लूका 19

येसु अनि जकेय

1अनि येसु यरिहो सेहेरतिगा होळीयतुर अनि ओर अद सेहेर लोपाडाल हन्दिला आस मन्दुर। 2अनि अद सेहेरतिगा जकेय पोरोयतोर वरोर मानेय मन्दुर; अनि ओर रोम राज्य साटि टाक्स येतवालोरकला मुक्याल अनि वरोर सावकार यहुदि मानेय मतोर। 3अनि जकेय येसु बोर आन्दुर इन्जोर हुळाना इच्चा कितुर। मति ओर टुबराल मतोर इन्जोर लोकुरा भीळता मारे हूळ परोर आन्दुर। 4इन्जोर ओर येसुन हुळान साटि येसु हन्दिला आस मन्दुर अद हरिता मुने विचोरिंग हतुर अनि उन्दि तोया मरातिगा अन्जतुर।

5अनि येसु अद तोया मरा हेरे अवतुर असके मरा पोरो हुळसुन, “हे जकेय सान्डे अडिय रेया; बाक्याकि नेन्ड नाकुन निया लोतिगा मन्दाना मन्ता” इन्जोर जकेयीन इतुर। 6अनि जकेय सान्डे मराताल रयसुन गिरदा आसोरिंग येसुन आपुना लोतिगा ओतुर।

7मति येसु जकेयना लोतिगा दान्तोर इन्जोर “येसु ते पापिना लोतिगा हन्दिला आतोर#१९:७ जकेय रोमि लोकुरकुन साटि टाक्स येतान्तोर इन्जोर जकेयीन पापि मानेय इन्दुर। इदाम लोकुरक कुळकुळ किया लाकतुरक।”

8जकेय नितितुर अनि येसुन इतुर, “हे प्रबु केन्जा! नना नावा अरदो धनसंपति गरिब लोकुरकुन हिसिन्तोना अनि नना बोनायसंग अन्याय किसुन येच मनका ते ओन नालुंग गुनांग अचोन हिसिन्तोना।” 9असके येसु ओन इतुर, “येर वने खरोय अब्रहामना मरि आन्दुर इन्जोर नेन्ड जकेयीन अनि जकेयना परिवारतुन मुक्ति पुटता। 10परमेस्वरना मयाताल लक आतोरक लोकुरकुन पळकसोरिंग परमेस्वरना हेरे मलस ततान साटि अनि ओरा मुक्ति कियान साटि नना मानेयतोर मरि वातोना#मत्ति १८:११ ।”

दहा सोनातांग डब्बुना पिटो

(मत्ति २५:१४-३०)

11अनि ओर लोकुरक येसुनांग पोल्लोनुंग केन्जिला आस मन्दुरक असके येसु अनि चेलालोरक येरुसलेमता हेरे मन्तोरक, परमेस्वरना राज्य सान्डे दिसान्ता इदाम हुचुलोर लोकुरक समजेमायिला लाकतुरक इन्जोर येसु ओरकुन असा उन्दि पिटो वेहतुर#मत्ति २५:१४-३० । 12“वरोर हजोर धनि मानेय मन्तोर ओर राजाल बनेमासुन असा मलसवायान साटि लक देशतिके हतुर। 13अनि ओर धनिमानेय लक देशतिगा हन्दानाता मुने आपुनोर दास्कनिगडाल दहा लोकुरकुन केयसुन दहा सोनातांग डबुंग#१९:१३ सोनाता उन्दि डबु मून्ड महिनाता बनिता बरोबर मता। हितुर अनि ओरकुन इतुर, ‘नाना वायानावनाह निमाट आपुना व्यापार कियाकिट।’ ”

14“मति अद सहेरते मनवालोरक ओर धनि मानेयसंग वेयरि मतोरक, अनि ओर धनि मानेय लक देशतिगा हता पजा ओरक आपुनोर लोकुरकुन अद देशतिगा लोहतुर। अनि ‘येर मावागा राजाल बनेमासुन राज्य केविर इदाम मावा इच्चा हिले’ इदाम उन्दि सन्देश ओरक अद देशतिगा हन्जुन वेहतुर।”

