Luka 11

Ɛnza ŋé min nvɔla Ala dɛ́li kó ó lɔ

Matiyu 6.9-13; 7.7-11

1Ló nɔ lá, Ɛnza ndɛ́ɛ Ala dɛ́lila ywáa lɔ́lɔ. Aa wɛ́ɛ sán mín nɔ́n, a yɛ́ kaamɔɔndhye ŋó kée ŋé a mánɲaankɛ kó: «Mantii ó, án ngala Ala dɛ́li ó la óo Yaya é a yɛ kaamɔɔndhye ŋólu kala ɲán mín mán.»

2Ɛnza ŋé fɔ i yɛ kó: «Ní a kɛ kɛ́ Ala dɛ́lila sán mínnɔn, áa fɔ kó:

‹Án Nvá, i tɔ́ɔ ó wáa sɛ́nnɛnya.

I yɛ mansaya ó wáa nan.

3Án ɲɛ́n ló ŋóo ló lɔ́min ó dí án mán.

4Án ɲɛ́n yúumu ólu yafa án mán,

kɛ mansɔɔ án ni yafala an ɲáacɛtabhaa ólu mán.

I kɛ́nan tó ké lɔ́swaannin o wáa sé án mán.› »

5Ɛnza ŋé fɔ i yɛ íkwɔ kó: «Ní ale lɔ kɛ i wíi kɛ́ táa a tɛ́ɛcɛ ó fɛ́ yé lúutaaman kɛ́ fɔ a yɛ kó: ‹Ndwáanva, ɲan né mán ní búluguun nzawa le, 6kɛ mansɔɔ né tɛ́ɛcɛ lɔ wɛ́ɛ bhɔ́ só kɛ́nan nvɛ́, sunman ndɛ́ móo kɛ́ di a mán,› 7ní a táamanɲɔɔn ó kɛ tó bhó ŋó kɔɔnnɔn kɛ́ a yawi kó: ‹Í kɛ́nan ndɔ́lɔ, lá ó wɛ́ɛ wɛɛ sɔɔla, né ní dhyé ŋólu wɛ́ɛ án ná, né tɛ́ sé kɛ ŋwíi kɛ́ búlu di í mán,› 8ní fɔ́la a yɛ́ ngó yáanin a mán í wíi kɛ́ búlu ó dí a mán twáanvaya ó kósɔn, ní a kɛ a ɲángban a yáa í wíi kɛ́ a manko é fé ŋóo fé nan, a yáa ó bɛ́ di a mán.»

9«O ɲán ó mán ni fɔ́la a yɛ ngó aa kófɔli kɛ, i yáa di a mán, ni a kɛ ɲíinnin kɛ, a yáa a sɔɔ. Ni a kɛ lá o mangbasi, i yáa í láka a yɛ. 10Kɛ mansɔɔ ní mɔɔn óo mɔɔn kɛ kófɔli kɛ o tíi ó yáa a sɔɔ kɛ, ní mɔɔn mínngɛ ɲíinnin kɛ́, o tíi ó yáa sɔɔlikɛ, ní mɔɔn mínngɛ lá o mangbasi, i yáa lá o laka o tíi ó yɛ. 11Dhyénva mínnɛɛn lée sɔ́nnan kɛ san ó di a dhyé ŋó mán, kɛ́ɛ ké a wɛ́ɛ yɔ́ɔ le kófɔ a yɛ? 12Wáman dhyénva mínnɛɛn lée sɔ́nnan kɛ wéende ó di a dhyé ŋó mán, kɛ́ɛ ké dhyé ŋó wɛ́ɛ shishɛkii lé kófɔ a yɛ́? 13Álee mínnu a yóo, ní álee lu é sɔ́nnan kɛ fémɛɛ ólu di a dhyé ŋólu mán, a Fá mín ŋé sángboo ó lɔ, o táa Ní Sɛnnɛnyanin ŋó di a dɛ́libhaa ólu mán an?»

Ɛnza ŋé a kɔɔfɔbhaa ólu yawila

Matiyu 9.32-34; 12.22-30; Maki 3.22-27

14Ló nɔ la, Ɛnza ndɛ́ɛ lámansayoo nɔ́ gbɛ́nan mín ndɛ́ɛ cɛ ó kɛ́la bhóbho le. Lámansayoo ŋó bhɔ́ cɛ ó fɛ mínngɛ, bhóbhocɛ oo a lamyaan kɛ kóman, tó yaman ó káwakoya. 15Wáa mɔɔn lɔ́luu fɔ kó: «Lámansayoo ŋólu kunndii Bɛlizebuli le bháaka lɔ, aa lámansayoo ŋólu gbɛ́nan.»

