Matiyu 12

Ɛnza ŋé kan mín nvɔ lɔnwɛɛnlilo ŋo ko o lɔ

Maki 2.23-28; Luka 6.1-5

1Ó wáati o lɔ́, lɔnwɛɛnlilo nɔ́ la, Ɛnza ndɛ́ɛ tínminnan belefyɛ ólu kɔɔnnɔn. Kɔ́ɔn é a yɛ kaamɔɔndhye ŋolu myáan tó olu béle tínnza ŋo lɔ́lu bhɔ́ kɛ i lɔɔ. 2Falizɛn ŋólu i yé o lá mínngɛ, ii fɔ Ɛnza ɲɛn ko: «Ɲɔ́ɔn nín, kó mín mánngan kɛ́ kɛ́ lɔnwɛɛnlilo ŋó lá, i yɛ kaamɔɔndhye ŋólu o lé kɛ́la.» 3Ɛnza ŋé í yawi kó: «Kɔ́ɔn é Laula ní a táamanɲɔɔn ólu myaan mínngɛ, aa mínngɛ, a mán ó kála kɛ́ a yé a? 4Aa lo ɲán mín mán Ala yɛ́ bhó ŋo kɔɔnnɔn, óni faanlɛɛbulu mín nziinin ndɛ́ɛ yénɔn, aa o lɔɔ ɲán mín man kɛ́ɛke ále ní a táamanɲɔɔn ólu si tɛ́ mánngan kɛ o búlu o lɔɔ, fɔ faanlɛɛɲansebhaa olu kéembe. 5Bháanin a mán yé Musa yɛ́ tɔ́ ŋo lɔ kó faanlɛɛɲansebhaa olu bháala kɛ́ Ala bhatobhomba ó lá lɔnwɛɛnlilo ŋo la a? Waa í tɛ́ yacela oo mɔɔn mínnu tɛ́ lɔnwɛɛnlilo ŋo tɔ́ ŋo látaaman lá a? 6Tó ní fɔ a yɛ́ ngó kó é yánun, mín nguu a gbɛ́ɛ kɛ tínmin Ala bhatobhomba ó ka! 7Ala e fɔ a yɛ kitabu o lɔ kó Ní hínnɛn le fɛ, ndɛ́ faanlɛɛ fɛ. Ni a tɛ́ɛ o kóman o kɔ́ɔ o lɔ, a tɛ́ táa jótii olu yaayii. 8Kɛ mansɔɔ mɔɔn Dhyénjɛ ó lée lɔnwɛɛnlilo ŋó kunndii o lé.»

Ɛnza ŋé cɛ bhóofaaninman lɔ́ lákɛɛnyala

Maki 3.1-6; Luka 6.6-11

9Ɛnza ŋé bhɔ́ yénɔn kɛ táa Yawudhyaa olu yɛ́ sɛ́ɛbho ŋo kɔɔnnɔn. 10Cɛ lɔ́ tɛ́ɛ yénɔn, o bhóo tɛ́wɛɛ fáa a man. Falizɛn ŋolu tɛ́ɛ fɛ́ ké ii sɔ nzɔ́ɔ Ɛnza nán, o kósɔn ii Ɛnza manɲaankɛ kó: «Án ɲɛn tɔ́ ŋo lɔ, án ngákan kɛ́ lákɛɛnyalikɛ lɔnwɛɛnlilo ŋo la?» 11Ɛnza ŋé i yawi kó: «Saa kéembe kɛ́ kɛ́ a lɔ́ bhóo ké o saa ó a í bé jáan lɔ́ lɔnwɛɛnlilo ŋo la, a tíi o táa táa o saa ó lábhɔ a? 12Mɔɔndhye ŋó kúu a gbɛ́ɛ kɛ tínmin saa ó ka! Óo lɔ mínngɛ, án ɲɛn tɔ́ ŋóo fɛ ké án ni kó bhɛ́ɛ le kɛ́ án mɔɔnɲɔɔn o yɛ́ lɔnwɛɛnlilo ŋo la.» 13Aa fɔ o lé lɔ́ cɛ ó yɛ kó: «Í bhóo ó lɔ́sawa.» Cɛ o a bhóo o lɔ́sawa, a bhóo o kɛ́ɛnya kɛ kɛ́ a bhóo tɔ́ kée ŋó súu le. 14O lée kɛ́ Falizɛn ŋolu bhɔ́ o lé kɛ́ɛnman kɛ táa ɲɔ́ɔnɲe, ké i káa kɛ tɛ́nmɛn kɛ Ɛnza nváa, ii bhɔ́ o ɲánle.

