋ̈ኒ̇ሳ 20

ዬሱ̈ሲ ዓይቃ ጋርታ̇ፖ̇ ዲንዲ̇ዴ

ማ̈ቶ̈ሳ 28፡1-8፤ ማ̈ርቆ̈ሳ 16፡1-8፤ ሉቃ̈ሳ 24፡1-10

1ዎጊ̇ ጋላስ ጌ̈ሽ ቢርት ጋማ ዳርኣዚምባ̇ራ ማ̈ራማ ማግዳሎ̈ንዳ ዬሱ̈ሳ ዱ̈ፊንኮ̇ ሉካ̇ዴ። ኢዛ ኢና ዬላ̇ምባራ ዱ̈ፊን ካሪን ጋልዳ ዎ ሹቺ̇ን ፊራር ፋኪ̇ንዶ̈ን ቤቃ̇ዴ። 2ኢዛር ሲሞ̈ን ጴ̈ጥሮ̈ሳኬ ዬሱ̈ሳ ካዝ ኢ ታማ̈ራ ሜላ̈ኮ ዎባር ሉካ̇ራ ኢንታኮ “ጎዳ ዱ̈ፊን ጋርታ̇ፖ̇ ኬሲ̇ ኤኪ̇ኔ፤ ኢንቲ̇ ኢያ ዎይዲ ጋዲ̇ኖኮ ኑ ኤሪባ̈ሴ” ጋ̈ዴ።

3ኢናፖ̇ ጴ̈ጥሮ̈ሳኬ ኢ ታማ̈ራ ሜላ̈ዲኬ ዎልኣ ኬስካ̇ሪ ዱ̈ፊንኮ̇ ሉኪ̇ዴ። 4ናምኣን ዎልኣ ዎጺ̈ርዶሪ ሜላ ኢ ታማራ̈ዲ ጴ̈ጥሮ̈ሳፖ̇ ቲ̈ኒታር ዱ̈ፊንኮ̇ ዬ̈ሊ̇ዴ። 5ኢ ዪርክ ጋ̈ሪ ቤቃ̇ምባራ ኢያ ጻቂኖ ኣፊሊን ኢና ዎን ቤቂ̇ዴ፤ ዎቲናካር ዱ̈ፊን ጋርታ̇ ጌላካ̇ዬ። 6ኢ ዎሂን ዬንት ጋልዳ ዎ ሲሞ̈ን ጴ̈ጥሮ̈ሲ ዬላ̇ሪ ዱ̈ፊን ጋርታ ጌሊዴ፤ ኢያር ዱ̈ፋ ኣፊሊን ኢዞ ቤቂ̇ዴ። 7ማ ዬሱ̈ሳ ቆሚ̇ን ጋልዳ ጻ̈ጺንቲ̇ኖ ኣፊሊንዳ ኢያ ጻቂኖ ኣፊሊንባር ዎልኣ ጊዳካ̇ይዶ̈ን ፌ̈ብ ዱማ ቁርቂ̇ንታ̇ር ዎን ቤቂ̇ዴ። 8ዪኒ̇ፖ ዎሃ ቲ̈ኒታር ጎሪንኮ̇ ዬሊ̇ኖ ዬሱ̈ስ ታማ̈ራ̈ዲ ጎሪን ጋርታ̇ ጌላር ቤቃ̇ሪ ኪን ጋ̈ሪ ኣማ̇ኒ̇ዴ። 9ኢ ዓይቃ ጋርታ̇ፖ̇ ዲንዳንዳብ ኮሻ̇ዚን ጌ̈ሻ̇ ማጻ̈ፋ ጋልዳ̇ ሶ̈ሊኖን ኢንታ̇ብ ጌላካ̇ዬ።

ዬሱ̈ሲ ማ̈ራማ ማግዳሎምቦ̇ ቤንቲ̇ዴ

10ዪኒ̇ፖ ዎሃ ኢ ታማራን ማ̈ቃ̇ር ፌ ኣ̈ል ሉኪ̇ዴ። 11ማ̈ራማ ዱ̈ፊን ላፍ ኤቃ̇ራ ዬ̈ካ̈̇ሬ፤ ኢዛ ዬ̈ካሙታ̇ዶ̈ራ ዱ̈ፊን ጋርሲን ቤቃ̇ንዳ̇ቦ ዪርክ ጋ̈ዴ። 12ዬሱ̈ሳ ኣሂን ዎ ቤሲ̇ን ጋልዳ̇ ቦ̈ርስ ኣፊላ ማኢኖ ናምኢ ኪ̈ታ̇ንቻ̇ን ፔታ̇ና ቆማቻ̇ ጎይ ፔታ̇ና ቶሃቻ̇ ጎይ ዶኢንዶ̈ን ቤቃ̇ዴ።