16Lɔ́lu, a lɔ́swaan ndɔ́ɔ lɔ, Íi fɔ a yɛ kó aa tɔɔmansii kée ngɛ́ i ɲánla, kɛ bhɔ́ sángboo ó lɔ. 17Ɛnza ndɛ́ɛ i miliya ólu lɔ́; aa fɔ i yɛ kó: «Yamaan mín mɔɔn lúu ɲɔ́ɔn ngɛlɛla, o yamaan óo céla lé. I yɛ bhó ŋólu yáa bémbe ɲɔ́ɔnnga. 18Ní Sɔtaannan kɛ́ a yɛ́ɛ lɔ́taa, a yɛ yamaan ó káa sé si sɔ́ɔla díi lé? Kɛ mansɔɔ aa fɔ́la kó Bɛlizebuli le bháaka lɔ ko née lámansayoo ŋólu gbɛnan. 19Ní née Lámansayoo ŋólu gbɛnan Bɛlizebuli le bháaka lɔ, o wáati ó lɔ, a dhyénjɛ ólu i gbɛnan yɛ́ɛtii bháaka lɔ? O lé kósɔn ólu yáa kɛ a yɛ kítitɛɛbhaa ólu lé. 20Wáa ní née Lámansayoo ŋólu gbɛnan Ala yɛ sébhaaya óle bháaka lɔ, óo a yáala kó Ala yɛ́ Mansaya ó wɛ́ɛ sé a mán.»

21«Ní mɔɔn faangbii o lɔ́bhyɛnin ngɛ́ kɛ a yɛ bhó ŋó kunnansiila ni malamafe né, a yɛ bhónanfe ŋólu bɛ́ɛ sutaa lɔ́. 22Wáa ní lɔ gbɛ́ɛ fáan kɛ́ gbíiya ale ta o le, o kɛ sé ale la, o faangbii o yáa a yɛ malamafe ŋó bɛ́ bwási a lá, a yée lánin ndɛ́ɛ mínnga. A yáa o bhóofe ŋólu bɛ́ cɛ kɛ́ ó dí mɔɔn gbɛ́ɛlu mán.

23Mɔɔn mín ndɛ́ né ɲíin né, óo né yúu lé le. Óni mɔɔn mín ndɛ́ ládhyɛli kɛ́la nín né le, o tíi ó ɲɛ́nɲɛnli lé kɛ́la.»

Lámansayoo ŋó kwɔ́sɛɛ kó o

Matiyu 12.43-45

24«Ní Lámansayoo ŋó kɛ́ bhɔ́ mɔɔn lɔ́ fɛ, aa táa i yáala wúla o kɔɔnnɔn, kɛ́ lɔ́nwɛɛnlikɛlaa ɲíin yé. Ní a mán o ywáa sɔ́ɔ, aa fɔ kó: ‹Ní bhɔ́ bhó mín ngɔɔnnɔn, ngáa ngwɔ́sɛɛ yénɔn.› 25Ní a kɛ́ i kwɔ́sɛɛ, kɛ táa yé ko bhó ŋó mancɛnin ŋé mɔɔn tɛ a lá. 26O lɔ aa táa Lámansayoo wóonvyaa gbɛ́ɛ ɲíin mínnu a yóo ale lé. Ii nan o tíi ó fɛ kɛ́ i síi, O tíi ó tɛ́ɛ ɲán mín mán jónan o yáa yóoɲan kɛ́ tínmin ó ka.»

Yɛ́ɛ yeemanfanin ɲé?

27Ɛnza ŋé ó kóman ólu fɔ kɛ́ wɛ́ɛ mínngɛ, muso lɔ é i kannan bhɔ́ yaman ó cɛ́man kɛ́ fɔ a yɛ kó: «Muso míin í wóo kɛ́ sín ndí i man, o yeemanfanin ɲé.»

28Wáa Ɛnza ŋé a yawi kó: «Mɔɔn mín ŋé Ala yɛ kóman ó lɔ́myɛnnan, kɛ́ a lá bháto, o lé yeemanfanin ɲé.»

