Luka 4

Sɔtaannan é Ɛnza nɔ́swaannan kɛ́ kwee

Matiyu 4.1-11; Maki 1.12-13

1 Ɛnza nvánin ndɛ́ɛ Ní Sɛnnɛnyanin ŋó lá. Aa bhɔ́ Zuludɛn bháji lá ó lá kɛ́ táa dhyɛ́ o lɔ́. Ní Sɛnnɛnyanin ŋóo táa a lé. 2Sɔtaannan é a lɔ́swaan tée bínaannin kɔ́ɔnnɔn. A mán lɔ́min sí kɛ́ ó tée bínaannin ó kɔ́ɔnnɔn. O ló ŋólu tínminnin ngwɔ́, kɔ́ɔn é a myaan.

3O wáati ó lɔ, Sɔtaannan é fɔ a yɛ́ kó: «Ní i Ala dhyénjɛ lé, a fɔ kó káwaguun míin ŋan yɛ́ɛman kɛ o kɛ́ búlu lé.»

4Ɛnza ŋé a yawi kó: «A sɛ́wɛnin ɲé Ala yɛ kitabu o lɔ kó: Mɔɔn tɛ́ bhálola lɔ́minfe ngbɛ́ɛgbɛɛ la.»

5O kwɔ́, Sɔtaannan é táa nín ale tii já nɔ́ ka kɛ́ lúukolo ó mansaya o bɛ́ yáa a lá ywáaninngee nɔn, 6kɛ́ fɔ a yɛ́ kó: «Né yáa míin bɛ́ kunndiiya óni a nanfootiiya ó di i mán. Ni née fɛ́ kɛ́ a di mɔɔn mín mán, née dila o tíi o le mán, kɛ mansɔɔ a bɛ́ é né tá lé lé. 7O lɔ, ní ile kwɛ́nnin ngɛ i kúnmɛɛn nɔ́kɛɛ né kɔ́ɔ kɛ́ né bháto, a bɛ́ yáa kɛ́ i tá lé.»

8Ɛnza ŋé a yawi kó: «A sɛwɛnin ŋe Ala yɛ́ Kitabu o lɔ kó: I mányii i yɛ́ Mantii o i yɛ́ Ala ó kée né yɛ́, kɛ́ ale kéengboto le bháto.»

9Alabha ŋó, Sɔtaannan é táa ni a le Yeluzalɛmu, kɛ alalɔ Ala bhatobhomba ó kúnnɔn, kɛ́ fɔ a yɛ́ kó: «Ni í Ala dhyénjɛ lé, í gbán kɛ́ í bhyáa lúuman, 10kɛ mansɔɔ a fɔnin ɲé Ala saaninkan ŋó lɔ kó:

A yáa cé dí a yɛ́ malɛɛka ólu mán i kósɔn,

kó íi i yáakiito i lɔ.

11Aa fɔ yé kó:

I yáa i tá i bhóo ó lɔ́,

ké i se ngɛ́nan gbasi káwaguun nɔ́ la.»

12Ɛnza ŋé a yawi kó: «A fɔnin ɲé Ala yɛ́ Kitabu ó lɔ́ kó: ‹Í kɛ́nan Mantii o, í yɛ́ Ala o lɔ́swaan.› »

13Sɔtaannan é a lɔ́swaan ɲán ó bɛ́ mán kɛ́ kwée wáati mín nɔ́n, aa táa kɛ́ a tó yé ŋótun.

Ɛnza ŋé a yɛ́ bháala o lámyaanla Galile

Matiyu 4.12-17; Maki 1.14-15

14 Ɛnza nvánin ŋó Ní Sɛnnɛnyanin ŋó yɛ́ sébhaaya ó lá áa í kwɔ́sɛɛ kɛ́ táa Galile mala ó lɔ́. A tɔ́ɔ é bhɔ́ o mala o ywáa ó bɛ́ lɔ́. 15A tɛ́ɛ mɔɔn ólu kalanan ólu yɛ́ sɛ́ɛbho ólu kɔ́ɔnnɔn, mɔɔn ólu bɛ́ tɛ́ɛ a tɔ́ɔɲwaan fɔ́la.

