Lukas 21

Sik Fagbubayun Nafon at Fanggalangun

Mk 12:41-44

1Isus gulit at maramraman fag ngay taw nu gsuad at fanggalangun fag salapi sas fagsuadan. 2Ay kanya nalag yangay sik yud e kwa fag fagbubayun nu gfon duak salapi.

3Ay Isus nalong te, “Matuyan, glong au ayu te, snay fag fagbubayun at yud e kwa at nafon ayu yap tua sat ngay iba. 4Aroro kanya fag ngay maramraman at nafon at nagsawean way, ay kanya fag fagbubayun dewa sik tagayudan way, at nafon fagayu tua at nafalganan at famul at fakonun.”

Isus Nafoyung sabaliwa at Fakatabuan fag ngay Menit

Mt 24:1-14; Mk 13:3-13

5Tibak tagadal nafoyung te, “Masine at fangawat sis Dius at bale fag ngay gang ngay taw at nafon ay tiba yak famasine.”

6Ay Isus nalong te, “Abandi ban we gang ya gtudtungudan. Fagayu ban umsaruayan wan.”

7At ngay tagadal nainto sas Isus te, “Takamoyung, seduge ban nu kafasludan takatanya, ay setain ban nu saful ami te, gakafasludanun wan?”

8Ay Isus nabalus te, “Mataganani tua laman diam gadayan tibak taw. Aroro ngayu bank taw kadasug ay glong te, ‘Au wan Dius at nafili fag Fun.’ Ay tiba ban ktaw glong te, ‘Katsi wan taguyan fag buknga.’ Dewa katanya, lag ban am gafanud sa kafag ngay taw. 9Ay dewa ban am e dungganan te, e gawayan ay e kamabo at fun, lag ban am kalimu. Matuyan, umfasludan takatanya taguna, dewa katanya, ya ban vtv kadasug at fakatabuan.”

10Ay Isus nalong yay te, “Tibak talun ban at ngay taw at fagfawayanun tibak talun yangay at ngay taw. Ay sik fun at ngay taw gfawayan yangay ban sik fun at ngay taw. 11Sa ban tibak talun maksvn nu e faleleg ay nu malunus. Ay e ngay fakasaitun ban daul, ay ngay fakalimuun, ay e ngay fakatoglagan yangay ban sis banwa. 12Ay takatanya ban fagayu nu kafasludan wan, tibak taw ggamat ayu ay gfauri ayu ay gtaban ayu sa sangay bale fakafulan ay gubung ayu sas bale fagubungan. Ay kanya ban fagayu tumaban ayu sat ngay fun ay sat ngay afud talun at ngay fun, aroro gafanud am sa angku. 13Ay ginanya ban, mafafamoyung am sa kafag ngay taw sabaliwa angku. 14Faksvni ay amatanganan, laman diam gafanawa te, tain ban ay famalus. 15Aroro gfoyung kban sa ayu at mamatanganan fag longan laman at nansalag ayu wa mababo ay we fagmafamayudun ya ay longan.

16“Anggan ay ngay fagtainan, ay ay ngay faduksay, ay ay ngay kalongan ay anggan ay ngay fagadgalangan gfon ban ayu sat mauri fag ngay taw. Ay kanya ban fag ngay taw mauri gfabul wan ayu tiba. 17Ay ginanya ban fag ngay menit, fagayu taw kauri ayu, aroro gafanud am sa angku. 18Dewa katanya, nusdi sadi ay buk di ban kagunut. 19Ay nu nagwantan tua ban am, e leleg tua ban am at yud e fakatabuan.

Isus Nafaguna Nafoyong sabaliwa furuan Erusalem nu Kaiklas

Mt 24:15-22; Mk 13:14-19

20“Nu nalag ban am sik ngay tagfawayan nu gligung Erusalem, sumaful wam te, munakbang wan Erusalem nu kaiklas. 21Ginanya ban, fagayu taw tagsis talun Udea lagyui wan sa sangay buksul, ay fagayu tagsis furuan duksuni ay lagyui. Ay fagayu tagsit fanloan lag guli ya sas furuan. 22Aroro ginanya wa ban fag buknga nu gfaurianan, laman gfafasludan Dius at Longan at kinriruk ebi. 23Ay ginanya ban fag ngay menit, afanyuan ngay tagfafion ay anggan at ke fagfasusuun, aroro siginans fagidapun daul takadasug ban ste fag talun, Dius at faurianan sa kafag ngay taw. 24Tibak taw umbul ban sas fiso, ay tiba e gtaban ban sa tibak talun. Ay at yud Udyu fag ngay taw namabo ban furuan Erusalem, yakmay ban antabu Dius at nafalganan fag buknga laman sa kafag ngay taw.”

Taw at Baguama nu Kadasug ban

Mt 24:29-31; Mk 13:24-27

25“E fakatoglagan ban sis menit ay sis magdanun ay anggan si sangay galeme. Ay ste swa daga fag ngay taw kalimu ban, aroro wa saful at masuad dagat at fagfawasun ay at faglugwakun. 26Ay ngay taw ban at mata umdulum at kaksvnan nu kalimu aroro sa tagakadasugun sas fagdaul daga, ay fagayu ke fagmabalyananun sis banwa muigan. 27Ay nu ntabu ban takatanya, fagayu taw lumag angku, Taw at Baguama, nu kadasug au sisad linyabu, ay e fagmabalyananun au, ay anggan e fagmasineun au daul. 28Ay gina ban gfasigad takatanya, tangdai ay useganani aroro munakbang wan nu gfalangfe ayu.”

Isus at Faydayuanan sabaliwas Malagu

Mt 24:32-35; Mk 13:28-31

29Ay Isus nafaydayuanan sanya fag ngay taw te, “Damai sik malagu, ay tibak kayu. 30Nu nalag am te, malagu at don karabas wan, saful wam te, gakamanguneun wan. 31Katanya yangay nu lumag ban am ku longan aro nu kafasludan, sumaful wam te, munakbang wan Dius nu gfagtainan. 32Matuyan nu glong au ayu te, katsi fag ngay taw tiba ya kabul yakmay ban anfasludan fagayu ku longan. 33Banwa ay daga kalyam way ban, dewa katanya ku longan ban sanya tua gugat kabavn.

Mafalganani

34“Mafalganani, laman diam gfangkumon ay glanguan ay gafanawa sabaliwa ay famanwanun, aroro kafag menit umdasug kasakit sik abvt nu kasalan. 35Aroro kanya ban fag menit kadasug sas fagayu taw tagbanwan sas fagdaul daga. 36Nu katanya, kabavn mafalganani ay mafandarangini laman mababo tuam takadasug ban fag fagidapun, ay laman ban manangalindug tua ban am sas Taw at Baguama at daga salubangan.”

37Fagayu menit Isus gfoyung sis Dius at bale, ay nu nyabi wan, kanya nalo siginans furuan ay nantiug sas Buksul Ulibu. 38Ay kayu balabag, fagayu taw masurip nu kadasug sas Dius at bale laman nandungugan anya.

Currently Selected:

Lukas 21: OCCT

Highlight

Copy