Fakamulun 10

Kurnelyu at Taginfan

1Sis furuan Sesaria, e sik mangama at ngayan Kurnelyu. Kanya sik fun tagfawayan sa sik gaban tagfawayan sis talun Italya. 2Kurnelyu fag talanan gsuyu tua ay gseg Dius. Ay kanya nagubuk ngayuk taw Udyu at ke fagidapun, ay mafandarangin tua. 3Ay sik menit gina sis fatulu sfafun, Kurnelyu nataginfan, ay nalag Dius at tagbarita at sadi, ay kafag tagbarita nalong te, “Kurnelyu.”

4Ay Kurnelyu nadama ay anlimu maksvn, ay nabalus te, “Nataw ku Fun?”

Ay kafag tagbarita nalong anya te, “Dius nadungug am darangin ay guseganan am fakamulun nu ggubuk o at ke ngay fagidapun. 5Katsi sugui sik ngay mangama sas furuan Upa laman namablang sik taw at ngayan Simun, at ngayan yangay te, Pedru. 6Pedru at fagtaglayunan fag bale sis tigyangan dagat sis Simun at bale. Simun sik tagfagong fagbaugun at balat.”

7Ay kafag tagbarita nu nalao wan, Kurnelyu nagewan at fagsuguan at dua ay at sadi at tagfawayan at matuyan ay tagseg Dius. Kanya fag tagfawayan Kurnelyu at fagsuguan at sadi. 8Ay Kurnelyu nafoyung sat fagsuguan fag tulu at ngay kinfasludan, ay sanya ginan, nasugu wan sas furuan Upa.

Pedru at Taginfan

9Ay balabag di nu swabilug menit wan, Kurnelyu at fagsuguan fag tulu nu munakbang wan sas furuan Upa, Pedru nasas tungud bale laman nandarangin. 10Kanya maksvn nu kalunus, ay kaylat wan nanfangon. Ay kaduge e gfalganan at matawan, kanya anke taginfan. 11Ay kanya nalag banwa nu kaluang ay kata sik umut mafatuguan at ke fanrabing ufatk fugungan nu kadaga. 12Ay sanya masuadan nusnge wain fag mangilafang at mela; taglao, tagalafangan, ay manuk tungud. 13Ay Pedru nadungug sik aringang te, “Pedru, malindugi. Fabuli ay oni.”

14Ay Pedru nabalus te, “Ku Fun, kwa kaylat. Kwa kon nusnge wain at masuya ay at yud masine.”

15Ay kafag aringang glong yay fia te, “Dius at ngay nafasine lag o gtuyan te, masuya.”

16Ay Pedru nu gdungug kafag aringang, tulu ginan, ay arodi kafag umut anranggut wan sas banwa. 17Kaduge Pedru gamatangan at taginfan at masuad, Kurnelyu at ngay fagsuguan andasug, ay grvbvy Simun at bale, ay malindug sis day sakbawan alad, 18ay ginto te, “O ste Simun, at ngayan yangay te, Pedru?”

19Ay kaduge Pedru gamatangan at taginfan at masuad, at Masine fag Falad nalong anya te, “Tuluk mangama grvbvy emu. 20Duksuni wan, lag o gadgaragun nangalo, aroro au at nasugu anya fag tulu.”

21Ay Pedru nu naduksun, nalong sanya fag tuluk mangama te, “Au wan ay fagrvbvyun. Wain ay fagindasugun?”

22Ay kafag tuluk mangama nabalus te, “Kurnelyu fag fun tagfawayan nasugu emi. Kanya matuyan ay gseg Dius, ay fagayu taw Udyu gsuyu tua anya. Ay sik tagbarita nalong anya te, nantaban ami emu sas Kurnelyu at bale laman kanya gdungugan am longan.” 23Ay Pedru nafasakbo kafag tuluk mangama kata sik ngay betaw. Ay balabag di Pedru ay tibak tagafanud sis Upa nanangalo kafag mangama tulu.

Pedru sis Kurnelyu at Bale

24Ay nu nlangfe sik menit, Pedru andasug sas furuan Sesaria, ay ginanya, Kurnelyu gfanya anya, ay sanya yangay at ngay kalongan ay at ngay fagadgalangan. 25Ay Pedru nu nasakbo sas Kurnelyu at bale, Kurnelyu nafablang ay namalub sis Pedru at daga salubangan ay naseg anya. 26Ay Pedru nalong anya te, “Malindugi, au sik taw kyangay kata emu.”

