Fakasigadan 7
7
Nu Glugwak
1Ay Yawi nalong sas Nui te, “Am fag talanan, sakboi wan sa ay nawat fag sakayan lino. Aroro katsi fag kasugfunanan, o way lang ku nalag at matuyan. 2Fasakboi galay fituk dadwa magup ay mela at masine.#7:2 magup ay mela at masine: masine laman fakonun ay fanggalangun sas Yawi. Ay galay sik mangilafang at yud masine sadi yakmank dadwa. 3Ay fasakboi yangay fituk dadwa manuk tungud laman gleleg tua ban sas fagdaul daga. 4Aroro nu nlangfe ban fituk menit siginan katsi, gfarak kban sas fagdaul daga kaduge ufatk safuluk menit ay ufatk safuluk yabi, laman namamin fagayu ku nawat tagleleg tagsis daga.” 5Ay Nui nafaning Yawi at ngay suguan.
6Nui at banwa unumk sandan gina lugwak kadasug sas fagdaul daga. 7Ay Nui nasakbo sas sakayan lino gadgaloan at mangena, ay at ngay baguama, ay anggan at ngay nugang, laman di ban kabul sis lugwak. 8-9Kata Yawi at suguan sas Nui, kanya nafasakbo sas sakayan lino fagayu mangilafang at masine, ay anggan at yud masine: tagalafang, taglayug, taglao, ay kanya fagayu nanangalo anya. 10Ay nu nlangfe fituk menit, gfasigad wan nu glugwak sas fagdaul daga.
11Ay gina sis falabi fituk menit sis faduak magdanun, maksvn nu karak ay fagayu bulbug nasawe. Ginanya, Nui at banwa unumk sandan. 12Ay karak maksvn sas fagdaul daga kaduge ufatk safuluk menit ay ufatk safuluk yabi. 13Ay ginanya fag menit, Nui nasakbo wan sas sakayan lino gadgaloan at mangena ay at ngay baguama Sem, Kam, ay Afet, ay anggan at ngay nugang. 14Ay ngay magup ay mela taglao, tagalafang, ay taglayug galo anya. 15-16Nui nafasakbo galay sik dadwa mangilafang sas sakayan lino kata Dius at suguan sa anya. Sanya ginan, Yawi nadingding wan sakayan lino at sakbawan.
17-18Ay gtaglayun nu karak kaduge ufatk safuluk menit. Ay mamam gtaglayun nu kabia ay sakayan lino ankabat. 19Ay gtaglayun nu kabat yakmay nasakfo fagayu buksul tangabat. 20Ay mamam at kabasadan ufatk dufa siginan tangabat fag buksul. 21Ay fagayu tagleleg sas fagdaul daga anbul wan: taglayug, tagsis talun fag ngay mangilafang, tagalafang ay anggan fagayu taw. 22Fagayu tagleleg sis tungud daga anbul wan. 23Fagayu tagleleg sis fagdaul daga dewa taw, taglao, tagalafang ay manuk tungud namin wan. Nui way lang fag talanan at kinsawad fag ngay taw. 24Nalugwak sas fagdaul daga kaduge sadik sandan limak safuluk menit.
Currently Selected:
Fakasigadan 7: OCCT
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Philippines
