Kɛ́wɛɛ 28

Pɔli é Maliti

1Án ɲwaan é ló kɛ́ɛnya lɔ mínngɛ, án ni lɔ o le lɔ kó o mala o tɔ́ɔ kó Maliti. 2O mɔɔn olu án myáan cɛ́ɛne oo kɛ likiiman le, ii tá bá lákin an ɲɛn, kɛ mansɔɔ, sa ŋo tɛ́ɛ nánla, óni nɛ́nnɛn o tɛ wɛɛ kɛ, tó kɛ án ngíi kó án ndáa tá o fɛ. 3Pɔli tɛ wɛɛ yíibhoo yáa nɔ́lu cɛ́ kɛ́ kɛ tá o la, wáa tá o fúnndɛɛ o kósɔn, santutu lɔ é bhɔ́ yíibhoo o lɔ, kɛ i dhyɛ́ Pɔli bhóo o la. 4Mɔɔn olu san o dhyɛ́nin ɲé Pɔli bhóola mínngɛ, ii fɔ ɲɔ́ɔnɲɛn ko: «Síka tɛ lɔ, cɛ míin ŋé mɔɔn fáa bháa le le, kɛ mansɔɔ, a ɲwaan wɛ́ɛ bhɔ́ kɔɔji o lɔ, wáa án ni Ala mín mátola tó a tɔ́ɔ kó Yusitusi o mán sɔ́n ké aa ɲáanmanɲan.»

5Wáa Pɔli é a bhóo o láfinzafinza tá o kúnnɔn kɛ san o bé tá o lɔ, Pɔli ywáa si mán a diin. 6A tɛɛ kɛ́la Mɔɔn olu yíiman oo Pɔli fasi o káa i lafa, wáman a yáa i bé kɛ sayakɛ o ywáaninngee ŋo lɔ. Ii mankɔɔnnin kɛ mínngɛ kɛ myɛ́n, ii yé oo kóyoo nvósi man kɛ Pɔli la, i míliya o yɛ́ɛman, tó kɛ fɔ́ ko Pɔli é Ala lɔ le lé.

7Ywáa míin wé, o ɲɛ́nmɔɔn o yɛ ywáa o tɛ́ɛ o le tɔ́ɔfɛ, o tɔ́ɔ kó Pubilusi, án ni án yíi o fɛ́ yénɔn, oo án nɔnmyaan cɛ́ɛne, án ni tée sawa le kɛ o fɛ́ yé. 8Pubilusi fácɛ tɛmanngɛnnɛn, fásigban óni tɔ́ɔtɔɔnin ne tɛ́ɛ a lá, Pɔli é táa a fɛ́ yénɔn, kɛ i sɛ́ɛ a yɛ, kɛ i bhóo la a ka, kɛ a lákɛɛnya. 9O kwɔ, yangalotɔ súu óo súu tɛ́ɛ o ywáa o lɔ, olu nan Pɔli sáala, olu kɛ́ɛnya ikwɔ. 10Mɔɔn óluu án mbwóɲan gbútuukɛ, án ndáa wáati o sé mínngɛ, án manko káa sii fé óo fé nán án ɲɛn táaman o lɔ, ii o bɛ́ di án man.

Pɔli se ó Lɔmu só o la

11Káa sawa tínminnin ŋo kwɔ́ o ywáa o lɔ, án ni kúun mba lɔ sɔɔ yénɔn o tɛ́ɛ bhɔ́la Alɛsandili, o tɛ wɛɛ sanmanyi wáati o kɛ yénɔn, i yɛ Ala o tó i tɛ́ɛ a bhátola, tó a tɔ́ɔ kó Diyɔsikuli olu yáa o tɛ́ɛ kúun mba o ka, án ndáa ló ŋo la, án ni án ɲɛ́ɛ o kɔ́ɔnnɔn. 12Án ni sé Silakusi, án ni tee sawa kɛ yénɔn. 13Án ni bhɔ́ o só o la mínngɛ, án ni án ná kɔɔji o fɛ, kɛ táa sé Lezio. O lusɔgbɛ o la, fwɛ́ɛn lɔ e bhɔ́ kíinmoo o fɛ, tee fyáa kɔ́ɔnnɔn án ni se Puzɔli. 14O só o kɔ́ɔnnɔn, án ni án mádhye nɔ́lu sɔ́ɔ yénɔn, olu án ndɛ́li kó án ni lɔ́ɔwoocɛ kée ngɛ ni ile. Án ni se Lɔmu o ɲan o lé mán.

15Án mádhye mínnuu o só o la, olu án nan kó o myɛ́n mínngɛ, ii nán án nánbhyɛ fɔ́ Apiyasi Lɔ́ɔfyɛ o lɔ, óni Lónanɲii bhó Nzawa Ywáa o lɔ; Pɔli é i yé nánla mínngɛ, aa bálika bhɔ́ Ala yɛ, tó kɛ i fáan ló. 16Án ni sé Lɔmu mínngɛ, swáasikunndii o Pɔli kée myáa a tá bhó nan, kɛ swáasi lɔ bhyáa kɛ a kunnansii.

