Mateu 13
13
Isus at Faydayuanan sabaliwa sik Tagtanum
Mk 4:1-9; Lk 8:4-8
1Ginanya fag menit, Isus nalo wan sanya ginan fag bale ay namalunggung sis tigyangan lino. 2Ay ngayuk taw anful ay naligung anya. Nu katanya, Isus nasakay sa sik sakayan lino ay malunggung sanya. Ay kafag ngay taw gmalindug sis tigyangan lino. 3Isus nafoyung ngayuk faydayuanan sanya fag ngay taw. Kanya nalong te, “Sik tagtanum nakoko laman nananum at ngay bvtang. 4Ay gina gtanum, tiba at bvtang antong sasad dalan. Ay sik ngay manuk tungud andasug sanya ay nasinduk wan. 5Ay tiba at bvtang antong sa tagagangun ay tagsanya fag daga mayangfis way. Ay kafag bvtang masakit nu gtugbung, aroro tagsanya fag daga wa ngabasad. 6Ay menit nu masugba wan, at bagu gtugbung fag bvtang kalangke wan, aroro at lalid wa kaabasad, ay kayango wan. 7Ay tibak bvtang antong sas wa makmak madugi, ay kafag makmak anbia ay nafaut at tanum. 8Ay tibak bvtang antong sat masine fag daga, ay ngayu tua at rawvg. At rawvg siginan tibak bvtang sik sandan, ay tiba unumk safulu, ay tiba tuluk safulu. 9Fagayu am tagdungugan, amatangani tua fia.”
Isus at Algan at Fagfaydayuananun
Mk 4:10-12; Lk 8:9-10
10Ay Isus at ngay tagadal ankakbang sa anya ay nainto te, “Wain am fagfaydayuananun way galay o gfoyung sa sangay taw?”
11Ay Isus nabalus te, “Aroro Dius kaylat nu sumaful am at ngay masuksuk sabaliwa nu gfagtainan, ay sa anya fagayu, duan. 12Sik taw at ke kwa, e gfamut yay ban laman umkayu tagsi anya. Ay sik taw nu alay way tagsi anya, e namul yay ban siginan anya. 13Gfaydayuanan au gfoyung au sa sangay taw laman kanya dewa gdama wa glag, ay dewa gdungug wa gdungugan, ay wa gtogdungug. 14Nu katanya, anfasludan sa kafag ngay taw, kata Isayas at foyungan te,
‘Dewa am gdungugan gugat, wam katogdungug,
ay dewa am gugat gdama, wam glag.
15Aroro kafag ngay taw kamaogatun way,
ay wa kaylat gdungugan, ay gtipan way.
Kafag ngay taw yaman katanya, glag tua ban,
ay gdungug, ay gtogdungug
ay kafoli sa angku,
ay gfafia kban anya fagayu.’#13:15 Isayas 6:9,10.
16Dewa katanya, am, mauseganan tuam, aroro glag tuam ay gdungug. 17Matuyan nu glong au ayu te, ebi fag ngay taglong ay fag ngay taw at matuyan nayalagun oma ay lagan katsi, ay nayadungugun oma ay nadungug katsi.
Isus at Faydayuanan sabaliwas Tagtanum at Masuad
Mk 4:13-20; Lk 8:11-15
18“Dungugani, katatuy at masuad ku faydayuanan sabaliwa tagtanum. 19Nusnga sinu at nadungug foyungan sabaliwa Dius nu gfagtainan ay nu dway nasaful at masuad, Satanas umdasug ay namul kafag taw at nadungug fag longan, kata kafag bvtang at kintong sasad dalan. 20Ay at kintong fag ngay bvtang sa tagagangun, kata ngay taw at nadungug Dius at Longan ay masakit nu gafanud ay guseganan. 21Ay kanya fag ngay taw nu gafanud wa glugo, kata kafag bvtang nu yud nalalid. Fagidapun ay famaskud nu ndasug aroro siginan at nadungugan Dius at Longan, kanya fagayu gfangafoliun way. 22Ay at kintong fag ngay bvtang sas wa makmak at madugi, kata ngay taw at nadungug Dius at Longan, ay dewa katanya, kanya fagayu gafanawa way at leleg ste swa daga, ay kesug way at fagmaramramanun, ay kanya nafaut at nadungug fag longan, ay wa narawvg. 23Ngay taw at nadungug ay at natogdungug Dius at Longan, kata ngay bvtang at kintong sit masine fag daga. Kafag ngay taw at fakamulun masine tua, kata yangay kafag tanum nu narawvg. At rawvg siginan tibak bvtang, sik sandan, ay tiba unumk safulu, ay tiba tuluk safulu.”
