Yoosuwa 17

MANASSÊ-KEDOH YECEEN BAAXO

1Yuusufuk naharsi-baxay Manasse deqsitahiyyak rade marah yeceen baaxo ah teeti. Manassek naharsi-baxi Makir deqsitak yen. Makir Gilqad xale. Makir carbil yimixxige celemik ten. Tonna leemiik Muusa Ordon weeqaytuk ayrô-mawqa le kabut raqta Gilqad kee Basan deqsitta baaxo Makirik rade marah yeceeh suge. 2Yoosuwa wohuk kalah yan maray Manasseh yoobokehiyyah Ordonuk ayrô-culma le kabut raqta baaxol ken xexxar keenih yecee. Manassek too baaxo akah yeceenim maa maraay itteenikii, Abiqeder kee Ceelek kee Asriil kee Seekem kee Ceefar kee Samiidaq deqsitta labhak rade marak ten. Too labha yakkeenimiik Yuusuf-Manassek rade marak yenen. Kulli num keenik isi kedoh exxak abbah yen. 3Manassek baxi baxah yan Gilqad lab baxa xaleeh; too num migaaqah Ceefar deqsitak yen. Ceefar kaadu Xalofcad deqsita baxa xale. Xalofcad say xaylo akke waytek, lab xaylo maxalinna. Too urri migaaqah Macla kee Noqa kee Cogla kee Milka kee Tirxa deqsitak yenen. 4Too urri sek Alqedar kee Yoosuwa kee abbobtih yen mara fan gexen. Iyyeenimii, «Duma YALLI Muusakaa, ‹Xalofcad xayloh oson akah yooboken kedoh tacayu wayta baaxok ken xexxar keenih baxissa haay ucuy› 'yaanam iyyeh suge» kaak iyyen. #Loowo 27:1-7 Tonna leemiik Yoosuwa, YALLI elle iyye innal, ken marak labhak kaxxih baaxok ken xexxar baxissa heeh keenih yecee. 5-6Yoosuwa, Manassek rade marak labhak kaxxih a sayyoh baaxo yeceemih sabbatah, Manasseh yooboke mari Ordonuk ayrô-mawqa le kabut raaqa Gilqad kee Basan rasuy duma ken maadehiyyak kalah ossotinah tabna exxa baaxok Ordonuk ayrô-culma le kabul geen.

7Ordonuk ayrô-culma le kabul Manasseh yooboke marah tontocowwe baaxo, Aaser deqsitta kedoh yeceen baaxok xabba haanamaay Mikmata deqsitta magaalay Seekem magaalak ayrô-mawqa le kabut raqtahiyyah amma 'yaanam tan ikke fanah gufak ten. Tokkeek cuduud keenik gabbi qaxak Qen-Taffuwac deqsitta magaala fan guffa haak yen. 8Taffuwac dariifal tan baaxo Manasseh im tekke. Takkay immay Taffuwac magaalay cuduudut raqtahiyya Efrayimik rade marih baaxo tekke. 9Cuduud tokkeek Kaana deqsita daqar katayak Maditraaniyah Badat yeede. Too daqaarak gabbi-qaxat raqta baaxol Efrayim kedo geyte magaalooli Manassê-kedoh yeceen baaxo fanat raqte. Manassek cuduud daqaarak kilbat le kabi gexxa 'yam gexak Maditraaniyah bad guffa haak yeneeh; tokket edde aadayuk yen. 10Efrayim kee Manasseh yeceen baaxok ayrô-culma le kabul, Maditraaniyah bad cuduuduh keenik raaqa. Efrayim geen baaxo gabbi-qaxa raqtaah; Manasse geen baaxo kilbat le kabu raqta. Manassek kilbat le kabul cuduud keenik Aaser deqsitta kedo le baaxo gufak yeneeh; ayrô-mawqa le kabul Issakar deqsitta kedo le baaxot aadayuk yen. 11Issakar kee Aaser geen baaxol, Manasseh yeceen magaalooli ah teeti. Beet-San kee Yiblaqam kee, Door deqsitta magaalay baddi afal tanihiyya kee, Qendor kee Taqnak kee Magiddo kee ken dariifal enna 'ta gaandoodi inkih kenim tekke. 12Takkay immay Manasseh yooboke mari too magaaloolil suge mara wokkek yayyaaqoonu yeffereenih. Tohum Kanqaan marak ten. Too mari too magaaloolil elle raaqen. 13Israayil mari sarrah qande baahak baaheeniih; tohuh ken mayyaaqinnoonuy, isinni naqoosa ken aben.

YUUSUFUK RADE MARI YOOSUWAK, «BAAXO NEK QUNXAH» IYYE

14Yuusufuk rade mari Yoosuwal yemeeteeh kaak iyyeemihii, «Baaxok dibuk inki exxâ-baxa neh akah teceem macaay? YALLI barkat net heeh nee yeymeggeeh kaxxam manginok» kaak iyyen.

15Yoosuwa keenil gacseemih, «Kaxxam temeggeeniih Efrayim rasuk qaleela mango exxa siinik daggowtek, wonnal Feriidah yooboke mara kee Rafaayim akak iyyan marih baaxoy garboh tanihiyya gexaay too garbo irgiqqa haay booxa abba haay elle gaca» keenik iyye.

16Too waqdi Yuusufuk radde Efrayim kee Manasseh yooboke mari Yoosuwak iyyeemih, «Qaleela le baaxo nek qunxaah; takkay immay Kanqaan maray booxaaxah tan baaxol yanihiyya birtak bicsen gaariiray carbi edde abaanahiyya lon. Too mari elle yanim, Beet-San deqsitta magaala kee tet dariifal tan gaandoodi kee tonnah Yidraqel-Daqar deqsita aracak ten» kaak iyyen.

17Yoosuwa, Efrayim kee Manasseh yooboke marak garabak iyyemii, «Isin mango mara kinnitoonuuh; kaadu celeemah yan mara kinnitoonuuh away geyteenimit ossotinah baaxo geetton. 18Qaleela mango baaxo siinih antacawwimele. Garboh tani'mmay caxa akak irgiqqaay booxah cabba haay a exxaay woo exxa akak isinnih haysita. Wokkel yan Kanqaan mari carbi gaariiray birtak abeenihiyya loonuuh celeemah yaniinih immay, qeebit ken ayyaaqetton» keenik iyye.

Currently Selected:

Yoosuwa 17: NKM

Highlight

Copy