Kɛ́wɛɛ 4

Piyɛli ní Yaya é kítitɛɛlaa o lɔ́

1Kɛ Piyɛli ni Yaya tó kóman o la yaman o fɛ, faanlɛɛɲansebhaa olu ní Ala bhatobhomba o kunnansiibhaa o kúnndii óni Sadusi olu nan. 2Ii yé mínngɛ kó Piyɛli ni Yaya é yaman o kalanan, tó kɛ Ɛnza ngúunngo o láse, óni kó su olu yáa kúun o mán dhyáa i yɛ fɛ́sɛ fɛ́sɛ. 3Ii í myaan, wáa lúu tɛ́ wɛɛ taa mínngɛ, ii i bhyáa kasola kɛ o lúusɔgbɛ o mankɔɔn. 4Wáa o bɛ́ kwɔ, mɔɔn mínnu tɛ́wɛɛ céladhye nvyáa olu yɛ kóman o lɔ́myɛn, ólu shɛ́ɛman ŋé lá Ɛnza nan. Lɔ́ é fála lánanbhaa ólu ka. I bɛ́ ládhyɛnin ŋó tɛ́ɛ cɛ wáa lóolu sí bhɔ́la.

5O lúusɔgbɛ ó, Yawudhyaa olu kunndii olu, óni cɛba olu óni Sɛliya kaamɔɔn olu ɲɔ́ɔn nándhyɛ Yeluzalɛmu. 6Mínnu tɛ́ɛ yé, faanlɛɛɲansebhaa olu kúnndiiba Anɛn, óni Kayife, óni Yaya, óni Alɛsandili óni faanlɛɛɲansebhaa olu kunndiiba o yɛ lúmanmɔɔn tɔ o bɛ́. 7Ii nan Piyɛli ní Yaya le, kɛ i lalɔ yaman o cɛ́man, tó kɛ́ i mánɲaankɛ kó: «Sébhaaya mínnɛɛn lé sɔ́ɔbu la, wáman yɛ́ɛtii tɔ́ɔ bháaka lɔ́ áa nanmaan o lakɛɛnya?»

8O lɔ, Piyɛli fánin ŋó Ní Sɛnnɛnyanin ŋó la, áa fɔ kó: «Án ɲɛn yaman o kunndii ólu, óni a cɛba ólu! 9Ní áa án manɲaankɛla bí, kóbhɛɛ mín wɛ́ɛ kɛ́ cɛ nanmaan tɔ o yɛ́, óni aa kɛ́ɛnya ɲán mín man, 10áa bhɔ́ a ɲan le cɛ́ɛne, álee bɛ́, óni Izalayɛlika olu bɛ́, Ɛnza Ngílisi Nazalɛtika tɔ́ɔ o kósɔn, áa Ɛnza mín gbáan yíi o mán tó aa sayakɛ, Ɛnza mín tó Ala é a lákuun kɛ a bhɔ́ su olu cɛ́man, ale lé sɔ́ɔbula cɛ míin ngɛ́ɛnyanin nɔ́nin ŋé a ɲankɔɔ. 11Sɛ́wɛ dhyé ŋó káan Ɛnza ne man, óni á lé lée luu bhónɔbhaa o lé, sɛ́wɛ dhyé ŋóo fɔla ywáa mín nɔn ko: ‹bhónɔbhaa olu i bhá kawa mínnɔn o le wɛɛ kɛ kawa bháaka man ŋó lé bhó ŋó zóo ŋó la.›#4.11 O kóman ó sɛ́wɛnin ŋé Zabulu 118.22. 12Kisili o táa sɔɔ mɔɔn gbɛ́ɛ tɔ́ɔla. Fɔ án ni tinmin a le ta tɔ́ɔ o le man kɛ mansɔɔ Ala man tɔ́ɔ gbɛ́ɛ di sangboo o kɔɔ Adamandhye ŋólu cɛ́man kɛ án ngísi.»

