Maki 12

Kɔ́ɔlamandhyaa mín ŋé bháalakɛdhyeɲoo ŋólu ka

Matiyu 21.33-46; Luka 20.9-19

1Ɛnza ŋé saanan lá i yɛ ó lé lɔ kɛ fɔ kó: «Cɛ lɔ́ lée lɛ́zɛn no, kɛ yɔ́sɔ kɛ́ a man. Aa fáajaan lɔ́ bhɔ́, kɛ o kɛ́ lɛ́zɛn ŋó jíbhɔlaa o le, tó kɛ gbáta lɔ́ lɔ́ sɛɛnkunnansiibhaa olu yɛ. Aa sɛ́ɛn ó kɛ́ɛfa ó lé lɔ bháalakɛdhye ŋolu mán, tó kɛ táa táamanla. 2Lɛ́zɛn mɔ́ wáati oo sé mínngɛ, aa a yɛ bháalakɛdhye ŋo kée myáashaa lɛ́zɛnmaalakɛbhaa olu mán ké ii a ta nin ŋó di. 3Wáa lɛ́zɛnmaalakɛbhaa olu o myáan, kɛ a gbasi, kɛ a bhóolɔkoo ŋó lákwɔsɛɛ. 4Lɛ́zɛnnvyɛtii oo bháalakɛdhye ngbɛ́ɛ bhyáashaa íkwɔ. Ii o gbási a kúnnɔn, kɛ a nɛɛn. 5Lɛ́zɛnnvyɛtii oo bháalakɛdhye ngbɛ́ɛ bhyáashaa íkwɔ, kɛ ii o fáa. Ii o kɛ bháalakɛdhye nzhɛ́ɛman nán cé. Ii lɔ́lu gbási tó kɛ lɔ́lu fáa. 6Mɔɔn kée mín ndɛ́ wɛɛ tó lɛ́zɛnnvyɛtii ó bhóo o lé tɛ́ɛ a dhyénjɛ óle mín ŋan dí a yɛ. Aa o kɛ́ céladhye nábha ŋo lé i man, a tɛɛ fɔ́la kó i yáa nyénjɛ ó bhɛ́ɛsii. 7Wáa lɛ́zɛnmaalakɛbhaa olu fɔ ɲɔɔnɲɛn kó: ‹Cɛ́ntabhaa ó lée nín, áa nan án ní a fáa ké cɛ́n o á tó án móo.› 8Ii cɛ o dhyénjɛ ó myáan ó lé lɔ, kɛ a fáa, kɛ a sú ó láfii lɛ́zɛnnvyɛ o kwɔ́ka.

9O bhóo ó mán, lɛ́zɛnnvyɛtii o kaa kɛ́ o lɔ díi? A yáa nan, kɛ lɛ́zɛn ŋo bháalakɛdhye ŋólu fáa, tó kɛ lɛ́zɛnnvyɛ ó kɛ́ɛfa lɛ́zɛnmaalakɛbhaa gbɛ́ɛlu mán! 10A mán tínminnaa míin ngála kitabu o lɔ bha ŋan? Mín ŋé fɔ́la kó:

Bhónɔbhaa olu tɛ́wɛɛ í bá tɛfɛ mínnɔn

o lé wɛ́ɛ kɛ́ tɛfɛ kúugbɛɛ ŋo le.

11 Oo fáanan Mantii ó lé la.

Oo kóba lé lé án née bhóo.

12Yawudhyaa ólu kúnndii ólu tɛ́ɛ ɲánɲiinnan Ɛnza myaanko ó mán, í tɛ́wɛɛ bhɔ́ ɲan le óo Ɛnza ndɛ́ɛ saanan o lala ile lée lu man. Wáa i tɛ́ɛ sháannan yaman o ɲɛn. Oo kɛ́ mínngɛ, ii a tó yénɔn kɛ́ táa.»

