बुतोंग 3

येसुना पोरोयते लंगळाल मानेयतुन सुदरे किन्तोर

1उन्दि दिया पतरस अनि युहन्नाल दुपाडा मून्ड नेकतपा प्रार्थनाता बेरा येरुसलेम मन्दिरतिगा हन्जोर मतोर। 2असके हुचुक लोकुरक वरोर जनमाताल लंगळाल मानेयतुन तचोर वासुन प्रार्थना लोतिगा हनवालोरकुन भिक तलकिर इन्जोर ओन ओरक मन्दिरता ओद सुन्दर पोरोयता दरवाजतिगा दरोज उपिचिन्दुरक। 3ओर पतरस अनि युहन्नान प्रार्थना लोतिगा हन्दानपा हुळसुन ओराकेडाल भिक तलकतुर। 4अनि भिक तलकवाल मानेयना लेंग केन्जुन पतरस युहन्नानासंग ओनाके ध्यानते हुळस, “मावाके हुळा!” इन्जोर इतुर। 5ओर ओराकेडाल बाराय पुटाना आशा इरस ओराके पकाय हुळिला लागतुर।

6असके पतरस ओर लंगडाल मानेयतुन इतुर, “चान्दि अनि सोनो नावा हेरे हिले, मति नावा हेरे मन्ता ओद नना निकुन हिन्तोना, नासरतोर येसु मसिना पोरोयते तेदा अनि ताका” इदाम इन्जुन, 7पतरस ओना तिन्दान कय पयस तेहतुर, असके ओना काल्क अनि घुटकांग सान्डेय सुदेरेमात। 8ओर डेयस नितितुर अनि वलियला लागतुर, अनि ताकसोर अनि डेयसोर अनि परमेस्वरना स्तुति किसोर पतरस अनि युहन्नानासंग मन्डिलितिगा हतुर। 9ओन वलियसोर अनि परमेस्वरना स्तुति कियाना सबोय लोकुरक हुळस, 10मन्दिरता सुन्दर पोरोयता दरवाजतिगा उदस भिक तलकिन्दुर ओर येरे आन्दुर इन्जोर पुन्ज ओनिगा आतु ओद घटनाता बारेते ओरक पकाय आश्चरय अनि चके मातुरक।

येरुसलेम मन्दिरतिगा पतरस उपदेश किन्तोर

11बेस आतोर लंगळाल मतोर ओर मानेय पतरस अनि युहन्नानासंग मन्तोर असके सबोय लोकुरक पकाय आश्चरय किसोर सुलेयमानना मन्डा इन्तोर ओद जागातिगा ओरा हेरे विचोर वातुरक। 12इद हुळस पतरस लोकुरकुन इतुर, “हे इस्रायेल लोकुरक, निमाट येर मानेयना जिवाते आता पोल्लो हुळस बाक्या आश्चरय किन्तोरिट? अनि माके आपुना लाव या परमेस्वरना मुने सोबाय लोकुरक मन्तोर इन्जोर येन वलियाना योग्य बनेहकितोम इदाम मानेमास मावाके बाक्या हुळिला आतोरिट? 13अब्रहाम अनि इसहाक अनि याकुबनोर परमेस्वर, मावोर पुरकातोरा परमेस्वर इदेक इद अत्भुत चमत्कारता द्वारा आपुनोर सेवक येसुना आदर कितुर। मति निमाट यहुदिलोकुरक ओर येसुन पयपिहतिट, अनि राजपाल पिलातुस ओन दन्ड केवोर आस तासियाना विचार कितुर ते वने निमाट ओना मुने ओर येसुन इन्कार कितिट#निर ३:१५। 14अनि निमाट इन्कार कितिट ओर येसुन खरोय पवित्र अनि परमेस्वरना मुने येताना योग्य मतोर। अनि ओना बदला वरोर हव्कवालतुन मिया साटि तासिविर इन्जोर निमाट विनन्ति कितिट#मत्ति २७:१५-२३; मर १५:६-१४; लूका २३:१३-२३; युह १९:१२-१५ । 15जिवनता झरातुन निमाट हव्कतिट ते वने परमेस्वर ओन हातोरिगाडाल असा जिवेहकितुर। माक इद पोल्लोता गवाह मन्तोरोम। 16अनि येसुना पोरोयते मन्ता ओद विस्वासता कारण ओनाय पोरोयता लाव निमाट हुळान्तोरिट अनि पुन्तोरिट येर मानेयतुन सुदरे कितोर। अनि येसुनिगा मन्ता ओदे विस्वास येन निमाट सबोय लोकुरा मुनेय सुदरे कितोर।”

17पतरस असा लोकुरकुन इतुर, “मति इदेक हे नावोर बायि-दादालोरक केन्जाट! निमाट अनि मिवोर नेता लोकुरक येसुन विरुद बाताल कितिट ओद अन्जानते कितिट इन्जोर इदेक नना पुन्तोना। 18मति ओनोर मसि पकाय तकलिप सहेन कियानुर इन्जोर बोव पोल्लोनुंग परमेस्वर सबोय परमेस्वरना पोल्लो वेहवालना टोडिताल पहलेय वेहच मतोर अदेन ओर इदे रितिते पुरा कितुर। 19पाप कियाना बन्द किस परमेस्वरनिके मलस वायकिट ते मिया पापतुन मापि पुटि, 20मिया साटि प्रबुनिकेडाल गिरदाता बेरा वायार अनि ओर मुनेटाले मिया साटि मसि आस निवळे किस मतोर ओर येसुन लोहिर। 21परमेस्वर सिरानताल परमेस्वरना पोल्लो वेहवाल आपुनोर पवित्र लोकुरा#३:२१ मूसा, दावुद, यशायाह, यिरमायाह, दानियेल, जकरियाह, युना टोडिताल वेहतोर ओव सबोय पोल्लोनुंग सुदरे कियानावनाह येसु स्वरगतिगा मनिर इन्जोर जरुरि मन्ता। 22‘प्रबु परमेस्वर, मिवोर तमोहनिगाडाल मिया साटि नावोर लेहका वरोर परमेस्वरना पोल्लो वेहवालिन निपिहनुर, ओर मिकुन बाताले इनिर अदेन निमाट केन्जकिट#व्यव १८:५,१८ । 23मति बोर मानेयक ओर परमेस्वरना पोल्लो वेहवालिन केन्जोर आयनुरक ते ओरकुन लोकुरकनिगाडाल संपुर्ण नाश कियानुर’ इन्जोर मूसाल इन्ज मतोर#व्यव १८:१९। 24अनि शमुवेलताल बचोक परमेस्वरना पोल्लो वेहवाल वातुरक ओरक सबोय लोकुरक इव दियाता बारेते वेहतुरक। 25अनि परमेस्वर सिरानते परमेस्वरना पोल्लो वेहवालोरा द्वारा हिता ओद वाचाता वारिस निमाट मन्तोरिट। अनि ‘दरतिता सबोय परिवार निया वंशता द्वारा आशिष पुटहानुर’ इन्जोर वळकस अब्रहामनासंग अनि मिवोर आजि-दादिलोरासंग परमेस्वर किता करारता वारिस वने निमाट मन्तोरिट#उत्प २२:१८। 26मियागाडाल सबोय लोकुरक आपुना खराब बुतोंग बन्द किहिस आशिष हेविर इन्जोर परमेस्वर आपुनोर सेवक येसुन तेहच पहले मिया हेरे लोहतुर।”

Currently Selected:

बुतोंग 3: fmu

Highlight

Copy