Markus 8

Isus Nafayafun Ufatk Libuk Taw

Mt 15:32-39

1Nu nlangfe kafag menit, sik ngay taw gdog yay maful ay we fakonun. Ay Isus nafakbang sa anya at ngay tagadal ay nalong te, 2“Kafanyu au in fag ngay taw, aroro tulu wak menit nu maful ste si angku, ay katsi we fakonun ya. 3Ay kwa kaylat gfauli anya fagayu ginlunusan, laman ro di karanug sat ngaba dalan, aroro tibak taw siginan tangayayu fag ngay furuan.”

4Ay at ngay tagadal nainto Isus te, “Daginan ro nu namul ami at kasakan fag fakonun, tam famafangon ro takayu nya fag ngay taw, ay ste fag talun we bale?”

5Ay Isus ginto te, “Seyu nunda ay ba tinapay?”

Ay at ngay tagadal gbalus te, “Fitu.”

6Ay Isus gsugu sa sangay taw laman malunggung. Ay kanya nabul kafag fituk tinapay, ay naseg Dius, ay nalungud ay nafon sat ngay tagadal, laman gfon yangay sa sangay taw. 7Ay e albon yangay, ay wa ngayu. Ay Isus gdog yay gseg Dius, ay gsugu at ngay tagadal laman gfon anggan albon. 8Ay fagayu taw naon ay napsug. Ay at ngay tagadal nafaful at ngay nagsawadan, at kayuan fituk balulang mapnu. 9Kafag ngay taw at kayuan, malgau ufatk libu. Ay Isus nafauli kafag ngay taw. 10Ay arodi, Isus ay at ngay tagadal nasakay sas sakayan lino, ay nalo sas talun Dalmanuta.

Ngay Taw Fariseu Kaylat Gyalagun at Mabalyanan fag Fakamulun

Mt 16:1-4

11Sik ngay taw Fariseu andasug ay gfabadbaboan Isus. Kafag ngay taw kaylat gfaskud Isus, ay get sas Isus laman gfalag sik mabalyanan fag fakamulun siginans banwa tagfatoglag te, Dius at nasugu anya. 12Ay Isus kauri ay nalong te, “Wain ro ay fagyalagunun sik fakatoglagan? Matuyan nu glong au ayu te, kwa ban e fagfalagun fakatoglagan sa ayu.” 13Ay Isus naubun kafag ngay taw ay gdog yay gsakay ay nalo wan sat dife.

Isus at Faydayuanan sabaliwas Famabia Tinapay

Mt 16:5-12

14Isus at ngay tagadal wa namatang gbuba fakonun, sas day sadik tinapay at nabuba sas sakayan. 15Ay Isus nalong sat ngay tagadal te, “Dirii ay mataganani taw Fariseu ay Erudes at famabia tinapay.”

16Ay at ngay tagadal gkamatoan sit dayu te, “Isus at fagnalongun katanya, aroro wa tam namatang gbuba fakonun.”

17Ay Isus saful way at ngay tagadal at kamatoanan ay nalong anya te, “Wain ay fagkamatoanun te, ‘Watam e fakonun’? O yam natogdungug? Ay o yam nasaful? Ay o kamaogatun yayam? 18-19O nunda dewam e mata, wam glag? O nunda dewam e talinga, wam gdungug? Ay o wam namatang? Gina au glungud limak tinapay, laman namayafun limak libuk taw, seyuk sabi mapnu ay nafaful at nagsawadan?”

At ngay tagadal nabalus te, “Labi dua.”

20Ay Isus gdog yay nalong te, “Ay anggan fag fituk tinapay, ku famayafun sas ufatk libuk taw, seyuk balulang ay nafaful at nagsawadan?”

Ay kanya fagayu nabalus te, “Fitu.”

21Ay Isus nalong te, “O nunda yam nasaful ku nalong at masuad sabaliwa at famabia tinapay?”

Isus Nafafia sik Taw at Yud Glag sis Furuan Betsaida

22Isus ay at ngay tagadal andasug sas furuan Betsaida. Ay tibak taw nataban sik taw at yud glag ay gfainfanyuan get sas Isus laman kanya namatayuk at daluap sat yud glag. 23Ay Isus nated at yud glag at daluap ay nataban sas day furuan. Ay Isus natufe sat yud glag at mata, ay nafatayuk at daluap sa anya ay nainto te, “O glag wo nusnge wain?”

24Ay kanya natangda ay glong te, “Glag au sik ngay taw kata sik ngay kayu nu glao.”

25Ay Isus gdog yay nafatayuk at daluap sat yud glag at mata, ay kafag taw anfia wan ay malyo nu kamanawan. 26Ay Isus nafauli wan sat bale ay glong te, “Lag gdalan sas furuan.”

Pedru Gfoyung te, Isus, Dius at Nafili fag Fun

Mt 16:13-16; Lk 9:18-21

27Isus, anggan at ngay tagadal nalo sa sangay furuan tagligung Sesaria-Filipus fag furuan. Kaduge glao, Isus ginto sat ngay tagadal te, “Sinu au, ngay taw at longan?”

28Ay at ngay tagadal nabalus te, “Tibak taw glong te, o wan Uan Tagfasurung, ay tiba glong te, o wan Dius at taglong Elyas, ay tiba glong te, o wan at sadi Dius at taglong.”

29Ay Isus nainto te, “Ay am nu gamatangan am, sinu au?”

Ay Pedru nabalus te, “O wan Dius at nafili fag Fun.#8:29 Dius at nafili fag Fun: sas Griegu, Kristu.”

30Ay Isus maksvn nu glong sat ngay tagadal laman wa glong sas nusnga sinu sabaliwa anya.

Isus Nafoyung sabaliwa nu Kabul Ban

Mt 16:21-28; Lk 9:22-27

31Isus gfasigad gfoyung sat ngay tagadal te, “Au, Taw at Baguama, ngayu ban ku fagnandalanun faurianan siginan sangay fagtainan ay ngay fun tagfon fanggalangun ay anggan ngay tagfoyung Muisis at Faugali. Ay e gfabul ban angku, ay gdog kyay ban gleleg sis fatuluk menit.” 32Ay Isus nafafayamagun takatanya sa anya fagayu. Ay Pedru nataban Isus sat dayu ay gagras anya.

33Ay Isus anbiling ay nadama at ngay tagadal ay gagras Pedru te, “Satanas, lag ste ya! Gfataid wayo angku. Aroro am amatanganan bunwa Dius at algan, nu bunway taw way at algan.”

34Ay Isus nafaful ngay taw, anggan at ngay tagadal, ay nalong te, “Nusnga sinu takaylat nangalo angku, lag gfaning at sadili fakaylatun nu bunway fasanani at fasulungan kayu ay aloi angku. 35Aroro nusnga sinu takesug at leleg, umkalyam way ban at leleg. Ay nusnga sinu tagfon tua at leleg aroro gafanud sa angku ay gafanud sat Masine fag Barita, kanya ban e leleg tua kabavn. 36O e tungkul ro sa sik taw dewa nagbilug nusnge wain ste swa daga ay at leleg ban sa ways faurianan? 37Sik taw we famangsi at leleg. 38Nusnga sinu fag taw takapla gfoyung angku ay ku longan sa sangay taw tagasalanan ay at yud matuyan sas Dius, anggan au, Taw at Baguama, kapla kyangay ban anya gina kban andasug ke fagmabalyananun siginan ku Mama gfasfuan at masine fag ngay tagbarita.”

Currently Selected:

Markus 8: OCCT

Highlight

Copy