Matiyu 9
9
Ɛnza ŋwɛ́ɛn cɛ sénvaaniman nɔ́ lákɛɛnya
Maki 2.1-12; Luka 5.17-26
1Ɛnza ŋé í yɛ́ɛ Kúun ŋó lɔ kɛ í kwɔ́sɛɛ bhá ó ɲán dɔ́ o mán a fɛso Kapɛnamu. 2Mɔɔn lɔ́ lúu nan cɛ lɔ́ lé a saala, o cɛ ó sé ŋólu tɛ́wɛɛ fáa a man. O yaangalotɔ ó lánin ndɛ́ɛ gbasa o ka. Ɛnza ŋé a yé kó ó mɔɔn ólu wɛɛ lá ale la mínngɛ, aa fɔ kuugba ó yɛ kó: «Nyénjɛ i lɔ́ja, i yɛ́ yúumu ólu wɛ́ɛ yafa i mán!» 3O fɔ́nin ŋó kwɔ, sɛliya kaamɔɔn lɔ́ lúu fɔ í kɔ́ɔnnɔn téeman kó: «Cɛ míin wɛ́ɛ Ala tɔ́ɔ ó cáan!» 4Ɛnza ŋé bhɔ́ i kɔɔnnɔnkan ŋo ɲánle. Aa fɔ i yɛ kó: «Mínnɛɛn le kósɔn míliya yóo nzúu miin núu a kɔ́ɔnnɔn? 5A fɔ ó kó: ‹I yɛ́ yúumu ólu wɛ́ɛ yafa,› wáman kɛ́ fɔ a yɛ́ kó: ‹I wíi kɛ́ táamankɛ,› o kóman fyáa ó lɔ́, a mínnɛɛn lé fɔ a dí? 6Waa ní fɛ́ ké aa lɔ kó sé é mɔɔn Dhyénjɛ ó yɛ kɛ́ mɔɔn yɛ́ yúumu ó yafa kɛ́ tó dínɲan lɔ́.» O lɔ, aa fɔ kuugba ó yɛ́ o lɔ kó: «Ní fɔ́la i yɛ́, í wíi kɛ́ í yɛ́ gbasa ó tá kɛ́ táa lúman.» 7Cɛ óo í wíi kɛ táa a fɛ́taa. 8Yaman ó ɲán é lɔ o kó ó lɔ́ mínngɛ, i man é sháan gbúnigbukɛ. Ii Ala tando, kɛ a kún ngɛ́ o sé o súu o dí lé mɔɔndhye ŋólu mán.
Ɛnza ŋé Matiyu kíila
Maki 2.13-17; Luka 5.27-32
9 Ɛnza ŋé bhɔ́ o ywáa ó lɔ kɛ táa. A tínminndɔ óo Matiyu tɔ́ɔ lɔ síininndɛ́ɛ nísɔɔnmyaanbhaa ólu yɛ́ bháalakɛlaa ó lɔ́. Aa fɔ o cɛ ó yɛ kó: «Bhyáa ngwɔ́!» Matiyu é i wíi kɛ í bhyáa a kwɔ.
10Kwɔ́ o la, Ɛnza ndɛ́ɛ lɔ́min kɛ́ Matiyu yɛ́ bhó ŋó lá, nísɔɔnmyaanbhaa shɛ́ɛman óni kóyoongɛbhaa shɛ́ɛman gbɛ́ɛ lúu nan í síi ni ale ní a yɛ kaamɔɔndhye ŋolu fɛ́. 11Falizɛn ŋólu ɲán é lɔ o kó ó lɔ́ mínngɛ, ii fɔ Ɛnza ɲɛn kaamɔɔndhye ŋolu yɛ kó: «Mínnɛɛn le kósɔn a kaamɔɔncɛ ni nísɔɔnmyaanbhaa olu ní kóyoongɛbhaa olu lɔ́minkɛla kéene?» 12Ɛnza ŋé o dhyáa ŋó myɛ́n mínngɛ, aa fɔ kó: «Mɔɔn mínnu kɛ́ɛnyanin ɲé, ólu manko tɛ́ lɔɔtɔlɔ lá, yangalobhaatɔ o léelu manko é lɔɔtɔlɔ lá. 13Ala é fɔ a saaninkan ŋo lɔ kó ní hínnɛn le fɛ́, ndɛ́ faanlɛɛ fɛ́. Áa táa í míli o kóman ólu mán. Né mán nan mɔɔnteenin ŋólu kíila, waa née nan yúumutɔ o léelu kíila.»
