Kɛ́wɛɛ 7
7
Etiyɛni yɛ kóman o
1Kɛ Etiyɛni lɔnin ndo kítitɛɛbhaa olu ɲankɔɔ, Faanlɛɛɲansebhaa olu kúnndiiba óo Etiyɛni manɲaankɛ kó: «Mɔɔn olu mín nvɔla i mán, óo tínɲan le lé á?»
2Etiyɛni é a yawi kó: «Mádhye ŋólu óni nvá olu, áa ngómankan ŋo lɔ́myɛn. Ala nɔ́lɔman ŋóo i yɛ́ɛ yáa án myɛ́nman Bulaaman la, Mezopotami, sánnin aa táa í síi Aalan. 3Áa fɔ́ a yɛ́ kó: ‹Bhɔ́ i yɛ́ yamaan ó lɔ óni i yɛ́ lúmanbhaa ólu cɛ́man, ngáa yamaan mín yáa í lá, táa í síi yé.›#7.3 O kóman ó sɛ́wɛnin ŋé Genɛzi 12.1. 4Oo kɛ́ mínngɛ Bulaaman é bhɔ́ Shalideka olu yɛ yamaan o lɔ, tó kɛ táa i síi Aalan. Kɛ a tó o ywáa o lɔ, a fá sayakɛnin ŋo kwɔ́, Ala é a lanan yamaan míin nɔn, á síinin ŋé mínnɔn binin. 5Wáa Ala tɛ́ mán ywáa sí dí a mán bhá o yamaan o kɔ́ɔnnɔn, yáanin sé gbáannaa kee, wáa áa láheli tá a yɛ kó a yáa yamaan míin ndíiya dí a mán, óni a bhɔ́nzɔ ŋólu mán ale kwɔ. O wáati o lo nɔ, dhyé ndɛ́ tɛ a bhóo. 6Ala é saanin kɛ cé kó: ‹I bhɔ́nzɔ ŋólu yáa sii kɛ yamaan gbɛ́ɛ lɔ, lónanɲan bhóo man, i yáa kɛ yɔ né, óni i yáa tɔ́lɔya lá i ka sánɲin kɛ́nmɛn náannin kɔ́ɔnnɔn. 7Wáa síya mín ngáa i kɛ yɔ ne, né Ala le káa olu tá kíti o tɛ́ɛ, ne Ala kó cé. O kwɔ́, i yáa bhɔ́ kɛ́nan ne bháto ywáa míin nɔ́n.›#7.7 O kóman ó sɛ́wɛnin ŋé Genɛzi 15.13-14; Ɛgizɔdi 3.12. 8O kwɔ́, Ala é láheli ta Nva Bulaaman yɛ; o sɛ́ɛya o lée kɛ́ kɛ́ɛnko o lé. O ɲán o le man, Bulaaman é Shaaka sɔ́ɔ, áa o kɛ kɛ́ɛn le a wóonin ŋó tée sɛ́nɲinyɔɔn ló ŋó la. Shaaka é a dhyénjɛ Yanguba kɛ céne. Yangubha é án myɛman tá ni fyáa olu kɛ céne.
9Án myɛman lúu i lɔɔcɛ Yusufu ɲánngboya, kɛ á féle Ezipuka lɔ́lu man, wáa Ala tɛ́ɛ a fɛ. 10Ala é a bwási o tɔ́lɔya olu lɔ. Aa nɛ́nmɛn kɛ a yɛ kɛ́ hákii dí a mán Finɔɔnnan ɲankɔɔ, Ezipu mansacɛ o. Óo a kɛ a látuunnan o le Ezipu yamaan o kúnnan, óni a yɛ bhó ŋó bɛ́. 11Wáa kɔ́ɔn é ló Ezipu óni Kannaan yamaan o bɛ́ lɔ. Tɔ́lɔya óo bwóɲan. Án nvá lu tɛ́ tɛ bhálo sɔ́ɔla bhée. 12Yangubha é myɛ́n mínngɛ kó súnman ŋé Ezipu, áa an nvá lu bhyáashaa síɲan jónan o kɛ. 13I táako fyáaɲɔn ó lɔ, Yusufu é a yɛ́ɛ yáa a bhádhye ŋólu la, óo kɛ sɔ́ɔbu lé, Ezipu mansacɛ óo Yusufu síya ó lɔ́. 14O kwɔ́, Yusufu é mɔɔn bhyáa kɛ́ táa a fá Yangubha ní a yɛ́ lúmanmɔɔn ólu bɛ́ tá kɛ́ nan ile. I bɛ́ɛ ládhyɛnin ŋó tɛ́ɛ mɔɔn bíwoonvyaa ni lóo le lé. 15Yangubha é táa Ezipu, ale ní án nvá olu sayakɛ yé. 16Í mwáannin ŋólu táa ni ile Shishɛmu, Bulaaman tɛ wɛ́ɛ kábulu mín nzá Amɔɔ dhyénjɛ lu man Shishɛmu, ii táa a sú ló yé.
