Luka 21

Finɲanmuso lɔ́ é a bhóo tá ó bɛ́ bhyáa késu ó kɔ́ɔnnɔn

Maki 12.41-44

1Kɛ Ɛnza ndó Ala bhatobhomba ó kɔ́ɔnnɔn, aa i ɲán láwii kɛ nanfootii ólu yé sɔɔtabhɔ ó bhyáala Ala bhatobhomba ó késu ó kɔ́ɔnnɔn. 2Aa finɲanmuso dɛ́sɛbhaatɔ lɔ yé wɛ́ɛgbannan nvyáa bhyáala késu o kɔ́ɔnnɔn. 3Ɛnza ŋé fɔ o lé lɔ kó: «Tínɲan in ne, ní fɔ́la a yɛ ngó finɲanmuso dɛ́sɛbhaatɔ míin ŋwɛ́ɛn wɛ́ɛ mín myáa késu ó kɔ́ɔnnɔn, ó a sháa a bɛ́ tá le, 4kɛ mansɔɔ ílee lu fítiinin né bhɔ́ i yɛ nanfoo ó la kɛ ó bhyáa késu ó kɔ́ɔnnɔn, wáa ale ní a yɛ faanndanɲan ó bɛ́, mín ndɛ́ɛ a bhóo kɛ kɛ́ lɔ́min sɔ́ɔn le, a wɛ́ɛ óle bɛ́ bhyáa késu ó kɔ́ɔnnɔn.»

Ɛnza ŋé Ala bhatobhomba céko ó fɔ́la

Matiyu 24.1-2; Maki 13.1-2

5Mɔɔn lɔ́lu tɛ́ɛ kóman lá kó Ala bhatobhomba ó cáaɲiin, kó aa lɔ́ ni káwa cɛ́ɛ ne le, a mánsiinin ɲé ní fémɛɛ léelu lá, mɔɔn ólu mín ndí Ala mán. Ɛnza ŋé fɔ i yɛ kó: 6A ɲán é bhó mínnan nín; «Ló nɔ́ yáa sé, bhó ŋó bɛ́ yáa cé, káwa ó sí táa tó ɲɔ́ɔn ngá.»

Dínɲan lábha ŋwáati ó sɛ́ɛya ó

Matiyu 24.3-14; Maki 13.3-12

7Ii Ɛnza mánɲaankɛ kó: «Kaamɔɔn, o kó ólu káa kɛ́ wáati mínnɛɛn lé lɔ? O tɔɔmansii ó káa kɛ́ mínnɛɛn le kɛ yáa kó a wáati ó wɛ́ɛ sé?»

8Ɛnza ŋé i yawi kó: «Áa a yɛ́ɛkɔɔsi, a kɛ́nan tó mɔɔn lɔ a a láfii. Kɛ mansɔɔ Mɔɔn shɛ́ɛman ɲáan nan nín né tɔ́ɔ óle, kɛ fɔ kó: Ile lée Kísibhaa óle, kó dínɲan labha ŋwáati ó wɛ́ɛ sé. A kɛ́nan bhyáa olu íkwɔ. 9Ní a kɛ kɛ́ɛkɛkan ŋólu myɛ́n, óni fíɲaanli kó ólu mánngan myɛ́n wáati mínnɔn, a kɛ́nan sháan. Kɛ mansɔɔ dhyaalagboya lée fɔ o kó ólu a kɛ́, wáa o sí tɛ́ dínɲan labha ŋo le.»

10O kwɔ́, aa fɔ i yɛ kó: «Síya lɔ yáa í wíi síya gbɛ́ɛ kanman, yamaanlɔ yáa í wíi yamaan gbɛ́ɛ kanman. 11Lúukolo yáayaa ó yáa kɛ ywáa shɛ́ɛman nɔn. Fwɛ́ɛnyangalo ó, óni kɔ́ɔn ó. Óni yeetɛɛko ólu, óni tɔɔmansii lɔ́lu yáa kɛ sángboo ó lɔ.

12Wáa sannin o kó ólu bɛ́ a kɛ, i yáa a myáan kɛ́ a gbási, i yáa a tɔ́lɔ. I yáa á ló sɛ́ɛbho ŋó kunndii ólu bhóo, i yáa a bhyáa kaso la. I yáa táa ní ále mansacɛ ólu ɲánkɔɔ, óni yámaantii ólu ɲánkɔɔ né tɔ́ɔ ó kósɔn. 13O yáa kɛ́ sɔ́ɔbu le, ké an ní ale sɛ́ɛya ládi. 14Aa lɔ́ ko a mánngan kɛ kóman lɔ lɔ́bhyɛ, á káa kóman mín nvɔ́ í ɲánkɔɔ kɛ a yɛ́ɛ dhyɛman, 15kɛ mansɔɔ, né gbú le káa kóman ó ló a lálɔ, kɛ hákiitiiya dí a mán, o sɔ́ɔbu la a yúu ólu sí táa sé kɛ kóman ní ale, wáman kɛ a sɔ́sɔ. 16A wóobhaa ólu yáa a ló bhóolɔ, óni a bhádhye ŋólu, mínnu mángbaanin ŋé a lá, óni a twáanva ólu, ólu yáa a shɛ́ɛman nó a yúu ólu bhóo kɛ́ a lɔ́lu fáa. 17Mɔɔn ólu bɛ́ yáa a yúuya né tɔ́ɔ ó kósɔn. 18Wáa yáanin a kúnzhe ó kɛ́ɛ kée ndáa túun. 19Ní a kɛ í lɔ́ja, a yáa ɲaanmanɲan ó sɔ́ɔ.»

