Luka 9

Ɛnza ŋé a yɛ́ kaamɔɔndhye ŋólu céla

Matiyu 10.5-15; Maki 6.7-13

1Ɛnza ŋé a yɛ kaamɔɔndhye ndá ni fyáa ólu kíi kɛ́ sébhaaya ni fáan dí í man kɛ́ lámansayoo ŋólu gbɛ́, óni kɛ́ yaangalotɔ ólu lákɛɛnya. 2O kwɔ́, aa i cé kɛ́ táa Ala yɛ́ mansaya kó o fɔ, kɛ́ yaangalotɔ ólu lákɛɛnya. 3Aa fɔ i yɛ kó: «Á kɛ́nan fósi tá, gbéle, wáman táamanlataalwee, wáman lɔ́min, wáman wɛ́ɛ, á kɛ́nan o sí tá. Á kɛ́nan deeke fyáa tá. 4Ní a kɛ yɛ́tiiya sɔ́ɔ bhó ŋóo bhó nan, aa tó yénɔn fɔ a bhɔ́waati ó kɛ́ sé ó só ó kɔɔnnɔn. 5Ní mɔɔn man í ɲán sii a kɔ́ɔ, aa bhɔ́ yénɔn, áa a sé ó lagbasi kɛ a sénan gbángba ŋó tó yénɔn. O yáa kɛ́ a sɛ́ɛya le.» 6Kaamɔɔndhye ŋólu táa í yáala la só ólu bɛ́ la kɛ́ Ala yɛ́ sanmankanmɛɛ o láse óni kɛ́ yaangalotɔ ólu lákɛɛnya o ywáa ó bɛ́ lɔ.

Elɔdi hákii ó wɛ́ɛ ɲáanmin

Matiyu 14.1-2; Maki 6.14-29

7 Elɔdi min ndɛ́ɛ fáan lá Galile mála ó lɔ, kó mínnu tínmin aa ólu myɛ́n mínngɛ, a hákii óo ɲáanmin, kɛ mansɔɔ lɔ́lu tɛ́ɛ fɔ́la kó Yaya Bátizelikɛbhaa le wɛ́ɛ kúun kɛ bhɔ́ su ólu cɛ́man. 8Lɔ́lu kó céla Eli le wɛ́ɛ í kwɔ́sɛɛ kɛ nan. Lɔ gbɛ́ɛlu kó céla kɔ́ɔ ólu lɔ́ lé wɛ́ɛ kúun. 9Wáa Elɔdi kó: «Né lée kɛ tó ii Yaya kún ŋó tɛ́ɛla. Née min ɲɛ́n kó kɛ́nin mánngan myɛ́nnan ni, óo yɛ́ɛtii lé?» O lɔ, a tɛ́ɛfɛ ké a ɲán a lá Ɛnza ngá.

Ɛnza ŋé lɔ́min dila yaman ó mán

Matiyu 14.13-21; Maki 6.30-44; Yaya 6.1-14

10Ɛnza ɲɛ́n céladhye ŋólu í kwɔ́sɛɛ sán mín nɔ́n, íi kó mínnu kɛ́, íi ó bɛ́ lɔ́sɔɔ Ɛnza ɲɛ́n. Aa táa ní íle í kée nan ywáa lɔ́lɔ. O ywáa ó tɛ́man já Bɛtisayida la. 11Wáa yaman ó bhɔ́ o ɲánle mínngɛ, íi táa íkwɔ. Ɛnza ŋé í labhyɛ ní nisɔdhyaa le, óni kɛ́ i kála Ala yɛ́ mansaya ó kó ó la. Mínnu tɛ́ɛ kɛ́ɛnya fɛ, aa ólu lákɛɛnya.

12Tée ó tɛ́ɛ bénan, a yɛ́ kaamɔɔndhye ŋólu í mangbaa a lá kɛ́ fɔ a yɛ́ kó: «Yaman ó lábhyaa ké íi táa só ólu ni kanman ólu la kɛ́ sunman ni lálaa ɲíin kɛ mansɔɔ án ní ywáa cɛ́bhɔnin né lɔ yánun.»