17Ala é láheli mín ndá Bulaaman yɛ, sannin o wáati ó a sé, án ɲɛ́n síya óo búu Ezipu. 18Wáa mansacɛ gbɛ́ɛ é i síi Ezipu yamaan o kunnan, o tɛ́ mán Yusufu lɔ́.#7.18 O kóman ó sɛ́wɛnin ŋé Ɛgizɔdi 1.7-8. 19O mansacɛ ó án ɲɛ́n mɔɔn ólu lánɛɛn, tó kɛ́ án myɛ́man lú tɔ́lɔ, kɛ́ fáan lá án nva lu ká ké íi i bá dhyéɲɛɛnnin ngwáa ólu lɔ, ké olu a sayakɛ. 20Musa é wóo, o wáati o lé lɔ, a cɛ́ɛ ndɛ́ɛ Ala ɲanla. A fá ní a wóobhaa é a labhalo bhó ngɔɔ káa sáwa kɔ́ɔnnɔn. 21Ii i kwɔ́kɛ a lá mínngɛ, Finɔɔnnan dhyémuso é a tá kɛ a labhalo óyoo a gbú dhyé. 22Ii Musa kála Ezipuka ólu yɛ lɔ́ninya ó bɛ́ la. Bháaka tɛ́ɛ a yɛ kóman ólu lɔ óni a yɛ kɛ́wɛɛ ólu bɛ́ lɔ.
23Áa sánɲin bínaannin sɔ́ɔ mínngɛ, áa i mili kó a kɛ́ɛ tɛ́ɛ bhɔ́ a bhádhye Izalayɛlidhye ŋólu fɛ yé. 24Aa Ezipuka lɔ́ yé tɔ́lɔya lála a yɛ́ mɔɔn lɔ ká, Musa é a bhádhye ŋó kwɔkɔɔdhyɛ, kɛ́ a tá o ɲɔ́ɔnbhɔ, aa Ezipukacɛ ó gbási kɛ́ a fáa. 25A tɛ́ɛ i milila, kó a bhádhye ŋólu yáa bhɔ́ a ɲánle kó Ala wɛɛ i lo a le lé lɔ, kɛ a bwási, wáa ólu man bhɔ́ ó ɲánle. 26O lúusɔgbɛ o, áa táa sɔ́ɔ ké Izalayɛlidhye ŋó mɔɔn fyáa é kɛ́ɛla, a tɛ́ɛfɛ kɛ i cɛ́ ó lɔ́bhyɛ, a kó: ‹Á bɛ́ɛ bhádhyeman né le, mínnɛɛn le kósɔn áa kóyoo ngɛ́la ɲɔ́ɔnnan?› 27Wáa mín ndɛ́ɛ kóyoo ngɛ́la a táamanɲɔɔn kée ŋó la, óo jámanngɛ Musa man kó: ‹Yɛ́ɛtii íle kɛ́ kunndii lé, óni kɛ i kɛ́ án ɲɛ́n kítitɛɛbhaa lé? 28Íi fɛ́ kɛ́ ne fáa óo íi Ezipukacɛ ó fáa ɲán mín man kúun ŋó á?› 29O kóman ó kósɔn, Musa é bwée, kɛ́ táa i síi Mandyan yamaan ó lɔ, aa dhyénjɛ fyáa sɔ́ɔ yénɔn.
30Sánɲin bínaannin tínminnin ŋó kwɔ́, malɛɛka lɔ́ é i yɛ́ɛ yáa Musa la wúla o lɔ Sinayi tíi o tɔ́ɔfɛ, támaan ŋó lɔ yíi túnin nɔ cɛ́man. 31Musa é o yé mínngɛ, aa káwakoya o yéli fé ŋó la, a tɛ́ɛ i mangbaala kɛ́ a mánfɛɛ, aa Mantii ó Saaninkan ŋó myɛ́n kó: 32‹Né lée í bhyɛman lú yɛ́ Ala ó le, Bulaaman, óni Shaaka, óni Yangubha yɛ́ Ala ó.› Musa é sháan fɔ́ aa yáayaala, a man sɔ́n kɛ́ a ɲan o láwii kɛ a mánfɛɛ. 33Oo kɛ́ mínngɛ, Mantii ó fɔ́ a yɛ́ kó: ‹I yɛ́ sawaa ólu bhɔ́ i sénan, kɛ mansɔɔ i lɔ́nin ŋé ywáa mínnɔn, óo lúu Sɛ́nnɛnyanin ne lé. 34Ɔ́ɔn, né wɛ́ɛ ɲɛ́n mɔɔn ólu yɛ tɔ́lɔya o yé Ezipu, ŋwɛ́ɛn i mánngan ŋó myɛ́n. Ne wɛ́ɛ ɲíi kɛ́ nan i bwási. Ngáa í bhyáashaa Ezipu kwáalenin.›#7.34 O kóman ó sɛ́wɛnin ŋé Ɛgizɔdi 2.1--3.10.
