Markus 6

Ngay Taw Nasaret Kauri Isus

Mt 13:54-58

1Isus nalo sanya ginan ay andasug sat furuan fia, ay at ngay tagadal nangalo anya. 2Gina Famiangalay fag Menit, Isus gfasigad gfoyung sis bale fakafulan. Ay kayu at nadungug andulo ay glong te, “Daginan tuy fag taw at foyungan? Nataw kanya fag fagsafulun tagsi anya? Tain nu mafafakamulun takatanya fag ngay madulo? 3O nunda bunwa kanya takawat bale fag taw ay Maria at baguama? Ay o nunda at ngay faduksay bunwa Santiagu, Use, Udas ay Simun? Ay o nunda at faduksay fag ngay mangena wa ste si tam furuan nu gbanwan?” Ay kanya fag ngay taw kauri Isus.

4Ay Isus glong te, “Dewa nday fag ngay taw gsuyu tua Dius at taglong, sas day kafag taglong at furuan ay at ngay kaiban ay anggan at ngay kalongan.”

5Ay Isus wa nafakamulun nusnga setaw at mabalyanan fag ngay fakamulun, sangay gfatayuk at daluap sa sangay tibak ke fakasaitun, ay gfafia. 6Ay Isus maksvn nu kadulo aroro sanya fag ngay taw wa gafanud.

Isus Nasugu at Tagadal fag Labi Duak

Mt 10:1,9-14; Lk 9:3-5, 10:4-12

Isus nalo sat fakbangan fag ngay furuan laman namoyung. 7Ay Isus nafaful at nasugu fag labi dua ay nasugu anya fagayu dewa nday, gadgaloan dua. Ay Isus nafae fagmabalyananun anya fagayu laman mafaiyan at mauri fag ngay falad.

8Ay Isus glong te, “Lag am e buba nu glo am, dewa fakonun, ay sabi, ay salapi si ay fagsuadan. Sik tulag yakman lang ay buba. 9Ay suluni ay lapak, ay lag gfadua ay lanbung. 10Nusnga nday fag bale nu gsakbo am, banwani yap sanya yakmay am nalo sanya ginan fag furuan. 11Ay nusnga nday fag talun at ngay taw nu dway kaylat ayu, ay nu dway kaylat gdungugan ayu, nu glo am sanya ginan, fagfagi tagsi ay darafa fag lukbu, laman famasaful te, sanya fag ngay taw wa gfaning.”

12Ay fag labi duak tagadal nalo wan ay namoyung sa sangay taw te, “Ubuni ay ngay asalanan.” 13Ay kanya naiyan ngayuk mauri fag falad ay nafafia ngay taw at ke fakasaitun siginan nu gfatayuk langis sa anya fagayu.

Fun Erudes Nafabul Uan Tagfasurung

Mt 14:1-12; Lk 9:7-9

14Fun Erudes nadungug sabaliwas Isus at fakamulun, aroro Isus at ngayan andungug sas fagayu taw. Tibak taw glong te, “Kafag taw Uan Tagfasurung nadog yay gleleg. Aroro katanya mafafakamulun at ngay madulo.”

15Tiba glong te, “Kanya Elyas,” ay tiba glong te, “Kanya at sadi Dius at taglong, kata ebi fag ngay taglong.”

16Erudes nu nadungug glong te, “Uan gdog yay gleleg, dewa au nafalifung at liug.”

17-18Erudes nalong takatanya aroro ebi ataw kanya andadwa sat kaka Felipe at mangena Erudias. Uan glong gugat sas Erudes te, “Kamabo way o tam faugali nu gtiug o am faduksay at mangena.” Nu katanya, kanya nafagamat ay nafaubung Uan laman gfaylatan Erudias. 19Ay Erudias maksvn nu kauri Uan ay kaylat gfabul anya, ay wa mafafakamulun, 20aroro Erudes kalimu Uan, ay nasaful te, masine at ugali ay we asalanan. Ay kanya ggubuk Uan. Ay Erudes nu nadungug Uan at foyungan, galakayan at amatanganan. Dewa katanya, Erudes kaylat gdungugan.

21Andasug sik menit Erudias at fakaylatun nu kafasludan. Ginanya, Erudes at fangasalug fag menit ay nafalganan sik ngay fakonun. Ay nafauro ngay fun ayu sirut ay ngay tagfangguna tagfawayan ay tiba tungud tagfangguna fag ngay taw sis talun Galilea. 22Erudias at baguina nasakbo sas fagfangonan ay gfalelegan at bilug, ay Erudes ay at ngay nafauro maksvn nu kaylat.

Ay Erudes nalong sanya fag baguina te, “Nusnge wain am fakaylatun eti sa angku ay gfon kro emu.” 23Ay Erudes gfafanud te, “Nusnga seyu am fagetun, gfon au emu, dewa sik wabilug ku fagfunanun.”

24Kafag baguina naduksun ay nainto sat mina te, “Nataw ro ku fagetun?”

At mina gbalus te, “Eti Uan Tagfasurung at alfuyu.”

25Ay at baguina masakit nu nangakbang sas fun ay get te, “Ku fakaylatun, fasai sik laman Uan Tagfasurung at alfuyu ay foni sa angku.”