Ala wɛ́ɛ í kwɛ́ɛn síi a yɛ bháalakɛdhye mín ngɔɔ

15 Ɛnza ŋé o kó ó myɛ́n mínngɛ, aa bhɔ́ i cɛ́man óle lɔ kɛ táa. Yamanba é táa a fo nan. Aa yaangalotɔ ólu bɛ́ lákɛɛnya, 16wáa aa fɔ í yɛ́ kɛ́ a mangbɛya kó i kɛ́nan ale kófɔ mɔɔn ólu ɲánla. 17Aa o kɛ́ lé ke kó óo kó é kɛ Céla Ezayi é kóman mín nvɔ, o a í lafa. A fɔnin ndɛ́ɛ o kwɔ́ tá ne kó:

18 Ɲɛ́n bháalakɛdhye ŋo lée nín,

ŋwɛ́ɛn ale lé bhɔ́, ale lé kó a dí ɲɛn.

Né wɛ́ɛ Ní o ló a lɔ, a yáa téeɲan ó láse síya gbɛ́ɛ olu mán.

19 A táa kɛɛ bhyáa mɔɔn sí la, a táa í ka nányɛɛ,

a lo ndáa kɛ́dhyaa nzhɛɛman ngɛ́bhaa lé yamanywaa olu lɔ.

20 A táa kaakaa o kúnmanyiinin ŋó tɔ́ kɛɛ,

tɔ bhɛ́ɛ tɛ́ laman mín nzala, a táa o tɔ́ lása.

A yáa tó o la fɔ́ kɛ́nan fáan dí téeɲan ó mán.

21 A tɔ́ɔ o yáa kɛ́ síya ólu bɛ́ yeeya le.

Ɛnza ŋé Falizɛn ŋolu yawila

Maki 3.22-30; Luka 11.14-23

22Ii nan cɛ lɔ́ lé Ɛnza nzáala, Lámansa yóo né tɛ́wɛɛ o cɛ ó kɛ́ bhóbho óni fyóo ne. Ɛnza ŋé o cɛ ó lákɛɛnya tó óo kóman, óni kɛ ywáa yé. 23O kó óo yaman o káwakoya fɔ́ ii fɔ́la kó: «Bháanin Ɛnza Laula Bhɔ́nzɔ o tɛ́ míin ne a?» 24Falizɛn ŋolu o dhyáa ŋó myɛ́n mínngɛ, olu fɔ kó: «Cɛ míin ŋé lámansa yóo ŋólu gbɛnan lámansa yóo ŋólu kunndii Bɛlizebuli lé bháaka lɔ!» 25Ɛnza ndɛ́ɛ i miliya olu lɔ, aa fɔ i yɛ kó: «Yamaan mín mɔɔn lúu ɲɔ́ɔn ngɛlɛla, o yamaan oo céla lé. Só wáman bhó mín nanbhaa lu kɛ́ kɛ́ ɲɔ́ɔn ngɛlɛla, o só ó, wáman o bhó ŋó tɛ́ sé si sɔ́ɔla. 26Ní Sɔtaannan kɛ́ kɛ́ Sɔtaannan gbɛnan, ké aa a yɛ́ɛ le kɛ́lɛla wé ne, o ɲán o mán, a yɛ́ yamaan ó káa sé si sɔ́ɔla díi? 27Ní née Lámansa yóo ŋólu gbɛnan Bɛlizebuli lé bháaka lɔ, o wáati ó lɔ, á dhyénjɛ ólu i gbɛnan yɛ́ɛtii bháaka lɔ? O lé kósɔn ólu yáa kɛ́ a yɛ́ kítitɛɛbhaa ólu lé! 28Wáa ni née Lámansa yóo ŋólu gbɛnan Ala Ní o le bháaka lɔ, oo a yáala le kó Ala yɛ́ mansaya ó wɛ́ɛ sé a mán.

