Luka 23

Ii táa ni Ɛnza né Pilati fɛ́ yé

Matiyu 27.2,11-14; Maki 15.1-5; Yaya 18.28-38

1Oo kɛ́ mínngɛ, yaman ó bɛ́ɛ í wíi kɛ́ táa ni Ɛnza né Pilati fɛ yé. 2Ii a lámyaan kɛ́ Ɛnza yáayii, kɛ fɔ kó: «Án ŋwɛ́ɛn yé kó cɛ míin ŋé án ɲɛ́n yamaanlɔ mɔɔn ólu kúnnɔn cáannan kɛ i lamuluti. Kɛ i lába nísɔɔn sala ó mán mansacɛ Sezali yɛ. A kó kó ale lée Kílisi ó lé, kó álee mansa le lé.»

3Pilati é a mánɲaankɛ kó: «Ile lée Yawudhyaa ólu yɛ mansacɛ o le a?»

Ɛnza ŋé a yawi kó: «Ile le wɛ́ɛ o fɔ.»

4Pilati é fɔ faanlɛɛɲansebhaa olu kúnndii ólu ní yaman ó yɛ kó: «Né mán kún ɲé cɛ míin nan mín ŋé sé kɛ́la a hálaki kún né.»

5Wáa í tɛ́ɛ fɔ́la kɛ mangbɛya kó: «Aa yaman ó lámulutila ní a yɛ káa ŋó le Zude mala ó ywáa bɛ́ lɔ, kɛ lámyaan Galile, fɔ kɛ́nan sé ya.»

I wɛɛ táa ni Ɛnza né Elɔdi fɛ́ yé

6 Pilati é myɛ́n mínngɛ kó aa bhɔ́la Galile, áa i manɲaankɛ kó: «Cɛ míin ŋé Galileka le lé a?» 7Aa myɛ́n mínngɛ kó Ɛnza ŋé mansacɛ Elɔdi yɛ fáan le kɔ́ɔ, aa fɔ i yɛ kó íi táa ni ale Elɔdi fɛ yé, kɛ mansɔɔ Elɔdi tɛ́ɛ Yeluzalɛmu o ló ŋó lá. 8Elɔdi é Ɛnza ɲé mínngɛ, oo dhyáa a yɛ koyoongɛ. Kabiini wáatija, a tɛ́ɛfɛ kɛ Ɛnza ɲé, kɛ mansɔɔ a tɛ́ wɛ́ɛ Ɛnza ngó myɛ́n. A tɛ́ɛ fɛ ké Ɛnza ŋán káwananngo lɔ kɛ́ ale ɲánla. 9Elɔdi é Ɛnza manɲaankɛ kó shɛ́ɛman nan, wáa Ɛnza mán a yawi. 10Faanlɛɛɲansebhaa olu kúnndii ólu ni sɛliya kaamɔɔn ólu tɛ́ɛ yé. I tɛ́ɛ kóman yóo nvɔla a mán kɛ a yánva. 11Elɔdi ni a yɛ swaasi ólu tɛ́ɛ yɛ́ɛbhɔla Ɛnza nɔ́n, áa mansaya faani cɛ́ɛ nɔ bhyáa a kannan kɛ yɛ́ɛbhɔ a lɔ, kɛ tó álakwɔsɛɛ Pilati mán. 12Pilati ní Elɔdi bhyɛnin ndɛ́ tɛ́ a lɔ, wáa ii kɛ́ twáanva ɲɔ́ɔnman ne o ló ŋó la.

Ɛnza nváa kó ó wɛ́ɛ i la tɛ́ɛ

Matiyu 27.15-26; Maki 15.6-15; Yaya 18.39--19.16

13 Pilati é faanlɛɛɲansebhaa olu kúnndii ólu, ní Yawudhyaa ólu yɛ ɲɛ́nmɔɔn ólu ní yaman ó kíi. 14Aa fɔ i yɛ kó: «A wɛ́ɛ nan ní cɛ míin né kó aa mɔɔn ólu lɔ́su la. Wáa, né wɛ́ɛ a manɲaankɛ a bɛ́ ɲanla, né mán kóman sɔ́ɔ a lá míin kɛ a yáayii kun né kɛ a fáa. 15Elɔdi mán yáayii kun nzɔ́ɔ a lá, kɛ mansɔɔ a wɛ́ɛ a lá kwɔ́sɛɛ né mán. O lɔ, né mán cɛ míin nváa kun ɲé. 16O lɔ, né yáa a gbasi gbɛ́nɲɛn lá. O kwɔ́, kɛ a lábhyaa.»

17[Sá ŋóo sá, Yawudhyaa ólu yɛ́ Hɔ́lɔɲanli ó ɲánlagbɛ ó lɔ, Pilati tɛ́ɛ kasodhye ngée nábhyaala.]

18Yaman ó bɛ́ɛ gbáa kɛ fɔ kó: «Cɛ míin nváa, íi Baanabasi bhyáa.» 19Kɛ mansɔɔ Baanabasi tɛ́ wɛ́ɛ bhyáa kasola mulutili ó kósɔn só ó kɔ́ɔnnɔn. Óni mɔɔn fáa o kósɔn.