35Izalayɛdhye ŋólu tɛ́ wɛɛ i bá Musa mínnɔn kɛ fɔ kó: ‹Yɛ́ɛtii i kɛ kúnndii le, óni kítitɛɛbhaa le?› Ala é o Musa kée ŋó le bhyáashaa ni Malɛɛka ó yɛ dhyɛmanli o le, míin i yɛ́ɛ a la tá o lɔ yíitunin ŋo lɔ. Ala é o Musa o kɛ i kunndii óni i bwásibhaa le. 36Ale Musa lée i lábhɔ Ezipu, ní káwananngo lu ní sɛ́ɛya lu kɛ́ le Ezipu yamaan o lɔ, kɔ́ɔyi ywɛ́ ŋó lɔ, óni wúla o lɔ, sánɲin bínaannin kɔ́ɔnnɔn. 37Ale Musa lée fɔ́ Izalayɛlidhye ŋólu yɛ́ kó: ‹Ala yáa céla lɔ lánan a bhádhye ŋólu cɛ́man, míin né sí le.›#7.37 O kóman ó sɛ́wɛnin ŋé Detelonɔmu 18.15. 38O ɲán o man, ní Izalayɛlidhye ŋólu tɛ́ɛ i ládhyɛ wúla o kɔ́ɔnnɔn, ale Musa le tɛ́ɛ kɛ́la án myɛ́man lú ni malɛɛka o cɛ kóman wáati o lɔ Sinayi tíi o kúnnɔn. Ala tɛ́ɛ ɲáanmanɲan o saaninkan ŋo fɔ́ a yɛ́, a tɛ́ɛ ó láse án man.
39Wáa án myɛ́man lú mán sɔ́n kɛ a saaninkan ŋó lɔ́myɛn, íi i bá a lɔ, i miliya é dhyáa Ezipu ka. 40Ii fɔ Alɔn yɛ kó: ‹Bhatofe nɔ́lu lálaa án ɲɛ́n, mínnu káa kɛ́ án ɲɛ́nnzhaafɛ, kɛ mansɔɔ Musa míin án nánbhɔ Ezipu yamaan o lɔ, án mán lɔ́ ŋóo kó mín ŋwɛ́ɛn kɛ́ a lá.› 41Oo kɛ́ mínngɛ, ii yó lɔ lálaa toladhye móo man, ii yó o sɔ, kɛ́ a bháto. Ii í nisɔdhyaa gbútuukɛ, kɛ́ i ɲáanli i bhóo nɔ́n ó kósɔn.#7.41 O kóman ó sɛ́wɛnin ŋé Ɛgizɔdi 32.1-23. 42Oo kɛ́ mínngɛ, Ala é i kwɔ́lo i la, áa i tó yé kó íi lóodhye ŋólu bháto, óyoo a sɛ́wɛnin ŋé céla ólu yɛ́ kitabu ó kɔ́ɔnnɔn ɲán mín man kó:
‹Izalayɛli, á tɛ́ɛ bhyáa ŋólu fáala né lé la óni kɛ́ faanlɛɛ bhɔ́ né lé la
sánɲin bínaannin kɔ́ɔnnɔn wúla ó lɔ a?
43Ɔ́n-ɔn, a yɛ yó mín ndɔ́ɔ kó Molɔki, áa o yɛ faani bhó ŋó tá.
Óni a yɛ lóodhye ŋo yáa o mín ndɔ́ɔ kó Lepan;
Áa o léelu lálaa tó kɛ i bháto.
O le kósɔn, ne yáa táa ni ále ywáaja nɔ́n kɛ tinmin Babilɔnin nga.›#7.43 O kóman ó sɛ́wɛnin ŋé Amɔsi 5.25-27.