Ɲaanli mín ŋé nísɔɔnbhɔko ó ka

Matiyu 22.15-22; Luka 20.20-26

13Yawudhyaa olu kúnndii ólu ni Falizɛn ŋo lɔ́lu ni Elɔdi dhyáaɲɛnmɔɔn ó lɔ́lu bhyáashaa Ɛnza man kɛ táa a lɔswaan ni ɲaanli kéene. 14Ii nan fɔ a yɛ kó: «Kaamɔɔn, án ni lɔ ŋóo íi tínɲan le fɔ́la. Í tɛ́ sháannan í mɔ́ɔnɲɔɔn ó ɲán o ɲɛn, í ló ndɛ́ lɔ́ bhɔ́la lɔ́lɔ, Íi Ala sháa o yáala tínɲan le ka. A fɔ án ɲɛn ní á láanin ɲé kó mɔɔn a nísɔɔn bhɔ́ Mansacɛ Sezali yɛ bháa bháanin a laanin ndɛ́? Án ngákan kɛ a sala bháa án mánngan kɛ a sala?» 15Wáa Ɛnza ndɛ́ɛ i yɛ fyaangafoya ó lɔ́, aa i mánɲaankɛ kó: «Mínnɛɛn lé kósɔn tó áa nɔ́swaannan? Áa nan wɛ́ɛgbannan ngée né ɲɛ́n ké ní a yé.» 16Ii nan wɛ́ɛgbannan ngée ne. Aa i mánɲaankɛ kó: «Yɛ́ɛtii yáa ni a tɔ́ɔ é a mán nín?» Ii a yawi kó: «Mansacɛ Sezali.» 17O bhóo o mán, Ɛnza ŋé fɔ i yɛ kó: «Fé mín ŋé mansacɛ Sezali tá le, áa o dí mansacɛ Sezali mán; tó fé mín ŋé Ala tá le, áa o dí Ala man.» A yɛ kóman o yawi seɲan o lée bháa mɔɔn olu bɛ́ lɔ.

Ɲaanli mín ŋé sú ólu kúunngo o ka

Matiyu 22.23-33; Luka 20.27-40

18Mɔɔn lɔ́lu tɛ́ɛ yénɔn kó Sadusi, mínnu tɛ́ɛ fɔ́la kó sú ólu táa kúun. Ii í mángbaa Ɛnza nan tó kɛ a mánɲaankɛ kó: 19«Kaamɔɔn, céla Musa é sɛ́wɛ a yɛ Kitabu o lɔ kó: Ní cɛ mínngɛ muso tá, kɛ sayakɛ ké a man dhyé nzɔɔ a lá, o tíi ó bhádhye ŋo kákan né kɛ o muso o tá ké aa dhyé nzɔ́ɔ táabhaa o yɛ. 20Bhádhyemannjɛ wóonvyaa lé tɛɛ. A jónan óo muso tá, wáa a mán dhyé nzɔ́ɔ aa sayakɛ. 21A fyáaɲɔn oo muso kée ŋó tá. O mán dhyé nzɔ́ɔ, óo sayakɛ íkwɔtun. A sawaɲɔn óo kɛ o ɲán kée ŋó lé mán. 22O kɛ́ ɲán o le mán cé, bhádhyemannjɛ wóonvyaa ó bɛ́ sayakɛ, i lɔ mán dhyé nzɔ́ɔ. I bɛ́ saya kɛ́nin ŋó kwɔ, muso óo saya kɛ́ íkwɔ. 23Sú ólu kúunno ŋo kɛ́ sé wáati mínnɔn, ké i bɛ́ wɛ́ɛ kúun, muso ó káa kɛ́ a mínnɛɛn lé tá lé? Kɛ mansɔɔ aa sii i mɔɔn wóonvyaa ó bɛ́ le kunman kée ngée.»

