Lukas 23

Isus sis Pilatu at Daga Salubangan

Mt 27:11-14; Mk 15:1-5; Uan 18:28-38

1Ay kafag ngay fun anlindug ay nataban Isus sas Pilatu. 2Ay kanya fagayu gfasigad gfoyung at ngay fantabugan te, “Nalag ami tuy fag taw nu gfae asalanan tam ngay taw. Ay kanya gsalag emi nu gfon ami famayad sas talun Ruma at fun, ay nalong te, ‘Au wan sik fun, Dius at nafili.’ ”

3Ay Pilatu nainto sas Isus te, “O o wan taw Udyu at fun?”

Ay Isus nabalus anya te, “O wan at nalong takatanya.”

4Ay Pilatu glong sa sangay fun tagfon fanggalangun ay sa sangay taw te, “Kwe nasaful tuy fag taw at asalanan.”

5Ay ngay taw nafabulun te, “Tuy fag taw gfauri ngay taw sas fagdaul talun Udea siginan at ngay foyungan, ay kanya nu gfoyung nafasigad siginans talun Galilea ay ndasug stae.”

Nataban Isus sas Erudes at Daga Salubangan

6Ay Pilatu nu nadungug takatanya, kanya nainto te, “O kafag taw sik taw Galilea?”

7Ay kanya nu nasaful te, Isus siginan Erudes at fagfunanun, Pilatu nasugu te, “Nantaban am Isus sas Erudes,” aroro ginanya fag ngay menit Erudes sis Erusalem. 8Erudes nu nalag Isus, guseganan, aroro kanya glugo wan nu gyalagun anya. Kanya ebi nadungug Isus at fakamulun ay gyalagun Isus nu gfakamulun at madulo. 9Ay Erudes ngayu at fagintoun sas Isus. Ay Isus wa gbalus.

10Ay ngay fun tagfon fanggalangun ay ngay tagfoyung Muisis at Faugali malindug sanya ay maksvn nu gfantabugan te, Isus e asalanan. 11Ay Erudes ay at ngay tagfawayan kase, gfalingun Isus. Ay kanya fagayu nafae lanbung Isus sik masine fag lanbung. Ay sanya ginan Erudes nalong te, “Fafolii Isus sas Pilatu.” 12Ay ginanya fag menit Pilatu ay Erudes nagadgalangan, ebi ataw kanya fag dua dewa gawayan.

Pilatu Nasugu te, Fabuli Isus

Mt 27:15-26; Mk 15:6-15; Uan 18:39–19:16

13Pilatu nafaful ngay fun tagfon fanggalangun ay ngay tagfangguna ay anggan ngay taw, 14ay nalong te, “Aro nataban am tuy fag taw sa angku, ay nalong am te, tuy fag taw gfauri way ngay taw. Nu katanya nainsaful au anya si ay daga salubangan, ay natuyan au te, wa matuyan ay ngay nafantabugan sabaliwa anya. 15Ay katanya yangay anggan Erudes, ay nu katanya kanya nafafoli anya sa antam. Dungugani, kanya di e asalanan at sak ngawa ro namabul. 16Nu katanya, namafaurianan kway lang anya ay gfalfas kwan.”

17[Galay fagmafulun sabaliwa Tagbarita nu Glangfe, Pilatu gfalfas sik taw at maubungan.]

18Ay ngay taw gasfuan ngayu guro te, “Fabuli Isus ay falfasi Barabas!” 19Barabas, ebi sik taw at kinkubung, aroro nafawayan at fun sisad furuan ay nafabul taw.

20Pilatu gdog yay garingang sa sangay taw, aroro kaylat gfalfas Isus. 21Ay kafag ngay taw nauro te, “Tuktuki, tuktuki anya sas fasulungan kayu!”

22At fatulu ginan, Pilatu glong sa sangay taw te, “Wain ay fagnantuktukun anya? Nataw nunda tuy fag taw at fakamulun mauri? Kwe nalag at asalanan, laman sak au namabul anya. Nu katanya, namafaurianan kway lang anya ay gfalfas kwan.”

23Ay kaugat way ngay taw nu gfabulun ay nu guro te, “Tuktuki anya sas fasulungan kayu.” Ay taguro nababo. 24Pilatu nafaning kafag ngay taw at fakaylatun. 25Kanya nafalfas Barabas kata ngay taw at fagetun, kanya ebi ankubung aroro nafawayan at fun ay nafabul taw. Ay Pilatu nafatigwanan Isus sa sangay tagfawayan laman gfaning ngay taw at fakaylatun.

Nu Gtuktuk Isus sas Fasulungan Kayu

Mt 27:32-44; Mk 15:21-32; Uan 19:17-24

26Gina ngay tagfawayan gtabanan Isus, kanya fagayu nafatawad Simun, sik taw siginans talun Sirene, at kindasug siginan baliwas gamasun. Ay kanya nafafasanan sa anya Isus at fasulungan kayu, laman gbuba sis Isus at guyan. 27Ay sik ngay taw naguyan Isus, ay anggan tibak mangena grungan way lang sirut gwayway, aroro kafanyu Isus. 28Ay Isus anbiling ay nalong sa sangay mangena te, “Furuan Erusalem at ngay mangena, lag gwayway, dewa am kabalu angku. Ay fagwaywayun, sa yakman ay sadili ay sa ay ngay sisian. 29Aroro amatangani, kadasug ban sik ngay menit, tibak taw lumong ban te, ‘Mauseganan tagaranas, ay at yud batang e nafasusu!’ 30Kadugenya,

‘ngay taw ban lumong sa sangay fungsu te, “Atongi sa emi,”

ay sa sangay buksul te, “Tabuni emi.” ’#23:30 Usea 10:8.