44Kɛ án myɛ́man lú tó wúla o kɔ́ɔnnɔn, láheli o késu o fáaninbho ŋó tɛ́ɛ i bhóo. Ala tɛ́wɛɛ fɔ Musa yɛ kó aa o lálaa, óo aa a yáa a lá ɲán mín mán. 45O kwɔ an myɛ́man lú o fáaninbho ŋó dí i dhyé ŋólu mán. Zozue tɛ́ɛ ɲɛnmɔɔn le wáati mínnɔn, ii lo ni fáaninbho ŋo le yamaan o lɔ. Ala é siya gbɛ́ɛ olu gbɛ́ i yɛ yamaan o lɔ, to kɛ o yamaan o di án myɛ́man olu mán, fáaninbho ŋó to i bhóo lɔ, fɔ kɛ́ nan sé mansacɛ Laula tá tée o mán. 46Laula é nɛ́nmɛn o sɔ́ɔ Ala koowaan lá, aa Ala dɛ́li kó aa tó ké ale á bhó nɔ́ lɔ Yangubha yɛ́ Ala ó yɛ. 47Mansa Swɛmannan lée kɛ́ o bhó ŋó lɔ́bhaa o le. 48Wáa mɔɔn é bhó mín nɔ i bhóo la, Ala kɔɔtanin ŋó tɛ́ síla o la, óyoo céla ó fɔ́ ɲán mín man ko:
49‹Sángboo o lée ɲɛ́n mansagbaanin ŋó le.
Lúukolo o lée nzé ngbáannaa o le,
Ále káa bhó mínnɛɛn le lɔ ne yɛ, Mantii ó kó cé
Ywáa mínnɛɛn le káa kɛ́ ne lɔ́nwɛɛnlaa o le?
50Né gbú bhóo o le man fé ŋó bɛ́ lálaa ŋán?›#7.50 O kóman ó sɛ́wɛnin ŋé Ezayi 66.1-2.
51Kwáalenin, a lée mɔɔn mulutunin ŋólu! Mɔɔn yósolagbɛɛ ŋolu óyoo bhɔ kɛ́ɛnlɔ bhɛɛ lu, alalɔmɛɛ olu! Álee Ní Sɛnnɛnyanin ŋó sɔ́sɔla ló ŋóo ló, óyoo á fá lúu a kɛ́ ɲán mín man. 52Céla mínnu tinmin, á fá lu mán ólu tɔ́lɔ á? Mínnu tɛ́ɛ mɔɔn téenin ŋó nán kó ó fɔ́la, i tɛɛ olu fáala. Kwáalenin ale wɛ́ɛ mɔɔn téenin ŋó yánva tó kɛ́ a fáa. 53Ále lée lúu Ala yɛ sɛ́liya ó sɔ́ɔ malɛɛka ó léelu sɔ́ɔbu la, wáa á mán sɛ́liya ó bwóɲan.»
Etiyɛni fáa ó
54Kítitɛɛbhaa olu o kóman olu myɛ́n mínngɛ, ii i ɲinmanfɛɛya gbutuukɛ Etiyɛni mán, fɔ kɛ i ɲin nzíi i koo ka. 55Wáa Etiyɛni wásanin ŋó Ní sɛnnɛnyanin ŋó la, aa i ɲángbaan sángboo ó lɔ áa Ala yɛ nɔ́lɔya ó yé, óni kɛ́ Ɛnza nɔ́nin ŋé Ala bhóobhɛɛ kɔ́ɔ. 56«Áa mánfɛɛ, né ɲán é sángboo o lálakanin nán, Mɔɔn dhyénjɛ o lɔ́nin ŋé Ala bhóobhɛɛ kɔ́ɔ.»
57Ii ó kóman ó myɛ́n mínngɛ, ii a lámyaan kɛ́ gbáan fáan lá, tó kɛ́ i tóo olu látuun. O yáanin ngée ŋó lɔ, i bɛ́ɛ i cɛ́ kɛ i kɛ Etiyɛni ngá, 58ii a gbɛ́ kɛ a lábhɔ só o kwɔ́ka, tó kɛ bwó káwa la. Sɛ́ɛya olu tɛ́wɛɛ i yɛ faani ŋólu kɛ́ɛfa káwee nɔ́ man o tɔ́ɔ kó Sɔli. 59Í tɛ́ɛ a bwónan mínngɛ, Etiyɛni ŋé Mantii o dɛ́li kó: «Mantii Ɛnza, ne wɛ́ɛ ní o dí i man.»
60O kwɔ́, á béndɔ o aa i kúnmɛɛn nɔkɛɛ tó kɛ gbáa fáanla kó: «Mantii o, yúumu míin nábe i yɛ.»
Aa wɛ́ɛ o fɔla mínngɛ, aa sayakɛ.
Currently Selected:
Kɛ́wɛɛ 7: MXX
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