Pɔli yɛ sanmankanmɛɛ láse o Lɔmu

17Tee sawa o kwɔ, Yawudhyaa olu yɛ ɲɛ́nmɔɔn mínnuu Lɔmu kɔ́ɔnnɔn, Pɔli é olu kíi, ké ii nan ɲɔɔn ɲé. I bɛ́ɛ nán i ládhyɛ mínngɛ, aa fɔ i yɛ kó: «Mádhye ŋólu, ne mín man fósi kɛ, án ɲɛn yaman o la, no man fósi kɛ an myɛ́man olu yɛ láanan o la, ii né myaan Yeluzalɛmu kɛ né ló Lɔmuka olu bhóo lɔ. 18Olu yɛ ɲaankɛli o kwɔ, olu tɛ́ɛ fɛ kɛ i bhóo kɛ́ nán, kɛ mansɔɔ i man sɔ nzɔ́ɔ né la, ii sé né fáala ko mín ngosɔn. 19Wáa Yawudhyaa olu kunndii olu sɔ́nnin ndɛ́ tɛ, ne gbú lée fɔ ngó ɲɛ́n kíti o a táa tɛɛ mansacɛba Sezali kɛ́ɛnnan, wáa o tɛ a yáala oo ni a fɛ le kɛ fɔ ko ɲɛn yamaanlɔmɔɔn olu wɛɛ ko lɔ kɛ nan! 20O le kósɔn, ni á kíi ké án ni nán ɲɔɔn ɲé, ké ni kóman á yɛ, kɛ mansɔɔ, Izalayɛli yɛ yéesii o le kósɔn, yɔlɔkɔ míin ŋé né la.» 21Ii Pɔli yawi ko: «Sanmankan mán se án man kɛ bhɔ́ Zude í tá kó o lɔ, án mádhye ŋo lɔ mán nan bha kɛ́ nan í yɛ kó o fɔ an ɲɛn, wáman kɛ í tɔ́ɔyoo nvɔ́ án ɲɛn. 22Wáa án ni fɛ kɛ íle gbú kómankan ŋo le lɔ́myɛn, kɛ í tá kɔ́ɔnnɔn o lɔ́, kɛ mansɔɔ, án ni a lɔ́ ŋóo mɔɔn olu i wíila í yɛ́ sɛ́ɛ o kánman ywáa o bɛ́ lɔ.»

23Yawudhyaa olu kunndii oluu ló ngée nzíi ni Pɔli le, o ló ŋo la, i shɛ́ɛman née nán lɔ́ɔɲin nvɛ Pɔli sílaa o lɔ. Pɔli tɛ́ɛ kómanla fáanla, a tɛ́ɛ Ala yɛ́ Mansaya o sɛ́ɛya ládila, óni a tɛɛ i díinan Musa yɛ sɛliya óni Céla tɔ́ olu yɛ sɛ́wɛ olu ka. Ké aa i miliya o yɛ́ɛman kɛ́ nán Ɛnza mán. Ii tó o le la, kɛ ta sɔɔ o mán, kɛ táa sé fɔ́ ywáa o la. 24Lɔ́luu sɔ́n Pɔli yɛ kóman o mán, wáa lɔ́lu mán sɔ́n a man. 25O mɔɔn olu táa wáati o sé ké i bhyɛnin ndɛ́ kéeman, Pɔli é fɔ i yɛ kó: «Ní Sɛnnɛnyanin ŋo tinmin Céla Ezayi mán, kɛ kóman a fá lu yɛ cɛ́ɛne. Tínɲan in ne, a tɛ́ɛ kóman mín nvɔla o tɛ́ɛ tínɲan le lé:

26‹Táa mɔɔn míinnu saala, kɛ a fɔ i yɛ kó:

Ále yáa á lɔ́myɛn cɛ́ɛne,

Wáa á táa bhɔ́ a ɲánle fɛ́sɛ fɛ́sɛ.

Ále yáa mánfɛɛli kɛ́ cɛ́ɛne,

Wáa á táa fósi yé fɛ́sɛ fɛ́sɛ.

27Kɛ mansɔɔ, síya mínnu wé, olu wɛ́ɛ kɛ́ mɔɔn hákiinda nu le,

i wɛ́ɛ i tóo olu látuun,

i wɛ́ɛ i ɲan olu látuun.

Kó óo kó é kɛ, ké i kɛ́nan yéli kɛ í ɲán olu la,

ké i kɛ́nan myɛ́nninkɛ í tóo olu la,

ke i kɛ́nan kɛ́ hákiiman nu le, ké í yɛ́ɛman kɛ i kwɔ́sɛɛ né mán, ké ní i lakɛɛnya.›#28.27 O kóman ó sɛ́wɛnin ŋé Ezayi 6.9-10.»

28Pɔli é a fɔ i yɛ íkwɔ kó: «O lɔ, á kákan kɛ lɔ ŋóo Ala yɛ Kísili o wɛ́ɛ nán síya gbɛ́ɛ olu man; olu yáa a lɔ́myɛn.» 29[Pɔli é wɛɛ o kóman o fɔla mínngɛ, Yawudhyaa olu táa lúman, ke ii ɲɔɔn man sɔ́sɔla gbútuukɛ, o kó o lɔ.] 30Pɔli tɛ́ɛ bhó mín nan, a tɛ́ɛ o sálala le, aa sanɲin fyáa le kɛ o la, mɔɔn o mɔɔn tɛ́ɛ nánla a sáala a tɛ́ɛ olu bɛ́ labhyɛnan. 31A tɛ́ɛ Ala yɛ́ Mansaya o kóman o fɔla i yɛ, a yɛ kaa ŋolu lɔ, a tɛ́ɛ Ɛnza Ngílisi yɛ kó olu fɔla i yɛ, a tɛ́ɛ o kɛla, o síka lo ndɛ́ tɛ kɛ́la a lɔ, óni mɔɔn si lo man fɔ́ kó a kɛ́nan o kɛ.

Currently Selected:

Kɛ́wɛɛ 28: MXX

Highlight

Copy