Ɛnza ɲɛ́n sómɔɔn ólu mán lá a lá

Matiyu 13.54-58; Maki 6.1-6

16Ɛnza ŋé táa Nazalɛti aa i lámwɔn só mín nán. Lɔnwɛɛnlilo ó lá, aa lo sɛ́ɛbho ó lá óyoo a tɛ́ɛ a kɛ́la ɲán mín mán. Aa i wíi kɛ́ kitabu ó kála. 17Céla Ezayi é kitabu mín nzɛ́wɛ, oo dí a mán. Aa a lalaka kɛ́ a ywáa lɔ́ fɔ. A sɛ́wɛnin ŋe yé kó:

18 «Mantii ó yɛ́ Ní ó né fɛ́,

kɛ mansɔɔ a wɛ́ɛ né múun kɛ sanmankanmɛɛ ó fɔ faannda ŋólu yɛ.

Aa né cé kó ní a fɔ yɔ ŋólu yɛ́ kó i yáa hɔ́lɔɲan,

kó ní a fɔ fyóondɔ ólu yɛ́ kó i ɲán ó yáa i láka,

kó ní mɔɔntɔlɔnin ŋólu bhɔ́ i yúu ólu bhóo kɛ́ i bhyáa.

19 Mantii ó káa a yɛ́ kóɲwaan ó kɛ́ sán mín nán,

kó ní ó fɔ mɔɔn ólu yɛ́.»

20O kwɔ́, Ɛnza ŋé kitabu ó látuun kɛ́ a di sɛ́ɛbho ŋó kunnansiibhaa ó mán kɛ́ i síi. Mɔɔn mínnu tɛ́ɛ yé, ólu bɛ́ é í ɲán gbáan a lɔ́. 21O sán ó lɔ́, aa kóman ó tá kɛ́ fɔ i yɛ́ kó: «A wɛ́ɛ Kitabu míin ngɔ́ɔnnɔnkoman mínnu myɛ́n nín, o kó ólu wɛ́ɛ í lafa bí.»

22I bɛ́ tɛ́ɛ a tɔ́ɔɲwaan fɔ́la. Ɛnza ɲɛn kómanbhɛɛ o i bɛ́ káwakoya, fɔ i tɛ́ɛ fɔ́la kó: «Bháa míin ndɛ́ Yusufu dhyénjɛ o lé a?»

23Ɛnza ŋé fɔ i yɛ́ kó: «Síka tɛ́ lɔ́, a yáa saanan míin ná né yɛ́ kó: ‹Bhwɛ́ɛkɛbhaa, i yɛ́ɛ kɛ́ɛnya.› A yáa fɔ né yɛ́ kó: ‹I wɛ́ɛ kó mínnu kɛ Kapɛnamu, án ŋwɛ́ɛn ó myɛ́n, ii ó ɲɔ́ɔnnzilu kɛ́ yánun i gbú yɛ́ só ó la.› »

24«Tínɲan in ne ní fɔ́la a yɛ́ ngó, céla sí tɛ́ myaanla cɛ́ɛne a gbú yɛ́ só ó la.» 25O kwɔ́, aa fɔ i yɛ́ kó: «Tínɲan in ne, ní fɔ́la a yɛ́ ngó, céla Eli yɛ́ tée ó lɔ́, sánɲin ó í bá kɛ́nan sá nzawa ni tɔ́ kɔɔnnɔn, kɔ́ɔnba é lo yamaan ó ywáa ó bɛ́ lɔ́. Finɲanmuso shɛ́ɛman ndɛ́ɛ Izalayɛli yamaan ó lɔ́. 26Waa Ala mán céla Eli cé i sí mán. Aa a cé finɲanmuso lɔ́ lé mán Salɛputa, Sidɔn mala ó lɔ́. 27Céla Elize tá tée ó lɔ́ kwáantɔ shɛ́ɛman ndɛ́ɛ Izalayɛli, waa i si mán kɛ́ɛnya, fɔ Naman kɛ́ bhɔ́ Sili yamaan ó lɔ́.»

28Sɛ́ɛbho ŋó kɔɔnnɔn mɔɔn ólu ó kóman ólu myɛ́n mínngɛ, íi mwɛ́nnɛn koyoongɛ. 29Ii i wíi kɛ́ Ɛnza myaan kɛ́ bhɔ́ ní ále só ó kɔɔnnɔn ni fáan lé. I yɛ́ só ó síininndɛ́ɛ tii mín ndɔ́ɔfɛ, íi táa ní ále o kúnnɔn. I tɛ́ɛ fɛ́ kɛ́ í síi á man kɛ́ a lá bé lúuman. 30Waa Ɛnza ŋé tínmin i cɛ́man kɛ́ táa.