15“अनि पजा ओर राजाल आस वातुर असके ओर सोनातांग डबुंग हिस मतोर ओर लोकुरक अवेन बदाम लेन देन किसुन बचोन असा कमेय कितोरक इन्जोर पुन्दाना साटि आपुनोर दहा दासकुन केयान साटि ओर आग्या हितुर। 16असके पहलेटोर मानेय हेरे वासुन, ‘हे मालिक नियांग हिताल सोनातांग डबुंगताल नना असा दहा डबुंग कमेय कितोना।’ 17असके ओर मालकाल ओन इतुर, ‘निमा सोबाय बुतो कितोन, निमा बेस दास मन्तोन! निमा हुडुक्साते वने पकाय विस्वास योग्य आति, इन्जोर इदेक दहा सेहेरतिगा अदिकार किम।’ 18असा दुसरो वासुन, ‘हे मालिक, नियांग सोनातांग डबुंगते नना असा सेयुंग डबुंग कमेयह कितोना’ इन्जोर इतुर। 19असके ओर मालकाल ओन वने इतुर, ‘निमा वने सेयुंग सेहेरतिगा अदिकार आम।’ ”

20“असा तिसरो मानेय वासुन, ‘हे मालिक, हुळा निया सोनातांग डबुंग इगा मन्तांग, इदेन नना नावा रुमालते दोहच इरतोना। 21बाक्याकि निमा इरवितान वने, ताहान्तोन अनि निमा वीतवि, अदेन वने कोयान्तोन इदाम कटोर मन्तोन इन्जोर नना निकुन वरियिन्दान’ इदाम इतुर। 22अनि ओर मालकाल ओन इतुर, ‘हे कपटि दास! नना नियांग पोल्लोते निकुने न्याय किन्तोना। नना बगा इरोन अदेन वने ताहान्तोना, अनि नना वीतोन अदेन वने कोयान्तोना कटोर मन्दोर मानेय मन्तोना इदाम निमा नाकुन पुन्तोन बहे। 23ते निमा नावांग पयसांग बान्कतिगा बाक्या इरवि आति, अदाम कियाकि ते नना वासुन व्याज साकेट ओनाताल येच मनेना बहे?’ ”

24“अनि बोर लोकुरक ओना हेरे निचमन्दुरक ओरकुन इतुर, ‘अव सोनातांग डबुंग ओनाताल तलक्सुन दहा डबुंग मन्तांग ओन हिसिम्ट।’ 25अनि ओरक लोकुर मालकान इतुरक, ‘हे मालिक, ओनिगा इदेकेय दहा सोनातांग डबुंग मन्तांग!’ 26असके मालकाल इतुर, ‘बोनिगा मन्तांग ओन असा हियाका अनि बोनिगा हिलेंग, ओनाताल वने येतका#मत्ति १३:१२; मर ४:२५; लूका ८:१८। 27मति नना ओरागा राज्य केवोन इदाम इच्चा किन्तोरक नावोर वेयरि लोकुरकुन इगा तचुन नावा मुने हव्काट’ इन्जोर ओर आग्या हितुर।”

येसु येरुसलेमतिगा राजाना लेहका दान्दोर

(मत्ति २१:१-११; मर ११:१-११; युह १२:१२-१९)

28इद पिटो वेहतुर पजा येसु चेलालोरासंगे मुने मुने हन्जुन येरुसलेमतिके हन्दिला आस मन्दुरक। 29अनि येसु अनि चेलालोरक जयतुन मटाना#१९:२९ जेयतुन मटा येरुसलेमना हेरेटा उन्दि मटा मता अनि इद मटातिगा जेयतुन मराक पकाय मतांग। हेरेटाल मता बेतपगे अनि बेयतनिय्याह पोरोयता हुडलांग सेहेरता हेरे अवतुरक, असके येसु आपुनोर इवुर चेलालोरकुन इदाम इन्तोर लोहतुर: 30“निमाट मुनेटा नाटेनिगा हन्टु; अनि अगा निमाट अवकिट असके बोरे बसकेय सवार केवो उन्दि गदहिता पिला दोहता निमाट हुळिकिट, अदेन लेहचुन ततकिट। 31अनि बोरे मिकुन इद गदहिता पिलातुन बाक्या लेहान्तोरिट इदाम पुच्चेमायनुर ते प्रबुन इदेना जरुरि मन्ता” इदाम ओरकुन इन्किट।