13Wáa Ɛnza ŋé fɔ i yɛ kó: «Álee gbúlu á sunman ndí í man.»

Ii fɔ a yɛ́ kó: «Fósi tɛ́ án móo ni búlu dhyé nóo óni yɔ́ɔ dhyé nvyáa gbóto tɛ́. Fɔ ní án ngɛ́ táa sunman nzá kɛ́ nan a di yaman ó mán.» 14Kɛ mansɔɔ, cɛ wáa lóo lú síya le tɛ́ɛ yénɔn.

Ɛnza ŋé fɔ a yɛ́ kaamɔɔndhye ŋólu yɛ kó: Áa mɔɔn ólu lásii mɔɔn bíloolu lóolu.

15Kaamɔɔndhye ŋólu ó kɛ́ kɛ kéeɲan ní a yɛ kóman óle, yaman ó bɛ́ɛ í síi. 16Ɛnza ŋé búlu lóo óni yɔ́ɔ dhyé nvyáa ó tá, kɛ í ɲán layɛɛ sángboo ó mánshaa fɛ kɛ Ala bálika bhɔ́. Aa búlu ólu kúunndɛɛtɛɛ kɛ i ló a yɛ kaamɔɔndhye ŋólu bhóo, kó ii a lɔ́taa yaman o la. 17Mɔɔn ólu bɛ́ɛ lɔ́min kɛ́ kɛ fá. Búlu gúun mínnu é tó, ii seenin ndá ni fyáa lafa sunman ndɔ́to ó la.

Piyɛli é fɔ́la kó Ɛnza née Kísibhaa ŋó le

Matiyu 16.13-19; Maki 8.27-29

18Ló nɔ́ la, Ɛnza ndɛ́ɛ Ala dɛ́li o lá í kée nán, a yɛ́ kaamɔɔndhye ŋólu tɛ́ɛ a tɔ́ɔfɛ. Aa i manɲaankɛ kó: «Yaman ó tá fɔli o lɔ, née yɛ́ɛtii lé?»

19Ii a yawi kó: «Lɔ́lu kó íi Yaya Bátizelikɛbhaa le lé. Lɔ́lu kó íi Eli le lé. Lɔ́gbɛɛ lú kó íi céla kɔɔ ólu lɔ́ le lé min wɛ́ɛ kúun kɛ́ bhɔ́ saya ó lɔ.»

20Ɛnza ngó: «Tó álee ɲánla, née yɛ́ɛtii le?»

Piyɛli é a yawi kó: «Íi Ala yɛ Kílisi ó le lé.»

21Ɛnza ŋé fɔ kɛ a mangbɛya í yɛ́ kó í kɛ́nan o fɔ mɔɔn si yɛ́.

22Aa fɔ i yɛ́ í kwɔ́ kó: «Mɔɔn Dhyénjɛ ó kákan kɛ́ tɔ́lɔya lé myáan koyoongɛ. Cɛba ólu ní faanlɛɛɲansebhaa olu kúnndii ólu ní Sɛliya kaamɔɔn ŋólu yáa í bá a lɔ́. I yáa a fáa, wáa a tee sawaɲɔɔnlo ŋó, a yáa kúun kɛ bhɔ́ saya o lɔ.»