24 Ɛnza ŋé i yawi kó: «Miin né kósɔn aa á yɛ́ɛ láfiila, a mán Kitabu o lɔ, a ló mán Ala yɛ sébhaaya ó lɔ. 25Tínɲan ní án ngɛ kúun wáati mínnɔn kɛ́ bhɔ́ saya bhóo ó mán, cɛ lɔ́ táa muso tá, muso lɔ́ ló ndáa sii cɛla; I bɛ́ káa kɛ́ lé óo malɛɛka lu, sángboo o lɔ. 26Wáa míin nan kɛ́ sú ólu tá kúun ŋó lé, tínminnaa mín ŋé fɔ́la Céla Musa yɛ́ kitabu o lɔ kó tá é máannan yíitunin ŋó la, a mán o ywáa ó kála ŋan? Ala é fɔ́la céla Musa yɛ́ o ywáa ó lɔ kó: Né lée Bulaaman yɛ Ala o le, Shaaka yɛ́ Ala o, óni Yangubha yɛ Ala o. 27Ní a kɛ kɛ́ a yíiman óyoo sú ólu kúunngo o tɛ́ tínɲan le, ké a wɛ́ɛ a yɛ́ɛ lafii koyoongɛ. Ala tɛ́ sú ólu yɛ́ Ala le, waa ɲáanman ŋólu yɛ́ Ala.»

Tɔ́ nguugbɛɛ ŋó

Matiyu 22.34-40; Luka 10.25-28

28 Sɛliya kaamɔɔn lɔ é i kómankan ŋo lɔ́myɛn. Aa lɔgbɛ mínngɛ óyoo Ɛnza ŋwɛ́ɛn Sadusi olu yawi cɛ́ɛne ne, aa í mángbaa a lá kɛ a mánɲaankɛ kó: «Tɔ́ ŋo mínnɛɛn lé kúu a gbɛ́ɛ tɔ́ ŋo bɛ́ le?» 29Ɛnza ŋé a yawi kó: «Tɔ́ mín ngúu a gbɛ́ɛ tɔ́ ŋo bɛ́ le o lée nín: Izalayɛlika ólu áa í tóomanlɔ! Mantii ó, án ɲɛn Ala o, o kée née Mantii óle. 30Í yɛ Mantii Ala o waa dhyáa í yɛ́ í yóso ó bɛ́ la, í ní o bɛ́ la, í míliya ó bɛ́ la, óni í fáan ó bɛ́ la. 31A fyáaɲɔn o lée nín: Í mɔ́ɔnɲɔɔn ó a dhyáa í yɛ́ óyoo íle gbú o a dí í yɛ́ɛ yɛ ɲán mín man. Tɔ́ ŋo lɔ́ kúu mán ngbɛ́ɛ o fyáa o le.» 32Sɛliya kaamɔɔn oo fɔ a yɛ kó: «Cɔ́! Í ní cé kaamɔɔn, o wɛ́ɛ bhyɛ cɛ́ɛne ne, í wɛ́ɛ tínɲan fɔ: Mantii ó kée née Ala le. Ala gbɛ́ɛ tɛ́ ale kwɔ. 33Óni a dhyáa í yɛ́ í yóso ó bɛ́ la, í miliya ó bɛ́ la, í fáan o bɛ́ la, í mɔɔnɲɔɔn ó a dhyáa í yɛ́ óyoo íle gbú o a dí í yɛ́ɛ yɛ ɲán mín man. O a físaa faanlɛɛ ólu le.» 34Ɛnza ŋé lɔ ŋóyoo cɛ ó wɛ́ɛ a yawi yáakiimanɲan la, aa fɔ a yɛ kó: «Í ywáa mán njá Ala yɛ́ Mansaya ó la.» Aa o fɔ́ mínngɛ mɔɔn sí lo mán í swáan Ɛnza ɲaankɛ la bhée.

