Matiyu 23

Ɛnza ngó lɔ́ kɛ́nan sɛ́liya kaamɔɔn ólu ní Falizɛn ŋolu yɛ́ kókɛse ŋólu kɛ

Maki 12.38-39; Luka 11.43,46; 20.45-46

1 Ɛnza ngó a yɛ kaamɔɔndhye ŋolu ní yaman o yɛ kó: 2«Sɛliya kaamɔɔn ólu ní Falizɛn ŋo lée lúu Musa yɛ́ tɔ́ o ɲánlɔsɔɔbhaa le. 3Oo lɔ mínngɛ, áa i fɔkan ŋó bɛ́ lataaman, wáa a kɛ́nan i yɛ kókɛse ŋólu kɛlɛ! Kɛ mansɔɔ, ii kó mín nvɔla, i gbúlu tɛ́ táamanla o sháa o fɛ́. 4Ii lwée ngbíiyanin ne siila mɔɔn ólu kunman, waa í tɛ́ í bhóokwɛɛnnin ŋo túula o lá yáanin dɔ́ɔnin ne kɛ́ a lá maanmaan. 5Ii kɛwɛli o bɛ́ kɛla lé ké mɔɔn ŋolu a i lasaa. O lé kósɔn, sɛ́wɛ mín ŋé kɛ́la ilee lú ce nan, óni i bhóola, o bwóɲannin née kɛ́la mɔɔn tɔ́ o bɛ́ tá le. O kwɔ, ii mansiife nzháayala i ta deekeba ólu man lé. 6Siilaa bhɛ́ɛ mín núu kɛ́la ɲɛ́nnzhaafɛ, o lée lú dhyáa é kɛ́la i lɔ lɔ́minkɛlaa ólu lɔ, óni sɛ́ɛbho ŋólu la. 7Mɔɔn olu kɛ́ kɛ́ i fola ni bhɛ́ɛsiili le yamanywaa olu lɔ, óni kɛ táa i kíi le kó ‹kaamɔɔn ó!› O lé dhyáa é kála i lɔ. 8Wáa álee kɛ́nan sɔ́n ké mɔɔn olu a kɛ́ fɔ́la a mán kó ‹kaamɔɔnba›. A bɛ́ɛ lé óo bhádhyenjɛman nú, kaamɔɔn kée ŋó lée ále bɛ́ la. 9A kɛ́nan fɔ mɔɔn óo mɔɔn mán lúukolo ó ka kó ‹án Nvá›. Fa kéembe lée a lá, o lée sángboo ó lɔ. 10A kɛ́nan tó ké mɔɔn olu ló ŋan táa a kíi le kó ‹cɔ́ɔnba›, kɛ mansɔɔ cɔ́ɔnba kéembe lée a lá, mín ŋé Kílisi o le. 11Mɔɔn mín ngɛ kɛ́ a bɛ́ kunndii le, o lé kákan kɛ kɛ́ á yɛ́ bháalakɛdhye ne. 12Mɔɔn mín ngɛ a yɛ́ɛ lɔ́bwoɲan, o tíi o yáa i manyiili shɔɔ, wáa mɔɔn mín ngɛ í mányii, Ala yáa ó tíi ó bwóɲan.»

Ɛnza ngó Falizɛn ŋolu ní sɛ́liya kaamɔɔn ólu fyáangafo bhóo a bwó

Maki 12.40; Luka 11.39-52; 20.45-47

13Ɛnza ŋé wɛɛ kɛ fɔ kó: «Bɔɔn é álee tá le, álee sɛliya kaamɔɔn ólu ní Falizɛn ŋólu! A fyáangafo ólu! Áa mɔɔn olu lábanan kó i kɛ́nan í bhóo síi sángboo ó Mansaya ó kɔɔ, álee gbú olu tɛ́ a bhóo síila a kɔɔ, bhóosiikɔɔlɔɔ lo ŋé mɔɔn mínnu la, a tɛ́ olu tó yénɔn ké olu a i bhóo síi a kɔɔ a. 14[Bɔɔn óo álee tá le, álee sɛ́liya kaamɔɔn ólu ní Falizɛn ŋolu! A fyáangafo ólu! Muso mínnu cɛ wɛ́ɛ sayakɛ, áa olu bhóofe ŋolu bɛ́ myaanla i la, ké a ló ŋé sɛ́ɛ kannanja ŋolu kɛ́la ké mɔɔn olu a a lásaa. Oo lɔ mínngɛ, a tá kíti o yáa gbɛ́ya mɔɔn tɔ́ ólu tá o lé síin!] 15Kunnangboya é a yɛ́, ále sɛliya kaamɔɔn ólu ní Falizɛn ŋólu! A fyáangafo ólu! Áa kɔɔji óni lúukolo ó lɔ́yaalala mɔɔnɲiin ndɔ́ɔ lɔ kó aa lo a tá dínnan o lɔ, wáa a kɛ́wɛɛ o sɔ́ɔla, áa o láyɛɛman yaananmanmɔɔn lé álee síya le, háanin o tíi ó tá yaananmanmɔɔnya óo tínmin a tá o ka.