Mɔɔn ólu i bánan Ɛnza nɔn

Matiyu 12.38-42

29Yaman ó tɛ́ɛ sháaya la Ɛnza ndɔ́ɔfɛ mínngɛ, aa fɔ i yɛ kó: «Wáati míin mɔɔn ólu mɔɔnyoo néelu le: Íi tɔɔmansii le ɲíin nán. Tɔɔmansii gbɛ́ɛ táa kɛ́ i yɛ́ bhée ní céla Zonasi yɛ́ tɔɔmansii o tɛ́. 30O lɔ Zonasi é kɛ tɔɔmansii lé Ninivuka ólu yɛ́ ɲán mín mán wé, mɔɔn Dhyénjɛ ó káa kɛ́ tɔɔmansii lé án ɲɛ́n wáati míin mɔɔn ólu yɛ́ o ɲán kée ŋó lé mán. 31Kítitɛɛlo ó la, mansamuso míin bhɔ́la kíinmoo fa ŋó fɛ́ o yáa i wíi ní wáati míin mɔɔn ólu lé kɛ kíti bé í ka, kɛ mansɔɔ álee bhɔ́ fɔ lúukolo ó lá ŋó la kɛ́nan mansacɛ Swɛmannan yɛ hákiitiiya kóman ólu lɔ́myɛn. Kɛ́ɛ ké, mɔɔn é yánun mín ŋé Swɛmannan ɲɛ́n. 32Kítitɛɛlo ó la, Ninivuka ólu yáa i wíi kɛ kíti bé wáati míin mɔɔn ólu ka, kɛ mansɔɔ Zonasi é lakawanin mín ngɛ́ Ninivu só ó kɔ́ɔnnɔn, Ninivuka ólu sɔ́n o mán. Ii díminsa kɛ fála i yɛ́ kóyoo ŋólu la. Kɛ́ɛ ké, mɔɔn é yánun mín ŋé Zonasi ɲɛ́n.»

Fási ó kɛ́ɛnɲan ó

Matiyu 5.15; 6.22-23; Maki 4.21; Luka 8.16

33«Mɔɔn sí tɛ́ laman ŋó lamaannan kɛ a bhyaa ywáaloonaankɛnin nɔn, wáman kɛ a bhyaa pála ŋó kɔ́ɔ, wáa aa síilaa lamannziife né ka ké mɔɔn mínnu kɛ kɛ́ lónan bhó ŋó kɔɔnnɔn, ólu a yéli kɛ́.

34Mɔɔn ɲán ó lée a fási ó laman ŋó le. Ní i ɲán ó káɲin, í fási ó bɛ́ é kɛ́ɛnɲan o lɔ. Wáa ní i ɲán ó mánɲin, í fási ó bɛ́ɛ kɛla diwi lɔ le. 35O lɔ, i yɛ́ɛ myaan ké kɛ́ɛnɲan míin í ka o kɛ́nan kɛ diwi le. 36Ní i fási ó bɛ́ kɛ kɛ́ kɛ́ɛnɲan ó lɔ, ní diwi súusuu tɛ́ yé, a yáa tó kɛ́ɛnɲan ó lɔ óyoo laman ŋó kɛ́ɛnɲan o bhɔ́la ɲán mín mán.»

Ɛnza ŋé Falizɛn ŋólu ní Sɛliya kaamɔɔn ólu kɔ́ɔfɔla

Matiyu 23.4,6-7,13,25-27,29-31,34-36; Maki 12.38-40

37Ɛnza ŋé wɛ́ɛ a yɛ́ kóman ó la mínngɛ, Falizɛn nɔ é a kíi kó aa táa lɔ́minkɛ ni ale yɛ lú ó mán. Aa táa, aa i síi lɔ́min ó mán. 38Falizɛn mín ŋé a kíi óo a lákɔɔsi mínngɛ kó Ɛnza mán a bhóo o kwó kɛ́ kéeɲan ní i yɛ laanan óle kɛ́ tó i síila sunman ŋó mán, oo a káwakoya. 39Mantii ó fɔ a yɛ kó: «Álee Falizɛn ŋólu kwɛ́nnin ŋé cé né. Áa yáafyɛ ólu ní tása ólu kɔ́ɔmanlaa ó lé kwóla kɛ i gbɛ́, kɛ́ɛ ké béngani óni yóoɲan óle fánin ŋé álee yóso ó lɔ. 40Nánloman ŋólu! Mɔɔn mín ŋé a kɔ́ɔmanlaa ó lálaa, óle mán kɔ́ɔnnɔnlaa ó lálaa ŋán? 41Aa yóoɲan ó bhɔ́ a yóso ó lɔ, kɛ faannda ŋólu sɔ, a yɛ kó o bɛ́ yáa sɛ́nnɛnya.