Mantii ó lée Kísibhaa o le ale lée Laula bhɔ́nzɔ ŋó le

Matiyu 22.41-46; Luka 20.41-44

35O wɛ́ɛnin ŋo kwɔ, Ɛnza ndɛ́ɛ lakawanin kɛ Ala bhatobhomba ó la. Aa ɲaanli kɛ kó: «Ɲán mínnɛɛn lé mán tó sɛliya kaamɔɔn olu fɔ́la Kílisi o mán kó Laula Bhɔ́nzɔ. 36Kɛ́ɛke Ní Sɛnnɛnyanin ŋó Laula gbú lo a fɔ o lɔ́ ko:

Mantii Ala é fɔ ɲɛ́n Mantii o yɛ kó:

Í síi móobhɛɛ kɔɔ,

fɔ́ ní í yúu olu bhyáa í sé ngɔɔ.

37Laula gbú yɛ́ɛ é Kísibhaa o kíi kó Mantii ó, tó óo sé kɛ́la Laula bhɔ́nzɔ né díi í kwɔ́?» Yamanba tɛ́ɛ a kan ŋó lɔ́myɛnnan ni nisɔdhyaa le.

Áa a yɛ́ɛ myaan sɛliya kaamɔɔn olu mán

Matiyu 23.1-36; Luka 20.45-47

38A yɛ kaa ŋo kɔ́ɔnnɔn aa fɔ kó: «Áa a yɛ́ɛ myáan sɛliya kaamɔɔn olu mán, kɛ́ í yaakɛla deekeba ólu lɔ, mɔɔn kɛ́ kɛ́ í fola bhɛ́ɛsili bhóoman yamanywaa olu lɔ óni, 39Siilaa bhɛ́ɛ mín núu kála ɲɛ́nnzhaafɛ, o léelu dhyáa é kála i lɔ sɛ́ɛbho o la óni lɔ́minkɛlaa ólu lɔ, 40Muso mínnu cɛ wɛ́ɛ sayakɛ, íi olu bhóofe ŋo bɛ́ myaanla i la; kéni a ló ŋé sɛ́ɛ kannanja olu kɛ́la ké mɔɔn olu a a lásaa. Oo lɔ mínngɛ, í tá kíti o yáa gbɛ́ya mɔɔn tɔ́ ólu tá lé síin!»

Finɲanmuso bhóokoo ŋó yɛ́ yáa ó

Luka 21.1-4

41Wɛ́ɛ o tɛ́ɛ bhyáala késu mín ngɔ́ɔnnɔn Ala bhatobhomba o la, Ɛnza ŋé í síi mínngɛ, aa í ɲán bhyɛ o mán, kɛ mɔɔn ólu yɛ́ wɛ́ɛ bhyáa seɲan o mánfɛɛ. Nanfootii olu shɛ́ɛman ndɛ́ɛ wɛ́ɛ shɛ́ɛman díla. 42Finɲanmuso bhóokoo nɔ́ é nan kɛ wɛ́ɛgbannan nvyáa bhyáa. O tɛ́ tɛ́ tínminnan tánman nvyáa ka. 43Ɛnza ŋé a yɛ kaamɔɔndhye ŋolu kíi tó kɛ fɔ i yɛ kó: «Ní tínɲan le fɔ́la a yɛ́ ni ngó, finɲanmuso bhóokoo míin née wɛ́ɛ shɛ́ɛman myáa wɛ́ɛ bhyáa késu o lɔ kɛ tínmin mɔɔn tɔ́ ó bɛ́ ka. 44Kɛ mansɔɔ mɔɔn tɔ́ ólu wɛ́ɛ mínnu di, i manko tɛ́ tɛ́ olu lá bhée i yɛ dínɲanlɔtɛɛ o lɔ. Wáa finɲanmuso o, a yɛ bhóokooɲan o lɔ, mín ndɛ́ɛ a yeeya lé bhálo bhóo o man a yɛ dínɲanlɔtɛɛ ó lɔ, aa o lé di.»

Currently Selected:

Maki 12: MXX

Highlight

Copy