I kákan kɛ́ bhyáa Ɛnza ngwɔ́ ɲán mín mán

Matiyu 16.21-28; Maki 8.30--9.1

23O kwɔ́, aa fɔ yaman ó yɛ kó: «Ní mɔɔn míin fɛ́ kɛ́ bhyáa né kwɔ́, fɔ́ o tíi ó a í bá a yɛ́ɛ lɔ, kɛ a yɛ́ɛ gbáanɲii ó tá ló ŋóo ló kɛ́ bhyáa né kwɔ́. 24Kɛ mansɔɔ mɔɔn óo mɔɔn é fɛ́ kɛ a ní o kísi, o tíi ó yáa bɔɔn a ní o lɔ. Wáa mɔɔn óo mɔɔn kɛ bɔɔn a ní o lɔ né kósɔn, o tíi ó yáa kísi. 25Óo mínnɛɛn ɲánla mɔɔn mán kɛ́ dínɲanlɔtɛɛ fé ŋó bɛ́ sɔ́ɔ tó kɛ táa bɔɔn a ni o lɔ́, wáman kɛ́ a yɛ́ɛ hálaki? 26Ní mɔɔn mínngɛ maloya, né ní ɲɛn kóman ó mán, mɔɔn Dhyénjɛ ó kɛ́ nán ni a yɛ sébhaaya ó lé, óni a Fá, óni malɛɛka sɛ́nnɛnyanin ŋólu yɛ nɔlɔya óle wáati mín nɔ́n, a yáa maloya o tíi ó ɲɛ́n. 27Tó ní fɔ a yɛ́ tínɲan in né ngó: Mɔɔn mínnuu yánun nín, o lɔ́lu yɛ́ɛ táa sayakɛ ní i mán Ala yɛ́ mansaya o yé.»

Ɛnza ɲɛ́n nɔ́lɔya ó wɛ́ɛ yáa

Matiyu 17.1-8; Maki 9.2-8

28Tée sɛ́ɲin ŋó kwɔ́ o kóman ólu fɔnin ngwɔ́ Ɛnza bhóo, áa i yɛ́ɛ tíi lɔ́ ka ní Piyɛli ní Yaya ní Zaki lu lé kɛ́ Ala dɛ́li. 29Kɛ Ɛnza ndó Ala dɛ́li ó lá, a ɲánlɔshaa ó yɛ́ɛman, a yɛ faani ó gbɛ́ pépe fɔ aa mánnan mánnan nan. 30O ywáaninngee ŋó lɔ, cɛ fyáa tɛ́ɛ kómanla ní ale. Céla Musa óni céla Eli lé tɛ́ɛ wé. 31Nɔ́lɔya tɛ́ɛ i ka. Ɛnza ngɛ́ɛ tɛ́ɛ Yeluzalɛmu kɛ sayakɛ ɲán ó mín mán kɛ́ a yɛ bháala ó lafa, i tɛ́ɛ ó kóman ó lé la. 32Sunnɔɔn tɛ́ɛ Piyɛli ní a táamanɲɔɔn ólu la. Ii kúun mínngɛ, íi Ɛnza ɲɛn Alaya ó nɔ́lɔya ó yé, óni cɛ fyáa mín nú tɛ́ɛ a tɔ́ɔfɛ. 33Cɛ fyáa ólu táatɔ ó kɛ bhɔ́ Ɛnza ndɔ́ɔfɛ, Piyɛli é fɔ a yɛ kó: «Mantii ó, án ngɛ́ ó yánun ó wɛ́ɛ físaya. Án ní tóo sawa lɔ́, í tá kée, céla Musa tá kée, óni céla Eli tá kée.» Piyɛli tɛ́ɛ mín nvɔ́ la, a tɛ́ mán ó lɔ.

34Kɛ́ Piyɛli tó o kóman ó la, káwa lɔ́ é yíi kɛ́ i mantuun. I tɛ́ɛ káwa ó lɔ́ mínngɛ, íi sháan. 35Saaninkan nɔ́ é bhɔ́ káwa ó lɔ kɛ́ fɔ kó: «Míin née né dhyénjɛ óle ŋwɛ́ɛn mín mɔ́, áa a kómankan ŋó lɔ́myɛn.»

36Kómankan ó bhɔ́ wáati ó lɔ, Ɛnza ngée ne tɛ́ɛ yé. Kaamɔɔndhye ŋólu mín ɲé, íi ó mala i kɔɔnnɔn, i mán ó lɔsɔɔ mɔɔn sí yɛ́ o wáati ó lɔ́.