13ኢንታ̇ር ኢዝኮ̇ “ኣ̈ሽ! ኔ ኣባብ ዬ̈ካ̇̈ራ?” ጋ̈ሪ ኢዞ ኦይጪ̇ዴ። ኢዛር ኢንታ̇ኮ “ቴ ጎዳ ኦ̈ናክ ኤኪ̇ኔ፤ ኢያ ዎንዳ̇ ጋዲ̇ኖኮ ቴ ኤራባሴ” ጋ̈ዴ። 14ዪና̇ ጋ̈ራ ኢዛ ጋስ ቢሪንታ̇ምባ̇ራ ዬሱ̈ሲ ኢና ኤቃ̇ር ዎዶ̈ን ቤቃ̇ዴ። ዎቲናካር ኢ ዬሱ̈ሳ ማ̈ቂ̇ኖን ኢዛ ኤራካ̇ዬ።

15ኢያር ኢዝኮ̇ “ኣ̈ሽ! ኔ ኣባብ ዬ̈ካ̇̈ራ? ኔ ኦ̈ና ኮያ̈ራ?” ጌይዴ።

ኢዛር ኢ ኣታኪልቲን ጋርታ̇ ኦ̈ዝ ኣስ ኢዝኮ̇ ማይጺን ኢ̈ኮ “ጎዳ̈ዶ! ኔ ኤኪ̇ኖኮ ዋ̈ዴ̇ ዎንዳ̇ ጋዲ̇ኖኮ ታ̈ብ ሶ̈ሊሼ፥ ቴ ሉካ̇ ኢያ ኤካ̇ንዳ̇” ጋ̈ዴ።

16ዬሱ̈ሳር ኢዝኮ “ማ̈ራሜ!” ጌዪ ኢዞ ጼይጊዴ። ኢዛር ኢ̈ኮ ጌዳ ማ̈ቃ̇ራ ኣይሁድ ኖ̈ናባራ “ሬቡ̈ኒ!” ጋ̈ዴ። ኢዝ ቢርሺቺ̇ንዳ “ኣስታማ̈ራ̈ዶ” ጌንቴ̇። 17ዬሱ̈ሳሬ ኢዝኮ̇ “ታ̈ና ኤ̈ፔ̇፥ ቴ ቴ ባ̈ባ̈ኮ ቢርት ማ̈ቃ̇ ሉካካ̇ዬ፤ ዓት ኔ̈ኒ ቴ ታማ̈ራንኮ ሉካ̇ራ ‘ታ̈ብኬ̇ ዪንታ̇ቦ ዎልኣ ባ̈ባ̈ኮ፥ ታ̈ብኬ ዪንታ̇ቦ ዎልኣ ጾ̈ሳ̇̇̈ኮ ሉካ̇̈ሬ ጌይኔ’ ጋ̈ራ ኢንታ̇ብ ሶ̈ላቤ” ጌይዴ።

18ማ̈ራማ ማግዳሎንዳ̇ ዬሱ̈ሳ ታማ̈ራ̈ንኮ ዬ̈ራ “ታ̈ኒ ጎዳ ቤቃ̇ሼ!” ጋ̈ዴ። ማ ኢ ኢዝቦ ሶ̈ሊኖን ኢንታ̇ብ ሶ̈ላዴ።

ዬሱ̈ሲ ፌ ታማ̈ራንቦ ቤንቲ̇ዴ

19ዪና̇ ኢዝ ቃሚ̇ን ዎጊ̇ ጋላስ ኦማ ዬሱ̈ሳ ታማ̈ራን ኣይሁዳንቦ ኢ̈ጫ̇ር ፌ ጋልዳ ካሪን ዪብጻር ዎልኣ ሺ̈ቃሪ ዎዶን፥ ዬሱ̈ሲ ዬ̈ሪ ኢንታ̇ ጊዳ̇ ኤቃ̇ር ኢንታኮ “ሳሪቲ ዪንታ̇ብ ማ̈ቆ̇” ጌይዴ። 20ዪኖ̇ ጋ̈ሪ ፌ ኩሻንኬ ፌ ባሪንን ኢንታ̇ ቤይሲዴ፤ ኢ ታማ̈ራንሬ ጎዳ ቤቃ̇ሪ ዎይሊን ኡፋይቲ̇ዴ።