26Ay fun Erudes maksvn nu kabalu aroro sat nafafanud, ay at ngay betaw nadungug, ay kanya wa mafabadbalian ya at longan. 27Ay arodi kanya nasugu sik tagfawayan, laman namul Uan at alfuyu. Kafag tagfawayan nalo ay nalifung Uan at liug sisad ubung, 28ay nabuba Uan at alfuyu masuadan si sik laman ay nafon sanya fag baguina, ay kafag baguina nafon yangay sat mina. 29Uan at ngay tagadal nu nadungug, nanamul Uan at bilug ay nanamoli sas fagfolian.

Isus Nafayafun Limak Libuk Mangama

Mt 14:13-21; Lk 9:10-17; Uan 6:5-13

30Isus at ngay nasugu anfoli sa anya ay gfoyung sa anya fagayu at nafakamulun ay at foyungan. 31Ngayuk taw takadasug ay taglao, ay Isus ay at ngay tagadal wa karan ya gfangon. Nu katanya Isus nalong te, “Bastam sas talun at yud e taw, laman nanfiangalay sanya.”

32Ay Isus ay at ngay tagadal nasakay sa sik sakayan lino laman nangadasug sa sik talun at yud e taw. 33Ay ngayuk taw nalag Isus ay at ngay tagadal nu glo, ay natoglag anya fagayu. Ay kafag ngay taw natarung siginan sangay furuan ay naguna way nu kadasug. 34Isus nu naduksun siginans sakayan lino, kanya nalag ngayuk taw, ay anfanyu aroro kanya fagayu kata way ngay tupa at yud e galaga. Ay Isus ngayu at nafoyung.

35Ay nu kayabi wan, Isus at ngay tagadal nanangakbang sa anya ay nalong te, “Ste we bale ay kayabi wan. 36Falaoi wan kafag ngay taw, ma ro nanrvbvy at fakonun sas ligung fag ngay talun ay fag ngay furuan.”

37Ay Isus nalong sat ngay tagadal te, “Am wa ro tagfayafun anya fagayu.”

Ay at ngay tagadal nalong sas Isus te, “Kayu ro waluk magdanun sik taw at nagbulan at mafapsug anya fagayu. O namayad ami takayu nyak tinapay laman em famafangon anya fagayu?”

38Ay Isus nainto te, “Agvd, damai, seyu sanya ay ba tinapay?”

Ay at ngay tagadal nu nadama, nabalus te, “Limak tinapay ay duak albon.”

39Isus nalong te, “Falunggungi kafag ngay taw swa makmak ay fainkafudani.” 40Ay fagayu taw namalunggung. Tibak afud sandank taw ay tibak afud limak safuluk taw. 41Ay Isus nabul kafag limak tinapay ay kafag duak albon ay natangda sas banwa ay naseg Dius. Ay nu ntabu wan, kanya nalungud kafag ngay tinapay ay nafon sat ngay tagadal laman gfon sa sangay taw. Ay katanya yangay anggan fagduak albon, nafud sas fagayu taw. 42Ay fagayu taw naon ay napsug. 43Ay at ngay tagadal nafaful at ngay nagsawadan tinapay ay albon, ay nu fagayu wan labi dua yak sabi mapnu. 44At nafangon, limak libuk mangama.

Isus Nalao sas Tungud Lino

Mt 14:22-32; Uan 6:16-21

45Ay arodi Isus nasugu at ngay tagadal te, “Sakayi wan sas sakayan lino ay gunai wan angku sas dife sas furuan Betsaida.” Ay kadugenya, Isus gfauli ngay taw. 46Ngay taw nu nalo wan, Isus gundaud sa sik buksul laman nandarangin.

47Ay nu nyabi wan, sakayan gina sis wabilug lino, Isus gsadilian way sis talun. 48Ay Isus nalag te, at ngay tagadal gidapan gfalao at sakayan lino, aroro tagmara gfablang. Balabag di sdaga kamenit, Isus nalo sa sangaba tungud lino ay nanangakbang sat ngay tagadal at sakayan lino, ay nanlangfe wama. 49Ay at ngay tagadal nu nalag Isus nu glo sis tungud lino, gfangudguroan way lang, aroro nu glong sik labang. 50Ay fagayu at tagadal nalag anya ay garinun kalimu.

Arodi vtv Isus nalong sa anya fagayu te, “Faksvni ay amatanganan. Au way, lag am kalimu.” 51Ay Isus nasakay sas sakayan lino, magamut at ngay tagadal, ay anragang wan nu gtagmara. Ay at ngay tagadal andulo maksvn, 52aroro wa natogdungug sabaliwa Isus at nafakamulun at madulo sanya fag ngay tinapay aroro kamaogatun at amatanganan.

Isus Nafafia Ngayuk Taw sis Talun Genesaret

Mt 14:34-36

53Isus ay at ngay tagadal nu ndife wan, andasug sas furuan Genesaret, ay sanya nu gfamato at sakayan lino. 54Ay nu naduksun siginans sakayan lino, sanya fag ngay taw natoglag Isus. 55Kanya fag ngay taw gabanganan sas fagdaul at fakbangan fag talun laman namul at ke ngay fakasaitun. Kanya fagayu nafasas igyan ay nusnga nday nu nadungug te, sanya Isus, namuba sanya. 56Ay nusnga nday Isus nu kadasug, dewa sa sangay furuan ayu sirut ay sa sangay furuan ayu daul ay sas talun, sanya fag ngay taw gfasasad wabilug furuan at ke ngay fakasaitun. Ay kafag ngay taw get sas Isus laman at ke ngay fakasaitun nanted dewa way ro sit farangfangan lanbung. Ay fagayu at nated anfia wan.

Currently Selected:

Markus 6: OCCT

Highlight

Copy