Ɛnza ŋé Lámansa lɔ́ gbɛ́

Matiyu 17.14-18; Maki 9.14-27

37O lusɔgbɛ ó, íi i yíi mínngɛ kɛ́ bhɔ́ tíi o ka, yamanba lɔ é nán Ɛnza ngunmyɛ. 38Cɛ lɔ é tó yaman ó cɛ́man kɛ́ gbáa kó: «Kaamɔɔn, ní i dɛ́lila, ii nyénjɛ kɛ́ɲan ó mánfɛɛ, kɛ mansɔɔ ale kée née dhyé né. 39Lámansayoo nɔ́ é tóla kɛ́ wíi a fɛ, ní a kɛ́ wíi a fɛ, aa baabaa kɛ́ gbáa, aa láyuuyuu koyoongɛ fɔ a láyi o fá a lálɔ. Aa tɔ́lɔla koyoongɛ, a tɛ́ bhɔ́la a fɛ́ jónan. 40Ŋwɛ́ɛn i yɛ kaamɔɔndhye ŋólu mándhyaa ké íi a gbɛ́, wáa i man sé.»

41 Ɛnza ŋé fɔ kó: «Álee mɔɔnyoo ŋólu lánanbhɛɛ ólu! Né káa tó a fɛ yánun kɛ táa sé wáati mínnɛɛn lé mán? Né káa álee lɔ́myaan kɛ sé fɔ wáati mínnɛɛn lé mán ósɔ? Nan ní í dhyénjɛ ó lé yánun.»

42Dhyé ŋó mángbaatɔ ó, Lámansa ó a tá kɛ́ a bé lúuman kɛ́ a lámaanmaan bhɛ́ɛbhɛɛ le. Wáa Ɛnza e í táan fɔ́ lámansayoo ŋó yɛ kɛ́ a gbɛ́. Dhyé ŋó kɛ́ɛnya, Ɛnza dhyé ŋó dí a fá man. 43Mɔɔn ólu bɛ́ káwakoya Ala yɛ sébhaaya ó kósɔn.

Ɛnza ŋé a saya kó ó fɔ́la íkwɔ

Matiyu 17.22-23; Maki 9.30-32

Ɛnza ŋán kókɛnin ŋólu tɛ́ɛ mɔɔn ólu káwakoya la mínngɛ, aa fɔ a yɛ kaamɔɔndhye ŋólu yɛ́ kó:

44«Áa í tóo mánlɔ cɛ́ɛne: Mɔɔn dhyénjɛ o yáa ló mɔɔn ólu bhóo.» 45Wáa kaamɔɔndhye ólu mán bhɔ́ ó kóman ó ɲánle, o kóman o kɔ́ɔ ó lóonaankɛnin ŋé tó i mán ké i kɛ́nan bhɔ́ o ɲánle. I tɛ́ɛ sháannan kɛ́ a mánɲaankɛ o kóman ó kɔ́ɔ ó mán.

Yɛ́ɛtii é mɔɔnba óle?

Matiyu 18.1-5; Maki 9.33-37

46Kaamɔɔndhye ŋólu tɛ́ɛ kómanla ɲɔ́ɔnɲɛn kó yɛ́ɛtii bɛ́ lɔ mɔɔnba óle i cɛ́man. 47Ɛnza ŋé i miliya ó lɔ́ mínngɛ, aa dhyémuu lɔ́ tá kɛ́ alalɔ a tɔ́ɔfɛ, 48kɛ́ fɔ i yɛ́ kó: «Mɔɔn mín ngɛ í ɲán síi dhyémuu míin nzí kɔ́ɔ né tá ɲiinɲan mán, o tíi óo í ɲán síila né lé kɔ́ɔ wé. Tó ni mɔɔn mínngɛ í ɲán síi né kɔɔ, o tíi ó wɛ́ɛ í ɲán síi né bhyáashaabhaa o lé kɔ́ɔ wé. Mɔɔn míin bɛ́ lɔ fítiinin ŋó le a cɛ́man, o tíi ó lée bɛ́ lɔ mɔɔnba óle.»