32अनि येसु लोहतोरक चेलालोरक हतुरक अनि येसु बदाम ओरकुन वेहन्दुर अदामे कलियतुरक। 33अनि ओर चेलालोरक गदहिता पिलातुन लेहिला आस मन्दुरक, असके गदहिनोर मालकाल, “इद गदहिता पिलातुन बाक्या लेहान्तोरिट?” इन्जोर ओरकुन पुच्चेमातुर। 34असके येसुनोर चेलालोरक मालकान इतुरक, “इद गदहिता पिलातुन प्रबुन जरुरि पहाजे।” 35अनि मालकाल अद गदहिता पिलातुन ओयिला हितुर, असके ओरक अद गदहिता पिलातुन येसुना हेरे ततुरक, अनि ओरक आपुनांग हुचुक कपळानुंग गदहिता पिला पोरो तारतुरक अनि येसुन उदिला वेहतुरक। 36अनि येसु गदहिता पिलापोरो उचुन हन्दिला लाकतुर, अनि लोकुरक येसुना सन्मान कियान साटि आपुनांग हुचुक कपळानुंग हरतिगा तारसोरिंग हन्दुरक।

37असके येसु अनि लोकुरक हरतिगडाल हन्जोरिंग ओरक जयतुन मराकना मटाता हन्दितिगा अवतुरक, असके चेलालोरक अनि सबोय लोकुरक अव सबोय अत्भुत चमत्कारता बुतोतुन हुळसुन पकाय गिरदा आसोरिंग हजोर लेंगदे परमेस्वरना स्तुति किया लाकतुरक:

38“परमेस्वरना पोरोयदे वान्तोर ओर राजाल धन्य मन्तोर!

परमेस्वर अनि मानेयकना नडुम स्वरगतिगा शान्ति आयि अनि आबारतिगा परमेस्वरना महिमा आयि#१९:३८ महिमा आयि मन्जे परमेस्वरदुन हजोर सन्मान पुटि।”

इदाम इतुरक#भज ११८:२६ ।

39असके लोकुरा भीळतिगाडाल हुचुलोरक परीसि लोकुरक येसुन, “हे गुरु, निया चेला लोकुरकुन इदाम हन्दिला धमकि हिम!” इन्जोर इतुरक। 40येसु ओरकुन, “येर कमेक आतुरक ते कल्क वने नावा स्तुति कियानुंग इन्जोर नना मिकुन वेहान्तोना” इन्जोर इतुर।

येरुसलेमता नाशता बारेते येसुना दुःख

41अनि येसु येरुसलेम सेहेरता हेरे वातुर असके येरुसलेम सहेरतोरक लोकुरकुन हुळसुन येसु किलतुर। 42अनि येसु इतुर, “हे येरुसलेमतोरक लोकुरक परमेस्वरनासंग शान्तिते मन्दान साटि मिया मदत किन्ता ओद पोल्लो निमाट समजेमान्तोरिट ते बचोक सोबाय मता। मति इदेक परमेस्वर अद शान्तितुन मियागडाल मकितुर। 43बाक्याकि परमेस्वर निकुन पिसान साटि वातुर ओद बेरा निकुन समजेमायो आतुरक इन्जोर निवोरक दुश्मन लोकुरक निया हिरमुटा आयनुरक, निकुन आहचानुरक; 44निया सहेर अनि सहेरतोर सबोय लोकुरकुन नाश कियानुरक, अनि निया सबोयतुन वने नाश कियाना उन्दि दिया नियागा वायार।”

येसु येरुसलेम मन्दिरताल मोमवालोरकुन पचियस हिन्तोर

(मत्ति २१:१२-१७; मर ११:१५-१९; युह २:१३-२२)

45असके येसु प्रार्थना लोतिगा हन्जुन मोमवालोरकुन प्रार्थना लोताल बाहरो पसहिला लाकतुर। 46अनि येसु ओरकुन, “ ‘नावा लोन प्रार्थना कियाना लोन आयार, मति निमाट अदेन कलेरकना लोन बने कितिट#यश ५६:७; यिर ७:११’ इदाम पवित्र पुस्तकतिगा कोटताल मन्ता” इन्जोर इतुर।

47अनि येसु अद प्रार्थना लोतिगा रोजदिया परमेस्वरना पोल्लोतुन वेहन्दुर, मति मुक्याल याजक लोकुरक, मूसाना नियमतुन करिहवालोरक अनि यहुदिलोरा मुक्याल लोकुरक येसुन हव्कान साटि डाव पळकन्दुरक। 48मति सबोय लोकुरक मन लावेकिसुन येसुना पोल्लो केन्जतुरक इन्जोर ओरकुन डाव पुटो आतुरक।

Currently Selected:

लूका 19: fmu

Highlight

Copy