Markus 14

Taw Udyu at ngay Fagtainan Kaylat Gfabul Isus

Mt 26:1-5; Lk 22:1-2

1Dua yak menit nu kadasug fagmafulun sabaliwa Tagbarita nu Glangfe, ay Tinapay at yud e Famabia. Ngay fun tagfon fanggalangun ay tagfoyung Muisis at Faugali gkamatoan nu setain nu magamat ay mafabul Isus laman ngay taw wa nasaful.

2Ay kanya fag ngay taw nalong te, “Toyap katsi, gina e fagmafulun fag ngay menit, laman ban sanya fag ngay taw at maful di namawayan antam.”

Sik Mangena Nafatayuk Famaebebanglu sas Isus

Mt 26:6-13; Lk 7:36-39; Uan 12:1-8

3Isus sis furuan Betanya ay gfangon sis Simun at bale. (Simun ebi ataw gabangbang.) Ay ginanya, sik mangena andasug, gbuba famaebebanglu at yud e suglat siginan sik tanum nardu, at mabyat nu kabayad, at fagsuadan mawatan siginans gang alabastru.#14:3 alabastru: sik malumak fag gang fangawat nusnge wain. Ay kafag mangena nalifung kafag fagsuadan at liug, ay naugwag at ba famaebebanglu sas Isus at alfuyu.

4Tibak taw sanya kadotama ay gkamatoan sit dayu te, “Wain manga at fagnafangulanun at famaebebanglu? 5Nu nafalao di, gtungud yay ro kayu sik taw at nagbulan kaduge sik banwa, ay mafon tua ro salapi sa sangay taw at yud e kwa.” Ay kanya fag ngay taw gagras kafag mangena.

6Ay Isus nalong te, “Lag am gsalag anya. Wain ay fakauriun anya? Masine tua at nafakamulun sa angku. 7At yud e kwa ste way gugat, ay nusnga ginain nu kaylat am, magubuk am anya. Ay dewa katanya, bunwa ban kabavn nu magamut au ayu. 8Kafag mangena nafakamulun wan at fagmakatun. Kanya naugwag sa ku bilug at ba famaebebanglu, laman gfalganan nu namoli ban angku. 9Matuyan nu glong au ayu te, nusnga nday ban nu e kamoyung at Masine fag Barita sas fagdaul daga, e gfoyung yangay ban anggan tuy fag mangena at nafakamulun, laman ban kanya kamatang tua gugat.”

Udas Namoyung Isus sat Mauri fag ngay Taw

Mt 26:14-16; Lk 22:3-6

10Arodi Udas Iskariute, Isus at labi duak tagadal at sadi, nalo sa sangay fun tagfon fanggalangun, laman namoyung Isus sa anya fagayu. 11Ay kanya fag ngay fun tagfon fanggalangun nu nadungug, guseganan, ay nafatuyanan sas Udas te, “Gfon ami emu salapi.” Ay Udas nafanya sik buknga laman mafoyung Isus sanya fag ngay taw.

Isus at ngay Tagadal Gfalganan at Yafun sabaliwa Tagbarita nu Glangfe

Mt 26:17-25; Lk 22:7-13; Uan 13:21-30

12Andasug taguna fag menit sis fagmafulun sabaliwa Tinapay at yud e Famabia. Ginanya yangay fag menit nu gfon fanggalangun fag tupa laman at fakonun gina fagmafulun sabaliwa Tagbarita nu Glangfe. Ay ginanya fag menit, Isus at ngay tagadal nainto sa anya te, “Dada ro am fakaylatun nu namalganan ami sabaliwa Tagbarita nu Glangfe fag yafun?”

13Ay Isus nasugu sat tagadal at dua te, “Loi wan sas furuan, ay sik mangama ro tagfasanan sik baringan mamam gfablang ayu. Ay nangalo ro am anya. 14Nusnga nday ro kafag taw nu gsakbo, longi sa tagbilug bale te, ‘Tam Takamoyung glong te, Dada ro fag salug nu gfangon au gasfuan ku ngay tagadal, laman sas fagmafulun sabaliwa Tagbarita nu Glangfe?’ 15Ay kanya ro namoyung ayu sik tagbia fag falangganan tagsit tungud baliwa. Ay sanya ro nu namalganan am tam yafun.”

16Ay kafag duak tagadal nalo wan ay andasug sas furuan. Ay duama nalag kata Isus at longan, ay nafatama sanya at yafun.

17Nu nyabi wan, Isus ay at tagadal fag labi dua andasug sanya. 18Ay kanya fagayu gina gfangon, Isus nalong te, “Matuyan nu glong au ayu te, si ayu ro at sadi tagfasfuan angku gfangon katsi, namoyung angku sat mauri fag ngay taw.”

19Ay at ngay tagadal gfasigad kabalu ay gsadsadian ginto sas Isus te, “Bunwa ban nangus au?”

20Ay Isus nabalus te, “Si ayu fag labi dua at sadi. Tagste yangay tagfasurung at fakonun sasad taya. 21Ay au, Taw at Baguama, umbul au kata at marirukan sas Dius at Longan. Ay ida at namoyung angku sat mauri fag ngay taw. Kanya nangus fag taw wa nsalug ya.”

