Fakamulun 4

Pedru ay Uan sis Taw Udyu at ngay Funan at Daga Salubangan

1Gina Pedru ay Uan gfoyung sa sangay taw, ngay tagfon fanggalangun ay tagulit fag ngay tagfangguna sis Dius at bale, ay ngay taw Saduseu ankakbang sas duama. 2Ay kanya fagayu maksvn nu kadotama duama aroro gfoyung ay gfatuyan te, siginans Isus, fagayu ban taw at kinbul gdog yay gleleg. 3Nu katanya, kafag ngay tagfangguna nagamat Pedru ay Uan. Ay aroro ginanya anyabi wan, kanya fagayu naubung yay duama fagngabak yabi. 4Dewa katanya, ngayuk taw at nadungugan ay at nafanud sas Isus siginan duama at foyungan, nu fagayu wan limak libuk mangama.

5Ay balabag di, ngay tagfangguna ay ngay fagtainan ay ngay tagfoyung Muisis at Faugali maful sis Erusalem. 6Ay sanya yangay Anas fag fun tagfon fanggalangun, ay Kayfas, ay Uan, ay Aleandru, ay fagayu fun tagfon fanggalangun at kalongan. 7Ay kanya fagayu nataban Pedru ay Uan sa sangay tagfon fanggalangun at daga salubangan ay nainto te, “Nataw fag fagmabalyananun, ay sinu at ke ngayan ay famafia at yud malao fag mangama?”

8Ay siginan at Masine fag Falad at gubuk, Pedru nabalus te, “Am fag ngay tagfangguna ay fag ngay fagtainan, 9nu gamatangan way am te, setain tuy fag mangama at yud malao nu kafia, 10fagayu am ay anggan ngay taw Israel, asafuli te, Isus at fagmabalyananun at nafafia tuy fag taw at malindug si ay daga salubangan. Isus tagsiginans Nasaret, Dius at nafili fag Fun, kanya ay nafabul sas fasulungan kayu, ay dewa katanya, Dius nafadog yay nafaleleg anya. 11Kata at marirukan te, at nalong fag gang, Isus wan:

‘Am fag ngay takawat bale ay naukas fag gang,

katsi famaogat tua.’#4:11 Alubad 118:22.

12Ste sfagdaul daga we mafalangfe antam nu bunway Isus.”

13Ay kanya fagayu andulo nu nalag Pedru ay Uan nu maseganama kamoyung, ay nu nasaful te, duama wa nadal ay we fagsafulun. Ay nasaful yangay te, duama Isus at ngay nasugu. 14Ay kanya fagayu we fagmaringangun ya nu nalag kafag mangama at kinfia sis duama at day tigyangan. 15Nu katanya, kanya fagayu nafaduksun duama siginan at fagmafulan, ay sanya ginan gkamatoan sabaliwas duama, 16ay gidgintoan te, “Tain ban tam fakamulun sas duama? Aroro fagayu taw sis Erusalem nasaful wan at nafakamulun madulo, ay wa tam mafamuagan ya. 17Ay nu katanya, laman wa gfataglayun ya nu karapyag takatanya, nansalag tam duama te, ‘Lag gfoyung ya sas nusnga sinu sabaliwa kafag taw.’ ”

18Nu katanya, kanya fagayu nafararang sas duama te, “Lag am kamoyung ya sabaliwas Isus.”

19Dewa katanya, Pedru ay Uan nabalus te, “Amatangani, inday at matuyan sas Dius at daga salubangan, tagfaning ay fakaylatun, o ay tagfaning Dius? 20Aroro wa masine nu dway mi gfoyung em ngay nalag ay em nadungug.”

21Ay kanya fagayu maksvn nu gsalag duama te, “Lag am kamoyung ya,” ay sanya ginan, nafalfas wan. Ay kanya fagayu ganamaurianun yay ma duama, dewa katanya, kalimu way ngay taw, aroro ngay taw gseg Dius siginan at nalag fag madulo. 22Ay kafag mangama at kinfia, ufat wak safuluk banwa.

Ngay Tagafanud at Darangin Laman Maseganama nu Kamoyung

23Pedru ay Uan nu nalo wan siginan sangay fun tagfangguna at daga salubangan, nataglayun sat ngay ibama ay nafoyung sabaliwa ngay fun tagfon fanggalangun ay ngay fagtainan at ngay nalong. 24Ay at ngay ibama nu nadungug, masadi nu gdarangin sas Dius te, “O wan em Fun at nawat banwa ay daga ay dagat ay anggan fagayu tagsanya, 25ay o wan at naringang sa em mangaguyang fun Dabid, am fagsuguan. Ay siginan at Masine fag Falad at gubuk, kanya nalong te,

‘Wain at yud Udyu fag ngay taw at fakadotamaun,

ay wain tibak taw at amatanganan fagmauriun?

26Ngay fun sas fagdaul daga

ay anggan ngay tagfangguna maful

laman gfalganan namawayan em Fun, am nafili.#4:26 am nafili: sas Griegu: Kristu. ’#4:26 Alubad 2:1-2.

27Nu katanya, Erudes ay Pilatu ay at yud Udyu fag ngay taw ay ngay taw Israel ansadi laman namawayan am fagsuguan Isus, am nafili fag Fun. 28Ay kanya fagayu nafakamulun kata am algan siginan am fagmabalyananun sabaliwa takadasug ban. 29Em Fun, saful way o kafag ngay taw mauri at algan sa emi. Nu katanya, fabitsugi emi laman maseganama nu gfoyung ami am longan. 30Ay falugdei am take laman siginan am fagmabalyananun ay siginans Isus, am fagsuguan at yud e malong, mafafia ami at ke ngay fakasaitun ay mafafakamulun at madulo ay at mabalyanan fag ngay fakamulun.”

31Ngay tagafanud nu ntabu gdarangin, at fagmafulan fag bale nauigan. Ay at Masine fag Falad antayuk sa anya fagayu ay maseganama nu kamoyung Dius at longan.

Tagafanud nu Ggudgubukan

32Ay fagayu tagafanud masadi at ngay amatanganan ay wa nesug at ngay ramraman nu bunway sa tuas fagayu. 33Ay at ngay nasugu e fagmabalyananun ay gfataglayun nu gfoyung sabaliwa tam Fun Isus nu gdog gleleg. Nu katanya, Dius nafon fagmagalangun sa sangay tagafanud, 34-35ay kafag ngay tagafanud di e fagayudanun ya, aroro tibak taw nafalao at ngay daga ay at ngay bale, ay at nagbulan nabuba sa sangay nasugu. Ay kafag ngay nasugu nafafudan at ngay nagbulan sa sangay tagayudan.

36Ay katanya yangay Use at nafakamulun. Nu katanya, ngay nasugu nafangayan anya te, Bernabe, at masuad te, Tagfabitsug Tiba at ngay Amatanganan. Kanya sik taw Lebi siginans furu Sipre. 37Kanya nafalao sik afud at daga ay nabuba at nagbulan sa sangay nasugu.

Currently Selected:

Fakamulun 4: OCCT

Highlight

Copy