Matiyu 21

Ɛnza ŋé lónan Yeluzalɛmu

Maki 11.1-11; Luka 19.28-40; Yaya 12.12-19

1Ii gbaa mínngɛ Yeluzalɛmu la ké i wɛɛ lo Olivyetii óni Bɛtifaze tɔ́ɔfɛ, Ɛnza ŋé kaamɔɔndhye ŋo fyáa bhyáashaa. 2Tó kɛ fɔ i yɛ kó: «Só mín ŋé a ɲɛ́nnzhaafɛ nín, áa táa o la. A kɛ́ lo ndɛ́nmɛn, a yáa táa sofɛɛnin ngbee nɔ́ ní a dhyé ŋó ngúunnin ɲé. Áa i fwée kɛ́nan ni ile ɲɛ́n. 3Ní mɔɔn lɔ́ kɛ kóman, áa fɔ o yɛ kó: ‹Mantii óle manko é a lá.› O kɛ́ kɛ́ i yáa a lábhyaa íkɔlɔ.»

4Oo kɛ́ lé ke kó óo kó é kɛ céla óo kóman mín nvɔ, o a í lafa. A fɔnin ndɛ́ɛ a kwɔ tá ne kó:

5Áa fɔ Siyɔn dhyémuso#21.5 Siyɔn dhyémuso: Ala bhatobhomba ó lɔ́nin ndɛ́ɛ tii mínnga Yeluzalɛmu, o lé tɔ́ɔ tɛɛ kó Siyɔn. Lɔ́lu tɛ́ɛ Yeluzalɛmu kíila Siyɔn tɔ́ɔ o lá wáati lɔ́lu lɔ. olu yɛ kó:

Ɲɔ́ɔn nín, a yɛ́ mansacɛ oo nánla a saala,

a wɛɛ a yɛ́ɛmanyii, a síinin ɲé sofɛɛnin nɔ ngwɔ́ lɔ,

sofɛɛnin ngbee nɔ, sofɛɛninmuso lɔ dhyé.

6Kaamɔɔndhye ŋolu táa o lé lɔ́ Ɛnza ɲɛn cé o la. 7Ii nan sofɛɛnin ngbee ŋo ní sofɛɛninnye ŋó le kɛ i yɛ faani olu lá olu kwɔ́lɔ tó Ɛnza ŋé í síi a kwɔ lɔ. 8Yaman o mɔɔn shɛ́ɛman ɲé i yɛ faani olu lɔ́woo sháa o ka, lɔ́ lúu yíibhoo lu tɛ́ɛkɛ i la lá sháa o ka. 9Yaman mínnu tɛ́ɛ Ɛnza ɲɛn óni mínnu tɛ́ɛ a kwɔ́, o bɛ́ tɛ́ɛ táa gbáa ne kó: Tando é Laula Bhɔ́nzɔ ŋó yɛ́! Mɔɔn mín ŋé nánla Mantii o tɔ́ɔla, tando é o yɛ! Tando é Ala yɛ́ sá ŋó lɔ!

10Ɛnza ŋé lo mínngɛ Yeluzalɛmu só ó la, só óo ɲáanmin. I tɛɛ fɔ́la kó: «Cɛ míin ŋé yɛ́ɛtii le?» 11Mɔɔn olu tɛ́ɛ i yawila kó: «Céla Ɛnza née wé kɛ bhɔ́ Nazalɛti, Galile mala ó lɔ.»

Ɛnza ŋé feekɛbhaa olu gbɛnan Ala bhatobhomba ó lú o kɔ́ɔnnɔn

Maki 11.15-19; Luka 19.45-48; Yaya 2.13-22

12 Ɛnza ŋé lo Ala bhatobhomba ó kɔ́ɔnnɔn, aa lámyaan kɛ feekɛbhaa olu ní sanikɛbhaa olu gbɛ́, aa wɛ́ɛfɛɛmaa olu tá tabɛli ólu bé, kɛ biinin nvelebhaa olu tá gbaanin ŋo bɛ́ bémbe. 13Aa fɔ i yɛ kó: A sɛwɛnin ɲé kó, ɲɛ́n bhó ŋó káa kíi lé kó Ala bhatobho. Wáa: «Ále wɛ́ɛ o bhó ŋó lé kɛ́ so nú lóonaankɛlaa lé nín!»

