Maki 2

Ɛnza ŋé kuugba lɔ́ lákɛɛnyala

Matiyu 9.1-8; Luka 5.17-26

1Tee láman tínminnin ŋó kwɔ, Ɛnza ŋé í kwɔ́sɛɛ Kapɛnamu. Mɔɔn ólu myɛ́n mínngɛ kó aa bhónan, 2yaman óo nan í fá bhó ŋó kɔ́ɔnnɔn, óni bhó ŋo lákɔɔ, yáanin tínminnaa tɛ́ tɛ́ bhée. A tɛ́ɛ Ala saaninkan ŋo fɔ́la í yɛ. 3O lée tó í lɔ́, mɔɔn lɔ́luu í kún nanbhɔ ni kuugbacɛ kéene. O tɛ́ɛcɛ náannin bhóokɔɔ. 4Yaman o kósɔn lá o kɔɔ, i man sháa sɔɔ kɛ táa a yáa Ɛnza nan. Ii í yɛ́ɛ bhó ŋó kúnnɔn, kɛ jáan bhɔ́ sánzaa ŋo lá Ɛnza nziilaa o lɔ, tó kɛ kuugba óni a yɛ láfe ŋo láyii bhó ŋó kɔ́ɔnnɔn Ɛnza ngɛ́ɛnnan. 5Ɛnza ŋé a yé kó ó mɔɔn ólu wɛɛ lá ale la mínngɛ, aa fɔ kuugba ó yɛ kó: «Nyenjɛ, i yɛ́ yúumu ólu wɛ́ɛ yafa i man!» 6Sɛliya kaamɔɔn lɔ́lu síininndɛ́ɛ yénɔn, olu yacesii lú kɛ́ í kɔ́ɔnnɔn kó: 7«Mínnɛɛn lée cɛ míin lónan kóman súu míin nvɔ́ ó lɔ? A wɛɛ Ala tɔ́ɔ o cáan. Yɛ́ɛtii sé kɛ́ mɔɔn ó yɛ́ yúumu ólu yafa á mán ni Ala kée ndɛ́?» 8Ɛnza ŋé lɔ́gbɛ a yɛ́ɛ fɛ í kɔ́lɔ óyoo o míliya súu oo mɔɔn olu la mínngɛ, aa fɔ i yɛ kó: «Mínnɛɛn la aa í milila tá? 9Kɛ́ a fɔ kuugba ó yɛ́ kó: ‹I yɛ́ yúumu ólu wɛ́ɛ yafa i man,› wáman kɛ́ fɔ a yɛ́ kó: ‹I wíi kɛ́ i yɛ gbasa ó ta kɛ́ táamankɛ,› o kóman fyáa ó lɔ́, a mínnɛɛn lé fɔ a dí? 10Waa ní í fɛ́ ké aa lɔ kó sé é mɔɔn Dhyénjɛ ó yɛ́ kɛ́ mɔɔn o yɛ́ yúumu ó yafa kɛ́ tó dínɲan lɔ́.» O lɔ, aa fɔ kuugba ó yɛ́ kó: «Ní fɔ́la i yɛ́, í wíi kɛ́ í yɛ́ gbasa ó tá kɛ́ táa lúman: 11Íle, í wíi, í yɛ́ gbasa ó tá, íi táa i bhóo lúman!»

12Bɛ́ ɲánkɔɔ téeman, cɛ óo í wíi tó kɛ a yɛ́ gbasa ó tá kɛ bhɔ́ kɛ́ɛnman. Óo i bɛ́ kɔɔnnɔnfii, i bɛ́ bɛ́ é Ala tando: «Kɛ fɔ́ko án ndɛ́ mán míin ɲɔ́ɔnɲe bhá.»

Ɛnza ŋé Levi kíila

Matiyu 9.9-13; Luka 5.27-32

13O kó ólu wɛ́ɛnin ŋó kwɔ, Ɛnza ŋé í kwɔ́sɛɛ Galile bhá lá o la. Yaman o tɛ́ɛ nánla a saala, tó a tɛɛ i lákawanan. 14Óo bhɔ́ í lá mínngɛ, a tínminndɔ óo táa nísɔɔnmyaanbhaa lɔ síinin ɲé nísɔɔnmyaanbhaa ólu yɛ́ bháalakɛlaa ó lɔ́. A tɔ́ɔ kó Levi, a fa ó tɔ́ɔ kó Alife. Aa fɔ o yɛ kó: «Bhyáa ngwɔ́!» O lɔ Levi é i wíi kɛ í bhyáa a kwɔ.

