मरकुस 7

परमेस्वरना नियमतुन पालन किम्ट

(मत्ति १५:१-९)

1येरुसलेमताल वास मतोर परीसि अनि नियमतुन करिहवालोरक हुचुक लोकुरक येसुना हेरे जमा आतुरक। 2अनि ओरक येसुना हुचुक चेलालोरकुन कय नोरवाय रोटिंग तिन्दानपा हुळतुरक। 3बाक्याकि परीसि अनि सबोय यहुदिलोकुरक आपुना पुरकातोर लोकुरा रितिरिवाजता अनुसार कय नोरोर अचोवनाह रोटिंग तिनोर। 4अनि हाटुमताल वास येर तुंगवाय जेवन तिनोर अनि दळियांग अनि गळु अनि तांबाता दळयाहतुन मान्जिस नोराना इदाम पकाय पोल्लोंग मान कियाना ओरा नियम मन्तांग। 5इन्जोर ओरक परीसि अनि मूसाना नियमतुन करिहवालोरक येसुन पुच्चेमातुरक, “नियोर चेलालोर बाक्या पुरकातोर लोकुरा रितिरिवाजते ताके मायोर अनि कय नोरवाय जेवन तिन्तोर।” 6येसु ओरकुन इतुर, “निमाट कपटिलोरा बारेते परमेस्वरना पोल्लो वेहवाल यशायाह वेहतोर परमेस्वरना ओद पोल्लो बराबर मन्ता, ओर पवित्र पुस्तकतिगा इदाम कोटस मतोर,

‘येरक लोकुरक टोडिते नावा आदर किन्तोरक, मति ओरा मन नावाताल लक मन्ता#यश २९:१३।

7अनि मानेयना आग्यातुन उपदेश किस ओरक करयान्तोरक इन्जोर ओरक नाकुन व्यर्थ उपासना किन्तोरक।

8बाक्याकि निमाट परमेस्वरना आग्यातुन तासिस मानेयना रितिरिवाजतुन मानेमान्तोरिट।’ ”

9अनि येसु ओरकुन इतुर, “निमाट आपुना रितिरिवाज मानेमायान साटि परमेस्वरना आग्या बचोन गिरिदाते हरचान्तोरिट! 10बाक्याकि ‘आपुनोर बाबो अनि अवहारिना आदर किम अनि बोरायि बाबो अनि अवहारिन बाताले गलति इनिर ते ओन होवक्स वाटाना’ इन्जोर मूसाल इतोर बहे#निर २०:१२; व्यव ५:१६; निर २१:१७; लेव्य २०:९। 11मति निमाट ते बोरायि मानेय आपुनोर बाबो अवहारिन इनिर: ‘नना मिया मदत कियाला परोन बाक्याकि मिया साटि कियाना मन्ता ओद पोल्लो नना परमेस्वरिन कुरबान अर्थ समरपित कितान’ इदाम निमाट इन्तोरिट ते मनि इन्जोर निमाट वेहान्तोरिट। 12ते निमाट ओर लोकुरकुन आपुना अवाल-बाबोन बाताले मदत कियाला सन्दि हेवोर। 13इदाम निमाट आपुना रितिरिवाजता कारण परमेस्वरना पोल्लोतुन कमजोर किन्तोरिट अनि इदाम निमाट दुसरो पकाय पोल्लोंग किन्तोरिट।”

मानेयतुन अशुद्ध केवांग पोल्लोंग

(मत्ति १५:१०-२०)

