Yaya 7

Ɛnza bhádhye ŋólu man la a lá

1O kwɔ́, Ɛnza ŋé Galile fán ŋó lɔ́yaala. A tɛ́ tɛ́ fɛ́ kɛ táa Zude fán ŋó fɛ́, kɛ mansɔɔ o ywáa ó lɔ Yawudhyaa ólu tɛ́ɛ fɛ́ kɛ́ a Fáa. 2O bɛ́ kwɔ́, Yawudhyaa ólu yɛ́ gbákɔɔsii fɛ́ti o tɛ wɛ́ɛ sunɲan kɛ bhá, 3a lɔ́ɔnin ŋólu fɔ a yɛ́ kó: «Bhɔ́ yánun kɛ táa Zude, ké íi káwako mínnu kɛla ke i yɛ kaamɔɔndhye ŋólu a o yé. 4Ní ii fɛ́ ké mɔɔn ólu a i lɔ, i kɛ́nan i yɛ́ kó olu kɛ́ loo nɔn. Ii káwako olu kɛ́la ɲánminman, táa i yɛ́ɛ yáa dínɲan la.»

5O wáati ó lɔ a bhádhye ŋólu yɛ́ɛman lá a lá. 6Ɛnza ŋé í yawi kó: «Né yɛ́ wáati ó man sé bhá. Ale kwɛ́nnin, wáati o bɛ́ káɲin álee lu mán. 7Ale kwɛ́nnin ndɛ́ sé kɛ gbéya dínɲan mɔɔn ólu yɛ́. Waa né kwɛ́nnin ŋan gbó í yɛ́, kɛ mansɔɔ íi kóyoo mín ngɛla ní o le fɔ́la i yɛ. 8Ále a táa o fɛ́ti ó man, né kwɛ́nnin mánfaa táa, kɛ mansɔɔ míin nan kɛ né yɛ́ wáati o le o man sé bhá.» 9O kóman ólu fɔnin ngwɔ, aa tó Galile mala o lɔ.

Ɛnza ŋé mɔɔn ólu kalanan Gbakɔɔsii fɛ́ti ó mán

10Waa a bhádhye ŋolu táanin ngwɔ́ fɛ́ti ó mán Jude, aa sháa ó tá, a man sɔ́n ké mɔɔn lɔ a a yé. Aa táa lóo ne lɔ.

11Yawudhyaa ólu tɛ́ɛ Ɛnza ywáa ɲíinnan fɛ́ti kɛ wáati ó lɔ́. I tɛ́ɛ fɔ́la kó: «Aa mín ne sa?» 12Mɔɔn ólu tɛ́ɛ ɲɔ́ɔn mánsɔsɔla gbútuukɛ a kósɔn. Lɔ́lu kó mɔɔnbhɛɛ lée a lé, waa lɔ́lu kó yaman o kunnɔncaanbhaa lée a le. 13Waa mɔɔn sí man sé kɛ́ ó fɔ i kánnanyɛɛnin né, kɛ mansɔɔ i tɛ́ɛ sháannan Yawudhyaa ólu ɲɛ́n.

14Kɛ í tó fɛ́ti ó cɛ́man, Ɛnza ŋe táa Ala bhatobhomba ó kɔ́ɔnnɔn kɛ́ lámyaan kɛ́ mɔɔn ólu kála. 15Yawudhyaa ólu káwakoya kóyoo ŋo man, íi tɛ́ɛ fɔ́la kó: «Áa kɛ́ díi kɛ́ kɛ́ lɔnikɛbhaa lé tá, a lo mán kaa ngɛ mɔɔn sí fɛ́ ó.» 16Ɛnza ŋé í yawi kó: «Ní mɔɔn ólu kalanan kó mínnu lá, ó mán bhɔ́ né fɛ́ yé, óo bhɔ́ njébhaa óle fɛ́ yé. 17Mɔɔn míin fɛ́ kɛ́ Ala sao ó kɛ́, o tíi ó yáa a lɔgbɛ óo né yɛ́ kaa ŋó bhɔ́la Ala lé fɛ́ yé, wáman ni aa bhɔ́ ne gbú lé lɔ. 18Mɔɔn míin ŋé á yɛ́ɛ kó fɔ́la, óo a gbú tándolaa lé ɲíinnan. Waa míin a cébhaa ó kó fɔ́la, ké bwóɲan a lá o ka, ó lée tinɲanfɔbhaa o lé, nánmaan fósi tɛ́ ó tíi o yɛ kóman ólu lɔ́. 19Musa lé man sɛ́liya ó dí a mán a? Waa a sí tɛ́ ó sɛliya ó manfála. Mínnɛɛn lé kósɔn áa fɛ́ kɛ́ né Fáa?» 20Mɔɔn ólu a yawi kó: «I lée Lámansatɔ lé lé. Yɛ́ɛtii é fɛ́ kɛ́ í Fáa?»