14Fyóo ŋolu ní kuugba lɔ́ lúu í mángbaa Ɛnza nán Ala bhatobhomba o lú o kɔ́ɔnnɔn yénɔn, aa olu lákɛɛnya. 15Faanlɛɛɲansebhaa olu kúnndii ólu ní sɛliya kaamɔɔn ólu ɲán é lɔ o káwananngo ólu lɔ́ mínngɛ, óni kɛ dhyémuu ólu yé gbáanan Ala bhatobhomba ó lú o kɔ́ɔnnɔn kó: «Tando é Laula Bhɔ́nzɔ ŋó yɛ!» Ii mwɛ́nnɛn. 16Ii fɔ Ɛnza ɲɛn kó: «Í tóo é i kan ŋo lɔ a?» Ɛnza ŋé i yawi kó: «Ɔɔn! Bháanin ále mán a fɔnin ɲé kitabu o lɔ́ bhá ŋan kó: Í wɛ́ɛ kɛ háanin dhyémuu lú ní dhyéɲɛɛnninngwaa lu bɛ́ bɛ́ í tándo la?» 17O fɔ́nin ŋó kwɔ, aa i tó yénɔn kɛ bhɔ́ só ó la kɛ táa si Betani.

Ɛnza ŋé fígisun nɔ dáanla

Maki 11.12-14,20-24

18Sɔ́ɔ ó mán, i tɛɛ í kwɔ́sɛɛla mínngɛ Yeluzalɛmu, kɔ́ɔn é Ɛnza myaan. 19Aa fígisun nɔ yé sháa o gboo nvɛ́, aa í mángbaa a lá, wáa a man dhyé nzɔ́ɔ o la fo búu gbɛɛgbɛɛ. Oo kɛ́ mínngɛ aa fɔ fígisun ŋo mán kó: «Íle táa í dhyé ngɛ́ bhée!» Íkɔlɔ téeman, fígisun ŋóo já. 20Kaamɔɔndhye ŋolu ɲán é o kó ó yé, óo bhɔ́ i kɔ́ɔman gbúnigbukɛ, kó: «Aa kɛ́ díi tó fígisun míin ŋé já íkɔlɔ cé?» 21Ɛnza ŋé i yawi kó: «Tó ní fɔ a yɛ́ tínɲan in ne ngo, ni lánanya kɛ́ kɛ́ a yóso o lɔ, óni ní síka mán kɛ́ a yóso ó lɔ, ní kó mín ngɛ fígisun míin nan, a yáa sé o lɔ́ kɛ́la, a yɛ́ɛ ló ɲáan sé fɔ́la tii míin ɲɛn kó ‹bhɔ́ ywáa míin nɔn yánun, íi táa í yɛ́ɛ láfii kɔɔji o lɔ,› tó óo o kɛ́. 22Ni lánanya kɛ́ kɛ́ a yóso o lɔ, a kɛ́ fé ŋóo fé ngófɔ sɛɛ o lɔ, a yáa o sɔ́ɔ.»

Yɛ́nee kó ólu kɛ́ ó sé kɛ́la Ɛnza ɲɛn?