13Ii Piyɛli ní Yaya hákii o síinin ŋé i yɛ kóman o lɔ mínngɛ, ii káwakoya, kɛ mansɔɔ mɔɔn ólu lɔ ŋóo i kalanin ndɛ́, mɔɔn gbáanzan née ile, i tɛ́ɛ lɔ ŋóo Piyɛli ni Yaya tɛ́ɛ ní Ɛnza né. 14Wáa, cɛ míin kɛ́ɛnya ii o lɔnin ɲé i tɔ́ɔfɛ mínngɛ, i mán kan nzɔ́ɔ kɛ i yawi o la. 15Oo kɛ́ mínngɛ, íi fɔ i yɛ kó íi bhɔ́ kítitɛɛlaa o lɔ, kɛ táa o ɲanbhɔ ɲɔɔnnjɛ. 16Ii fɔ́ ɲɔɔnɲɛn kó: «Án ngáa mɔɔn míinnu yɛ kó o myaan díi? Kɛ mansɔɔ i wɛɛ tɔɔmansii bá mín ngɛ́, Yeluzalɛmuka olu bɛ́ kosɔɔ é o lɔ, án ndɛ́ sé o mánsɔsɔla. 17Wáa an ni fɔ i yɛ kɛ a mangbɛya kó Ɛnza ndɔ́ɔ míin wé, i kɛ́nan o fɔ mɔɔn si yɛ yaman o lɔ bhée, ké o ko kɛ́nan se yaman o ywáa bɛ́ lɔ.»

18O lɔ́ íi i kíi tó kɛ fɔ i yɛ kó, a kɛ́nan o kóman o lɔ́sɔɔ mɔɔn lɔ yɛ, a ló ngɛ́nan mɔɔn sí kála Ɛnza ndɔ́ɔ o la. 19Wáa, Piyɛli ní Yaya é i yawi kó: «A bhyɛnin ɲé Ala ɲankɔɔ kɛ álee kómankan ŋo le yace bháa, bháa ni Ala ta o? Álee gbúlu a o kíti o tɛɛ. 20Wáa án née, án ŋwɛ́ɛn mín ɲé óni an ŋwɛ́ɛn mín myɛ́n án ndɛ́ sé án númandhye la o mán.»

21Ii í sɛ́ɛmansɔɔ i yɛ kókwaa kɛ, tó kɛ i bhóo kɛ́ i la. I mán ɲán sɔ́ɔ a mán kɛ kólatɔ i la yaman o kósɔn, kɛ mansɔɔ, kó mín ndɛ́ wɛɛ kɛ yaman o tɛ́ɛ Ala tandola o kósɔn. 22Kɛ mansɔɔ, cɛ míin ɲɛn kɛ́ɛnya o kɛ́ káwako le, a sísaa o tɛ́ wɛ́ɛ tinmin sánɲin bínaannin ká.

Kaanmɔɔndhye ŋólu yɛ́ sɛɛ o

23Piyɛli ní Yaya bhyaanin ŋó kwɔ́, kóman mínnu tinmin ile ní faanlɛɛɲansebhaa ólu kúnndiiba olu ní cɛba olu cɛ́, Piyɛli ní Yaya é táa o bɛ́ lɔ́sɔɔ i táamanɲɔɔn ólu yɛ́. 24Ii o kóman o myɛ́n mínngɛ, i bɛ́ɛ bhyɛ́ kéeman, kɛ Ala dɛ́li kɛ fɔ kó: «Sébhaa mansa o, íle lée sángboo óni lúukolo óni kɔ́ɔyi o la, óni fé ŋóo fé ŋé a kɔ́ɔnnɔn. 25Íle lée kɛ í yɛ́ Ní Sɛnnɛnyanin ŋó kóman ló án myɛ́man Laula káa lɔ í yɛ bháalakɛdhye ŋó:

‹Mínnɛɛn kósɔn yamaan gbɛ́ɛ ólu bɛ́ɛ mwɛnnɛn lá?

Mínnɛɛn kósɔn yaman olu yánva yóo míinnu la gbɛ́ɛgbɛɛ nín?