16Kunnangboya é a yɛ, álee mínnu é fyóondɔ le! Ále lée lúu fɔ́la kó ni mɔɔn kɛ́ í shɛ́n kɛ Ala bhatobhomba ó kɛ́ i sɛ́ɛya le, kó o shɛ́nnin o tɛ́ la. Wáa kó sɛ́ɛn mín ŋé Ala bhatobhomba ó la, ni mɔɔn mínngɛ í shɛ́n o sɛ́ɛn ŋo la, kó shɛnnin bhɛ́ɛ ó lée wé. 17A ló nánloman ɲe kɛɛ, a ló ɲán o latuunnin ɲé! Sɛ́ɛn ŋo lé kúu a gbɛ́ɛ bháa, bháa Ala bhatobhomba ó? Ɲɔ́ɔn ngó sɛ́ɛn ŋo wɛ́ɛ sɛ́nnɛnya Ala bhatobhomba ó lé sɔ́ɔbu lá lé? 18Áa fɔ́la íkwɔ kó ni mɔɔn kɛ́ í shɛ́n kɛ faanlɛɛbhɔlaa ó kɛ́ sɛ́ɛya le, kó o shɛ́nnin o tɛ́ la, wáa kó mɔɔn kɛ́ í shɛ́n faanlɛɛfe ŋo lé la, kó shɛ́nnin bhɛ́ɛbhɛɛ ó lée wé. 19A ló ɲán latuunnin ɲe! Faanlɛɛ ó lé kúu a gbɛ́ɛ bháa, bháa faanlɛɛbhɔlaa ó? Ɲɔ́ɔn ngo faanlɛɛfe ŋo wɛ́ɛ sɛ́nnɛnya faanlɛɛbhɔlaa ó lé sɔ́ɔbu lá? 20Oo lɔ mínngɛ, mɔɔn mín ngɛ í shɛ́n faanlɛɛbhɔlaa ó la, ké o tíi o wɛ́ɛ í shɛ́n faanlɛɛbhɔlaa óni faanlɛɛfe ŋo le bɛ́ lá kéene wé. 21Mɔɔn mín ngɛ í shɛ́n kɛ Ala bhatobhomba ó kɛ́ sɛ́ɛya le, ké o tíi óo í shɛ́nnan o bhó ŋóni Ala le lá kéene wé, Ala mín bhátobho ngo yé! 22Mɔɔn mín ngɛ í shɛ́n sángboo o la, ké o tíi óo í shɛ́nnan Alataannan nɔ́nmɔnnaa óni ale Ala le lá wé, kɛ mansɔɔ ale lé nɔ́nmɔnnaako e. 23Bɔɔn é álee tá le, ále sɛliya kaamɔɔn ólu ní Falizɛn ŋólu! A fyáangafo ólu! Nánkwɔfe mɛ́nsɛn mínnu é nan kɛ́ nannanye ni anɛti ní kumɛn ŋolu le, áa yáa bhɔ́la o bɛ́ lɔ lɔ. Tó tɔ́ ŋo ywáa kúugbɛɛ mín núu nan kɛ́ téleɲan óni hínnɛn óni lánanya óle, a tɛ́ olu yacela. Ké a mánngan kɛ o léelu bhɔ́ sháa man. Kɛ́ dɔ́ ólu fala o ka. 24Álee sháaɲɛn fyóondɔ ólu! Áa a yɛ́ jíminnda o mánsɛɛnnɛnla kó háanin sóso fítiinin ngɛ́nan táa a kɔ́ɔnnɔn, ké áa ɲɔ́ɔnmɛɛn ó lákuunnan cɔ́!