15O kwɔ, Ɛnza ndɛ́ɛ lɔ́min kɛ́ Lévi yɛ́ bhó ŋó lá; nísɔɔnmyaanbhaa shɛ́ɛman óni yúumutɔ shɛ́ɛman ngbɛɛ lúu nan í síi ni ale ní a yɛ kaamɔɔndhye ŋolu fɛ́; o mɔɔn súu o léelu tɛ́ɛ sháa a kwɔ́ka. 16Sɛliya kaamɔɔn mínnu tɛ́ɛ Falizɛn ŋólu tá sɛ́ɛ ó lɔ, ólu Ɛnza yé lɔ́min kɛla ni o mɔɔn súu ólu lé mínngɛ, ii fɔ a yɛ kaamɔɔndhye ŋolu yɛ kó: «Mínnɛɛn lé kósɔn a yɛ kaamɔɔncɛ óni nísɔɔnmyaanbhaa olu ní yúumutɔ olu lɔ́min kɛla kéene?» 17Ɛnza ŋé o dhyáa ŋó myɛ́n mínngɛ, aa fɔ i yɛ kó: «Mɔɔn mínnu kɛ́ɛnyanin ɲé, ólu manko tɛ́ lɔɔtɔlɔ lá, yangalotɔ o lé manko é a lá. Né mán nán mɔɔn téenin ŋólu kíi, ni nán yúumu tɔ ó lée lú kíi.»

Kaamɔɔndhye ŋolu yɛ́ sunnongo ó

Matiyu 9.14-17; Luka 5.33-39

18Tee kéeman, Yaya Bátizelikɛbhaa yɛ́ kaamɔɔndhye ŋólu ní Falizɛn ŋólu tɛ́ɛ sún nɔ́n. Lɔ́luu nan Ɛnza mánɲaankɛ kó: «Mínnɛɛn lé kósɔn Yaya Bátizelikɛbhaa yɛ́ kaamɔɔndhye ŋolu ní Falizɛn ŋólu yɛ kaamɔɔndhye ŋólu sún nonan tó í tá kaamɔɔndhye ŋolu tɛ́ sún nonan?»

19 Ɛnza é i yawi kó: «Kwɛ́ɛnkwaa o cɛ ó tɛ́ɛcɛ ólu sé kɛ súnno kɛ́ íle ní kwɛ́ɛnkwaa o cɛ ó tó ɲɔ́ɔn nvɛ́ kwɛ́ɛnbho ŋo la a? Kwɛ́ɛnkwaa o cɛ ó kɛ́ kɛ́ i bhóoka sán o mínnɔn, i tɛ́ sé í bánan sunman ŋo lɔ. 20Waa ló nɔ́ yáa sé, kwɛ́ɛnkwaa o cɛ ó yáa bwási i lá, í yáa súnno o ló ŋó la.

21Mɔɔn sí tɛ́ sé faani kɔɔ ó lábɛɛnan faaninguun ngwáa o la; kɛ mansɔɔ o faaninguun ŋó yáa fáanin kɔɔ ó ywáa lɔ́ fála tó jáan ó tɔ́ é bwóɲan. 22Mɔɔn sí tɛ́ lɛ́zɛnnji kwáa ó kɛ́la bhwée kɔɔ ó kɔ́ɔnnɔn. Ni ó kɛ́ kɛ, lɛ́zɛnnji ó yáa bhwée ó cé, tó bɔɔn é kɛ́ lɛ́zɛnnji kwáa óni bhwée ó lɔ́ kéene. Wáa mɔɔn lɛ́zɛnnji kwáa o kɛ́la bhwée kwáa le kɔɔnnɔn.»

Ɛnza ni lɔnwɛɛnlilo ŋo

Matiyu 12.1-8; Luka 6.1-5

23 Lɔnwɛɛnlilo nɔ́ la, Ɛnza ní a yɛ́ kaamɔɔndhye ŋólu tɛ́ɛ tínminnan bélefyɛ ólu kɔɔnnɔn. Kɛ́ í tó táalaa a yɛ́ kaamɔɔndhye ŋólu béle tínnza ŋo lɔ́lu bhɔ́. 24Falizɛn ŋólu a mánɲaankɛ kó: «A mánfɛɛ nín, kó mín mánngan kɛ kɛ́ lɔnwɛɛnlilo ŋó lá, mínnɛɛn le lá i yɛ́ kaamɔɔndhye ŋólu o kɛ́la?»

25Ɛnza ŋé í yawi kó: «Laula é kó mín ngɛ a mán o ywáa ó kála má ŋan? Kɔ́ɔn ó ale ní a táamanɲɔɔn ólu myáan mínngɛ ké súnman nzí tɛ́ í bhóo. 26Abiyata tɛ́ɛ faanlɛɛɲansebhaa olu kúnndiiba lé wáati mínnɔn, aa lo ɲán min mán Ala yɛ́ bhó ŋo kɔɔnnɔn, faanlɛɛbulu mínnu síininndɛ́ɛ yénɔn kɛ ólu lɔɔ tó kɛ́ a lɔ dí a táamanɲɔɔn ólu mán. Kɛ́ɛke mɔɔn gbɛ́ɛ tɛ́ mánngan kɛ́ o búlu ólu lɔɔ fɔ́ faanlɛɛɲansebhaa ólu.»

27Ɛnza ŋé i yawi íkwɔtun kó: «Ala mán mɔɔn ó lá lɔnwɛɛnlilo ŋo kanman, Waa lɔnwɛɛnlilo ŋóo lá mɔɔn lé yɛ. 28O lé kósɔn mɔɔn Dhyénjɛ ó lé gbú é lɔnwɛɛnlilo ŋó kunndii lé.»

Currently Selected:

Maki 2: MXX

Highlight

Copy