27Ay kaduge gkamatoan, Pedru nasakbo ay nalag ngayuk taw maful, 28nu katanya, kanya nalong sa anya fagayu te, “Nasaful wam te, wa masine sik taw Udyu nu gfagadgalangan sik yud Udyu fag taw ay nusdi at nansibo sat bale. Dewa katanya, Dius nafalag angku te, ‘Lag o gtuyan te, masuya nusnga sinu fag taw.’ 29Nu katanya, kwa nadgaragun nangalo gina e namablang angku. Ay katsi gyasafulun au te, wain ay fagyafastieun angku?”

30Ay Kurnelyu nabalus te, “Ebi vtv sis fatuluk menit, kata yangay katsi sfatulu sfafun, gdarangin au si ku bale. Ay sik mangama masulo at lanbung andasug masakit ay namalindug si ku salubangan. 31Ay kanya nalong sa angku te, ‘Dius nadungug am darangin ay kaylat am fakamulun nu ggubuk o ngay tagidapan. 32Sugui tuluk mangama sas furuan Upa laman nantaban Simun, at ngayan yangay te, Pedru. Kanya gbanwan sis Simun at bale sis tigyangan dagat. Simun sik tagfagong fagbaugun at balat.’ 33Nu katanya, nafauro au emu. Ay fadi fadi andasug tuo stae. Ay katsi maful ami ste sis Dius at daga salubangan laman gdungugan tam Fun at ngay longan siginan emu.”

34Ay Pedru gfasigad gfoyung te, “Katsi nasaful au te, Dius we fagfili taw. 35Dius kaylat dewa ndaginan fag talun at taw nu gsuyu tua anya ay gfakamulun at matuyan. 36Ay nasaful wam sabaliwa at Masine fag Barita, Dius at nafoyung sa emi fag ngay taw Israel te, ngay taw umke fagmasadiun sas Dius siginan nu gafanud sas Isus, Dius at nafili fag Fun, kanya wan fagayu taw at Fun. 37Ay nasaful yangay am at kinfasludan sis talun Udea, siginans furuan Galilea, gina Uan gfoyung sabaliwa nu gfasurung. 38Ay nasaful am te, Dius nafon at Masine fag Falad ay fagmabalyananun sas Isus tagsiginans Nasaret, ay nasaful yangay am te, nusnga nday kanya nu glao, gfakamulun gugat at masine ay gfafia fagayu tagsis daga Satanas at fagmabalyananun, aroro Dius gufud tua anya fagayu.

39“Mafatuyan ami Isus at ngay nafakamulun sa sangay taw Udyu at talun ay anggan sis Erusalem. Ay sanya fag ngay taw nafabul anya siginan nu gtuktuk sas fasulungan kayu. 40Ay baliwan sis fatuluk menit, Dius nafadog nafaleleg anya ay nafasure sa emi. 41Isus nu kasure, sa way lang emi, Dius at ngay nafili, laman tagfatuyan ban sabaliwa anya. Ay nafasfuan ami anya gfangon ay ginum gina kanya nadog wan naleleg. 42Dius nasugu emi te, ‘Famoyungi at Masine fag Barita sa sangay taw ay fatuyani yangay te, Isus wan Dius at nafili laman nantuyan sabaliwa sangay taw tagleleg yay ay sangay kinbul te, sinu ban at kumlangfe ay ban sinu at yud kalangfe.’ 43Ngay taglong nafoyung sabaliwas Isus te, fagayu tagafanud sa anya umkalyam wan at ngay asalanan.”

44Ay kaduge Pedru garingang, fagayu tagdungugan sanya anke Masine fag Falad. 45Ay Pedru at ngay ufud fag ngay taw Udyu tagafanud andulo, aroro at yud Udyu fag ngay taw anke Masine fag Falad yangay. 46Aroro kafag ngay taw Udyu nadungug at yud Udyu fag ngay taw nu garingang sa tibak ngay fangaringang ay nu gseg Dius.

47Ay Pedru nalong te, “Dius nafon yangay sas yud Udyu fag ngay taw at Masine fag Falad kata nu gfon antam. Ay nu katanya we masalag kafag ngay taw nu kasurung sas mamam.” 48Ay Pedru nasugu te, “Fasurungi anya fagayu sa tam Fun Isus at ngayan.”

Ay sanya ginan, kanya fag ngay taw nalong sas Pedru te, “Banwani yap ste nu seyuk menit.”

Currently Selected:

Fakamulun 10: OCCT

Highlight

Copy