Maki 8

Ɛnza ŋé sunman díla mɔɔn wáa náannin mán

Matiyu 15.32-39

1O tée ó mán, yaman bá tɛ́ɛ Ɛnza ndɔ́ɔfɛ sunman ndɛ́ tɛ i bhóo bhée. Ɛnza ŋé a yɛ kaamɔɔndhye ŋolu kíi kɛ́ fɔ i yɛ kó: 2«Yaman míin mánɲwaan é nɔ́n, kɛ mansɔɔ i tée sáwa lée ngwɔ́ka nín, sunman ndɛ́ i bhóo. 3Ni ngɛ́ i kɔ́ɔntɔ ó lábhyaa ké ii táa i fɛ́ yé, i yáa dɛ́sɛ sháala, kɛ mansɔɔ i lɔ́lu bhɔ́laa a já.»

4Ɛnza ɲɛn kaamɔɔndhye ŋólu a yawi kó: «Í káa bhɔ́ míin nú lafa búlu o lé mín ne dhyɛ́ míin nɔn?» 5Ɛnza ŋé i mánɲaankɛ kó: «Búlu yée lée a bhóo?» Ii fɔ kó: «Wóonvyaa.»

6Aa fɔ yaman o yɛ kó ii í síi lúu mán. O kwɔ, aa búlu wóonvyaa ó tála, kɛ Ala bálika bhɔ́ Ala yɛ, aa i kúunndɛɛtɛɛ kɛ di a yɛ kaamɔɔndhye ŋolu mán ké ii a lɔtaa yaman ó la. 7Yɔ́ɔdhye mɛ́nsɛn dáman tɛ́ɛ i bhóo. Ɛnza ŋé yɔ́ɔ ólu tá kɛ Ala bálika bhɔ́ íkwɔtun kɛ a di a yɛ kaamɔɔndhye ŋolu mán íkwɔtun kó ii a lɔ́taandaa yaman o la. 8Mɔɔn olu bɛ́ɛ lɔ́minkɛ kɛ fá. Tó ii nán see wóonvyaa lé sunman ndɔto o lɔ. 9Yaman o tɛ́ɛ mɔɔn wáa náannin lú síya bhɔ́la. O lé kwɔ, to aa i lábhyaa. 10O ywáaninngee ŋo lɔ, Ɛnza ni a yɛ kaamɔɔndhye ŋolu í bhyáa kúun ŋó lɔ tó kɛ táa Dalimanuta mala ó lɔ.

Falizɛn ŋolu fɔ́la kó Ɛnza ŋan káwananngo lɔ́ kɛ́

Matiyu 16.1-4

11 Falizɛn ŋolu nan, ii lágban bhyáa Ɛnza nan a lɔswaan ndɔ́ɔ lɔ́: Tó íi fɔ a yɛ kó aa káwako kée ngɛ́ i ɲánla, kɛ́ bhɔ́ sángboo o lɔ. 12Aa í ɲáankiiba láyii tó kɛ fɔ kó: «Mínnɛɛn lé kósɔn tó án ɲɛ́n wáati miin mɔɔn min núu káwako ɲíinnan? Ní fɔ́la a yɛ́ tínɲan in ne ngó, káwako gbɛ́ɛ táa kɛ́ a lé wáati miin mɔɔn ólu yɛ́!» 13O kwɔ, aa í kwɔ́sɛɛ ni a yɛ kaamɔɔndhye ŋolu le kúun ŋó lɔ kɛ táa bhá ó ɲán dɔ́min ŋo mán.

Falizɛn ŋólu ní Elɔdi yɛ́ mɔɔn ólu yɛ́ kaangoo o

Matiyu 16.5-12

14Kaamɔɔndhye ŋolu ɲan kɛ́ búlu lú tá. Búlu kée ngbóto lé tɛ́ɛ i bhóo kúun ŋó lɔ. 15Ɛnza ŋé i sɛ́ɛmansɔɔ í yɛ́ kɛ fɔ kó: «Áa a yáakii tó a yɛ́ɛ lɔ́ Falizɛn ŋólu ní Elɔdi yɛ́ lévu o mán.» 16Kaamɔɔndhye ŋolu tɛ́ɛ kómanla ɲɔ́ɔnɲɛn kɛ mansɔɔ búlu tɛ́ tɛ i bhóo. 17A tɛɛ i kɔɔnnɔnkan ŋo lɔ́ mínngɛ, aa i mánɲaankɛ kó: «Áa fɔ́la ɲɔ́ɔnɲɛn kun mínnɛɛn lé la kó búlu tɛ́ a bhóo? A mán hákii sɔ́ɔ bhá ŋan? A mán bhɔ́ a ɲan lé bhá ŋan? Bháa a yáakii o gbénenin née a? 18Ɲán é a kún mán, a tɛ́ yéli kɛla a? Tóo é a kún mán a tɛ́ myɛ́nnin kɛla a? Kó tɛ́ tóla a kɔ́ɔnnɔn a? 19Ní búlu lóo ó lɔ́tɛɛtɛɛ cɛ wáa lóo ó lá mínngɛ, áa see ɲée lé lafa búluguun ŋó tɔ́ ólu la?» Ii a yawi kó: «Tá ni fyáa.» 20«Tó ní búlu wóonvyaa ó lɔ́tɛɛtɛɛ mínngɛ mɔɔn wáa náannin ó la, áa nan see náfanin ɲée lé lé a tɔ́ ólu lɔ?» Ii a yawi kó: «Wóonvyaa.» 21Ɛnza ŋé fɔ i yɛ kó: «Yáanin sán, a mán bhɔ́ o ɲán lé bhá ŋan?»