Yeluzalɛmu hálaki ko ó

Matiyu 24.15-21; Maki 13.14-19

20«Ní a kɛ Yeluzalɛmu laminninnin ɲé kɛ́ɛkɛbhaa ólu lá a yúu ólu bhóo wáati mínnɔn, aa lɔ kó só ó cé wáati ó wɛ́ɛ sé. 21Mɔɔn mínnu káa kɛ́ Zude mala ó lɔ, ólu á bwée kɛ táa tii ólu kúnnɔn. Mínnu kɛ kɛ́ Yeluzalɛmu só ó kɔ́ɔnnɔn, ólu á bwée kɛ bhɔ́. Mínnu kɛ kɛ́ sɛɛn mán, ólu kɛ́nan ló só ó kɔ́ɔnnɔn. 22Kɛ mansɔɔ o ló ŋó Ala yɛ kítitɛɛlo ŋó lée wé Yeluzalɛmu ka, ké kóman mínnu wɛ́ɛ sɛ́wɛ kitabu ó kɔ́ɔnnɔn, ké o á i lafa. 23O ló ŋó la kunnangboya yáa muso kɔ́ɔnman ŋólu sɔɔ, óni mínnu sín ndí lá dhyé ŋólu mán, tɔ́lɔya ó yáa sé yamaan ó mán, kɛ mansɔɔ Ala yɛ díminsa ó yáa bé yaman ó ka. 24I yáa lɔ́lu fáa fá ŋó lá, i yáa a myaan kɛ́ táa ní ale síya gbɛ́ɛ olu yɛ yamaan ó lɔ. Síya ólu yáa Yeluzalɛmu cé pépe fɔ wáati min ŋwɛ́ɛn dí i mán, o á í lafa.»

Mɔɔn Dhyénjɛ ó kwɔ́sɛɛko ó

Matiyu 24.29-31; Maki 13.24-27

25«Tɔɔmansii lɔ́lu yáa kɛ́ tee lɔ, óni káa óni lóodhye ŋólu ka, óni lúukolo ó ka. Mɔɔn ólu yáa ó yáa tɛɛ yamaan ó lɔ fɔ́ kɛ i kɔɔnnɔn bhá, kɔɔji ó mannganba ó kósɔn. 26Mɔɔn shɛ́ɛman yáa sayakɛ sháanngoyoo ŋó bhóo, káwako ó miliya ó kósɔn lúukolo ó ka. Kɛ mansɔɔ sébhaaya míin kɛ́la sá ŋó lɔ ólu yáa mannan mannan. 27O ɲán o mán, án ɲáan mɔɔn Dhyénjɛ ó nántɔ ó yé sángawa ó lɔ ní a yɛ sébhaayaba óni a yɛ nɔ́lɔyaba óle. 28Ni ó kó ólu kɛ́ i lámyaan wáati mínnɔn, áa í látee kɛ́ a kúnnanwii sáman, kɛ mansɔɔ a yɛ Hɔ́lɔɲanli wáati ó wɛ́ɛ sé.»

Ɛnza ɲɛn kóman ó táa tínmin fɛ́sɛ fɛ́sɛ

Matiyu 24.32-35; Maki 13.28-31

29O kwɔ, Ɛnza ŋé saanan lɔ́ la i yɛ kó: «Aa fígisun ŋó mánfɛɛ, óni yíi o tɔ ólu bɛ́. 30Ní a kɛ́ a yé ké aa í búu kwáa bhɔ́la, aa bhɔ́la a ɲánle kó sanmanyi o wɛ́ɛ gbaa. 31O ɲán kée ŋó mán, álee lu, ní a kɛ kɛ́ o kó ólu yéla kɛ́la wáati mínnɔn, aa lɔ́ ŋóo Ala yɛ́ Mansaya ó wáati ó lé wɛ́ɛ gbaa.

32Tó ní fɔ a yɛ tínɲan in né ngó, án ɲɛn bí wáati míin mɔɔn ólu bɛ́ táa sayakɛ, fɔ́ kó míinnu bɛ́ a kɛ́ kɛ i lafa. 33Sángboo óni lúukolo ó yáa tínmin, wáa né yɛ kóman ólu táa tínmin tún.»

Áa a yɛ́ɛkɔɔsi

34«Áa a yɛ́ɛkɔɔsi, a kɛ́nan tó lɔ́minba kɛ ólu la, óni minin ó la, óni kɛ tó dínɲan hánminnanngo ólu ɲíin ŋó mán, ké dínɲan labha nó ŋó kɛ́nan bháa a lɔ, 35kɛ mansɔɔ nánlo ŋó kaa bháa dínɲan mɔɔn ólu bɛ́ lɔ lé, óyoo jɔ óo fé ŋó myaanla ɲán min mán. 36Aa í hákii tó a yɛ́ɛ lɔ, kɛ́ a tíinnandhyaa Ala dɛ́li ó la wáati bɛ́, ké áa fáan sɔ́ɔ, kóyoo mínnu é nánla ké aa sé kɛ bwási ó bɛ́ mán, ké aa sé kɛ í lɔ mɔɔn Dhyénjɛ ó ɲánkɔɔ.»

37Ɛnza ndɛ́ɛ mɔɔn ólu kalanan Ala bhatobhomba ó kɔ́ɔnnɔn tee lɔ. Ní sú ó tɛ́ɛ kwó, a tɛ́ɛ bhɔ́la só ó kɔ́ɔnnɔn kɛ táa sú o tínmin Olivyetii o ka. 38Sɔɔ jónan ó mán, mɔɔn bɛ́ tɛ́ɛ táala Ɛnza nzaala Ala bhatobhomba ó kɔ́ɔnnɔn kɛ a lɔ́myɛn.

Currently Selected:

Luka 21: MXX

Highlight

Copy