29Mɔɔn e sé lónan mɔɔn faangbii lɔ́ yɛ́ bhónan, kɛ o bhóota o bɛ́ ta ni a man o mɔɔn faangbii ó síli a? Ní a kɛ sé kɛ a síli, aa sé kɛ a yɛ bhónanfe ŋo bɛ́ ta. 30Mɔɔn mín ndɛ́ né ɲíin lé, oo né yúu lé le. Óni mɔɔn mín ndɛ́ ládhyɛli kɛ́la ni né lé, o tíi ó ɲɛ́nɲɛnnin né kɛ́la! 31O lé kósɔn ní fɔ́la a yɛ́ ngó yafa é sé kɛ kɛ́ mɔɔndhye ŋólu yɛ yúumu o bɛ́suu man, háanin mín ŋé nan kɛ́ Ala lɔ́ɔya óle, wáa mɔɔn óo mɔɔn kɛ́ Ní Sɛnnɛnyanin ŋó lɔ́ɔya, yafa táa kɛ́ o tíi ó mán. 32Mɔɔn óo mɔɔn kɛ́ kóman yóo nvɔ́ mɔɔn Dhyénjɛ o mán, yafa é sé kɛ́la o tíi ó mán, wáa mɔɔn óo mɔɔn kɛ́ kóman yóo nvɔ́ Ní Sɛnnɛnyanin ŋó mán, yafa táa kɛ́ o tíi ó mán tún, yafa ló ndáa kɛ́ a man kíyaman.»

Sáanan míin yíi óni yíidhyengo o ka

Luka 6.43-45

33«Yíi mín ngáɲin, o lé dhyé ngáɲin. Yíi mín mánɲin, o dhyé ŋó mánɲin. Aa céne, mɔɔn é yíi ó lɔnan a dhyé ŋó lé mán. 34Álee santutudhye ŋolu! Ále a yóo ɲán mín man álee káa sé kómanbhɛɛ fɔ́la díi? Kɛ mansɔɔ mɔɔn yóso ó fánin ɲé fé ŋó mínnan, i lá ó o le fɔ́la. 35Mɔɔnbhɛɛ ó fémɛɛ ó bhɔ́la a yɛ́ nanfoobhɛɛ o lé lɔ mín ŋé a yóso ó lɔ. Mɔɔnyoo ŋó féɲoo ne bhɔ́la a yɛ́ nanfooyoo ŋó lɔ. 36Ní fɔ a yɛ́ ngó kítitɛɛlo ŋo kɛ́ sé, mɔɔndhye ŋólu wɛ́ɛ kóman kúnnda nzúusuu fɔ, i tɛɛ o fɔ́la kun mínnan, i yáa o fɔ. 37Kɛ mansɔɔ mɔɔn é jó sɔɔla i yɛ́ɛla kóman ó lé fɛ, wáman mɔɔn ló ŋe yaayiila i yɛ́ɛla kóman ó lé fɛ́.»