Tam Fun at Yafun

Mt 26:26-30; Lk 22:14-23; 1Ku 11:23-25

22Gina kanya fagayu gfangon, Isus nabul sik tinapay ay naseg Dius, ay nalungud, ay nafon sat ngay tagadal ay nalong te, “Tuy ku bilug. Buli ay oni.”

23Ay Isus nabul yangay sik taya ay nu naseg Dius, kanya nafon sat ngay tagadal ay fagayu nainum. 24Ay kaya nalong te, “Tuy ku taguk takabusbus ban laman gfalyam ngayuk taw at asalanan, ay famatuyan Dius at nasadian sa sangay taw. 25Matuyan, glong au ayu te, kya ban gdog ginum rawvg ubas at mamam yakmay kban ginum at bagu si ku Mama at fagfagtainanan.”

26Ay nu nalubad wan sik alubad, kanya fagayu nalo wan sas Buksul Ulibu.

Isus Nafaguna Nalong Pedru nu Kamuag te, Wa Toglag Anya

Mt 26:31-35; Lk 22:31-34; Uan 13:36-38

27Ay Isus nalong sat ngay tagadal te, “Fagayu am gubun ro am angku, kata at marirukan te, ‘Gfabul au tagalaga, ay at ngay tupa sumaruayan.’#14:27 Sakaryas 13:7. 28Ay gina kban nadog naleleg, gguna au ayu sas talun Galilea.”

29Ay Pedru nalong anya te, “Ku iba ro fagayu dewa naubun emu, au kwa gubun emu.”

30Ay Isus nalong te, “Matuyan, glong au emu te, katsi ro fag yabi, gina tabag yud natarakit at fadua ginan, tulu ginan ro nu kamuag o te, wo toglag angku.”

31Ay Pedru maksvn nu gbalus anya te, “Duan, dewa ro au nangabul gasfuan emu, kwa ro glong te, kwa toglag emu.” Ay katanya yangay fagayu at tagadal at longan.

Isus Gdarangin

Mt 26:36-46; Lk 22:40-46

32Isus ay at ngay tagadal nalo sa sik tanuman at ngayan Getsemane. Ay Isus nalong sat ngay tagadal te, “Malunggungi ste kaduge au gdarangin.”

33Ay Isus nataban Pedru ay Santiagu ay anggan Uan, ay gfasigad kabalu ay maksvn nu gidapan sit amatanganan. 34Ay Isus nalong sat ufud fag tulu te, “Katsi maksvn nu kabalu au, kata kwan nu mabulan au. Ste yap am ay mataganani.”

35Ay Isus nalo yay sirut ay malub sas daga ay gdarangin laman malangfe takafasludan ban sa anya. 36Ay Isus nalong te, “Mama, mafafakamulun tuo nusnge wain. Buli siginan angku ku fagnandalanun ban fag faurianan.#14:36 Buli… faurianan: sas Griegu, Buli siginan angku tuy fag faginuman. Dewa katanya, lag gfaning ku fakaylatun, nu bunway fadasugi am fakaylatun.”

37Ay Isus anfoli sat tagadal fag tulu ay manlag di gtiug way. Ay kanya glong sas Pedru te, “Simun, o gtiug wayo mangaro? Ay wain, o wo maintiuganun ya dewa sik buknga sirut? 38Mataganani ay darangini tua, laman diam gafaskudan asalanan. Ay amatanganan mafalganan tua, dewa katanya, ay bilug mamomuy way.”

39Ay Isus nalo yay fia sat dayu ay nandarangin, ay at longan kata yangay aro taw. 40Ay Isus gdog yay anfoli ay manlag di at ngay tagadal gtiug yay gugat, aroro maksvn nu gatiugun. Ay Isus nu nafulo, kafag tulu wa mabalus aroro kapla. 41Ay Isus anfoli at fatulu ginan ay nalong sat ngay tagadal te, “O gtiug yayam gugat ay gfiangalay? Sabv ro. Katsi wan, damai, e namoyung wa angku, Taw at Baguama, sa sangay taw tagasalanan. 42Alindugi wan. Bastam wan. In wan at namoyung angku, andasug wan.”

Nagamat Isus

Mt 26:47-56; Lk 22:47-53; Uan 18:3-11

43Ay arodi vtv, kaduge Isus garingang, Udas, Isus at labi duak nasugu at sadi, andasug ay e ufud sik ngay taw ngayu gafisoan ay e famalang. Ngay fun tagfon fanggalangun ay ngay tagfoyung Muisis at Faugali ay taw Udyu at ngay fagtainan nasugu kafag ngay taw. 44Ay at namoyung Isus nafae fagsafulan sat ngay ufud te, “Dewa gina ro, nusnga sinu ku nayuk at fingi, kanya wan Isus. Gamati wan ay tabani, lag gfalfas.”