31Aroro ngay taw nu gfakamulun wan takatanya sa angku at yud e asalanan, kaugat wa ban nu gfakamulun takatanya sa sangay taw at ke asalanan.”#23:31 sas Griegu: Aroro ngay taw nu gfakamulun wan takatanya sat melo fag kayu, nataw ya ban at fakamulun sat mayangoan?

32Ngay tagfawayan nataban dua yak taw at ke asalanan, laman namabul gasfuan Isus. 33Ay nu ndasug sas buksul at ngayan te, Butul Alfuyu, kanya fagayu natuktuk Isus sas fasulungan kayu. Ay natuktuk yangay kafag duak tagasalanan sas duak fasulungan kayu gsumbalian Isus.

34Isus nalong te, “Mama, falyami kafag ngay taw at fakamulun at mauri, aroro wa nasaful at fakamulun at masuad.” Ay kafag ngay tagfawayan gukas gang laman ginsaful te, sinu ro at nangagbilug Isus at ngay lanbung. 35Ay ngay taw malindug ngayu sanya gdama. Ay ngay tagfangguna gfalingun Isus te, “Ebi kanya nafalangfe tibak taw, ay mafalangfe yangay nangus at sadili nu kanya tua Dius at nafili fag Fun.”

36Anggan sanya fag ngay tagfawayan gfalingun anya ay nangakbang ay nafon anya sik mayat fag sanggvtan, 37ay glong te, “Nu o wan taw Udyu at fun, falangfei am sadili.”

38E sik rirukan sis Isus at tungud alfuyu te, Tuy ngay Taw Udyu at Fun.

39At sadi at ke asalanan, ngay taw at natuktuk, gfalingun Isus te, “Nu o wan Dius at nafili fag Fun,#23:39 Dius at nafili fag Fun: sas Griegu, Kristu. falangfei am sadili, ay anggan emi.”

40Ay at usama gagras anya te, “O wo kalimu Dius? Aroro gafaurianan yangay o kata anya. 41Matuyan, ita gafaurianan wata fia, aroro e asalanan ta. Ay tuy fag taw we nafakamulun at mauri.” 42Kafag taw nalong sas Isus te, “Isus, amatangi ban angku gina ban o gfagtainan.”

43Ay Isus nabalus anya te, “Matuyan nu glong au emu te, katsi ro fag menit gtaban au emu sas Dius at fagbanwanan.”

Isus nu Kabul

Mt 27:45-56; Mk 15:33-41

44Ay nu swabilug menit wan, andulum sanya fag talun. Ay nu madulum, sitsigon sfatulu sas fafun baliwa, 45aroro menit wa gdamlag ya. Ay fantaba fag ramit sad basad Dius at bale an-girat ay ankafud dua.

46Ay Isus nauro maksvn te, “Mama, gfatigwanan kwan sa emu ku falad.” Ay kanya wan taguyan at engasan.

47Tagsanya fag fun tagfawayan nu nalag at kinfasludan, kanya naseg Dius te, “At matuyan, tuy fag taw we asalanan.”

48Ay ngay taw at maful sanya at nalag at kinfasludan, gina kanya fagayu guli grungan way lang aroro kabalu. 49Ay Isus at ngay fagadgalangan, ay anggan ngay mangena at nanangalo anya siginans talun Galilea, malindug sit dayu ay nalag yangay at kinfasludan ginanya.

Nu Namoli Isus at Bilug

Mt 27:57-61; Mk 15:42-47; Uan 19:38-42

50Sanya sik taw, at ngayan Use, siginan taw Udyu at furuan at ngayan Arimatea. Ay kanya ngay taw Udyu at tagfangguna at sadi, ay sik taw masine ay matuyan. 51Use wa gfadiuganan tibak tagfangguna at fakaylatun ay at fakamulun. Kanya gfanya Dius nu gfagtainan. 52Kanya fag taw nalo sas Pilatu ay get sa anya Isus at bilug. 53Ay Use nafadaga Isus at bilug ay nasifig sik ramit daul, ay nanamoli sa sik fagfolian at magaruyan sisad gang. Sanya ya batang e nanamoli at kinbul.

54Ginanya, Famalganan ngay fakonun fag Menit, ay gafasigadun Famiangalay fag Menit. 55Kafag ngay mangena, ebi tagalo Isus siginans talun Galilea, naguyan Use ay nalag at fagfolian ay anggan nu gfoli at bilug sanya. 56Kafag ngay mangena nfoli wan ay nafasine sik famaebebanglu ay sik lumad. Ay kanya kamato sis Famiangalay fag Menit, gfaning Dius at Longan.

Currently Selected:

Lukas 23: OCCT

Highlight

Copy