युहनाल 21

येसु तिबिरियास नाहारता टका हेरे चेलालोरकुन दिसान्तोर

1अनि इव पोल्लोता पजा येसु आपुनतुन तिबिरियास नाहारता टका हेरे चेला लोकुरकुन असा दिसतुर। अनि ओर इद रितिते प्रगट कितुर। 2अनि शमोन पतरस अनि दिदुमुस इन्तोर ओर थोमा अनि ओर गलील प्रदेशता काना नाटेनोर नदनयेल अनि जबदिनोर मरक अनि ओनोर चेलानिगाडाल दुसरो इवुर लोकुरक वने अगा जमा आस मतोरक। 3असके शमोन पतरस ओरकुन इतुर, “नना मीनक पयान साटि हन्दिला आतोना।” ओरक ओन इतुरक, “माक वने नियासंग वान्तोरोम” इदाम ओरक पसियस डोंगातिगा अन्जतुरक मति अद नरका ओरक बाताले पयोरक।

4अनि सकार आतपा येसु नहारता टकातिगा वास नितितुर ते वने येर येसु आन्दुर इन्जोर चेलालोरक पुनोरक। 5असके येसु ओरकुन इतुर, “हे बालक बाताल मिया हेरे तिन्दान साटि हुचुक मीनक मन्तांग बहे?” ओरक उत्तर हितुरक, “हिलेंग#लूका ५:५।” 6अनि येसु ओरकुन इतुर, “डोंगाता तिन्दान बासा जालि वाटाट ते मीनक पुटनुंग।” असके ओरक जालि वाटतुरक अनि पकाय मीनकना कारणते ओरक जालितुन पिळिंगिला परोरक आतुरक#लूका ५:६। 7असके येसु पकाय मया किन्दुर ओर चेलाल पतरसिन इतुर, “येर ते प्रबु आन्दुर।” अनि शमोन पतरस “ओर प्रबु आन्दुर” इन्जोर केन्जुन ओर दरोज कराना कुरता ओना मेन्दुलतिगा हिले आसि इन्जोर नळितिगा दुपटातुन हुरिहतुर अनि नहारतिगा डेयतुर। 8मति दुसरो चेलालोरक डोंगातिगा मीन्क निन्दिता जालितुन पिळिंगसोर वातुरक बाक्याकि ओरक टकाता पकाय लक हिलेर आसि। अनि लगभग टकाताल रन्ड नुहक कय लक मता।

9बसके ओरक टकातिगा रयतुरक ते ओरक कोरसाता किस अनि अदेना पोरो मीनक अनि रोटिंग इरता हुळतुरक। 10अनि येसु ओरकुन इतुर, “इदेक निमाट पयतोरिट ओव मीनकनिकेडाल हुचुक मीनक ताट।” 11ते शमोन पतरस डोंगातिगा हन्जुन उन्दि नुर त्रेपन हजोर मीनक निन्दिता जालितुन टका हेरे पिळिंगतुर अनि इचोक मीनक मन्जुन वने जालि हरो आतु। 12अनि येसु ओरकुन इतुर, “वाट जेवन किम्ट।” अनि चेलानिगाडाल बोरे ओन “निमा बोर आन्दि?” इन्जोर पुच्चेमायाना हिमत कोवो बाक्याकि येर प्रबुये आन्दुर इन्जोर ओरक पुन्दुरक। 13अनि येसु वातुर अनि रोटिंग ओरकुन हितुर, अनि अदामे मीनक वने हितुर। 14अनि येसु हातोरिगाडाल असा जिवेमातपा इदाम तिसरो बेरा चेला लोकुरकुन दिसतुर।