Maki 11.27-33; Luka 20.1-8

23Ɛnza ŋé táa Ala bhatobhomba ó la. A tɛ́ɛ mɔɔn ólu kalanan mínngɛ. Faanlɛɛɲansebhaa olu kúnndii ólu ní só o cɛba ólu í mángbaa o lé lɔ kɛ a manɲaankɛ kó: «Íi kó míinnu kɛ́la sébhaaya mínnɛɛn lé la? Yɛ́ɛtii o sébhaaya ó dí í mán?» 24Ɛnza ŋe í yawi kó: «Né káa ále mánɲaankɛ láfaɲan kéene la, kéembe, ni a kɛ́ ɲáwi, o kɛ́ kɛ́, ní bhɔ́la kó míin nú kɛ́ ó sébhaaya ó lé ywáa mínnɔn, ní o fɔ́ a yɛ́: 25Yɛ́ɛtii é Yaya Bátizelikɛbhaa bhyáashaa kɛ́nan mɔɔn ólu bátize, Ala bháa, bháa mɔɔn ólu?» Ii fɔ ɲɔ́ɔnɲɛn kó: «Ní án ngɛ a yawi kó Ala lée a bhyáashaa, a yáa án mánɲaankɛ kó mínnɛɛn lé kósɔn tó án mán lá Yaya la? 26Tó ní án ngɛ fɔ kó mɔɔn lée lúu a bhyáashaa, án ngákan kɛ sháan yaman o ɲɛn, kɛ mansɔɔ mɔɔn bɛ́ tɛ́ɛ Yaya yacela céla lé le.» 27Kó ólu kɛ́ɲan man cé, íi Ɛnza ɲawi kó: «Án mán lɔ.» Ɛnza ŋé i yawi o le lɔ kó: «Ni a kó cé, née kó mínnu kɛ́la nín, née ólu kɛ́la sébhaaya mínnan ndáa o fɔ́ a yɛ́.»

Sáanan mín ŋé dhyénjɛ fyáa ólu ka

28Ɛnza ŋé fɔ íkwɔ kó: «Ngáa kó mín nvɔ a yɛ́ nín, áa a tá ɲánla ó fɔ́ ɲɛ́n o kó ó tá fa nvɛ́: Dhyénjɛ fyáa tɛ́ɛcɛ lɔ́ bhóo. Aa fɔ jónan ó yɛ kó: ‹Nyénjɛ, táa bháala kɛ́ lɛ́zɛnnvyɛ ó lɔ́ bí.› 29O kó a yɛ kó a táa kɛ, wáa kwɔ́ o la, aa nan caanlɔngii tó kɛ táa bháala kɛ́ lɛ́zɛnnvyɛ ó lɔ. 30Facɛman ŋóo o kóman kée ŋó fɔ́ dhyénjɛ tɔ́ kée ŋó yɛ. Oo fɔ kó: ‹Mantii o, ŋwɛ́ɛn myɛ́n, ɲáan táa›, wáa a man táa.» 31Ɛnza ŋé i manɲaankɛ kó: «O dhyénjɛ fyáa ó mínnɛɛn lée i fa sáonanngo ó kɛ?» I ko Ɛnza ɲɛn kó: «Aa jónan mín nje.» Ɛnza ŋé fɔ ale faanlɛɛɲansebhaa olu kúnndii ólu ní Yawudhyaa cɛba ólu yɛ́ o lé lɔ kó: «Tó ní fɔ a yɛ́ tínɲan in ne ngó, háanin nísɔɔnmyaanbhaa olu ní tútu olu yáa Ala yɛ́ Mansaya ó hɛ́lɛ o sɔ́ɔ álee ɲɛn, 32kɛ mansɔɔ Yaya Bátizelikɛbhaa é nan a saala nin sháa téenin ŋó le, a mán lá a lá. Wáa nísɔɔnmyaanbhaa olu ní tútu olu lá a lá. Tó ále gbúlu ɲán é lɔ o kó ó lɔ, wáa a mán díminsa tó kɛ lá a lá.»