Ɛnza ŋé dhyáa mín nvɔ sún ŋo tá fa nvɛ́
Maki 2.18-22; Luka 5.33-39
14Yaya yɛ́ kaamɔɔndhye ŋólu í mángbaa o lé lɔ́ Ɛnza nan kɛ a manɲaankɛ kó: «Mínnɛɛn le kósɔn án nee ní Falizɛn ŋólu sún nonan swáaswaa, ké ile ni í yɛ́ kaamɔɔndhye olu tɛ́ sún nonan?» 15Ɛnza ngó i yɛ kó: «Kwɛ́ɛnkwaa o cɛ ó tɛ́ɛcɛ olu tɛ́ sé í ɲán lasiila ké i lé ní kwɛ́ɛnkwaa o cɛ óo ywáa kée nɔn lɛ! Waa ló nɔ́ yáa sé, kwɛ́ɛnkwaa o cɛ ó yáa bwási i lá, i yáa súnno.
16Mɔɔn sí tɛ́ sé faani kɔɔ ó lábɛɛnan faaninguun ngwáa o la, kɛ mansɔɔ o faaninguun ngwáa ŋó yáa fáanin kɔɔ ó ywáa lɔ́ fála tó jáan ó tɔ́ é bwóɲan. 17O kwɔ, mɔɔn tɛ́ lɛ́zɛnnji kwáa kɛ́la bhwée kɔɔ ó kɔ́ɔnnɔn, ni ó kɛ́ kɛ, bhwée ó yáa cé tó lɛ́zɛnnji óo bwɔ́ lúuman, ké bɔɔn wɛ́ɛ kɛ́ bhwée ó lɔ́ lé wé. Wáa mɔɔn é lɛ́zɛnnji kwáa ó kɛ́la bhwée kwáa óle kɔ́ɔnnɔn, tó i bɛ́ lamalanin ŋé tó.»
Ɛnza ŋwɛ́ɛn káakwo yaangalotɔ lɔ́ lákɛɛnya óni kɛ síngbiinin nɔ lákuun
Maki 5.21-43; Luka 8.40-56
18Ɛnza ŋé tó kómanla i yɛ tó Yawudhyaa kunndii lɔ́ é í kunnanbhɔ. Aa í kúnmɛɛn nɔ́kɛɛ Ɛnza ngɔɔ kɛ fɔ kó: «Nyémuso wɛ́ɛ saya kɛ́ kwáa kwáa le nín, wáa dyɛn íi táa í bhóo lá a ka. O kɛ́ kɛ́ a yáa kúun.» 19Ɛnza ŋé í wíi tó ale ní a yɛ kaamɔɔndhye ŋolu bhyáa cɛ ó kwɔ. 20O lɔ́ muso lɔ tɛɛ i cɛ́man, mín ŋán káakwo tɛ tɛ wɛɛla tó a wɛɛ kɛ a lá yangalo le Kanbiini sanɲin tá ni fyáa. O muso óo í mángbaa Ɛnza nán a kwɔ́man kɛ í bhóo túu o yɛ́ deeke o lágboo o lá. 21Kɛ mansɔɔ, a tɛɛ fɔ́la í kɔ́ɔnnɔn lé kó: «Ni ngɛ́ sé móo túula a yɛ deeke o lá, ɲáan kɛ́ɛnya.» 22Ɛnza ŋé í kwɔ́ yɛ́ɛman, a ɲan é lá muso ó ka, tó aa fɔ a yɛ kó: «Í kɛ́nan sháan, nyémuso! Í lɔ́ja, i yɛ́ lánanya ó wɛ́ɛ í lákɛɛnya.» O wáati kée ŋó lɔ, muso óo kɛ́ɛnya.
