Mateu 21

Isus Nasakbo sas Erusalem Kata sik Fun

Mk 11:1-10; Lk 19:28-38; Uan 12:12-15

1Isus ay at ngay ufud nu munakbang wan sis furuan Erusalem andasug sas furuan Betfage sis Buksul Ulibu. Ay Isus nasugu duak tagadal te, 2“Loi wan sat fadogan fag furuan. Ay nu ndasug am sanya, lumag ro am sik asnu masiukan anggan at riangan. Luasi wan kanya fag dua ay tabani stae sa angku. 3Ay gina am gluas, sik taw nu e nasalag way ayu, longi anya te, ‘Tam Fun kaylat.’ Ay kanya ro fag taw gfabayan way lang nu gtaban am kafag duak asnu.”

4Fakatanyaun, gfafasludan Dius at taglong ebi at foyungan te,

5“Longi sas furuan Erusalem at ngay taw te,

‘Damai, ay Fun kadasug wan sa ayu.

Kanya kamababaun tua, ay gsakay si sik asnu,

ay kafag asnu sik riangan yay.’ ”#21:5 Sakaryas 9:9.

6Ay kafag duak tagadal nalo wan ay nafaning Isus at longan. 7Ay duama nataban sa anya kafag asnu ay anggan at riangan, ay nasagmak at ngay lanbung sanya fag duak asnu at tungud guyuy, ay Isus nasakay sanya. 8Ay ngayuk taw nasagmak yangay at ngay lanbung sa sangaba dalan. Ay tiba nalifung ngay falungfung laman at fanagmak at dalan. 9Ay ngay taw tagsit fagunan ay tagsit faguyanan guro te,

“Fadi fadi, O fun Dabid at kasugfunanan!

Segi takadasug sas Dius at fagmabalyananun!#21:9 Alubad 118:25,26.

Fadi fadi, segi Tiba Tungud fag Dius!”

10Ay Isus gina bagu kadasug sas Erusalem, fagayu taw kadulo ay gidgintoan te, “Sinu ro siring kanya fag taw?”

11Ay tibak taw nabalus te, “Kanya Isus, Dius at taglong tagsiginans furuan Nasaret sis talun Galilea.”

Isus Naiyan Tagfaebayad siginan Dius at Bale

Mk 11:15-19; Lk 19:45,46; Uan 2:13-16

12Ay Isus nasakbo sas Dius at bale ay naiyan fagayu tagfaebayad ay fagayu at namayad. Ay kanya nafalub at ngay tagfabadbangsian salapi at ngay fagfolian, ay anggan ngay faglunggungan laman sa sangay tagfaebayad labikung. 13Ay Isus nalong sanya fag ngay taw te, “E rirukan wa te, ‘Ku bale sik bale daranginan,’#21:13 Isayas 56:7. ay dewa katanya, nawat wayam ‘ngay tagfangkamul at fagmafulan.’ ”#21:13 Eremyas 7:11.

14Ay arodi ngay taw yud glag ay yud malo nanangakbang sas Isus gina sis Dius at bale, ay Isus nafafia anya fagayu. 15Ay ngay fun tagfon fanggalangun ay ngay tagfoyung Muisis at Faugali kauri nu nalag Isus at fakamulun at madulo, ay nu nadungug ngay sisian sas Dius at bale nu guro te, “Fadi fadi, segi, fun Dabid at kasugfunanan.”

16Ay kafag ngay taw nainto sas Isus te, “O wo nadungug kafag ngay sisian at longan?”

Ay Isus nabalus te, “Sabv. Ay o yam natap te,

‘Dius, nafalganan wo ngay sisian ay sik ngay ngenge tagseg emu’?”#21:16 Alubad 8:2.

17Ay Isus nalo wan sanya ginan fag ngay taw ay siginans furuan Erusalem, ay ndasug sas furuan Betanya ay sanya wan nu gtiug.

Isus Nafayango sik Kayu

Mk 11:12-14,20-24

18Ay balabag di, gina Isus ay at ngay tagadal kafoli sas furuan Erusalem, Isus anlunus. 19Ay kanya nalag sik kayu sis day dalan, ay nasanya ay narvbvy at rawvg. Ay we nalag, sas day at ngay don. Ay Isus nalong sanya fag kayu te, “Siginan katsi lag ban grawvg kabavn.” Ay arodi vtv kafag kayu nyango wan.

20Ay at ngay tagadal nu nalag, andulo te, “Tain nu kayango vtv?”

21Ay Isus nabalus anya te, “Matuyan nu glong au ayu te, nu gafanud tuam ay nu ddi am gawabilugan, mafafakamulun yangay am kata aro ku nafakamulun sa kafag kayu. Ay malong yangay am ste fag buksul te, ‘Alini, ay tosi sasad dagat,’ ay gfaning ay longan. 22Ay nusnge wain ay fagetun gina am gdarangin, gfon wa fia ayu, nu e fagafanudun tuam.”

Sinu at Nasugu Isus

Mk 11:27-33; Lk 20:1-8

23Ay Isus andasug sas Dius at bale, ay kaduge kanya gfoyung, ngay fun tagfon fanggalangun ay ngay fagtainan nanangakbang sa anya ay nainto te, “Daginan am fagmabalyananun am fagmafafakamulunun katanya, ay sinu at nasugu emu?”

