Mateu 28

Isus nu Gdog Gleleg

Mk 16:1-7; Lk 24:1-8

1Ay Famiangalay fag Menit nu nlangfe wan, gina sbalabag sirut sLinggu, Maria Magdalena, ay anggan sadi yak Maria, andasug laman nanlag sas fagfolian. 2Ay gina sanya, maksvn daga nu guigan. Ay tam Fun at tagbarita at sadi andasug siginans banwa, ay nafadaging faningding sakbawan fag gang daul, ay gmalunggung sanya. 3At kamasuloan kaksvn sik limbad, ay at lanbung malaksi. 4Ay tagulit fag ngay tagfawayan maksvn nu gtadtaruyan aroro kalimu, ay kata wan nu mabulan.

5Ay kafag tagbarita nalong sa kafag ngay mangena te, “Lag am kalimu, aroro nasaful au te, grvbvy am Isus, ebi at natuktuk sas fasulungan kayu. 6Kanya wa ste ya, aroro nadog yay naleleg, kata ebi at longan. Wainyayam, damai at fagfolian anya. 7Masakiti, namoyung am sat ngay tagadal te, kanya gdog yay gleleg siginan at fagmabulanan. Ay kanya gguna ban ayu sas talun Galilea. Sanya ban nu glag am anya. Amatangi ku longan ayu.”

Isus Ansure sas Duena Gina sa sangaba Dalan

Mk 16:8

8Ay kanya fag duena nalo masakit siginans fagfolian, ay nafasaful at nalag sa sangay tagadal. Ay dewa kalimu, guseganan daul. 9Ay kaduge sangaba dalan, Isus nafablang duena ay nafakamatoan. Ay duena ankakbang sas Isus ay nated at darafa, ay naseg anya. 10Ay arodi Isus nalong sanya fag duena te, “Lag kalimu. Loi wan ay foyungi sa ku ngay faduksay, laman sabans talun Galilea. Ay sanya ban nu glag angku.”

11Ay gina kafag ngay mangena nalo, tibak tagfawayan tagulit sis fagfolian, anfoli sas furuan ay nafoyung sa sangay fun tagfon fanggalangun fagayu at nalag. 12Ay ngay fun tagfon fanggalangun nu nafaful taw Udyu at ngay fagtainan ay nu nasulitanan, kanya nafon sik ngay salapi sanya fag ngay tagfawayan, 13ay nalong te, “Foyungi te, ‘Isus at ngay tagadal andasug sas fagfolian aro sad yabi ay nabul at bilug kaduge ami gtiug.’ 14Ay tam fun ro nu nadungug katanya ay longan, ay nu nkuri way, ami waban tagfalukmeanan anya, laman di gfauri ayu.” 15Ay kafag ngay tagfawayan nabul kafag ngay salapi ay gfaning at longan. Ay dasug katsi ngay taw Udyu gfoyung yay gugat takatanya.

Isus Nasugu at ngay Tagadal Laman Kamoyung

Mk 16:15-18

16Ay Isus at labi sadik tagadal nalo sas Isus at longan ebi ataw fag buksul sis talun Galilea. 17Ay at ngay tagadal nu nalag Isus, gseg anya. Ay tiba gaduanun yay. 18Ay Isus ankakbang sat ngay tagadal ay nalong anya fagayu te, “Fagayu fagmabalyananun sis banwa ay sis daga nafon wan sa angku. 19Loi wan ay faetagadali angku sas fagayu talun at ngay taw. Fasurungi anya fagayu sa tam Mama at ngayan ay at Baguama at ngayan ay at Masine fag Falad at ngayan. 20Foyungi sa anya fagayu, laman gfaning fagayu ku longan sa ayu. Matuyan, si ktua ban gugat ayu, sitsigons fagdaul daga at fakatabuan.”

Currently Selected:

Mateu 28: OCCT

Highlight

Copy