21Ɛnza ŋé í yawi kó: «Né wɛ́ɛ kawako kée né kɛ, o lé wɛ́ɛ a bɛ́ kɔ́ɔnnɔn bhá. 22Musa é kɛ́ɛn ó sɛliya ó fɔ a yɛ́ waa a man í lámyaan Musa mán, aa i lamyaan án bhyɛ́man ó léelu man. Sísan, aa a dhyé ŋólu bhɔ́la kɛ́ɛnlɔ lɔnwɛɛnlilo ŋo man. 23Kɛ mɔɔn bhɔ kɛ́ɛnlɔ lɔnwɛɛnlilo ŋo man, ni ó tɛ́ Musa yɛ́ sɛliya ó cáannan, mínnɛɛn le kósɔn áa mwɛ́nnɛnla né mán kó né wɛ́ɛ mɔɔn lákɛɛnya lɔnwɛɛnlilo ŋo man? 24A kɛ́nan mɔɔn o mánfɛɛ kɛ a yɛ kíti o tɛɛ, waa a yɛ kíti o téenin ŋán kɛ.»

Ɛnza née Kísibhaa ó lé a?

25 Yeluzalɛmuka lɔ́lu tɛ́ɛ fɔ́la kó: «Í tɛ́ cɛ míin né ɲíinnan ke íi a Fáa a? 26Áa a mánfɛɛ ale lée kómanla bɛ́ ɲanla ni í ló ndɛ́ fósi fɔ́la a yɛ́. Bháa án ɲɛn ɲɛ́nmɔɔn ólu wɛɛ a lɔ́ sísan kó tínɲan in ne ale lée Kílisi ó lé a? 27Án ngwɛnnin ŋan míin bhɔ́laa o lɔ. Kɛ mansɔɔ ni Kílisi ó kɛ́nan, mɔɔn mánfaa ó bhɔ́laa o lɔ́.»

28O sán ó lɔ Ɛnza ndɛ́ɛ mɔɔn ólu kalanan Ala bhatobhomba ó kɔ́ɔnnɔn, aa i yawi kó: «Tínɲan in ne, aa né lɔ, aa mɔ́laa o lɔ! Waa né man nan yɛ́ɛ mán. Njébhaa ó lée tínɲan o tii ó lé, a man ó lɔ. 29Waa né ŋa a lɔ kɛ mansɔɔ ní bhɔ́ ale lé fɛ́ yé, ale lée né cé.»

30O wáati ó lɔ́, í tɛ́ɛ fɛ́ kɛ́ a myáan, waa mɔɔn sí man sé kɛ í bhóola a ká, kɛ mansɔɔ a yɛ́ wáati ó tɛ́ mán sé bhá. 31O bɛ́ kwɔ́, yaman ó cɛ́man, shɛ́ɛman ŋé lá a lá, olu tɛ́ɛ fɔ́la kó: «Ni Kílisi ó kɛ́nan wáati min nɔn, o yáa káwako gbɛ́ɛlu kɛ́ kɛ tínmin cɛ míin ndá ó ka ŋan?»

Mɔɔn olu Ala bhatobhomba ó kunnansiibhaa olu bhyáala kɛ́ Ɛnza myaan

32Mɔɔn ólu tɛ́ɛ Ɛnza ɲɛn kó ó mankomankomanla yaman ó cɛ́man fɔ kɛ́ táa bhyáa Falizɛn ŋólu tóo o man. Ólu ni faanlɛɛɲansebhaa olu kúnndii ólu Ala bhatobhomba kúnnansiibhaa ólu bhyáa ko íi táa Ɛnza myaan. 33Ɛnza ŋe fɔ yaman ó yɛ́ kó: «Wáati dɔ́ɔnin ne wɛ́ɛ tó né káa mínngɛ ní a lé, ó kwɔ́, né yáa ngwɔ́sɛɛ njébhaa ó fɛ́ yé. 34Á yáa né ywáa ɲíin kɛ́ kwée, a mánfaa né yé. Kɛ mansɔɔ né kɛ́ɛ tɛ́ɛ ywáa min nɔn, a táa sé kɛ́ táa yénɔn.»

