Mateu 19

Isus at Longan sabaliwa at Naubun at Mangena

Mk 10:1-12

1Ay Isus nu ntabu wan nu gfoyung, nalo wan siginans talun Galilea ay andasug sa sik afud talun Udea sis dife Liskung Urdan. 2Ay ngayuk taw naguyan anya. Ay sanya, Isus nafafia ngay taw at ke fakasaitun.

3Ay sik ngay taw Fariseu ankakbang sas Isus laman namaskud anya. Ginto te, “O gfaning tam faugali sik mangama nu naubun at mangena dewa snga setaw at fanlonganan?”

4Ay Isus nabalus anya te, “O nunda yam natap te, sis fakasigadan, Takawat ‘nawat mangama ay mangena.’#19:4 Fakasigadan 1:27. 5Ay kanya nalong te, ‘Nu katanya, sik mangama gubun at mama ay at mina ay nangalo at mangena, ay kanya fag dua ansadi wan.’#19:5 Fakasigadan 2:24. 6Nu katanya, bunwa dua ya, sadi wan. Ay nusnga sinu Dius at nafasadi, lag e namasaruayan ya.”

7Ay kafag ngay taw Fariseu nainto Isus te, “Nu katanya, wain Muisis at fagnalongun te, ‘Nu gaubunun wo am mangena, foni anya sik famatuyan te, nasaruayan wata, ay aiyani wa anya’?”

8Ay Isus nabalus te, “Fakatanyaun aroro kamaogatun am ay amatanganan, ay wa katanya ebi taguna. 9Ay glong kyangay ayu te, nusnga sinu at naubun at mangena, ay kafag mangena nu doma nanamatugtug, kafag mangama way tagfanugtug nu ndadwa yay sa tibak mangena.”

10Ay Isus at ngay tagadal nalong anya te, “At faugali sabaliwa sik dadwa nu katanya way, at masine lag kadadwa ya.”

11Ay Isus nalong sat ngay tagadal te, “Bunwa fagayu taw at mafaning kafag longan, nu bunway Dius tua tagfamatangan. 12Saman wan sik mangama at fanlonganan at fagyudun kaylat kamubay. Tibak mangama wa gafamubayun aroro katanya wan siginan ngay nu kasalug. Ay tibak mangama wa gafamubayun aroro e naluasan anya. Ay tiba yangayk mangama wa gafamubayun aroro kesug Dius nu gfagtainan. Nusnga sinu at makatu gfaning, faningi.”

Isus Nafadante sik ngay Sisian

Mk 10:13-16; Lk 18:15-17

13Ay arodi e nataban sik ngay sisian ayu sirut sas Isus, laman Isus namatayuk at daluap sa anya ay nandarangin. Ay at ngay tagadal gsalag kafag ngay taw tagtaban. 14Ay Isus nalong te, “Fabayani wan kafag ngay sisian, lag am gsalag nu kakbang sa angku. Aroro takata kanya fag ngay sisian katap ban sas Dius at fagfagtainanan.”

15Ay Isus nu nafatayuk wan at daluap sanya fag ngay sisian, nalo wan sanya ginan.

Sik Maramraman fag Mangama

Mk 10:17-31; Lk 18:18-30

16Ay ginanya sik baguama nanangakbang sas Isus ay ginto te, “Takamoyung, setain manga ku fakamulun at matuyan laman e leleg ktua at yud e fakatabuan?”

17Ay Isus nabalus anya te, “Wain am fagintoun angku sabaliwa at matuyan? Sadi way at matuyan. Nu kaylat o gleleg kabavn, faningi Dius at ngay suguan.”

18Ay kafag baguama nainto yangay te, “Inday manga kafag ngay suguan at masine ku fagfaningun?”

Ay Isus nabalus anya te, “Lag gfabul, ay lag gfanugtug, ay lag gfangkamul, ay lag kamuag nu gfatuyan sabaliwa am iba, 19ay suyui am mama ay am mina, ay esugi am iba kaksvn nu kesug o emu.”

20Ay kafag baguama nabalus Isus te, “Nafaning kwan takatanya fagayu. Ay nataw ya ku yud nafakamulun?”

21Ay Isus nabalus te, “Nu kaylat o laman di o e malong, falaoi fagayu am ramraman, ay at nagbulan foni sa sangay yud e kwa, laman e ramraman tua ban o sas banwa. Ay sanya ginan, aloi angku.”

22Ay kafag baguama nu nadungug Isus at longan, nalo mabaluanan, aroro maksvn nu maramraman. 23Ay Isus nalong sat ngay tagadal te, “Matuyan nu glong au ayu te, maidap tua sik maramraman fag taw nu manangatap sas Dius at fagfagtainanan. 24Ay glong kyangay ayu te, amasakit yap sik kamelyu nu nansulun sasad fansimat ramit at sulat, sa sik maramraman fag taw nu manangatap sas Dius at fagfagtainanan.”

25Ay at ngay tagadal andulo maksvn nu nadungug Isus at longan ay nalong te, “Nu katanya, sinu ban at kumlangfe.”

26Ay Isus nadama at ngay tagadal ay glong te, “Ngay taw at fagyudun mafafakamulun, Dius mafafakamulun tua.”

27Ay Pedru nalong sas Isus te, “Ami, naubun wami fagayu em ngay ramraman laman nangalo ami emu. Ay nataw ban manga emi em fagnamulun?”

28Ay Isus nabalus anya te, “Matuyan nu glong au ayu te, Dius ban gfabagu nusnge wain, ay au, Taw at Baguama, gmalunggung au sa ku fagmalunggungan ke fagmasineun, laman namagtainan. Ginanya ban, am tagalo angku, malunggung yangay ban am sas labi duak faglunggungan kata sik ngay fun. Ay nanginsaful ban am at masine ay at mauri sas labi duak kasugfunanan Israel. 29Ay nusnga sinu at naubun at bale ay at ngay faduksay ay at mama ay at mina ay at sisian ay at daga aroro gafanud sa angku, kanya ban fag taw mul ayu yap tua at naubun, ay e leleg tua ban at yud e fakatabuan. 30Ay katsi at naguna tiba, kanya ban gaguyanan, ay at naguyanan, kanya ban gumuna.”

Currently Selected:

Mateu 19: OCCT

Highlight

Copy