Sáanan mín ŋé lɛ́zɛnmaalakɛbhaa yóo ŋólu ka

Maki 12.1-12; Luka 20.9-19

33Ɛnza ŋé fɔ kó: «Áa í tóomanlɔ saanan gbɛ́ɛ lɔ: Lɛ́zɛnnvyɛtii lɔ lée lɛ́zɛn no kɛ yɔ́sɔ kɛ́ a man. Kɛ lɛ́zɛnjibhɔjaan lɔ́ bhɔ́, kɛ o kɛ́ lɛ́zɛn ŋó jíbhɔlaa le, tó kɛ gbáta lɔ́ lɔ́ sɛɛnkunnansiibhaa olu yɛ. Aa sɛɛn ó kɛ́ɛfa o lé lɔ bháalakɛdhye ŋólu mán, tó kɛ táa táamanla. 34Lɛ́zɛn bhɔ́ wáati oo sé mínngɛ, aa a yɛ bháalakɛdhye ŋolu bhyáashaa lɛ́zɛn ŋo bháalakɛbhaa olu saala kó ii a ta fa ŋo di. 35Wáa lɛ́zɛnmaalakɛbhaa olu a yɛ bháalakɛdhye ŋolu myáan kɛ a kée gbasi, kɛ kée ŋó fáa tó kɛ a sawaɲɔn o bwó káwa la. 36Lɛ́zɛnnvyɛtii oo bháalakɛdhye ngbɛ́ɛlu bhyáashaa. Olu tɛ́ɛ sháa mɔɔn jónan ólu le. Wáa lɛ́zɛnmaalakɛbhaa olu o kó kée ŋó lé lá olu la íkwɔ. 37Alabha ŋo la, aa a dhyénjɛ bhyáashaa. A tɛɛ fɔ́la kó i yáa nyénjɛ ó bhɛ́ɛsii. 38Wáa lɛ́zɛnmaalakɛbhaa olu cɛ ó dhyénjɛ o yé mínngɛ, íi fɔ ɲɔɔnɲɛn kó: ‹Cɛ́ntabhaa ó lée nín! Áa nan, án ní a fáa ké cɛ́n o a tó án bhóo.› 39Ii a myaan o lé lɔ kɛ a lafii lɛ́zɛnnvyɛ o kwɔ́shaafɛ tó kɛ a fáa.»

40Ɛnza ŋé ɲaanli kɛ kó: «Lɛ́zɛnnvyɛtii o kɛ́nan, a káa mínnɛɛn lé kɛ́ lɛ́zɛnmaalakɛbhaa olu la?» 41Ii a yawi kó: «A yáa o kóyoongɛbhaa olu fáa, a táa mánɲwaan i la. A yáa a yɛ lɛ́zɛnnvyɛ ó kɛ́ɛfa lɛ́zɛnmaalakɛbhaa gbɛ́ɛlu mán mínnu káa a yɛ lɛ́zɛn ŋó tɔɔn ó ló a bhóo a san lɔ.»

42 Ɛnza ŋé fɔ i yɛ kó: A mán tínminnaa míin ngála Kitabu o lɔ bhá ŋan?

Bhónɔbhaa olu tɛ́wɛɛ í bá tɛfɛ mínnɔn,

o lé wɛ́ɛ kɛ́ tɛfɛ kúugbɛɛ ŋo le.

O fáanan Mantii ó lé la,

oo kóba lé lé án née bhóo!

43Ɛnza ŋé wɛɛ kɛ fɔ kó: «O lé kósɔn, tó ní fɔ a yɛ́ ngó: Ala yɛ́ Mansaya ó hɛ́lɛ o táa dí a mán bhée, a yáa ló lananbhɛɛ olu bhóo, mín núu sé a lɔko o kɛ́la. 44[Mɔɔn óo mɔɔn kɛ́ í bé o tɛ́fɛ ó ka, o tíi o kóo olu yáa í lɔ́kɛɛngɛɛ, ni o tɛfɛ ó ló ngɛ́ bé mɔɔn mínnga, o tíi o yáa í lɔ́muɲuu.]»

45 Faanlɛɛɲansebhaa olu kúnndii ólu ní Falizɛn ŋolu Ɛnza ɲɛn saanan olu myɛ́n mínngɛ, ii bhɔ́ ɲan le óo Ɛnza ngan ndɛ́ɛ ile léelu mán wé. 46Oo kɛ́ mínngɛ, í tɛ́ɛ ɲánɲiinnan Ɛnza myaanko ó mán, wáa i tɛɛ sháannan yaman o ɲɛn, kɛ mansɔɔ bɛ́ tɛ́ɛ Ɛnza ɲacela Ala yɛ céla lé le.

Currently Selected:

Matiyu 21: MXX

Highlight

Copy