Kó Ɛnza ŋan tɔɔmansii lɔ kɛ

Maki 8.11-12; Luka 11.29-32

38 Sɛliya kaamɔɔn lɔ́lu ni Falizɛn nɔ́lu fɔ Ɛnza ɲɛn kó: «Kaamɔɔn, án ni fɛ́ kɛ́ i yɛ́ tɔɔmansii kée ɲé.» 39Ɛnza ŋé i yawi kó: «Án ɲɛ́n wáati miin mɔɔn míinnu manɲin. Ala kanmyaanbhɛɛ ó lé lúu tɔɔmansii ɲíin. Tɔɔmansii gbɛ́ɛ táa kɛ́ i yɛ́ bhée ní céla Zonasi yɛ́ tɔɔmansii o tɛ́. 40O lɔ Zonasi é tee sáwa ní sú sawa kɛ́ yɛ́ɛba ó kɔ́ɔnnɔn ɲán mín mán wé, mɔɔn Dhyénjɛ, o yáa tee sáwa ní sú sawa kɛ́ o ɲán kée ŋó mán kábulu o lɔ lúukolo o kɔ́ɔ. 41Kíti tɛ́ɛlo ŋó la, Ninivuka ólu yáa i wíi kɛ́ kíti bé án ɲɛ́n wáati miin mɔɔn ólu ka, kɛ mansɔɔ Zonasi é lakawanin mín ngɛ́ Ninivu só ó kɔ́ɔnnɔn, Ninivuka ólu sɔ́n o mán. Ii díminsa kɛ́ fala í yɛ́ kóyoo ŋólu lá. Waa, mɔɔn é yánun mín a bwó ní Zonasi lé! 42Kíti tɛ́ɛlo ŋó la, kíinmoo fán ŋó fɛ́ mansamuso ó yáa í wíi ní án ɲɛ́n wáati míin mɔɔn ólu lé kɛ́ kíti bé í ka, kɛ mansɔɔ a lée bhɔ́ fɔ lúukolo ó lá ŋó la kɛ́nan Swɛmannan yɛ́ hákiimanɲandhyaa ólu lɔ́myɛn. Waa, mɔɔn é yánun mín ŋe Swɛmannan ɲɛ́n!»

Lámansa yóo ŋó kwɔ́sɛɛ ó

Luka 11.24-26

43«Ní Lámansa yóo ŋó kɛ́ bhɔ́ mɔɔn lɔ́ lɔ, aa táa í yáalayaala lá wúla ó le kɔɔnnɔn, kɛ́ lɔnwɛɛnlikɛlaa ɲíin yénɔn. Waa á tɛ́ o ywáa sɔ́ɔla mínngɛ, 44O lɔ aa fɔ a yɛ́ fɛ́ kó: ɲáan ngwɔ́sɛɛ ɲɛ́n bhó ŋó la, ní bhɔ́ ywáa mínnɔn. Ní a kɛ́ í kwɔ́sɛɛ wáati mínnɔn, kɛ táa o ywáa ó lɔkoo ŋo mancɛnin ní lɔ́bhyɛnin ŋó yé. 45O lɔ, aa táa Lámansa yóo wóonvyaa gbɛ́ɛ kíi, mínnu a yóo ale lé. Ii nan lo o tíi ó lɔ kɛ́ í síi. A tíi ó kɛ́ɲan ó yáa yóoɲan kɛ́ tínmin a jónan ó ka. A lo ngáa kɛ́ wáati miin mɔɔn ólu lá céne.»

Ɛnza ŋwóobhaa ni Ɛnza nɔ́ɔcɛ ólu

Maki 3.31-35; Luka 8.19-21

46Kɛ a tó kómanla yaman o yɛ́ bhó ŋó la, a wóobhaa ní a lɔ́ɔcɛ ólu í lɔ́ ndɛ́ɛ kɛ́ɛnman. I tɛɛ fɛ́ kɛ kóman a yɛ. 47Lɔ́ é fɔ a yɛ kó: «Í wóobhaa ní í lɔ́ɔcɛ ólu lɔ́nin ɲé kɛ́ɛnman, ii fɛ́ kɛ kóman lɔ́ fɔ́ í yɛ́.» 48Wáa Ɛnza ŋé o tíi ó yawi kó: «Yɛ́nee ŋwóobhaa le? Yɛ́nee lú é nɔ́ɔcɛ ólu le?» 49Ɛnza ŋé í bhóo sú a yɛ kaamɔɔndhye ŋolu la kɛ fɔ kó: «Ŋwóobhaa óni nɔ́ɔcɛ ó lée lúu nín. 50Tínɲan in ne, Nvá mín ŋé sá ŋó lɔ, mɔɔn óo mɔɔn kɛ kɛ́ o sáo o kɛ́la, o tíi ó lée nɔ́ɔcɛ óni nɔ́ɔmuso, óni ŋwóobhaa le.»

Currently Selected:

Matiyu 12: MXX

Highlight

Copy