Mín ndɛ́ án yúu lé oo án ɲíin né le

Maki 9.38-40

49Yaya é kóman ó tá kɛ́ fɔ Ɛnza ɲɛn kó: «Kaamɔɔn, án ni cɛ lɔ́ yé aa lámansayoo ólu gbɛ́nan kɛ́ bhɔ́ mɔɔn ólu fɛ ní í tɔ́ɔ óle. Án ndɛ́ɛ fɛ kɛ a lálɔ, kɛ mansɔɔ án nɔ́ tɛ́ le.»

50 Ɛnza ŋé a yawi kó: «A kɛ́nan a lálɔ, kɛ mansɔɔ mɔɔn min ndɛ́ a yúu le, óo a ɲíin ne lé.»

Lɔ́lu é í bá kɛ́ Ɛnza nɔ́bhyɛ

51Ɛnza kákan kɛ́ bhɔ́ dínɲan lɔ́ wáati mín nɔ́n, oo súnɲan mínngɛ, áa a látɛɛ kó a kɛ́ɛ tɛ́ɛ Yeluzalɛmu. 52O lɔ, aa céladhye ŋólu bhyáa kɛ́ táa a ɲɛ́n. Ólu táa ló Samali tɔ́ɔfɛ só lɔ́ kɔɔnnɔn kɛ yɛ́tiiya ɲíin Ɛnza ɲɛn. 53Wáa o sómɔɔn ólu mán sɔ́n ké Ɛnza ŋán i yíi i fɛ́ yé, kɛ mansɔɔ a tɛ́ɛ táala Yeluzalɛmu. 54Ɛnza ɲɛ́n kaamɔɔndhye Zaki ní Yaya é ó yé mínngɛ, íi fɔ Ɛnza ɲɛn kó: «Mantii ó, ii fɛ́ ké án ní tá láyii kɛ́ bhɔ́ sángboo ó lɔ́ kɛ́ í hálaki a?»

55Ɛnza ŋé í ɲán yɛ́ɛman i lɔ kɛ́ kóman i man. 56O kwɔ́, íi tínmin kɛ́ táa só gbɛ́ɛ la.

Lɔ́luu fɛ́ kɛ́ bhyáa Ɛnza ngwɔ́

Matiyu 8.19-22

57Kɛ́ í tó sháala, cɛ lɔ é fɔ Ɛnza ɲɛ́n kó: «I kɛ táa ywáa óo ywáa lɔ, né yáa bhyáa íkwɔ.»

58 Ɛnza ŋé fɔ a yɛ́ kó: «Jáan é kóngowuu ólu bhóo, bhó ŋé sámankɔɔn ólu bhóo, wáa lálaa tɛ́ mɔɔn Dhyénjɛ ó bhóo lɛ́.»

59Ɛnza ŋé fɔ mɔɔn gbɛ́ɛ yɛ kó: «Bhyáa né kwɔ́.»

Wáa cɛ ó kó: «Mantii ó, i lɔ́ né kɛ́ɛ tɛ́ɛ nvacɛ su ló ótun.»

60Ɛnza ŋé fɔ a yɛ́ kó: «A tó ké su ólu a i yɛ su o ló. Ile kwɛ́nnin, ile a táa Ala yɛ́ Mansaya ó kó o láse.»

61Mɔɔn gbɛ́ɛ é fɔ Ɛnza ɲɛ́n kó: «Née fɛ́ kɛ bhyáa íkwɔ, Mantii ó. Wáa í lɔ́ ké né a táa nzáa ɲɛ́n lumanmɔɔn ólu la ótun.» 62Ɛnza ŋé ó yawi kó: «Mɔɔn óo mɔɔn é nisilawa ó myaanla ké aa sɛɛn kɛ, tó a ɲángbaannin ŋé a kwɔ́man, o tíi ó mánngan ní Ala yɛ́ mansaya óle.»

Currently Selected:

Luka 9: MXX

Highlight

Copy