45Ay Udas nu ndasug, nanangakbang wa vtv sas Isus ay nalong te, “Takamoyung,” ay nayuk Isus at fingi. 46Ay kanya fag ngay taw nagamat Isus ay nataban wan. 47Ay Isus at tagadal at sadi naguyud at fiso ay nabasing tiba tungud fag tagfon fanggalangun at fagsuguan ay andasdas at talinga at sadi.

48Ay Isus nalong sa sangay taw te, “Nataw ay fagsteun ngayu gafisoan ay e ngay famalang? O nanggamat am angku kata nu e ggamat sik tagfangkamul? 49Kayu menit gfoyung au gugat sis Dius at bale, ay sanya yangay am, dewa katanya wam nagamat angku. Ay katsi umfasludan wan Dius at Longan sabaliwa angku.”

50Ay Isus at ngay tagadal fagayu naubun anya ay nalagyu. 51Ay sik baguama at ke lanbung umut naguyan Isus. Ay tibak taw nagamat anya, 52ay kanya nalagyu malulasan aroro si way at lanbung nu gted.

Nu Gtaban Isus sas Taw Udyu at ngay Tagfangguna

Mt 26:57-68; Lk 22:66-71; Uan 18:12-14,19-24

53Ay kafag ngay taw nataban Isus sa tiba tungud fag tagfon fanggalangun. Ay fagayu fun tagfon fanggalangun ay taw Udyu at ngay tagfangguna ay anggan tagfoyung Muisis at Faugali anful sanya. 54Ay Pedru gguyan Isus sit dayu, ay ndasug sa tiba tungud fag tagfon fanggalangun at fagawean. Ay Pedru malunggung magamut ngay tagulit ay gfangenbung. 55Ay kanya fag ngay fun tagfon fanggalangun ay taw Udyu at ngay tagfangguna fagayu grvbvy at famatuyan sabaliwas Isus at nafakamulun laman sak gfabul anya. Ay dewa katanya, kanya fagayu we nalag. 56Dewa ngayuk taw takamuag nu gfoyung sabaliwas Isus, at ngay longan wa gdiuganan.

57Ay tiba at malindug sanya kamuagan gfoyung te, 58“Nadungug ami tuy fag taw nu glong te, ‘Nanrasras kban Dius at bale, ngay taw at nawat, ay nu nlangfe ban tuluk menit, nangawat au at sadi, bundi taw at ke awatan.’ ” 59Dewa katanya anggan kanya at foyungan wa gdiuganan.

60At tiba tungud fag tagfon fanggalangun anlindug si sangay taw at wabilug ay ginto sas Isus te, “O wo gbalus in fag ngay taw at ngay fanlonganan sabaliwa emu?”

61Ay Isus maragangan way ay wa gbalus. Ay at tiba tungud fag tagfon fanggalangun ginto yay fia te, “O o wan Dius at nafili fag Fun?#14:61 Dius at nafili fag Fun: sas Griegu, Kristu. O o wan tam Fagsegan fag Dius at Baguama?”

62Ay Isus nabalus te, “Au wan. Ay lumag ban am angku, Taw at Baguama, nu malunggung au sit Mabalyanan at siun ay nu kadasug au siginan sad linyabu sis kiwang.”

63Ay tiba tungud fag tagfon fanggalangun nagirat at lanbung aroro kadotama ay nalong te, “Lag tam kaylat ya tibak taw tagfoyung at asalanan, 64aroro nadungug watam nu glong mauri sas Dius. Tain ro ay algan?”

Ay kanya fagayu ansadi te, “Fabuli anya.”

65Ay tiba gfasigad gtufe Isus ay gtabun Isus at mata ay gfalang anya, ay glong te, “Foyungi emi, sinu at nafalang emu.” Ngay tagulit gina gtaban anya maksvn nu gfalang.

Pedru nu Kamuag te, wa Toglag Isus

Mt 26:69-75; Lk 22:54-62; Uan 18:16-18,25-27

66Pedru kaduge sis fagawean, tiba tungud fag tagfon fanggalangun at sadi at fagsuguan sik baguina andasug. 67Ay kafag baguina nu nalag Pedru gina gfangenbung, glong te, “O wan at sadi tagalo Isus fag taw Nasaret, o sabv?”

68Ay Pedru nafamuag te, “Kwa toglag kafag taw, ay kwa saful am longan at masuad.”

Ay Pedru nalao siginan sad fagawean laman nasas sakbawan alad. 69Ay kafag baguina gdog yay nalag anya ay nalong sat malindug tagsanya fagayu te, “In fag taw Isus at ufud at sadi.”

70Ay Pedru gdog yay nafamuag. Ay arodi vtv sik ngay taw at malindug sanya glong sas Pedru te, “Anud wan, o wan at sadi at ufud, aroro sik taw Galilea o.”

71Ay Pedru maksvn nu gfatuyan te, “Dewa ro au anbul, anud wan kwa toglag ay nalong fag taw.”

72Ay arodi vtv sik tabag gtarakit at fadua ginan, ay Pedru namatang ebi ataw Isus at longan anya te, “Gina ro tabag yud natarakit at fadua ginan, tulu ginan ro wo kamuag te, wo toglag angku.” Ay Pedru nawayway maksvn.

Currently Selected:

Markus 14: OCCT

Highlight

Copy