Isus at Faydayuanan sabaliwa ngay Makmak tagsis wa Trigu
24Ay Isus gdog yay nafoyung sik faydayuanan te, “Dius nu gfagtainan kata sik taw at nanananum at masine fag bvtang sat gamasun. 25Ay gina ngay taw gtiug, at fawayan andasug ay nanananum yangay at mauri fag bvtang sanya fag gamasun, ay nalo wan. 26Ay abandi at tanuman natugbung ay narawvg. Ay anggan at mauri fag bvtang natugbung yangay ay narawvg. 27Ay at ngay fagsuguan sanya fag gamasun nanangakbang sat tagfayafun ay glong te, ‘Fagtainan, masine oma am natanum fag bvtang sim gamasun. Wain at fagesuglatun at mauri fag makmak?’
28“Ay at tagfayafun nabalus te, ‘Sik fawayan at nafakamulun takatanya.’
“Ay at ngay fagsuguan nainto yangay te, ‘O nanggulad wami kafag ngay makmak?’
29“Ay at tagfayafun nabalus te, ‘Deyud yap. Magulad am anggan ngay trigu. 30Fabayani wan, ay gina ban kagutlu, glong kyay ban sa ku ngay taggutlu te, Taguna fafuli yap kafag ngay makmak ay futusi ay ukasi sasad afuy. Ay gutlui trigu ay fafuli sa ku bale famoy.’ ”
Isus at Faydayuanan sabaliwa sik Rigrig Burarad, ay sik Famabia Tinapay
Mk 4:30-32; Lk 13:18-21
31Ay Isus gdog yay nafoyung sik faydayuanan te, “Dius at fagfagtainanan kata yangay sik rigrig burarad sik taw at narigrig sit gamasun. 32Kanya wan tiba alay fag bvtang sas fagdaul daga, ay nu natugbung wan ay nu nbia wan, abat yap tibak tanum. Ay nu nkabat, gsud sik kayu, ay ngay manuk tungud gfugad tua sit ngay sanga.”
33Ay Isus nafoyung yay fia sadi yak faydayuanan te, “Dius nu gfagtainan kata sik famabia tinapay sik mangena at nafasuglat sas fangawat tinapay masuadan sit tagbia fag fagsuadan. Ay arodi fagayu at nafasuglat anbia.”
34Ay Isus galay gfoyung sa sangay taw, gfaydayuanan way. Ay wa gfoyung nu dway gfaydayuanan. 35Kanya nafakamulun katanya laman gfafasludan Dius at nalong sat taglong ebi at nafoyung te,
“Namoyung kban ngay faydayuanan,
ay namoyung kyangay ban anggan ebi at masuksuk
siginan fagdaul daga nu nkawat.”#13:35 Alubad 78:2.
Faydayuanan at Masuad sabaliwas Makmak sis wa Trigu
36Ay arodi Isus nalo wan siginan at maful fag ngay taw, ay nasakbo sat fagtaglayunan fag bale. Ay at ngay tagadal ankakbang sa anya ay ginto te, “Fayamagi sa emi am faydayuanan sabaliwas makmak tagsis gamasun.”