23Ɛnza no nin ngwɔ́ Yawudhyaa kunndii ó bhóo bhónan, aa yaman yé yénɔn: O lɔ́lu tɛ́ɛ fyóo fɔ́la, i lɔ gbɛ́ɛlu tɛ́ɛ saankasi kɛ. 24Aa fɔ i yɛ kó: «Áa bhɔ́ kɛ́ɛnman, síngbiinin ŋo sayakɛnin ndɛ́, aa sunnɔɔn le lɔ.» Wáa ii yɛ́ɛbhɔ Ɛnza nɔn. 25Yaman oo bhɔ́ kɛ́ɛnman wáati mínnɔn, Ɛnza ŋé lo sibho ŋo la kɛ síngbiinin ŋo tá a bhóo mán tó síngbiinin ŋoo í wíi. 26O kó óo bhúubhɛɛ o só ó lánga ŋo ywáa bɛ́ lɔ.
Ɛnza ŋwɛ́ɛn fyóondɔ fyáa ɲánlaka
27 Ɛnza ŋé bhɔ́ o ywáa ó lɔ, a táatɔ óle, fyóondɔ fyáa é táa a kwɔ́ kɛ táa gbáa né kó: «Manɲwaan án nan, Laula Bhɔ́nzɔ o!»
28Ɛnza ŋé lo bhó ŋó la, fyóondɔ ŋólu í mángbaa a lá tó aa i manɲaankɛ ko: «A lánin ŋé la óo née sé a ɲán o lakala a?» Ii a yawi kó: «Ɔɔn, Mantii o.» 29Oo kɛ́ mínngɛ aa í bhóo túu i ɲán ólu la tó kɛ fɔ kó: «Kɛ́ kéeɲan ní á yɛ lánanya ó lé, a ɲán o a í láka!» 30I ɲan o í láka. Ɛnza ŋé fɔ i yɛ kɛ a mangbɛya kó mɔɔn sí kɛ́nan lɔ ŋóo ale lée i ɲan olu laka. 31Wáa i bhɔ́nin ngwɔ́ kɛ́ɛnman, ii kóman mɔɔn olu yɛ́ cɛ́bɛ cɛ́bɛ lɔ Ɛnza ndá fán nvɛ́ o lánga ŋó lɔ.
Ɛnza ŋwɛ́ɛn bhóbhocɛ lɔ lákoman
32I taatɔ óle, ii nan cɛ lɔ́ lé Ɛnza ɲɛn, Lámansa yóo né tɛ́wɛɛ o cɛ ó kɛ́ bhóbho le. 33Ɛnza ŋé o lámansa yóo ŋó gbɛ́ ndɛ́nmɛn, bhóbhocɛ oo kóman. O kó óo bɛ́ kawakoya yaman o lɔ fɔ́ ii fɔ́la kó: «Káwananngo súu miin mán kɛ́ Izalayɛli kɔ́ɔ bhá!» 34Wáa Falizɛn ŋolu tɛ́ɛ táa fɔ le kó: «Lámansa yóo ŋólu kunndii ó lé bháaka lɔ, tó aa lámansa yóo ŋólu gbɛnan!»
Yaman o mánɲwaan wɛ́ɛ lo Ɛnza nɔn
35 Ɛnza ndɛ́ɛ sóba ólu ní só dhyénin ŋo bɛ́ lɔyaalala kɛ táa mɔɔn olu kála né sɛ́ɛbho ŋólu la, óni kɛ táa Ala yɛ́ mansaya ó sanmankanmɛɛ ó láse lé, o kwɔ, a tɛɛ yangalo bɛ́suu lákɛɛnyala. 36Aa yaman o yé mínngɛ i mánɲwaan é lo a lɔ, kɛ mansɔɔ i mansɛɛnin né tɛɛ, óni kɛ i yée tɛ́ɛ óyoo kunnansiibhaa tɛ́ saa mínnu la. 37Óo kɛ mínngɛ aa fɔ a yɛ kaamɔɔndhye ŋolu yɛ kó: «Sunman ndɛ́ɛ tá o waa sháa, waa bháalakɛbhaa ólu man nzháa. 38Óo lɔ mínngɛ áa sɛɛntii ó dɛ́li ké aa bháalakɛbhaa ólu bhyáa kɛ́ táa a yɛ́ sunman ŋó tɛ́ɛ.»
Currently Selected:
Matiyu 9: MXX
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