Ɛnza ŋé Lámansatɔ lɔ́ kɛ́nnɛnyala

Matiyu 7.28-29; Maki 1.21-28

31Ɛnza ŋé táa Galile mála ó só lɔ́ lá, mín ndɔ́ɔ kó Kapɛnamu. A tɛ́ɛ mɔɔn ólu kalanan lɔnwɛɛnlilo ó lá yé. 32Ii káwakoya a yɛ́ mɔɔn kalanzeɲan ó lá, kɛ mansɔɔ a tɛ́ɛ kóman lá óyoo sébhaaya é mɔɔn mín móo. 33Cɛ nɔ́ɔnnin nɔ tɛ́ɛ ni ile sɛ́ɛbho ŋó kɔ́ɔnnɔn Lámansayoo ndɛ́ɛ o fɛ́. O cɛ ó gbáa koyoongɛ kó: 34«Ée! Ɛnza Nazalɛtika, mínnɛɛn lée né ní i lé cɛ? I wɛ́ɛ nan kɛ́ án hálaki a? Ii mɔɔn mín né, ní ó lɔ. Ile lée Ala yɛ́ céladhye nzɛ́nnɛnyanin ŋó lé.»

35Ɛnza ŋé yaman a kunnan kɛ́ fɔ a yɛ kó: «A jalɔ! Bhɔ́ cɛ míin nvɛ́.» Lámansa oo cɛ ó tá kɛ́ a bé lúuman i cɛ́man kɛ́ bhɔ́ a fɛ́. Waa fósi mán kɛ́ cɛ ó lá.

36Mɔɔn bɛ́ é káwakoya fɔ í tɛ́ɛ ɲɔ́ɔn mánɲaankɛla kó: «Ɛ́ɛ, kóman súu mínnɛɛn lée nin? Aa kóman lámansayoo ŋólu fɛ́ ní fáan ní sébhaaya lé. Ii bhɔ́la mɔɔn ólu fɛ́.» 37O sɔ́ɔbu ó fɛ́, Ɛnza ndɔ́ɔ é búubɛɛ ó mala o ywáa ó bɛ́ lɔ.

Ɛnza ŋé yaangalotɔ shɛ́ɛman ngɛ́nnɛnyala

Matiyu 8.14-17; Maki 1.29-34

38Ɛnza ŋé bhɔ́ sɛ́ɛbho ó kɔ́ɔnnɔn kɛ́ táa Simɔn yɛ́ bhó ŋó la. Simɔn bhyáamuso tɔ́lɔnin ndɛ́ɛ fásigban ó bhóo koyoongɛ. Ii Ɛnza ndɛ́li kó aa a kɛ́ɛnya. 39Ɛnza ŋé táa i bíin a kunnan kɛ fɔ kó fásigban o bhɔ́. Fásigban óo wɛɛ. Aa i wíi ó ywáanin ngée ŋó lɔ kɛ bháalakɛ i yɛ.

40Teekun ŋó bénin ngwɔ́, mɔɔn ólu táa Ɛnza nzaala ní yaangalotɔ bɛ́suu lé. Aa í bhóola i bɛ́ kée ngéenan ka kɛ́ i lákɛɛnya. 41Lámansa ólu tɛ́ɛ bhɔ́la mɔɔn shɛ́ɛman nvɛ́. I bhɔ́tɔ ó, i tɛ́ɛ gbáanan kó: «Ii Ala dhyénjɛ le lé.» Wáa Ɛnza ŋé í táan fɔ́ i yɛ. A tɛ́ tɛ́ sɔ́nnan ko ii kóman, kɛ mansɔɔ ólu tɛ́ɛ lɔ ŋóo Ala yɛ́ Kílisi lɔtɔnmɔnnin ŋó lée wé.

Ɛnza nankun ŋó

Maki 1.35-39; Matiyu 4.23

42Kɛ́ɛn óo bhɔ́ mínngɛ, Ɛnza ŋé bhɔ́ kɛ́ táa ywáamanfanin nɔ́ lɔ́. Yaman óo lámyaan kɛ́ a ywáa ɲíin. Ii táa a yé mínngɛ, ii a dɛ́li kó aa tó i tɔ́ɔfɛ, kó a kɛ́nan táa ywáayanɔn. 43Wáa aa fɔ i yɛ kó: «Né kákan né kɛ́ Ala yɛ́ mansaya ó sanmankanmɛɛ ó fɔ só tɔ ólu la, kɛ mansɔɔ njé kún ŋó lée wé.»

44O lɔ, a tɛ́ɛ lakawanin o kɛ́la sɛ́ɛbho ólu kɔ́ɔnnɔn Zude mala ó lɔ́.

Currently Selected:

Luka 4: MXX

Highlight

Copy