Ɛnza ŋé fyóonjɛ lɔ lákɛɛnyala Bɛtisayida

22Oo wɛɛ mínngɛ, Ɛnza ni a yɛ kaamɔɔndhye ŋolu táa Bɛtisayida só o la. Yénɔn, mɔɔn ólu nan fyóonjɛ lɔ lé a yɛ, kɛ a dɛ́li kó aa í bhóo túu o lá, kɛ a lákɛɛnya. 23Ɛnza ŋé fyóonjɛ o myáan a bhóo o mán, kɛ táa ale só o kwɔ́ka. Tó aa a láyi o bhyáa a ɲanman, kɛ í bhóo lá a ka, kɛ a mánɲaankɛ kó: «Íi fé nɔ́ yéla a?» 24Fyóonjɛ óo í ɲánlaka ó lé lɔ tó kɛ fɔ kó: «Ní mɔɔn ólu yéla táaman kɛ́la wáa i bhɔ́nin ɲé yíi lée lú la.» 25Aa í bhóo lá a ɲan ó ka ko kwáa kɛ. Óo kɛ́ mínngɛ, cɛ óo í ɲánlaka, aa kɛ́ɛnya kɛ ywáa yé cɛ́ɛne. 26Ɛnza ŋé fɔ a yɛ kó aa táa a bhóo lúman wáa kó a kɛ́nan lo só ó kɔ́ɔnnɔn.

Piyɛli é mín nvɔla Ɛnza man

Matiyu 16.13-20; Luka 9.18-21

27 Ɛnza ni a yɛ kaamɔɔndhye ŋolu tɛ́ɛ táala Filipu, Sezale lámiin nzó nɔ́lu lá. I tɛ́ɛ sháakun ŋo lɔ́ mínngɛ, aa a yɛ kaamɔɔndhye ŋolu mánɲaankɛ kó: «Mɔɔn ólu tá fɔli o lɔ, née yɛ́ɛtii lé?» 28Ii a yawi kó: «Lɔ́lu kó íi Yaya Bátizelikɛbhaa lé le, lɔ́gbɛɛ lu kó íi Eli lé le, tó lógbɛɛ lu yɛ́ɛ kó íi céla ólu lɔ́ lé le.» 29Aa a yɛ kaamɔɔndhye ŋolu mánɲaankɛ kó: «Tó Ále ɲánla, ní yɛ́ɛtii lé?» Piyɛli é a yawi kó: «Íle lée Kílisi o le.» 30Ɛnza ŋé fɔ i yɛ kɛ a mangbɛya kó i kɛ́nan á yɛ kó ó fɔ́ mɔɔn sí yɛ.

Ɛnza ŋé a yɛ sayako óni a yɛ kúunniko o fɔ́la

Matiyu 16.21-28; Luka 9.22-27

31Óo wɛɛ mínngɛ, Ɛnza ŋé a yɛ kaamɔɔndhye ŋolu kála ŋó lámyaan kɛ fɔ i yɛ kó: «Mɔɔn Dhyénjɛ ó kákan né kɛ́ tɔ́lɔya lé myáan koyoongɛ. Cɛba ólu ní faanlɛɛɲansebhaa olu kúnndii ólu ní sɛliya kaamɔɔn ólu yáa í bá a lɔ́. I yáa a fáa, a tee sawa a saya kɛ́nin ŋo kwɔ, a yáa kúun kɛ bhɔ́ saya o lɔ.» 32Aa tɛ́ɛ o fɔ́la i bɛ́ le yɛ. O lɔ, Piyɛli é Ɛnza ngíi í kéenan, kɛ kóman a yɛ kɛ a mangbɛya. 33Ɛnza ŋé í ɲán yɛ́ɛman kɛ a yɛ kaamɔɔndhye ŋolu mánfɛɛ tó kɛ kóman Piyɛli yɛ kɛ mangbɛya kó: «Táa kɛ bhɔ́ ngwɔ́ Sɔtaannan! Kɛ mansɔɔ í tɛ́ i mílila óyoo Ala, wáa óyoo mɔɔn ólu.»

Kɛ bhyáa Ɛnza ngwɔ oo kɛ́la díi?

34Oo kɛ́ mínngɛ, Ɛnza ŋé yaman o kíi óni a yɛ kaamɔɔndhye ŋolu kɛ fɔ i yɛ kó: «Ní mɔɔn mín ŋé fɛ́ kɛ́ í bhyáa né kwɔ́, fɔ́ o tíi ó a í bá a yɛ́ɛ lɔ lé, kɛ a yɛ́ɛ gbáanɲii o tá kɛ́ bhyáa né kwɔ́. 35Kɛ mansɔɔ mɔɔn óo mɔɔn é fɛ́ kɛ a ní o kísi, o tíi ó yáa bɔɔn a ni o lɔ. Wáa mɔɔn óo mɔɔn kɛ bɔɔn a ni o lɔ́ né ni sanmankanmɛɛ o kósɔn, o tíi ó yáa kísi. 36Óo mínnɛɛn lé ɲánla mɔɔn mán kɛ́ dínɲanmanfe ŋó bɛ́ sɔ́ɔ tó kɛ táa bɔɔn a ní o lɔ́? 37Mɔɔn ó sé kɛ́ fé mínnɛɛn lé dí a ní o kunmanka lé? 38Ni mɔɔn mín ngɛ maloya né lá, óni kɛ maloya ngómankan ŋolu lá bímɔɔn Ala kanmyaanbhɛɛ olu ní yúumutɔ ólu cɛ́man, mɔɔn Dhyénjɛ o yáa maloya o tíi ó lá ni a kɛ́nan tée mín man a Fá yɛ nɔ́lɔya ó lɔ́ ni malɛɛka sɛ́nnɛnyanin ŋólu le.»

Currently Selected:

Maki 8: MXX

Highlight

Copy