42Álee Falizɛn ŋólu, bɔɔn é álee tá le, kɛ mansɔɔ aa i lɔ́jala kɛ nannanye óni nánfe ŋó bɛ́ súu yáa bhɔ́la. Wáa Ala yɛ téeɲan óni a yɛ dhyáaɲɔɔnya mín nvɔ́, aa ólu tóla yé. A kákan kɛ o le kɛ́, kɛ́ dɔ́ ólu fala o ka.

43Bɔɔn yáa álee Falizɛn ŋólu sɔɔ, kɛ mansɔɔ sɛ́ɛbho ŋólu kɔɔnnɔn, siilaabhɛɛ ó láa dí álee lú yɛ. Mɔɔn tɔ ólu kɛ kɛ́ a fola bhɛ́ɛsili bhóo mán yaman ywáa ólu lɔ o léelu dhyáa é kɛ́la a lɔ. 44Bɔɔn yáa álee Falizɛn ŋólu sɔɔ, kɛ mansɔɔ a wɛ́ɛ kɛ́ óyoo kábulu ólu, mínnu tɛ́ yéla, mɔɔn ólu táamanla a ka ké i tɛ́ bhɔ́la a ɲánle.»

45O lɔ, sɛliya kaamɔɔn lɔ́ é fɔ Ɛnza ɲɛ́n kó: «Kaamɔɔn, ní i wɛ́ɛ kóman cé, ii wɛ́ɛ ló án née la.»

46Ɛnza ŋé i yawi kó: «Bɔɔn yáa álee sɛliya kaamɔɔn ólu sɔɔ, kɛ mansɔɔ áa lwée ngbíiyanin né siila mɔɔn ólu kunman, tó a tɛ́ i bhóo túula a la yáanin dɔ́ɔnin ne. 47Bɔɔn yáa álee sɔɔ! Kɛ mansɔɔ áa céla ólu yɛ́ kábulu ólu lɔ́la, kɛ́ɛ ké a fá léelu i fáa. 48Áa yáa céne kó a fá ólu tɛ́ɛ mín ngɛ́la, kó o a dí álee lú yɛ, kɛ mansɔɔ, íi céla ólu fáa, tó álee, áa ólu kábulu ólu lɔ́la. 49O lé kósɔn Ala yɛ́ hákiitiiya ó fɔ kó: a yáa céla lú ní céladhye nú cé i mán. I yáa i lɔ́lu fáa, kɛ i lɔ́lu tɔ́lɔ. 50O le kósɔn, kíti yáa bé bímɔɔn ólu ka céla ólu fáa o kósɔn, o yée míin bwɔ́ kabiini dínɲan lamyaan wáati ó mán, 51kɛ tá Abɛli yée bwɔ́ ŋó mán fɔ́ kɛ́nan sé Zakali yée ó mán, íi mín nváa Ala bhatobhomba ó ywáa sɛ́nnɛnyanin ŋó ní faanlɛɛbhɔlaa ó cɛ. Tínɲan in ne, ní fɔ́la a yɛ ngó Ala yáa bímɔɔn ólu manɲaankɛ o bɛ́ mán.»

52«Álee sɛliya kaamɔɔn ólu, bɔɔn yáa álee sɔɔ, kɛ mansɔɔ álee wɛ́ɛ Ala yɛ lɔ́ninya ó lákeli ó tá. Álee gbúlu tɛ́ ló, wáa lónɔɔ é mínnu la áa ólu lábanan kɛ ló.»

53Ɛnza ŋé bhɔ́la o ywáa ó lɔ sán mínnɔn, ké sɛliya kaamɔɔn ólu ní Falizɛn ŋólu mwɛnnɛn a mán koyoongɛ. I tɛ́ɛ gée mbɛ́ súu ɲíinan. O lɔ, i tɛ́ɛ ɲaankɛli shɛ́ɛman ngɛ́la kɛ a lákɔɔbhɔ ké aa kóman, 54i tɛ́ɛfɛ ké aa kóman lɔ fɔ́ ké ó waa kɛ́ a myaan kun ne.

Currently Selected:

Luka 11: MXX

Highlight

Copy