20Wáa Pilati tɛ́ɛfɛ kɛ Ɛnza nábhyaa, aa yaman ó manɲaankɛ í kwɔ́. 21Wáa íi gbáa kó: «A gbaan yíi ó mán! A gbáan yíi ó mán!»

22Pilati é i manɲaankɛ a síɲan sáwaɲɔn ó lɔ kó: «Aa kóyoo mínnɛɛn lé kɛ wɛ́? Né mán kun nzɔ́ɔ míin kɛ́ a fáakun ne. O lɔ, né yáa fɔ kó íi a gbasi ní gbɛ́nɲɛn lá, O kwɔ́ kɛ a lábhyaa.»

23Wáa yaman ó gbáa kó aa Ɛnza gbáan yíi ó mán. I mánngan ŋóo bwóɲan fɔ kɛ́ fáan sɔ́ɔ. 24I tɛ́ɛ mín ɲiinnan, Pilati é fɔ kó a yáa ó kɛ́ i yɛ. 25Baanabasi mín ndɛ́ɛ kaso ó la múlutili óni mɔɔn fáa ó kósɔn, aa ó lábhyaa. Kɛ Ɛnza nó i bhóolɔ ké íi i sao kɛ́ a lá.

Ɛnza ngbaan ngó ó

Matiyu 27.32-44; Maki 15.21-32; Yaya 19.17-27

26I táatɔ ó lé ní Ɛnza ne, ii cɛ lɔ́ kunmyɛ a tɛ́ɛ bhɔ́la sɛɛn mán, a tɔ́ɔ kó Simɔn, Silɛninnga lée ó le. Ii Ɛnza gbáanɲii ó lá o kunman, kó aa bhyaa Ɛnza kwɔ́.

27Kɛ i táatɔ o tó, yamanba é bhyaa íkwɔ, muso shɛ́ɛman ndɛ́ɛ táa íkwɔ, ólu tɛ́ɛ i sísi ólu mángbasigbasila kɛ i mánkoman kóman la. 28Ɛnza ŋé í ɲán yɛ́ɛman kɛ fɔ i yɛ kó: «Yeluzalɛmu muso ólu, a kɛ́nan kasi né kósɔn. Aa kasi a gbúlu kósɔn óni a dhyé ŋólu kósɔn, 29kɛ mansɔɔ ló nɔ́ yáa sé, mɔɔn ólu yáa fɔ kó: ‹Muso mínnu mán dhyé nzɔ́ɔ, óni mínnu mán dhyé ŋwóo, óni mínnu mán sín ndí dhyé mán, ólu yeemanfanin ɲé.› 30O sán ó lɔ, i yáa fɔ tíi ólu yɛ kó: ‹Áa bé án ngá!› I yáa fɔ tiininngbeya ólu yɛ kó: ‹Áa án mátuun!› 31Ní í kɛ kɛ́ míin ngɛ́la yíi kɛ́nnɛn ó lá ta ŋó, yíi yáa ŋó tá ó káa kɛ́ díi?»

32I tɛ́ɛ táa ni mɔɔn fyáa gbɛ́ɛ le, kóyoongɛbhaa le tɛ́ɛ ólu le, ké ii ólu ní Ɛnza nváa ɲɔ́ɔn nvɛ́.

33Ii ywáa min ngíila kó Kunngɔɔngoo ywáa, ii sé o ywáa o lɔ mínngɛ. Ii Ɛnza gbáan yíi ó mán yé, óni kɛ kóyoongɛbhaa fyáa ólu gbaan yíi mán, kée ndɛ́ɛ a bhóobhɛɛkɔɔ, tɔ kée ŋó tɛ́ɛ a bhóonwaan ngɔɔ. 34Wáa Ɛnza ŋé fɔ kó: «Nvá, yafa i mán, kɛ mansɔɔ íi min ngɛ́la i mán ó lɔ́.»

Swaasi ólu gbámantɛɛ Ɛnza ɲɛ́n faani ólu ka kɛ ólu lɔ́taandaa ɲɔ́ɔnnan. 35Yaman ó lɔ́nin ndɛ́ɛ yé i tɛ́ɛ mánfɛɛli kɛ. Yawudhyaa ólu yɛ kunndii ólu tɛ́ɛ yɛ́ɛbhɔla Ɛnza nɔn. Kɛ fɔ kó: «Ní ale lée Kílisi óle, Ala wɛ́ɛ mín lɔ́tɔnmɔn a wɛ́ɛ mɔɔn tɔ́ ólu bwási, aa a yɛ́ɛ bwási le.»

36Swaasi ólu tɛ́ɛ yɛ́ɛbhɔla a lɔ. Ii í mangbaa a lá ko í káa lɛ́zɛnnji kuunnin ŋó dí a mán. 37Kɛ fɔ a yɛ kó: «Ní ile lée Yawudhyaa ólu yɛ mansacɛ ó lé, i yɛ́ɛ bwási.»