37Ay Isus gbalus te, “Tagtanum at masine fag bvtang, au wan, Taw at Baguama. 38Ay kafag gamasun, fagdaul daga. Ay at masine fag bvtang, Dius at fagfagtainanun fag ngay taw. Ay kafag ngay makmak, ngay tagfakamulun mauri. 39Ay kafag fawayan at natanum kafag ngay makmak, Satanas. Ay kafag fanggutluan, fagdaul daga at fakatabuan, ay kafag ngay taggutlu, Dius at ngay tagbarita. 40Nu setain nu ggulad ay girug ngay makmak, katanya yangay ban takafasludan sa taguyan fag ngay menit. 41Ay au, Taw at Baguama, gsugu kban ku ngay tagbarita laman namasaman siginan ku fagfagtainanan fagayu tagfae asalanan ay fagayu tagfakamulun at mauri. 42Ay ngay tagbarita ban mukas kafag ngay taw sa tagigang fag afuy, ay sanya ban gwayway gugat ay gfaringgit at ngay bagang. 43Ay ginanya ban fag menit, at matuyan fag ngay taw masulo kata menit si tam Mama at fagfagtainanan. Fagayu am tagdungugan, amatangani tua fia.
Isus at Faydayuanan sabaliwa sik Mesug fag Ramraman
44“Dius nu gfagtainan kata yangay sik mesug fag ramraman at masuksukan sa sik gamasun. Ay abandi sik taw nalag kafag ramraman ay nadog nafasuksuk. Kafag taw guseganan maksvn sat nalag, ay nalao laman namalao nusnge wain at ramraman, ay namayad kafag gamasun.
Isus at Faydayuanan sabaliwa sik Mabulawanan fag Ramraman
45“Ay sadi ya ku faydayuanan. Dius nu gfagtainan kata yangay sik tagfalao nu nanrvbvy sik ngay mabulawanan fag ramraman. 46Ay kanya nu nalag sik mabulawanan at maksvn nu mafanud, nafalao at ngay ramraman nusnge wain laman namayad kafag mabulawanan.
Isus at Faydayuanan sabaliwa sik Fanggamat Albon
47“Ay sadi ya ku faydayuanan. Dius nu gfagtainan kata sik fanggamat albon. Ngay tagfangalbon naukas at fanggamat albon sasad lino ay nagamat nusnge wain fag albon. 48Ay albon nu nkapnu sat fanggamat, kafag ngay taw gguyud sas tigyangan lino. Ay arodi malunggung yay sanya laman gfaful at masine fag ngay albon sat fagsuadan, ay gukas at yud masine. 49Katanya yangay ban sat taguyan fag ngay menit. Dius ban at ngay tagbarita nu ndasug, namasaman ban at mauri fag ngay taw siginan at masine fag ngay taw. 50Ay ngay tagbarita ban mukas kafag ngay taw sa tagigang fag afuy, ay sanya ban gwayway gugat ay gfaringgit at ngay bagang.”
51Ay sanya ginan Isus ginto te, “O nasaful wam fagayu ku faydayuanan at masuad?”
Ay at ngay tagadal gbalus te, “Sabv.”
52Ay Isus nalong yay fia te, “Nu katanya, fagayu at nadal Dius at Longan ay at kinsik tagadal sas Dius at fagfagtainanan, kanya kata sik tagagbilug bale at nafasure siginan at fagfungsuan at bagu ay at taglugo fag ramraman.”
Ngay Taw Nasaret Kauri Isus
Mk 6:1-6
53Nu ntabu wan nu gfoyung kafag ngay faydayuanan, Isus nalo wan sanya ginan. 54Ay nu ndasug sat furuan fia, nafoyung tagsanya fag ngay taw sis bale fakafulan. Ay ngay taw kadulo ay gidgintoan te, “Daginan manga kanya fag taw at fagsafulun ay at fagmabalyananun gfakamulun at ngay madulo? 55O nunda kanya fag taw bunwa kafag takawat bale at baguama? Ay o nunda at mina bunwa Maria? Ay at ngay faduksay bunwa Santiagu, Use, Simun, ay Udas? 56Ay o nunda at faduksay fag ngay mangena wa ste si tam furuan nu gbanwan? Daginan kafag taw nu gbul takatanya fagayu?” 57Ay kanya fag ngay taw kauri anya.
Ay Isus nabalus anya fagayu te, “Dewa nday fag ngay taw gsuyu tua Dius at taglong, sas day kafag taglong at furuan ay at ngay kalongan.”
58Ay Isus wa fia nafasure at madulo fag ngay fakamulun sanya, aroro sanya fag ngay taw wa gafanud.
Currently Selected:
Mateu 13: OCCT
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Philippines
