Mateu 16

Ngay Taw Fariseu ay Saduseu Kaylat Gyalagun at Mabalyanan fag Fakamulun

Mk 8:11-13

1Abandi ngay taw Fariseu ay ngay Saduseu nanangakbang sas Isus laman namaskud anya. Kanya fagayu get sa anya laman gfasure sik mabalyanan fag fakamulun tagfatoglag te, Dius at nasugu anya.

2Ay Isus nabalus kafag ngay taw te, “Gina kayabi glong am te, ‘Masiwang tua ban balabag, newa banwa gmangalay tua.’ 3Ay gina sbalabag glong am te, ‘Karak way ro siring newa banwa dewa gmangalay, madulum way sat ligung.’ Nasaful wam at fakatoglagan sis banwa ay dewa katanya wam saful fakatoglagan sabaliwa takadasug ban fag ngay menit. 4Ay fagyalagunun sik mabalyanan fag fakamulun aroro mauri wayam fag ngay taw ay at yud matuyan sas Dius. Ay wa ban e gfalag ya sa ayu takatanya sas day at kinfasludan sas Dius at taglong Unas.”

Ay Isus naubun kafag ngay taw ay nalo wan.

Isus at Faydayuanan sabaliwas Famabia Tinapay

Mk 8:14-21

5Ay Isus ay at ngay tagadal nu ndife wan, at ngay tagadal wa namatang gbuba fakonun. 6Ay Isus nalong anya te, “Dirii ay mataganani taw Fariseu ay Saduseu at famabia tinapay.”

7Ay at ngay tagadal gkamatoan sit dayu te, “Isus at fagnalongun katanya aroro wa tam namatang gbuba fakonun.”

8Ay Isus saful way at ngay tagadal at kamatoanan ay nalong anya te, “Wa maksvn nu gafanud am. Wain ay fagkamatoanun te, ‘Watam e fakonun’? 9O yam natogdungug? Ay o wam gamatang ya ku famayafun fag limak tinapay sas limak libuk mangama, ay seyuk sabi ay nafaful at nagsawadan? 10Ay anggan yangay fituk tinapay ku famayafun sas ufatk libuk mangama, ay seyuk balulang ay nafaful at nagsawadan? 11Wain ro ay fagyudun nasaful aro ku longan at masuad? Ku nalong at masuad, bunwa fakonun. Glong ktua te, dirii ay mataganani ngay taw Fariseu ay Saduseu at famabia tinapay.”

12Ay arodi at ngay tagadal nasaful te, Isus at longan wa sabaliwas famabia tinapay. At masuad tua te, dirii ngay taw Fariseu ay Saduseu at ngay foyungan.

Pedru Gfoyung te, Isus, Dius at Nafili fag Fun

Mk 8:27-30; Lk 9:18-21

13Ay abandi Isus nalo sas Sesaria-Filipus fag furuan, ay nainto sat ngay tagadal te, “Sinu au, ngay taw at longan sa baliwa angku, Taw at Baguama?”

14Ay at ngay tagadal nabalus te, “Tibak taw glong te, o wan Uan Tagfasurung, ay tiba glong te, o wan Dius at taglong Elyas, ay tiba glong te, Eremyas, ay mannga tiba yak taglong ebi.”

15Ay Isus nainto yangay fia sat ngay tagadal te, “Ay am, nu gamatangan am, sinu au?”

16Ay Simun Pedru nabalus te, “O wan Dius at nafili fag Fun,#16:16 Dius at nafili fag Fun: sas Griegu, Kristu. Anggan t.20. tagleleg fag Dius at Baguama.”

17Ay Isus nalong yangay anya te, “Mauseganan tuo Simun, Unas at baguama. We taw nafoyung emu takatanya. Ku Mama tua sas banwa at nafoyung emu. 18Ay glong kyay sa emu te, o wan Pedru, at masuad te Gang, ay namaful kban ku ngay taw stae fag gang, ay dewa fakabulun at fagmabalyananun di ban mababo ku nafaful fag ngay taw. 19Ay gfon kban sa emu fanluang Dius at fagfagtainanan. Ay nusnga setaw am fagsalagun ste swa daga, anggan Dius sis banwa gsalag yangay. Ay nusnga setaw am fagyudun gsalag ste swa daga, anggan Dius sis banwa wa yangay gsalag.”

20Ay arodi Isus maksvn nu glong sat ngay tagadal laman wa glong sas nusnga sinu sabaliwa anya te, sia wan Dius at nafili fag Fun.

Isus Nafoyung sabaliwa nu Kabul Ban

Mk 8:31–9:1; Lk 9:22-27

21Siginan ginanya, Isus gfasigad gfoyung sat ngay tagadal te, “Glo kban fia sas furuan Erusalem. Ay sanya ban ngayu ku fagnandalanun faurianan siginan sangay fagtainan ay ngay fun tagfon fanggalangun ay anggan ngay tagfoyung Muisis at Faugali. Ay e gfabul ban angku, ay gdog kyay ban gleleg sis fatuluk menit.”

22Ay Pedru nataban Isus sat dayu ay gagras anya te, “Ku Fun, duan, wa ban umfasludan takatanya sa emu.”

23Ay Isus anbiling ay nasalubang Pedru ay nalong anya te, “Satanas, lag ste ya! Gfataid wayo angku. Aroro am amatanganan bunwa Dius at algan, nu bunway taw way at algan.”

24Ay arodi Isus nafoyung sat ngay tagadal te, “Nusnga sinu takaylat nangalo angku, lag gfaning at sadili fakaylatun nu bunway fasanani at fasulungan kayu ay aloi angku. 25Aroro nusnga sinu takesug at leleg, umkalyam way ban at leleg. Ay nusnga sinu tagfon at leleg aroro gafanud sa angku, kanya ban e leleg tua kabavn. 26O e tungkul ro sa sik taw at nagbilug nusnge wain ste swa daga ay at leleg ban sa ways faurianan? Sik taw we famangsi at leleg. 27Aroro au, Taw at Baguama, kadasug kban stae at ke fagmasineun siginan ku Mama, gfasfuan at ngay tagbarita. Ay ginanya ban gfon au sas fagayu taw kata at nafakamulun.

28“Ay matuyan nu glong au ayu te, am tiba at malindug ste katsi ya ban am kabul yakmay am nalag angku, Taw at Baguama, nu kadasug au laman namagtainan ku ngay taw.”

Currently Selected:

Mateu 16: OCCT

Highlight

Copy