26Mansacɛ mínnu lúukolo o ká olu wɛ́ɛ i wíi kɛ i lɔ,

óni kunndii olu wɛ́ɛ ɲɔ́ɔn nándhyɛ

Mantii óni a yɛ Kílisi o kánman.›#4.26 O kóman ó sɛ́wɛnin ŋé Zabulu 2.1-2

27Kɛ mansɔɔ, tínɲan in ne, Elɔdi ní Pɔnsi Pilati, ní yamaan gbɛ́ɛ ólu bɛ́, óni Izalayɛlidhye ŋólu wɛ́ɛ ɲɔ́ɔn nándhyɛ só míin ngɔ́ɔnnɔn, i yɛ́ bháalakɛdhye Ɛnza Nzɛ́nnɛnyanin ŋó kánman, í wɛɛ túu bwɔ́ mín nga, kɛ a lasii. 28Í tɛ́ wɛ́ɛ kó óo kó lákɛɛ, í yɛ sebhaaya o lɔ óni í sao lɔ, íi o léelu lafa. 29Wáa kwáalenin, Mantii o, í gbɛ́ɛman lɔ i yɛ sɛ́ɛmansɔɔ kan ŋólu lɔ, óni íi se dí i yɛ yɔ ŋólu man ké ii kɛ́ i yɛ kóman o lásela ni tɛ́ɛnga náfanin né. 30I bhóo lábhɔ ké kɛ́ɛnyalilu a kɛ, óni tɔɔmanse lu, óni káwananngo lu kɛ, i yɛ́ bháalakɛdhye Ɛnza Nzɛ́nnɛnyanin ŋó tɔ́ɔla.»

31Ii wɛɛ i sɛ́ɛla mínngɛ, i ládhyɛnin ndɛ́ɛ bhó mín nán óo yáayaa. I bɛ́ɛ fá Ní Sɛnnɛnyanin ŋó la: I tɛ́ɛ Ala Saaninkan ŋó lásela ní tɛ́ɛnga né.

Lánanbhaa ólu yɛ́ fé nɔ táa ŋó

32Mɔɔn óo mɔɔn tɛ́ wɛɛ kɛ lánanbhaa le, olu bhyɛ́nin ndɛ́ɛ a lɔ́ gbútuukɛ ní yóso kée né, óni ní kée né. Lɔ́ tɛ tɛ́ fɔla kó: Né kée ndá lée ni, wáa i tɛ́ɛ a bɛ́ kɛla kée né lé. 33Céladhye ŋólu tɛ́ɛ Mantii Ɛnza ngúunngo sɛ́ɛya o ládila ni fáan bá le, óni Ala yɛ nɛ́nmɛn bá o tɛ́ɛ i bɛ́ ka. 34I cɛ́man, lɔ́ tɛ́ tɛ dɛ́sɛbhaatɔ le, kɛ mansɔɔ sɛ́ɛn tɛ́ɛ mɔɔn óo mɔɔn bhóo, óni bhó ndɛ́ɛ mínnu bhóo olu tɛ́ɛ olu féle la, i tɛ́ɛ fé mínnu féle i tɛ́ɛnan ni o sɔ́ɔn o le, 35kɛ́ o kwáan céladhye ŋólu yɛ́, céladhye ŋólu tɛ́ɛ o lɔ́taa kɛ bhyɛ́ i bɛ́ tá mankoya mán.

36O lɔ, Yusufu, tó céladhye ŋólu a tɔ́ɔla kó Baanabasi, o kɔ́ɔ o tɔ́ɔ kó mɔɔn míin mɔɔn fáan ló nán. Levi le tɛ́ɛ ale, kɛ bhɔ́ Shipele. 37Áa a yɛ lúukolo o féle, o mín ndɛ́ɛ a tá le, kɛ́ nan o wɛ́ɛ o le, kɛ o dí céladhye ŋólu mán.

Currently Selected:

Kɛ́wɛɛ 4: MXX

Highlight

Copy