21ዬሱ̈ሲ ማ̈ቃ̇ሪ ኢንታ̇ኮ “ሳሪቲ ዪንታ̇ብ ማ̈ቆ̇! ቴ ባ̈ባ̈ዲ ታ̈ና ኪ̈ቲ̇ ሚሺኖንዲፌ̈ኒ ታ̈ናሬ ዪንታ̇ ኪ̈ታ̇ ሚሻ̈ሬ” ጌይዴ። 22ዪኖ̇ ጌይኖፖ̇ ዎሃ ኢንታ̇ ጋልዳ̇ ኡፍ ጋ̈ር ፉጋ̇ሪ “ጌ̈ሻ̇ ኣያ̇ና ኤኪ̇ብቴ፤ 23ኣሳ ናጋራ ዪንቲ̇ ኢንታ̇ብ ኣቶ̇ ጌዬጌይን ኢንታ̇ብ ኣቶ̇ ጌዪንታ̇̈ሬ፤ ኢንታ̇ ናጋሪን ዪንቲ̇ ኢንታ̇ብ ኣቶ̇ ጋ̈ካ̇ይ ኣቴ̇ጌዪን ኢንታ̇ብ ኣቶ̇ ጌዪንታ̇ባሴ” ጌይዴ።

ዬሱ̈ሲ ቶ̈ማ̈ሳቦ ቤንቲ̇ዴ

24ዬሱ̈ሲ ፌ ታማ̈ራንኮ ዬ̈ዚምባ̇ራ ታጶ̇ ናምኣን ጋርታ̇ፖ̇ ፔታ̇ና ዲዲሞ̈ስ ጌይዛ ቶ̈ማ̈ሲ ባዬ̇። 25ኢ ታማ̈ራን ዶካ̇ን ቶ̈ማ̈ሳኮ “ኑ̈ኒ ጎዳ ቤቃ̇ሼ!” ጌይዴ። ኢያር ኢንታ̇ኮ “ታ̈ኒ ሚስማ̈ራባር ኡሪንቲ̇ኖ ኢ ኩሺን ፉሊን ቤቃካ̇ይዶ̈ራ፥ ሚስማ̈ራን ጌሊኖ ፉሊምባር ቴ ጊልኢን ሚሻካ̇ይዶ̈ርኬ፥ ኢ ባሪንን ጫዲንቲ̇ኖን ካሪንባር ቴ ኩሺን ጌልሳ ቤቃካይዶ̈ራ ኪን ጌያ ኣማ̇ናባሴ” ጌይዴ።

26ላማካይ ቃማ̇ፖ̇ ዎሃ ዓታ̇ር ኢ ታማራን ኬ̈ ጋርታ̇ ዎዶ̈ን ቶ̈ማ̈ሳሬ ኢንታ̇ባር ዎ። ካሪን ዪብጺንቲንዶ̈ን ዬሱ̈ሲ ዬ̈ሪ ኢንታ ጊዳ̇ ኤቃ̇ሪ “ሳሪቲ ዪንታ̇ብ ማቆ̇!” ጌይዴ። 27ኢናፖ̇ ቶ̈ማ̈ሳኮ “ኔ ጊልኢን ዓይ ኤሄ̈ራ ቴ ኩሻን ቤቃ̇ቤ፤ ቴ ባሪንን ጫዲንቲ̇ኖ ካሪንባር ኔ ኩሽ ሚሻራ ቤቃ̇ቤ፤ ኣማ̇ናብዶኬ ኣማናካ̈ዮ ኣስ ማ̈ቃፔ” ጌይዴ።

28ቶ̈ማ̈ሳሬ ኢ̈ኮ “ቴ ጎዳ̈ዶ! ቴ ጾ̈ሳ̇̇̈ዶ!” ጌይዴ።

29ዬሱ̈ሳር ኢ̈ኮ “ኔ ታ̈ና ቤቂ̇ኖኮታ̇ብ ኣማ̇ኒኔ፤ ታ̈ና ቤቃካ̇ይ ኣማ̇ኒዛን ኢንቲ̇ ኣንጂንቲ̇ኖን” ጌይዴ።

30ዬሱ̈ሲ ዓና̇ ማጻ̈ፊን ጋልዳ ጻ̈ፊንታ̇ካ̇ዮ ሜላ ዎይሊን ታ̈ሚ̇ራታ ፌ ታማ̈ራን ቲ̈ን ኦ̈ኔ። 31ዎቲናካሬ ዬሱ̈ሲ ኢ ክርስቶ̈ስ ጾ̈ሳ̇̇ ናኢ ማ̈ቂ̇ኖን ኣማ̇ናምፔ̈ን ማ ኣማ̇ናር ኢ ሱምባር ዪንታ̇ብ ሜናብ ሼምፓባር ዶኢ ዶኣምፔ̈ን ዓና̇ ዪንታ̇ብ ጻ̈ፊንቲ̇ኔ።

Currently Selected:

ዋ̈ኒ̇ሳ 20: ኦጫ̈ቃማ

Highlight

Copy