24Ay Isus nabalus anya te, “Anggan au, e fagintoun au sa ayu. Ay nu nabalus tua ro am ku fagintoun, anggan au, gfoyung kyangay ro ayu te, daginan ku fagmabalyananun ku fagmafafakamulunun takatanya. 25Ginto au ayu te, Uan at fagfasurungun taw, o at fakamulun siginans banwa, o mannga siginans taw?”

Ay kanya fag ngay taw gkamatoan sit dayu te, “Nu nalong ro tam te, ‘Siginans banwa,’ kanya ro gbalus antam te, ‘Wain ay fagyudun gafanud Uan at longan?’ 26Ay nu nalong ro tam te, ‘Siginans taw,’ kalimu way tam fagayu taw, aroro kanya fagayu gafanud te, Uan sik taglong siginans Dius.”

27Nu katanya, kanya fagayu nabalus Isus te, “Wami saful.”

Ay Isus nalong te, “Anggan au, kwa gfoyung ayu te, daginan ku fagmabalyananun ku fagmafafakamulunun takatanya.

Isus at Faydayuanan sabaliwa sik Duksay

28“Ay tain nu gamatangan am? Sik taw e baguama dua. Ay kanya nalong sat sadi at baguama te, ‘Loi wan sa tam tanuman wat ay namakamulun o sanya.’

29“Ay kafag baguama nabalus te, ‘Kwa kaylat.’ Ay arodi nafabali yay at amatanganan, ay nasanya yay.

30“Ay sanya ginan at mama nanangakbang sat sadi ay katanya yangay at longan. Ay kanya nabalus te, ‘Kin, mama.’ Ay dewa nalong katanya, wa nasanya.

31“Inday ro sanya fag duksay at nafaning at mama at fakaylatun?”

Ay kafag ngay taw gbalus te, “At taguna.”

Ay Isus nalong yangay anya te, “Matuyan nu glong au ayu te, ngay tagbul famayad laman sas fun ay ngay takamatugtug gumuna ayu nu nangatap sas Dius at fagfagtainanan. 32Ebi Uan andasug oma sa ayu laman namoyung ayu ay fakamulun at matuyan, ay wam gafanud anya. Ay dewa katanya, ngay tagbul famayad laman sas fun ay ngay takamatugtug gafanud tua. Ay dewa am nalag takatanya, wam naubun ay asalanan ay wa yangay am gafanud anya.”

Isus at Faydayuanan sabaliwa at Mauri fag ngay Tagalaga Tanuman

Mk 12:1-12; Lk 20:9-19

33Isus nalong yangay fia te, “Dungugani sadi ya ku faydayuanan. Sik tagagbilug daga natanum sik ngay wat ubas sit daga ay naalad at tanuman, ay nawat yangay sik fagturisan ubas at rawvg, ay nawat sik bale ngabat laman fagulitan at tanuman. Ay kanya nafaalaga at tanuman sa sik ngay tagalaga ay nalo sa tangayayu fag talun. 34Ay at ngay rawvg nu gakalesanun wan, tagagbilug nasugu tiba at fagsuguan sa sangay tagalaga at tanuman laman namul at afud. 35Ay kafag ngay tagalaga nagamat kafag ngay fagsuguan. Ay nafalang at sadi, ay nafabul at sadi, ay nafana gang at sadi. 36Ay tagagbilug nasugu tiba yak fagsuguan ayu yap aro taw taguna. Ay katanya yangay at ngay tagalaga at fakamulun sanya fag ngay fagsuguan. 37Ay taguyan, kanya nasugu at baguama sat ngay tagalaga ay nalong te, ‘Kanya ro fag ngay tagalaga gsuyu tua ku baguama.’

38“Dewa katanya kanya fag ngay tagalaga nu nalag kafag baguama, gkamatoan te, ‘Kadasug wan at nangagbilug ban at mama at daga. Bastam, namabul tam anya, ay gagbilug ban tam at daga.’ 39Ay kafag ngay tagalaga nagamat kafag baguama ay nataban sas day tanuman ay nafabul anya.”

40Ay Isus nainto te, “Ay nu katanya, tagagbilug ro nu ndasug, nataw at fakamulun sanya fag ngay tagalaga?”

41Ay kafag ngay taw nabalus te, “Kanya namabul kafag ngay taw mauri, ay namalaga at tanuman sa tibak taw, laman ban nu nke rawvg, kanya e afud tua.”

42Ay Isus nalong anya te, “O yam natap Dius at Longan te,

‘Ngay takawat bale at naukas fag gang,

katsi at famaogat tua at bale.

Tam Fun at nafakamulun takatanya,

ay maksvn nu kadulo tam.’#21:42 Alubad 118:22,23.

43Nu katanya, glong au ayu te, Wa ban am umful sas Dius at fagfagtainanan. At kumful ban, tagfaning tua at fakaylatun. 44Ay nusnga sinu at kumtong sanya fag gang, umrufa, ay nusnga sinu at nafakwanan kafag gang umdudug.”

45Ay ngay fun tagfon fanggalangun ay ngay taw Fariseu nu nadungug Isus at faydayuanan, nasaful te, sa wa anya fagayu at fagfatungulan. 46Ay dewa kanya fagayu gyagamatun Isus, kalimu way ngay taw, aroro ngay taw gafanud te, Isus, Dius at taglong at sadi.

Currently Selected:

Mateu 21: OCCT

Highlight

Copy