बुतोंग 1
1
परिचय
1-3हे तियुफिलुस, पवित्र आत्माता मदतते प्रबु येसु ओर आचतोर आपुना खास चेला लोकुरा मुने आपुना हायाना अनि असा जिवेमायानाता पजा च्याळिस दियांगवनाह आपुनतुन प्रगट कितुर#लूका १:१-४। इदाम प्रगट किसोर परमेस्वरना राज्यता बारेते ओरकुन पकाय पोल्लोंग वेहचोर मतोर। इदाम पकाय खरोय सबुततासंग ओर जिवित मन्तोर इदाम आपुनतुन ओरा मुने प्रगट किस ओरकुन पवित्र आत्माता मदतते आग्या हिस पोरो स्वरगतिके ताहतुर। स्वरगतिके ताहतुर ओद दियांगवनाह बाताल कियाना अनि बाताल करियना प्रबु येसु सुरु कितोर ओद सबोय पोल्लोता बारेते नना पहलेटा पुस्तकतिगा कोटतोना। 4अनि उन्दि दिया येसु ओरासंग मिलेमास जेवन किस मतोर असके ओरकुन आग्या हितुर, “निमाट येरुसलेमतुन तासिमाट नावाकेडाल केन्जतोरिट ओर बाबो परमेस्वरना ओद प्रतिज्ञा पुरा आयाना साटि हर हुळस मन्दिला पहाजे#लूका २४:४९ 5बाक्याकि युहन्नाल ते पहले एते बपतिस्मा हितोर, मति हुचुक दियाना पजा परमेस्वर मिकुन पवित्र आत्माते बपतिस्मा हियानुर” इदाम येसु ओरकुन आग्या हितुर।
येसुना स्वरगारोहण
6येसुना खास चेला लोकुरक येसुनसंग उन्दि जागा जमा आस मतोरक असके ओरक येसुन पुच्चेमायिला लागतुरक, “हे प्रबु, बाताल निमा इस्रायेल लोकुरकुन इदे बेरा देशतुन ओरा साटि स्थापन कियाकि बहे?” 7येसु ओरकुन इतुर, “बाबो परमेस्वर आपुना अदिकारते इरतोर ओद बेरा या काळदुन निमाट पुन्दाना साटि परवांगि हिले। 8मति पवित्र आत्मा मियागा वायनुर असके मिकुन लाव पुटसुन येरुसलेम सहेरतिगा अनि सबोय यहुदि प्रदेशतिगा अनि सामरिया प्रदेशतिगा अनि सबोय दरतिगा निमाट नावोर गवाह आयकिट” इन्जोर इतुर#मत्ति २८:१९; मर १६:१५; लूका २४:४७,४८। 9अनि येसु इदाम इतुर पजा ओरक ओन हुळसोर हुळसोर मतोरक असके परमेस्वरना लावदे ओर पोरो स्वरगतिगा ताहतुर अनि आबारता उन्दि ढगि ओन ओरा कोन्डांगताल मकिहतु#मर १६:१९; लूका २४:५०,५१। 10ओना हन्दानबेरा येसुना खास चेला लोकुरक आबारतिके हुळसोर मतोर असके पान्डरिह सन्दरांग करतोर इवुर मानेय ओरा हेरे वास नितितुर। 11अनि ओरकुन “हे गलीलितोरक मानेयक, निमाट बाक्या नितस आबारतिके हुळिला आतोरिट? ओर मिया हेरेटाल स्वरगापोरो ताहच ओतोर येरे येसुन बोद रितिते निमाट ओन स्वरगतिगा हन्दानपा हुळतोरिट ओदे रितिते ओर असा मलस वायनुर” इन्जोर इतुर।
मत्तियासिन यहुदाना बदला आचान्तोर