येसु पतरसनासंग वळकान्तोर

15जेवन आतपा येसु शमोन पतरसिन इतुर, “हे युहन्नानोर मरि शिमोन बाताल निमा येराताल वने नाकुन मया किन्तोन?” अनि पतरस येसुन इतुर, “इंगो, प्रबु, नना निकुन मया किन्तोना” इन्जोर निमा ते पुन्तोन। अनि येसु ओन इतुर, “नावांग बेळांग लेहका मन्तोरक ओर लोकुरकुन मेहा।” 16अनि येसु असा दुसरो बेरा ओन इतुर, “हे युहन्नानोर मरि शमोन बाताल निमा नाकुन मया किन्तोन?” अनि पतरस ओन इतुर, “इंगो प्रबु, नना निकुन बचोन मया किन्तोना” इन्जोर निमा पुन्तोन। येसु ओन इतुर, “नावांग बेळांग लेहका मन्तोरक ओर लोकुरकुन संभाले किम।” 17अनि येसु तिसरो बेरा ओन इतुर, “हे युहन्नानोर मरि शिमोन, बाताल निमा नाकुन मया किन्तोन?” अनि येसु ओन तिसरो बेरा “बाताल निमा नाकुन मया किन्तोन” इदाम पुच्चेमातुर इन्जोर पतरास उदास आतुर अनि ओन इतुर, “हे प्रबु, निमा ते सबोय पुन्तोन, नना निकुन मया किन्तोना इन्जोर निमाय पुन्तोन।” अनि येसु ओन इतुर “नावांग बेळांग लेहका मन्तोरक ओर लोकुरकुन मेहा। 18नना निकुन खरोय खरोय इन्तोना, निमा लयोर मतोन असके निमा आपुना तयारि किस बगा इच्चा मता अगा वलियन्दि मति निमा मुदियाल आयकि असके आपुना कयक मुने कियाकि अनि दुसरो निकुन तयार किस निया इच्चा हिले अगा निकुन ओयनुर।” 19अनि पतरस बदामना हामुरते परमेस्वरना महानता प्रगट कियानुर इन्जोर येसु इव पोल्लोते वेहतुर: असके येसु पतरसिन इतुर, “नावा परके ताकसोर वाय।”

येसु अनि ओनोर मायातोर चेला

20अनि पतरस परके मिळिच ओन येसु पकाय मया किन्दुर ओर चेलान परके वायानपा हुळतुर। अनि ओर जेवन कियानाता बेरा येसुना चाति हेरे वकसुन, “हे प्रबु निकुन पयपिवाल बोर आन्दुर?” इन्जोर पुच्चेमास मतोर येरेय मतोर#युह १३:२५। 21अनि ओन हुळसुन पतरस येसुन इतुर, “हे प्रबु येना बदाम दसा आयार?” 22अनि येसु ओन इतुर, “ओर नावा असा मलस वायानवनाह जितो मन्दानुर इदाम नना इच्चा कियाका ते निमाट ओद पोल्लोता बारेते समजेमायाना जरुरि हिले। अनि निमा नावा परके ताकसोर मन।” 23ओर चेला हायोर आयनुर इन्जोर चेला लोकुरकनिगा इद पोल्लो फयलेमात। ते वने ओर हायोर आयनुर इन्जोर येसु ओरकुन इद इनोर मति “नना असा मलस वायानवनाह ओर जितो मन्दानुर इदाम नना इच्चा कियाका ते निमाट ओद पोल्लोता बारेते समजेमायाना जरुरि हिले” केवल इचोनेय येसु ओन इतुर।

उपसंहार

24अनि येर चेलाल इद पोल्लोता गवाहि हिन्तोर अनि ओर इव पोल्लोंग कोटतोर मन्तोर; अनि ओना गवाहि खरोय मन्ता इन्जोर माक पुन्तोरोम। 25अनि येसु इदेनताल वने पकाय बुतोंग कितोर अव पुस्तकतिगा कोटता हिले। अव सबोय बुतोंगतुन उन्दि उन्दि किस कोटस मनेर ते पकाय पुस्तक आस मनवांग। अनि इचोक पुस्तकिंग बनेमास मनवांग ते अवेहकुन इरान साटि इद दुनियातिगा वने जागा पुटो आस मनवार इन्जोर नना पुन्तोना।

Currently Selected:

युहनाल 21: fmu

Highlight

Copy