14असके येसु लोकुरकुन आपुना हेरे केयसुन ओरकुन इतुर, “निमाट सबोय नावा केन्जाट, अनि समजेमाम्ट। 15बाहरोटाल वास मानेयना लोपा हन्दाना बोदे चिज ओन अशुद्ध किया परो। मति बोद चिज मानेयना लोपाडाल पसिन्तांग, अवे मानेयतुन अशुद्ध किन्तांग। 16(निमाट बाताल केन्जान्तोरिट अदेन पकाय ध्यानते केन्जुन सम्जेकिम्ट#मर ४:९।”) 17ओर भीळता हेरेटाल लोन हतुर ते ओनोर चेलालोर इद पिटोता बारेते ओन पुच्चेमातुरक। 18येसु ओरकुन इतुर, “बाताल निमाट वने इदाम समजेमायविट बहे? बोद चिज बाहरोटाल मानेयना लोपा दान्ता ओद मानेयतुन अशुद्ध किया परो इन्जोर बाताल मिकुन समजेमायविट बहे? 19बाक्याकि अव ओना मन्दे आयो, मति पोटातिगा दान्ता अनि ओना मेन्दुलतिगाडाल बाहर पसियस दान्ता” इदाम इन्ज येसु सबोय तिन्दाना चिजतुन शुद्ध मन्ता ठहरे कितुर। 20असा ओर इतुर, “बोद मानेयनिगाडाल पसिन्ता केवल ओद मानेयतुन अशुद्ध किन्ता। 21बाक्याकि लोपाडाल अर्थ मानेयना मन्दे खराब खराब विचार, व्यभिचार, कलाना, हव्काना, दुसरो मानेयना मुत्ते या दुसरो आळता मुदियालनासंग हुन्जाना। 22लोभ, दुष्टता, चळ, लालुच, खराब नजर, चाहळिंग, घमन्ड अनि मुर्खता इव पोल्लोंग पसियान्ता। 23इव सबोय पोल्लोंग मानेयना मनताल पसियस मानेयतुन अशुद्ध किन्तांग।”

उन्दि बायिना विस्वास

(मत्ति १५:२१-२८)

24पजा येसु अगडाल तेदस सूर प्रदेशता हेरे वातुर अनि उन्दि लोन हतुर बोरे पुनमाकिर इन्जोर ओना इच्चा मता, मति ओर मक परोर। 25अनि सान्डे उन्दि बायि ओदेना हुडला पेडिनिगा दुष्टात्मा मता ओद येसुना पोल्लोंग केन्ज ओना हेरे वात अनि ओना काल्क अरत। 26ओद सुरुपिनिकि जातिता उन्दि युनानि बायि मता, नावा पेडिनिगाडाल दुष्टात्मा पसियस हेविर इन्जोर ओद ओन विनन्ति कित। 27ओर ओदेन इतुर, “पहले आपुना पेकोरकुन तृप्त आयिला हिम्ट बाक्याकि पेकोरा रोटिंग ओस नयकना मुने वाटाना उचित हिले#७:२७ इगा पेकोरक मन्जे यहुदिलोकुरक अनि नय मन्जे बोर यहुदि आयोर ओर लोकुरक मन्तोरक।” 28ओद ओन इदाम उत्तर हितु, “निमा वेहता पोल्लो खरोय मन्ता प्रबु, असके नयक वने टेबलना अडिय अरस मन्ता बालकना हारिनुंग कलियस तिन्ता।” 29ओर ओदेन इतुर, “इद पोल्लोता कारण निमा हन, दुष्टात्मा निया पेडिताल पसियस हता।” 30ओद आपुना लोन वासुन पेडि कटुलतिगा हुन्जता अनि दुष्टात्मा पसियस हता इन्जोर हुळतु।

येसु बहराल अनि मुकाल मानेयतुन सुदरे किन्तोर

31येसु असा सूर प्रदेशताल पसियस सिदोन सहेरताल दिकापुलिस प्रदेश आसोर गलील नहारता टकातिगा अवतुर। 32अगा बहराल अनि मुकाल वने मतोर वरोर मानेयतुन लोकुरक ओना हेरे तच येसु आपुना कय ओना पोरो इरिर इन्जोर विनन्ति कितुरक। 33असके ओर बहरान भीळता अलगो ओतुर अनि आपुना वळेन्ज ओना कविदिगा माहतुर अनि उक्स ओना वळेन्जतुन इटतुर। 34अनि स्वरगतिके हुळस स्वास येतितुर अनि “इप्फतह” अर्थ “कुलेमाम” इदाम इतुर। 35सान्डे ओना कविंग खुलेमातुंग अनि ओना वन्जेरता गट्टि वने खोलेमात अनि ओर सोबाय वळकिला लागतुर। 36असके इद पोल्लो बोनेसंग वेहमा इन्जोर येसु ओरकुन वेहतुर मति बचोन ओन वळकमा इन्जोर आग्या हितुर अचोन ओरक इद पोल्लो फयलेकितुरक। 37“ओर सबोय सुदरे कितुर; ओर बहरान केन्जाना अनि मुकान वळकाना लाव हिन्तोर” इदाम ओरक इन्ज पकाय आश्चरय कितुरक।

Currently Selected:

मरकुस 7: fmu

Highlight

Copy