38Ii sɛ́wɛli kɛ Yíifɛɛn nɔ mán kɛ o gbaan Ɛnza ngúnnɔn sáman a sɛwɛnin ndɛ́ɛ o man kó: «Cɛ míin née Yawudhyaa ólu yɛ mansacɛ óle.»

39Kóyoongɛbhaa fyáa mínnu gbaan yíi ó mán, ó kée ndɛ́ɛ a nɛɛnnan kɛ fɔ kó: «Ile lé tɛ́ Kílisi óle a? I yɛ́ɛ bwási, kɛ́ án née bwási!»

40Wáa kóyoongɛbhaa tɔ́ kée ŋóo kóman dɔ ó mán kɛ fɔ a yɛ kó: «I tɛ́ sháan Ala ɲɛn ŋán! 41Án née kwɛ́nnin ngákan ni tɔ́lɔya míin né, kɛ mansɔɔ án wɛ́ɛ kóyoo ne kɛ, wáa ale mán kóyoo nzí kɛ.» 42O kwɔ, aa fɔ kó: «Ɛnza, ní í kɛ́ i síi i yɛ́ Mansaya ó lɔ wáati mínnɔn, íi i hákii tó né lɔ.»

43Ɛnza ŋé a yawi kó: «Tínɲan in né ní fɔ́la i yɛ ngó: Bí i yáa kɛ ni né lé ɛliyanan ó lɔ.»

Ɛnza nzáyako ó

Matiyu 27.45-56; Maki 15.33-41; Yaya 19.28-30

44Teelatee ŋwáati ó tɛ́wɛɛ bhyaa sé le, diwi é ló yamaan ó ywáa bɛ́ lɔ fɔ́ kɛ táa sé ywáatee ó mán. 45Tée ó tɛ tɛ́ yéla bhée. Ala bhatobhomba ó sácɛ ó fála fyáa le. 46Ɛnza ŋé gbáa kɛ fɔ kó: «Nvá, né wɛ́ɛ né ní ó ló í bhóo.» Aa ó fɔ mínngɛ, aa sayakɛ.

47Lomɛn ólu yɛ́ swaasi kúnndii óo o kó ólu yé mínngɛ, aa Ala tando kɛ fɔ kó: «Kɛ fɔ tínɲan la, cɛ míin ndɛ́ɛ mɔɔnteenin ne lé.»

48Yaman mín nádhyɛnin ndɛ́ɛ kɛ o kó ólu mánfɛɛ, kó mínnu é tínmin ólu o yé mínngɛ, ólu kwɔ́sɛɛtɔ ó tɛ́ɛ i sísi ó mangbasi la nílafin ŋó bhóo. 49Ɛnza ndwáanva ólu, óni muso mínnu tɛ́wɛɛ bhyáa a kwɔ́kɛ bhɔ́ fɔ Galile, ólu i lɔ kɛ kólɔgbɛ ywáa já nɔ́n.

Ɛnza nzúlongo ó

Matiyu 27.57-61; Maki 15.42-47; Yaya 19.38-42

50Yawudhyaa ólu yɛ kítitɛɛbhaa ólu lɔ, cɛ lɔ tɛ́ɛ yé, a tɔ́ɔ kó Yusufu. Mɔɔnteenin né tɛ́ɛ o le, óni mɔɔnbhɛɛ le tɛ́ɛ o le. 51A mán sɔ́n a táamanɲɔɔn ólu yɛ kó látɛɛnin ŋólu mán. Óni ii kó mínnu kɛ, A tɛ́ɛ bhɔ́la Yawudhyaa ólu yɛ só lɔ la mín ndɔ́ɔ kó Alimate. A tɛ́ɛ Ala yɛ́ Mansaya ó nán o mánkɔɔnnan. 52Aa táa Pilati saala kɛ Ɛnza nzú ó kófɔ a yɛ. 53O kwɔ́, aa Ɛnza nzú ó láyii kɛ a bhɔ́ yíi o mán, kɛ féngbɛ ló a mán, kɛ a bhyáa kábulu lɔ kɔ́ɔnnɔn, o kábulu ó shɛ́nnin ndɛ́ɛ fáa o le lɔ, i tɛ́ mán mɔɔn sútaa yénɔn bhá. 54Aa ó kɛ sannin lɔnwɛɛnlilo ŋó síɲanla óle mán. Lɔnwɛɛnlilo ó tɛ́ɛfɛ kɛ i lámyaan.

55Muso mínnu tɛ́wɛɛ bhyáa Ɛnza ngwɔ́ kɛ bhɔ́ Galile, ólu táa ni Yusufu le Ɛnza nzútaalaa ó lɔ. Ii kábulu ó mánfɛɛ kɛ Ɛnza nzú ó láseɲan ó mánfɛɛ. 56O kwɔ́, íi i kwɔ́sɛɛ kɛ táa só ó kɔ́ɔnnɔn. Ii wúsulan ŋó ní túu swáandhyaanin ŋó lɔ́bhyɛ.

Ii lɔnwɛɛnlilo ŋó bwóɲan óyoo aa fɔ ɲán mín mán Ala yɛ sɛliya ó lɔ.

Currently Selected:

Luka 23: MXX

Highlight

Copy