35Yawudhyaa ólu tɛ́ɛ fɔ́la ɲɔ́ɔn njɛ kó: «Míin ngáa sé kɛ́ táa ywáa mínnɛɛn le lɔ́ tó án ngáa a ywáa ɲíin kɛ́ dɛ́sɛ? Mɔɔn mínnu ɲɛ́nzɛnnin yé Gɛlɛki ólu cɛ́man, a kɛ́ɛ tɛ́ɛ o léelu fɛ́ kɛ́ síya gbɛ́ɛlu kála ŋan? 36A wɛ́ɛ fɔ kó: ‹Áa káa né ywáa ɲíin kɛ́ kwée, á mánfaa né yé,› óni ‹né kɛ́ɛ tɛ́ɛ ywáa min nɔn, áa mánfaa sé táala yénɔn›. O kɔ́ɔ oo mínnɛɛn lé?»

Ɛnza ŋe Ní Sɛnnɛnyanin ŋo laheli tála

37Súnmannalo fɛ́ti ó lónabha ŋó lá, míin ŋé lómba ó lé, Ɛnza ŋé i lɔ́ kɛ́ fɔ yaman ó yɛ́ kó: «Ni jíminnɔɔ é mɔɔn minnan, ó tíi o wáa nan né man kɛ́ jí min. 38Ni mɔɔn min ngɛ́ lá né lá, jí miin ɲáanmanɲan o díla o yáa wée kɛ bhɔ́ o tíi o yóso o lɔ óo bhá jí, óyoo a sɛ́wɛnin ɲé Ala yɛ Kitabu o lɔ́ ɲanminman.» 39Mɔɔn mínnu káa lá a lá, olu yáa Ní Sɛnnɛnyanin ŋó sɔ́ɔ, a tɛ́ɛ ó lé kó fɔ́la. Ní Sɛnnɛnyanin ŋó tɛ́man dí otun bhá kɛ mansɔɔ Ɛnza ndɛ́ man bwóɲan sɔ́ɔ bhá.

Yaman ó í lɔ́taanan Ɛnza ngosɔn

40Lɔ́lu Ɛnza ɲɛn kóman ólu myɛ́n mínngɛ, olu tɛ́ɛ fɔ́la yaman ó cɛ́man kó: «Tínɲan in ne, míin née Célaba ó lé.» 41Lɔ́lu kó: «Kílisi o lée ni.» Waa lɔ́lu kó: «Kílisi o kákan né kɛ́ bhɔ́ Galile le a? 42A man fɔ Ala yɛ Kitabu o lɔ́ kó Kílisi o káa bhɔ́ mansacɛ Laula bhɔ́nzɔ ŋo le lɔ́ a? Óni ko a káa bhɔ́ Bɛtelɛmu lé, min ŋe Laula wóo só o lé.» 43Yaman óo i lɔtaa Ɛnza ngosɔn o ɲan o le man. 44Mɔɔn lɔ́lu tɛ́ɛ fɛ́ kɛ́ a myáan, waa olu sí man sé kɛ́ í bhóola a ká.

Yawudhyaa kúnndii olu yɛ yósolagbɛya o

45Ala bhatobhomba o kúnnansiibhaa ólu í kwɔ́sɛɛ kɛ́ táa faanlɛɛɲansebhaa olu kúnndii ólu, óni Falizɛn ŋólu sáala. Íi í mánɲaankɛ kó: «Mínnɛɛn le kósɔn a mán nan ni a lé?» 46Íi í yawi kó: «Hɛɛ! Mɔɔn si man kóman bha óo cɛ míin ni!» 47Falizɛn ŋólu i mánɲaankɛ kó: «Aa a yɛ́ɛ lábhyaa tó áa a lánɛɛn ngɛɛ? 48Án ɲɛn ɲɛ́nmɔɔn ólu, wáman Falizɛn ŋólu cɛ́man, yɛ́ɛtii lá a lá? 49Yaman min ŋwɛ́ɛn la a lá, olu man Musa yɛ́ sɛliya ólu lɔ́! Olu dáannin née.»

50Nikodɛmu míin táa Ɛnza nvɛ́ ló nɔ la, tó áa Falizɛn ŋo lɔ́ lé, óo fɔ kó: 51«Kɛ kéeɲan ni án ɲɛn sɛliya ó lé, án ni sé kɛ́ kíti bé mɔɔn lɔ ka ni an man o tíi o lákan ŋó lɔ́myɛn bha ŋan? Ní a kɛ́ko ólu manlɔ bha ŋan?» 52Íi o yawi kó: «Ílee Galileka lé lé a? Ala yɛ Kitabu o mánfɛɛ cɛ́ɛne, i yáa yé kó Céla sí man bhɔ́ Galile.»

53[O kwɔ, bɛ́ɛ i wíi kée ngée kɛ táa a bhóo lúman.

Currently Selected:

Yaya 7: MXX

Highlight

Copy