25Bɔɔn é álee tá le, ále sɛliya kaamɔɔn ólu ní Falizɛn ŋolu! A fyáangafo ólu! Áa yáafyɛ olu ní tása olu kwɔ́manlaa ó lé kwóla tó kɛ i kɔ́ɔnnɔnlaa ó nɔɔnninmba ó tó. Áa a ywáa ólu mánkwola sɛ́nnɛnya bhóoman ké natabaya óni yɛɛlɔmyaanbhɛɛya oo a yóso ó lɔ. 26Falizɛn fyóondɔ ó! Yáafyɛ óni tása olu kɔ́ɔnnɔnlaa ólu kwó ótun, o kɛ́ kɛ́ í kɔ́ɔmanlaa ó yáa sɛ́nnɛnya.

27Bɔɔn é ale tá le, álee sɛliya kaamɔɔn ólu ní Falizɛn ŋolu! A fyáangafo ólu! Pɛ́nndulu gbɛ́ lánin ɲé kábulu mínnu mán, a bhɔ́nin ɲé o kábulu síya o léelu la: I kanaa ó bhɔ́nin ŋé kála fé njɛ́ɛ ne la, ké su kóoguun ŋólu ní fé ndwéenin bɛ́suu fanin ɲé í kɔɔnnɔn. 28Álee céne! Mɔɔn olu kɛ́ a yé, íi fɔ kó áa mɔɔn télenin né le, ké a yóso ó fánin ɲé fyaangafoya óni níyooɲan o la.

29Bɔɔn é ale tá le, álee sɛliya kaamɔɔn ólu ní Falizɛn ŋolu! A fyáangafo ólu! Áa kábulu lu lɔ́la Ala yɛ céla ólu yɛ́, óni kɛ mɔɔn télenin ŋolu tá kábulu olu mánsii cɛ́ɛne, 30tó kɛ fɔ kó: ‹Ni án ndɛ́ɛ kɛ́ án myɛ́man ólu tá sán o lɔ, án ne ni olu tɛ táa bhyɛ kéeman céla ólu fáa ó mán.› 31O ɲán o mán, á gbúlu wɛ́ɛ kɛ a gbú sɛ́ɛya le kɛ a gbúlu yáayii, kɛ a yáa kó mínnu wɛɛ céla ólu fáa, kó áa ólu bhɔ́nzɔ ne le. 32Áa wá cɔ́! A bhyɛ́man lúu kó mín lamyaan, áa o tɔ́ o lábha né téeman! 33Ále santutudhye ŋólu! Ále káa sé bwásila yaananmanlɔtaa kíti o mán díle? 34O lé kósɔn ɲáan céla lú ní kólɔmaa lu ní sɛliya kaamɔɔn lú cé a mán: A yáa i lɔ́lu fáa, a yáa i lɔ́lu gbáan yíi mán, a yáa i lɔ gbɛ́ɛlu gbási gbɛ́nɲɛn lá a yɛ́ sɛ́ɛbho ŋolu la, a yáa kɛ́ i tɔ́lɔla só ó bɛ́ la. 35Mɔɔnteenin mín núu fáa lúukolo ó ka, kɛ ta cɛ télenin Abɛli yée bwɔ́nin ŋó mán fɔ kɛ́nan sé Balaki dhyénjɛ Zakali tá ó mán, olu yáacɛ yáa bhɔ á álee lu lɔ. Áa Zakali fáa Ala bhatobhomba óni faanlɛɛbhɔlaa ó cɛ. 36Tó ní fɔ a yɛ́ tínɲan in ne ngó, o kóyoo ŋó bɛ́ yáacɛ yáa bhɔ́ álee bímɔɔn míin nú lɔ!»

Kóman mín ŋé Yeluzalɛmu só ó tá fa nvɛ́

Luka 13.34-35

37Ɛnza ŋé fɔ íkwɔ kó: «Yeluzalɛmuka ólu, Yeluzalɛmuka ólu, ale mín núu Ala yɛ́ céla ólu bwónan káwa la kɛ́ í fáa, síɲan yée né tɛ́ɛ fɛ́ kɛ́ a ládhyɛ ndɔ́ɔfɛ óyoo shishɛ óo a dhyé ŋólu ladhyɛla a káwa ó kɔ́ɔ ɲán mín man, waa a mán sɔ́n! 38Oo lɔ mínngɛ, a yɛ́ bhó ŋó lɔ́koo ɲáan tó féfe. 39Kɛ mansɔɔ tó ní fɔ a yɛ́ ngó a táa ɲé bhée. Fɔ́ a kɛ́ fɔ kó: Mɔɔn mín ŋé nánla Mantii ó tɔ́ɔla, tando é ó yɛ.»

Currently Selected:

Matiyu 23: MXX

Highlight

Copy