12अनि पजा ओरक जयतुन पोरोयता मटाताल येरुसलेम मलस वातुर। ओद मटा येरुसलेमताल लगभग उन्दि किलोमिटर लक मता#१:१२ जेयतुन मटा उन्दि पवित्र दिया हन्दाना इचोन लक मन्ता। मूसान परमेस्वर हिता नियमता अनुसार उन्दि सबात आरामकियाना दिया मता ओद दिया वरोर मानेय लगभग रन्ड किलोमिटर हन्जपरान्तोर। । 13असके ओरक अगा अवतुर ते ओरक मन्जोर मतोरक पोरोडा मन्ता ओद खोलितिगा हतुरक; अगा पतरस, युहन्ना, याकुब, अन्दरियास, फिलिप्पुस, थोमास, बरतुलामायि, मति, अलफायिनोर मरि याकुब, हलकायिते बुतो केवाल शिमोन#१:१३ हलकायि मन्जे परमेस्वर साटि शिमोना सेवाता स्भाव या रोमि लोकुरा कयदाल यहुदि लोकुरकुन पिसान साटि मन्ता यहुदि आदंगवादि लोकुरा दलता पोरोय वने मन्दार। अनि याकुबना मरि यहुदा येर सबोयलोरक#मत्ति १०:२-४; मर ३:१६-१९; लूका ६:१४-१६ 14हुचुक आसक, येसुना अवहारि मरियम अनि येसुना तमोलोरासंग उन्दि मन आस प्रार्थना किसोर मतोरक।
15हुचुक दियांग पजा लगभग उन्दि नुर विसा विस्वासि मानेयक मिलेमास मतोरक असके ओरक तमोलोरा नडुम पतरस नितस इन्दिला लागतुर, 16“हे नावोर तमोलोरक, येसुन पयान साटि वातोर लोकुरकुन मदत हितोर यहुदाना बारेते पवित्र आत्मा दावुद राजाना द्वारा पकाय पहलेय इन्ज मतोर, पवित्र पुस्तकतिगा कोटता ओद पोल्लो पुरा आयाना जरुरि मता। 17ओर मावागा गिन्ति आस इद सेवातिगा यहुदा वने मावासंग सहभागि मतोर।”
18(परमेस्वरना मुने येताना योग्य आयो बुतोता द्वारा पुटता रोजिते यहुदा उन्दि डन्ड असतुर, अनि पजा तलाता भारदे अरतुर अनि ओना पोटा नडुमते ओरतु अनि ओना सबोय पोहक बाहरो पसियतुंग#मत्ति २७:३-८। 19ओद पोल्लोतुन येरुसलेमतिगा मनवालोर सबोय लोकुरक पुतुर इन्जोर ओद डन्डता पोरोय ओरा अरामयक बोलिते हकलदमा अर्थ “नतुरता किमतते असता डन्ड” इदाम पोरोय आतु।)
20“ ‘ओना लोन खालि आयि,
अनि अगा बोरे मनमाकिर’
अनि ‘ओना सेवाता पद बोरे दुसरो येतिर’ ”
इन्जोर भजन संहितातिगा कोटता मन्ता#भज ६९:२५; भज १०९:८ । 21-22इन्जोर वरोर मानेय मावासंग प्रबु येसुना असा जिवेमायानाता गवाह आयिर उचित मन्ता। युहन्नाना बपतिस्माताल माकुन तासिस पोरो स्वरगतिके ताहतुर ओद दियावनाह प्रबु येसु मावासंग मतोर ओद सबोय काळदे दरोज मावासंग मतोरक ओर लोकुरकनिगाडाल वरोर मानेय पहाजे ओर#मत्ति ३:१६; मर १:९; लूका ३:२१; मर १६:१९; लूका २४:५१ । 23अदाम ओरक यूसुफ पोरोयतोर बर-सब्बान अनि मत्तियास इदाम इवुरकुन निपिहतुर। अनि यूसुफिन युस्तुस इदाम दुसरो पोरोय वने मता। 24पजा ओरक इदाम प्रार्थना कितुर, “सबोयना मन्दुन पुनवाल प्रबु, 25यहुदा पाप किस येसुना खास चेलालना बुतो तासिस ओना साटि तयारि किता ओद जागातिगा हतोर। इन्जोर ओना सेवाता अनि येसुना खास चेलाल आयाना पथता बदला येर इवुरासनिकेडाल बोन निमा येसुना खास चेला आस आचातोन इद तोहा।” 26असके ओरक ओरा बारेते चिटिंग वाटतुर, अनि चिटि मत्तियासिना पोरोयते पसियतु। अनि ओन येसुना अकरा दुसरो खास चेलाल लोकुरासंग गिन्ति आतु।
Currently Selected:
बुतोंग 1: fmu
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
